Te Auala ke Fakaaoga ei a te Ko oi e Fai ne Latou te Loto o Ieova i Aso Nei?
Ne Fakatoka a te Polosiua Fou tenei ke Takitaki Atu ei a Akoga Faka-te-Tusi Tapu ki te Fakapotopotoga
1. Ne a pogai aoga e tolu o te polosiua ko te Loto o Ieova?
1 Kai kamata aka eiloa o fakaaoga ne koe a te polosiua fou tenei Ko oi e Fai ne Latou te Loto o Ieova i Aso Nei? A te pogai ne fakatoka ei ko te mea ke (1) fakamasani a akoga faka-te-Tusi Tapu ki a tatou e pelā me ne Molimau a Ieova, (2) fesoasoani atu ki a latou ke tauloto e uiga ki ‵tou faifaiga, mo te (3) fakaasi atu ki a latou a mea e fai ne ‵tou fakapotopotoga. E aofia i te polosiua ko te Loto o Ieova a mataupu kolā e takitasi fua a itulau i ei kae e mafai o fakaoti i se lima ki te sefulu minute i te fakaotiga o akoga takitasi.
2. Ke fakamatala mai a te fakatokaga mo vaega o te polosiua tenei.
2 Te Auala ne Fakatoka ei: Ko oti ne vaevae aka a te polosiua ki vaega e tolu, telā e fakamatala mai i ei a vaega kese‵kese o te fakapotopotoga a Ieova. A ulutala takitasi o mataupu e 28 e fakatoka e pelā me se fesili, kae ko ulutala fo‵liki kolā e ‵soko atu ki ei kae e tusi i mataimanu ‵kese ko te tali ki te fesili tenā. A ata mai i fenua e sili atu i te 50 kolā e fakaaoga i te tusi kātoa ne fakatoka ke fakaasi atu ei te lasi o te ‵tou galuega i te lalolagi kātoa. E maua a nai akoakoga tāua mo manatu fesoasoani i pokisi “Ke Maua a Nisi Fakamatalaga,” kolā e mafai o fakamalosi aka ei ne koe tau tino akoga ke kausaki atu ki ei.
3. E mafai pefea o fakaaoga ne tatou a te polosiua ko te Loto o Ieova?
3 Te Auala e Fakaaoga ei: Ke kamata mai i te fakasino tonu atu ki te fesili telā ko te ulutala o te mataupu. I te taimi e fai‵tau fakatasi ei koulua ki te mataupu, ke faka‵mafa atu a ulutala fo‵liki i mataimanu ‵kese. Oti aka loa, ke mafau‵fau ki te fesili i te fakaotiga o te itulau. E mafai o faitau atu a te mataupu kātoa io me e faitau kae suke‵suke ki ei i vaega takitasi. Ke filifili faka‵lei aka a tusi fai‵tau ke faitau. Ke mo a ma puli a ata mo te pokisi ko te “Ke Uke Atu Au Mea e Iloa.” I te ukega o taimi, e ‵tau eiloa o fai a te sukesukega ki mataupu e ‵tusa loa mo te fakasologa. Kae e mafai eiloa o fai muamua se mataupu telā e fiafia atu ki ei te tino akoga. E pelā me se mea e tasi, kafai ko pili o fai se fono io me se fono o te atufenua, e mafai o tiaki ne koulua nisi mataupu kae na fai a te mataupu e 11.
4. Kaia e fiafia ei koe ki te mea faigaluega fou tenei?
4 Kafai e suke‵suke tatou ki te Tusi Tapu mo se tino, e fesoasoani atu tatou ki a ia ke fakamasani mo te ‵tou Tamana faka-te-lagi. Kae e manakogina foki tatou ke akoako a ia e uiga ki te fakapotopotoga a Ieova. (Faata. 6:20) Ko oko eiloa i te ‵tou fia‵fia ki te mea faigaluega fou tenei telā e fakafaigofie ne ia te ‵tou galuega!