E Mata, e Toka Koe o Fai a ‵Fuliga?
1. Ne a fakamafuli‵fuliga e ‵tau o fai ne tatou ona ko te mafuli‵fuli o mea kolā e ‵tupu i te lalolagi?
1 I te 1 Kolinito 7:31, e fakatusa ne te Tusi Tapu a te lalolagi ki se koniseti telā e mafuli‵fuli faeloa a mea kolā e ‵tupu i ei mo tino. Ona ko mafuli‵fuliga i te lalolagi, e manakogina i ei ke fai ne tatou a fakamafuli‵fuliga ki te auala e talai atu ei tatou, fakasologa o mea e ‵tau o fai ne tatou, mo ‵tou fakamatalaga. E mata, e toka koe o fai a ‵fuliga?
2. Kaia e ‵tau ei o toka tatou o fai a ‵fuliga i te taimi e tau‵tali fakapilipili atu ei ki te fakapotopotoga?
2 Te Auala e Talai Atu ei Tatou: Ko oti faeloa ne fai a fakamafuli‵fuliga i te fakapotopotoga Kelisiano. I te taimi muamua ne uga atu ei ne Iesu ana soko, ne fai atu a ia ki a latou ke se ave ne meakai io me ne pausi tupe. (Mata. 10:9, 10) Kae fakamuli, ne toe fakamafuli ei ne ia a fakatonuga konā me ne mafaufau a ia ki faifaiga ma‵sei ka oko atu ki ana soko mo te faiga foki o te galuega talai i se auala tai lasi atu i nisi koga. (Luka 22:36) I te fia selau tausaga ko ‵teka atu, ko oti eiloa ne fakaaoga ne te fakapotopotoga a Ieova a auala kese‵kese ke talai atu ei—ko tamā pepa, fakasalalauga i letio, motoka mo mea faka‵lasi leo—e ‵tusa loa mo mea e manakogina i te taimi tenā. I aso nei, ona ko te faigata ke maua atu a tino i fale, ko oti ne fakamalosi aka a nisi auala ke fai ei te galuega talai mai fale ki fale mo te talai atu i mua o tino katoa i so se taimi. Ko oti foki ne fakamalosi mai ki a tatou ke olo atu mai fale ki fale i fakaafiafi māfai e olo atu a tino o ga‵lue i te ao. E pelā eiloa mo te kaliota afi telā e fulifuli faeloa te koga e tele atu ki ei, e a, e tautali fakapilipili atu eiloa koe ki ei?—Eseki. 1:20, 21.
3. E fesoasoani mai pefea a te toka o fai ‵fuliga i ‵tou fakamatalaga i te faiga ke momea aka ‵tou ma‵goi i te akoako atu i ‵tou koga talai?
3 Au Fakamatalaga: Ne a mea e manava‵se nei ki ei a tino i tou koga talai? Mea tau tupe? Kāiga? Taua? E aoga eiloa ke iloa ne koe a fakalavelave mo fakanofonofoga masani i aso nei ko te mea ke fakatoka ne koe se fakamatalaga telā e fetaui ‵lei. (1 Koli. 9:20-23) Kafai e fakaasi mai ne tino i te fale a mea e manava‵se latou ki ei, i lō te sona tali atu fua kae fai loa ‵tou fakamatalaga, e sili atu eiloa i te ‵lei ke toka tatou o fai a ‵fuliga ki ‵tou fakamatalaga e uiga ki mea e manava‵se latou ki ei.
4. Kaia e ‵tau ei o toka fakavave tatou o fai a ‵fuliga?
4 Ko pili nei o fakagata atu a toe “mea kolā e ‵tupu” i te lalolagi tenei, kae ka kamata mai i ei a te fakalavelave lasi. “Ko toetoe te taimi koi ‵toe.” (1 Koli. 7:29) Ko se faka‵tau eiloa i te tāua ke toka tatou o fai ‵fuliga e aunoa mo te fakatalave, ko te mea ke mafai ne tatou o fai a mea e uke i te taimi toetoe tenei koi ‵toe!