“E se Maua Foki ne Au te Tino i te Fale!”

Kai fai aka loa ne koe a pati konā ki se tino telā ne fakaasi atu tena fiafia i te galuega talai? E tiga eiloa e taumafai faeloa koe o āsi atu ki te tino i te fale, ne seki mafai o fakasiusiu aka ne koe te fuaga o te munatonu telā ko oti ne ‵toki ne koe. (1 Koli. 3:6) I nisi taimi, e tusi atu loa ne tino talai apo se tusi ki te tino telā ne seki maua ne latou i te fale, io me tuku atu se fakamatalaga i se tamā pepa i tua o te mataloa o te fale. Ne iloa aka ne nisi tino talai me e tai faigata loa ke maua atu te tino i te fale i te taimi e āsi atu ei, telā la, e mafai loa o fesili atu, “E isi sau telefoni?” E mafai eiloa o lau ne tatou se toe āsiga e tasi māfai ne āsi atu io me ne talai atu ki ei e auala i se tusi, se meli iti, se fakamatalaga e tuku atu i tua o te mataloa, io me telefoni atu. E tiga eiloa i te ukega o taimi e se nofo atu a ia i te fale, koi mafai loa o fesokotaki atu tatou ke fakatumau aka ei tena fiafia.