Se Fesili Ke Mafaufau ‵Loto Ki Ei

◼ Ne a akoakoga fakavae i te Tusi Tapu e aoga ki te fakaaogaga o selefoni i te taimi e ‵kau atu ei ki fakatasiga Kelisiano mo te galuega talai?

“Te Taimi o te Nofo ‵Mu mo te Taimi o te Faipati.” (Fai. 3:7): E tuku atu ne selefoni a te avanoaga ki tino ke aveave fekau io me ke fai‵pati atu ki nisi tino i so se taimi. Kae e isi ne taimi e se ma‵nako a Kelisiano ke fakalavelave atu olotou selefoni ki a latou. E pelā mo taimi o ‵tou fakatasiga, ne taimi ke tapuaki atu ki a Ieova, ke maua a akoakoga faka-te-agaga, kae ke fakatau fakamalosi foki tatou i ei. (Teu. 31:12; Sala. 22:22; Loma 1:​11, 12) E mata, e mafai o tamate ‵tou selefoni i te taimi e oko atu ei tatou kae ke toe fakaola aka māfai ko olo atu tatou kea‵tea? Kafai e isi se telefoni tāua e fakamoemoe koe ki ei, ko manakogina ei ke se tamate te selefoni kae ke seti ne koe i se fakatokaga telā ka se fakalavelave atu ki nisi tino.

‘Fai a Mea Katoa mō te Tala ‵Lei.’ (1 Koli. 9:23): I nisi taimi, e aoga eiloa ke fakaaoga a selefoni i te taimi o te galuega talai. E pelā mo te taina telā e tausi atu ki te potukau, e mafai o fakaaoga ne ia ke ‵sala atu ki tino kolā e talai atu i nisi koga. E fakaaoga foki ne tino talai i nisi taimi a selefoni ke telefoni atu ki se tino fiafia io me se akoga faka-te-Tusi Tapu a koi tuai o āsi atu, maise eiloa māfai e nofo ‵mao atu a te tino tenā. Kafai e aveave ne tatou se selefoni, e ‵tau o fakaeteete malosi tatou ke mo a ma fakalavelave mai i te taimi e fai‵pati ei tatou mo se tino i te fale. (2 Koli. 6:3) I te taimi koi faka‵tali ei ki nisi tino talai, i lō te telefoni atu io me aveave fekau mo se taugasoa, se mea ‵lei ke ‵saga tonu atu tatou ki te galuega talai mo tino kolā e ga‵lue fakatasi tatou?

Ke Mafaufau ki Nisi Tino. (1 Koli. 10:24; Fili. 2:4): Ke mo a eiloa ma fakata‵mala tatou ki te oko vave atu ki fakatasiga mō te galuega talai mo te mafaufauga me e mafai faeloa ne tatou o telefoni io me avatu se fekau ki se tino ke iloa aka te koga e talai ei te potukau. Kafai e tuai atu tatou, e mafai eiloa o toe fulifuli a fakatokaga kolā ko oti ne fai. E tonu, a fakanofonofoga kolā e se mafai o pule faka‵lei tatou ki ei e mafai o fai ei ke talimuli tatou i nisi taimi. Kae kafai e fakamasani tatou ki te oko vave atu, e fakaasi atu a te fakatāua ne tatou o te fakatokaga a Ieova, te taina telā e tausi ne ia te potukau talai, mo ‵tou taina talai.