Te Auala ke Fakaaoga ei a Te Tala ‵Lei Mai te Atua!

Ne Fakatoka se Polosiua Fou ke Fesoasoani Mai i te Faiga o Toe Asiga Kae Kamata a A‵koga Faka-te-Tusi Tapu

1. Se a te polosiua fou ne ‵tala mai i te Fono o te Atufenua ko te “Ke Puipui Tou Loto!” telā ne fakatoka ke fesoasoani mai i te faiga o toe asiga mo te kamataga o akoga faka-te-Tusi Tapu?

¹ I te Fono o te Atufenua ko te “Ke Puipui Tou Loto!,” ne fia‵fia eiloa tatou ke maua se polosiua fou ke fesoasoani mai i te faiga o toe asiga kae kamata a akoga faka-te-Tusi Tapu. E tai ‵pau a Te Tala ‵Lei Mai te Atua mo te polosiua ko te Manako, telā ko sui nei ki ei, ona me toe‵toe fua a mataupu i loto i ei. E mafai o fakaaoga mō akoga faka-te-Tusi Tapu toe‵toe mai tua o te fale. Kae e tiga eiloa e fakamatala mai i te polosiua ko te Manako a mea e ‵tau o fai ne se Kelisiano, e mafai eiloa o faigata ke talia a mea i loto i ei ne tino a‵koga ‵fou, ona i te polosiua tenei e fakasino tonu atu fua ki te tala ‵lei telā e maua i te Tusi Tapu.​— Galu. 15:35.

2. Kaia ne ‵lomi ei a te polosiua ko te Tala ‵Lei?

² Kaia ne ‵lomi ei te polosiua tenei? Ne fakamolemole mai a taina i te lalolagi kātoa e uiga ki se mea faigofie telā e mafai o fai ei a tino ke tosina atu ki te munatonu kae takitaki atu ei latou ki te tusi ko te Akoakoga a te Tusi Tapu, te mea faigaluega fakapito mō akoga faka-te-Tusi Tapu. A tino kolā e se tī fia‵fia ki se tusi e sili atu te lotou fia‵fia ke sukesuke ki te Tusi Tapu mai te fakaaogaga o se polosiua. E se gata i ei, e sili atu te faigofie ke ‵fuli se polosiua ki ‵gana e uke.

3. E ‵kese pefea a te polosiua tenei mai i nisi tusi mō sukesukega?

³ Te Auala ne Fakatoka ei: Ne fakatoka eiloa ‵tou tusi mō sukesukega e uke ko te mea ke mafai o faitau se tino ki ei kae malamalama i te munatonu, e aunoa mo se fesoasoani. E ‵kese te tusi tenei. Ne tusi ko te mea ke fai pelā me se fesoasoani ki te akoga faka-te-Tusi Tapu mo te faiakoga. Tela la, kafai e ofo atu ki se tino, a te ‵toe mea ‵lei ko te sau‵tala ki se palakalafa e tasi io me e lua. E toe‵toe fua a palakalafa, telā la e mafai eiloa o mafau‵fau ki ei mai tua o te fale o se tino io me ko tena koga galue. E tigā eiloa e ‵lei atu ke kamata i te mataupu 1, e mafai eiloa o kamata ne tatou se akoga i so se mataupu i te polosiua.

4. E fesoasoani mai pefea te polosiua ke akoako ‵tonu atu tatou mai te Tusi Tapu?

⁴ I te ukega o ‵tou tusi, a tali ki fesili kolā ne ‵lomi aka e mafai o maua i palakalafa. Kae i te tusi tenei, e maua ‵tonu mai eiloa a tali i te Tusi Tapu. A te tokoukega o tino e fia tauloto atu mai te Tusi Tapu i lō ‵tou tusi. Tela la, toeitiiti ko tusi fai‵tau katoa e se siki mai. E ‵tau eiloa o faitau ki ei mai i te Tusi Tapu. E fesoasoani atu te mea tenei ki te tino akoga ke iloa ne ia me i mea kolā e tauloto ne ia e aumai eiloa mai te Atua.​—Isa. 54:13.

5. Kaia e tāua ke fakatoka faka‵lei a te faiakoga ki sukesukega takitasi?

⁵ E se fakamatala mai i te Tusi Tapu a tusi fai‵tau katoa. Kaia? Ne fakatoka ke fakamalosi atu ki te tino akoga ke fai atu a fesili kae tuku atu foki i ei se avanoaga ki te faiakoga ke fakagalue aka tena atamai i te akoako atu. Tela la, se mea tāua ke fakatoka faka‵lei mō sukesukega takitasi. Ne mū pati fesoasoani: Ke sa to sa to fakaukeuke au pati. E fia‵fia eiloa tatou ke fakamatala atu te Tusi Tapu. Kae e uke atu a mea e fakataunu ne tatou mai i te ‵kami atu o te tino akoga ke fakaasi mai tena mainaga ki te uiga o te tusi faitau. E auala i te faiga o fesili i se auala atamai, e mafai ne tatou o fesoasoani atu ki a ia ke mafaufau faka‵lei ki uiga o tusi fai‵tau takitasi.​—Galu. 17:2.

6. E mafai pefea o fakaaoga ne tatou a te polosiua: (a) ki tino kolā e se tali‵tonu ki te Atua mo te Tusi Tapu? (e) mai te olo atu mai fale ki fale? (i) mai te olo ‵tonu atu ke kamata akoga faka-te-Tusi Tapu (o) i te faiga o toe asiga?

⁶ E pelā mo nisi tusi mō akoga faka-te-Tusi Tapu, e mafai o ofo atu a te polosiua tenei i so se taimi, faitalia me se a te mea e ofo atu mō te masina. Ka fia‵fia eiloa a tino e tokouke ke fakaaoga te polosiua mo te fesili ‵tonu atu me e ma‵nako latou o suke‵suke ki te Tusi Tapu ke kamata ei a akoga toe‵toe mai tua o te fale. E se gata i ei, e pelā mo te mea ne taku atu i te fono o te atufenua, a te fakaaogaga i te taimi e toe foki atu ki tino kolā ne fakaasi atu te fia‵fia, “e mafai eiloa o fai ei a te galuega ko te faiga o toe asiga mo fai se mea fakafiafia ‵ki!”​—Ke onoono ki pokisi i te itulau e 7-9.

7. E mafai pefea o fai ne koe se akoga faka-te-Tusi Tapu mai te fakaaogaga o te polosiua?

⁷ Te Auala ke Fai ei te Akoga Faka-te-Tusi Tapu: E mafai o kamata ne tatou te sau‵talaga mai i te faitauatuga o te fesili i mataimanu ‵kese. E ‵soko atu ki ei, ke faitau te palakalafa mo tusi fai‵tau i mataimanu ‵kese. Ke fakaaoga mo te atamai a fesili ko te mea ke fesoasoani atu ki te tino i te fale ke malamalama i te uiga o tusi fai‵tau. Kae koi tuai o olo atu ki te suā vaega, ke fai atu ki te tino i te fale ke tali mai aka ne ia a te fesili i mataimanu ‵kese, ke fakamautinoa aka me ko malamalama ‵lei a ia. I nai asiga muamua, se mea ‵lei ke mafaufau ki se fesili e tasi i mataimanu ‵kese. E se leva foki kae ko mafai o tai fakaleva atu te ‵tou sau‵talaga ke aofia i ei se mataupu kātoa.

8. Ne a pati e mafai o fai ne tatou mafai ko taku atu a tusi fai‵tau, kae kaia?

⁸ A tusi fai‵tau kolā e tusi i olotou tafa a te pati “faitau” ko tusi fai‵tau eiloa kolā e tali ‵tonu mai i ei a te fesili i mataimanu ‵kese. Kafai e taku atu se tusi faitau, ke ‵kalo keatea mai i te fai atu penei, “Ne tusi mai te apositolo ko Paulo” io me, “Mafaufau la ki mea ne ‵valo mai ne Ielemia.” E mafai o mafaufau te tino i te fale me e faitau atu fua ne tatou a pati a tino. E sili atu i te ‵lei ke fai atu, “E fai mai te Muna a te Atua” io me, “Mafaufau ki mea ne ‵valo mai i te Tusi Tapu.”

9. E mata, e ‵tau o faitau a tusi fai‵tau katoa i te taimi e fai te akoga?

⁹ E mata, e ‵tau o faitau ne tatou a tusi fai‵tau katoa io me ko tusi fai‵tau fua kolā e tusi a te pati “faitau” i olotou tafa? E faka‵na eiloa ki fakanofonofoga. E isi eiloa se pogai e tuku atu i ei i konā a tusi fai‵tau. E maua eiloa i ei a fakamatalaga kolā e tāua ke sau‵tala ki ei. Kae i te ukega o taimi, a te sē lava o te taimi, te fiafia, io me ko te apo i te faitau o se tino akoga e fakamalosi atu ei ke onoono fua ki tusi fai‵tau kolā e maua atu i ei a te pati “faitau” i olotou tafa.

10. Se a te taimi ‵lei e mafai o sui a te faiga o te akoga ki te tusi ko te Akoakoga a te Tusi Tapu?

¹⁰ Te Taimi ‵Lei ke Sui ei ki te Tusi ko te Akoakoga a te Tusi Tapu: Mai tua o nai sau‵talaga mo te faiga faeloa o te akoga, e mafai ne tatou o sui ki te tusi ko te Akoakoga a te Tusi Tapu io me ke tumau loa i te faiga o te polosiua ko te Tala ‵Lei ke oko ki te taimi e oti ei. E mafai o fakaaoga ne tino talai a faka‵tauga ‵lei ke fakaiku aka a te taimi ‵lei ke sui ei. I te taimi eiloa e sui ei te tusi, e mata, e ‵tau o kamata tatou mai i te kamataga o te tusi ko te Akoakoga a te Tusi Tapu? E seai ne tulafono ki te mea tenei. E kese‵kese a tino katoa. Kae ka maua ne tino a‵koga e tokouke a mea aoga māfai e toe sukesuke ki nisi fakamatalaga likiliki e uiga ki mataupu foki eiloa konā i te tusi ko te Akoakoga a te Tusi Tapu.

11. Kaia e ‵tau ei o fakaaoga faka‵lei ne tatou a te polosiua fou tenei?

¹¹ I se lalolagi telā e se lauiloa a te tala ‵lei, e maua ne tatou a te ‵toe tauliaga sili o te folafolaatuga o te ‵toe tala ‵lei eiloa​—me ko pule mai nei te Malo o te Atua kae ko pili o fakaoko mai te lalolagi fou telā ka maua i ei te amiotonu! (Mata. 24:14; 2 Pe 3:13) E tali‵tonu matou me i tino e tokouke kolā e lagona ne latou te fekau tenei ka fai atu foki ne latou a pati fakaosofia konei: “Ko oko eiloa i te gali, manafai e lavea atu se avefekau e vau mai i mauga o aumai se tala ‵lei, ko te tala o te filemu! E folafola mai ne ia te manumalo kae fai mai ki Siona penei, ‘A tou Atua ko te tupu!’” (Isa. 52:7) Ke na fakaaoga ne tatou a te polosiua fou tenei ke avatu a te tala ‵lei mai te Atua ki tino fia inu i ‵tou koga talai!

[Ata i te itulau e 7]

Koga Kolā e se Tali‵tonu a Tino ki te Atua mo te Tusi Tapu:

● I nisi koga, e lavea atu ne tino talai me e fai eiloa a te avā pati ko te “Atua” mo te “Tusi Tapu” e pelā me ne mea e fakagata ei a sau‵talaga. I vaegā koga penā, i te asiga muamua, se mea ‵lei ke sau‵tala ki mataupu kolā e manava‵se ki ei a tino, e pelā mo te manakoga mō se pulega ‵lei, te koga e mafai ei o maua ne kāiga a fesoasoani aoga, mo mea ka ‵tupu i aso mai mua. Kāti e mafai o fakaasi atu a te polosiua ko te Tala ‵Lei mai tua o nai sau‵talaga kae mafau‵fau ki te auala e iloa ei ne tatou me e ola te Atua mo te pogai e fakatalitonugina ei te Tusi Tapu.

[Ata i te itulau e 8]

Te Olo Atu Mai Fale ki Fale:

● “E āsi mai au ke fakaasi atu te faigofie ke iloa aka a fuafuaga a te Atua mō tino i aso mai mua. Kai mafaufau aka eiloa koe me ka fakasaoloto ne te Atua a tatou mai i logo‵maega? [Faka‵tali ki se tali.] E fakaasi mai i te polosiua a koga e mafai ei o maua ne koe a te tali ki te fesili tenā i te Tusi Tapu. [Tuku atu se polosiua ki a ia, kae faitau te palakalafa muamua i te mataupu 1, e pelā foki mo te Ielemia 29:11.] Mai te mea tenei, e a, e se foliga mai i ei me e manako te Atua ke maua ne tatou se olaga ‵lei i aso mai mua? [Faka‵tali ki se tali.] Kafai e manako koe ki ei, e mafai o tausi ne koe te ‵kopi tenei ma koe. I te suā taimi, e mafai o mafau‵fau tāua ki te lua o palakalafa ke ‵sala atu ei ki te tali o te fesili tenei, ‘Ka fakasaoloto pefea ne te Atua a tino mai i pogai o logo‵maega?’” Kafai e foliga mai me e lava te taimi o te tino i te fale i te asiga muamua, e mafai ne koe o faitau kae sau‵tala ki te lua o palakalafa mo tusi siki i ei e tolu mai te Tusi Tapu. Fakatoka o toe foki atu ke sau‵tala ki te lua o fesili i te mataupu tenā.

● “E fia‵fia a tino e tokouke o ‵talo, maise eiloa māfai ko uke olotou fakalavelave. E mata, e ‵talo atu koe i nisi taimi? [Faka‵tali ki se tali.] E mata, e mafaufau koe me e fakalogologo te Atua ki ‵talo katoa, io me e se fakafiafia atu a nisi ‵talo ki a ia? [Faka‵tali ki se tali.] E isi se polosiua telā e fakaasi mai i ei a te auala e mafai o maua a tali mai te Tusi Tapu ki fesili konā. [Ke tuku atu se ‵kopi, kae mafau‵fau fakatasi ki te palakalafa muamua o te mataupu e 12 mo tusi fai‵tau kolā e ‵tau o “faitau.”] E a, e sē se mea gali me e loto fiafia a te Atua ke fakalogologo mai ki a tatou? Kae ke maua katoatoa a mea aoga mai i ‵talo, e ‵tau o iloa ‵lei ne tatou a te Atua. [‵Suke ki te mataupu e 2 kae fakasino atu ki te ulutala foliki.] Kafai e manako koe ki ei, e mafai o tuku atu ne au a te polosiua tenei ki a koe, kae e mafai o fai‵tau fakatasi tāua i te suā taimi ki tali a te Tusi Tapu ki fesili ‵gali konei.”

● “Ko vau loa au i te taeao nei ona ko te manava‵se o tino e uiga ki te tulaga ka oko atu ki ei te lalolagi tenei. E mata, e mafaufau koe me ka momea aka te ‵lei o fakanofonofoga i te lalolagi? [Faka‵tali ki se tali.] E ōfo a tino e tokouke ke iloa atu me e maua i te Tusi Tapu a te tala ‵lei telā e mafai o tuku mai ki a tatou a te fakamoemoega. Konei la a nisi fesili e maua a tali ki ei i te Tusi Tapu.” Tuku atu se polosiua, kae ‵kami atu ke filifili aka ne ia se fesili mai te ‵kava ki tua telā e fiafia malosi a ia ki ei. Ko ‵suke ei ki te mataupu, kae fakaasi atu te faiga o se akoga. Ke fai a fakatokaga ke toe foki atu kae mafaufau ki te suā fesili i te mataupu tenā.

[Ata i te itulau e 9]

Tofotofo ki te Fesili ‵Tonu Atu:

● “Ne afe mai au penei ke fakaoko atu ki a koe se faiga fou o se akoga faka-te-Tusi Tapu. E 15 a mataupu i loto i ei kolā e fakaasi mai a te koga i tau Tusi Tapu e mafai o maua ne koe a tali ki fesili tāua. [Fakaasi atu te ‵kava i mua mo tua o te polosiua.] Kai taumafai aka eiloa koe ke malamalama i te Tusi Tapu? [Faka‵tali ki se tali.] Ke fakaasi atu ne au ki a koe a te faigofie o mataupu konei. [Onoono ki te palakalafa muamua o te fesili napa 3 i te mataupu e 3, kae faitau te Fakaasiga 21:4, 5. Kafai e ‵lei, ke mafaufau ki te suā palakalafa mo tusi siki “fai‵tau” i ei.] Kafai e manako koe ki ei, e mafai o tuku atu ne au ma koe a te polosiua tenei. E fakamalosi atu matou ke taumafai koe o sukesuke ki te Tusi Tapu kāti fakatasi i te vaiaso. Kafai e lei ki a koe, e mafai eiloa o faka‵soko atu. I te suā taimi, e mafai o mafau‵fau tatou ki te mataupu muamua. Onoono la me e tasi fua te itulau.”

[Ata i te itulau e 9]

Ke Fakaasi Atu i te Faiga o se Toe Asiga:

● Kafai e toe foki atu ki se tino fiafia ne fetaui koulua, e mafai ne tatou o fai atu penei: “Ko oko eiloa i te gali ke toe fetaui tāua. Ne aumai ne au a te polosiua tenei me e tuku mai i ei a tali i te Tusi Tapu ki fesili ‵gali e uke. [Tuku atu te polosiua ki a ia, kae ‵kami atu ke onoono ki te ‵kava mai tua.] Se a te mataupu e fiafia malosi koe ki ei i mataupu konei? [Faka‵tali ki se tali. Ko ‵suke ei ki te mataupu ne filifili ne ia.] Ke fakaasi atu ne au ki a koe a te auala e mafai ei o fakaaoga a te polosiua tenei ke maua a tali i te Tusi Tapu.” Ke fakaasi atu te faiga o te akoga mai i te sau‵tala ki se palakalafa e tasi io me e lua mo tusi “faitau” i mataimanu ‵kese. Ko fatoa kamata ne koe se akoga faka-te-Tusi Tapu! Ke tuku atu te polosiua ki te tino i te fale, kae fai a fakatokaga ke toe foki atu. Kafai e fakaoti ne koe a te mataupu, e mafai o sau‵tala ki te suā mataupu ne filifili ne te tino i te fale io me e kamata loa mai i te mataupu muamua i te polosiua.