Ke Fai Eiloa te Vaitaimi o te Fakamanatuga Tenei mo Fai se Taimi Fiafia!
1. Se a te auala e tasi e momea aka ei tou fiafia i te vaitaimi o te Fakamanatuga?
1 E manako koe ke momea aka tou fiafia i a Mati, Apelila, mo Me? A te auala e tasi ke fai penā ko te momea aka o au mea e fai i te galuega talai, kae kafai e mafai, ke paenia lagolago. Ka fakaopoopo atu pefea ne te mea tenei a te fiafia ki a koe?
2. Ka momea aka pefea te fiafia māfai e momea aka ‵tou mea e fai i te galuega talai?
2 Ke Momea Aka Tou Fiafia: Ne faite ne Ieova tatou mo te atamai ke maua te fiafia mo te lotomalie mai te tapuaki atu ki a ia i te taimi e fakataunu ei ‵tou manakoga faka-te-agaga telā ne fa‵nau mai mo tatou. (Mata. 5:3) Ne faite foki ne ia tatou i se auala telā e mafai ei o maua ne tatou a te fiafia mai te tukuatuga o mea ki nisi tino. (Galu. 20:35) E mafai eiloa o fai ne tatou a mea e lua konā i te galuega talai—ke tapuaki ki te Atua mo te fesoasoani atu ki tino. Se mea tonu me i te momea aka o ‵tou mea e fai i te galuega talai ko te lasi foki o te fiafia e maua mai i ei. E se gata i ei, a te uke o taimi e fakamāumau ki te talaiatuga, ko te momea aka foki ei te ‵tou atamai. I te taimi e maua ei ne tatou a te atamai, e ati aka ne tatou a te loto talitonu kae gasolo ifo foki i ei te ‵tou pole‵pole. Ka uke atu a avanoaga e maua ne tatou ke tuku atu se molimau kae ke kamata foki a akoga faka-te-Tusi Tapu. E fai eiloa ne mea katoa konei ke fai te galuega talai mo fai se mea fakafiafia.
3. Kaia e fai ei a Mati mo Apelila mo fai a toe masina ‵lei ke paenia lagolago i ei?
3 A Mati mo Apelila ko toe masina ‵lei eiloa ke paenia lagolago me e mafai o filifili aka ke paenia tatou mō itula e 30 io me e 50. E se gata i ei, e kamata mai i te Aso Ono, Mati 22, kae faka‵soko atu loa ke oko ki te Fakamanatuga i te Aso Gafua, Apelila po 14, ka ‵kau atu eiloa tatou ki se galuega fakapito kae gali i te ‵kamiga o nisi tino ke ‵kau mai ki te Fakamanatuga. Ka ‵fonu eiloa a fakapotopotoga i te fia‵fia i te taimi e ga‵lue fakatasi ei a tino e tokouke ke fakaoti te koga talai i te taimi ne tuku mai ke fai ei.—Sefa. 3:9.
4. Kafai e ma‵nako tatou o paenia lagolago, ne a mea e ‵tau o fai ne tatou?
4 Ke Fakatoka Nei: Kafai e seki fai koe penā, ke na fakaaoga se taimi ke toe onoono ki te fakasologa o au mea e fai kae onoono aka me isi ne fakama‵fuliga e mafai o fai ne koe ke momea aka te uke o au mea e fai i te galuega talai i se masina e tasi io me uke atu. Ke ‵talo malosi atu e uiga ki ei. (Iako. 1:5) Ke fai‵pati e uiga ki ei mo tou kāiga mo nisi tino i te fakapotopotoga. (Faata. 15:22) E mafai o iloa aka ne koe me faitalia a tulaga faiga‵ta i ma‵saki io me ko tau galuega ‵togi, e mafai eiloa o maua ne koe te fiafia telā e māfua mai i te paenia lagolago.
5. Ne a mea ka iku mai māfai e momea aka te uke o ‵tou mea e fai i te galuega talai i te vaitaimi tenei o te Fakamanatuga?
5 E manako a Ieova ke fia‵fia ana tavini. (Sala. 32:11) Mai te ga‵lue malosi ke momea aka te uke o ‵tou mea e fai i te galuega talai i te vaitaimi tenei o te Fakamanatuga, ka se momea aka fua i ei ‵tou fia‵fia kae ka fakafiafia atu foki ki te ‵tou Tamana faka-te-lagi.—Faata. 23:24; 27:11.