Ke Momea Aka Faeloa ‵Tou Atamai i te Galuega Talai​—Ke Fakaasi Atu te Amanaia Tonu

Te Pogai e Tāua ei: Ne kilo atu Iesu ki tino e pelā me e tāua, kae ne fakaasi atu foki ne ia ki a latou a te alofa mo te amanaia tonu. Pelā me se fakaakoakoga, i se taimi e tasi ne lavea ne Iesu se tagata ‵tuli mata mā, ne ave kea‵tea ne ia mai tino kae faka‵lei ne ia. (Male. 7:​31-35) Ne fakaasi atu ne Iesu te amanaia ki te tulaga o ana soko kae ne seki tuku atu foki ne ia ne fakamatalaga e uke ki a latou. (Ioa. 16:12) I tena tofi faka-te-lagi, e fakaasi atu foki loa ne Iesu te amanaia tonu. (2 Timo. 4:17) E pelā me ne soko o Keliso, e ma‵nako loa tatou o fakaakoako atu ki a ia. (1 Pe. 2:21; 1 Ioa. 3:​16, 18) E se gata i ei, ka magoi eiloa ‵tou galuega talai māfai e amanaia tonu tatou ki te tino i te fale kae mafaufau ki tena fakanofonofoga, ki mea e fiafia ki ei, penā foki mo mea e manavase a ia ki ei. Ka tosina mai eiloa a ia o fakalogologo māfai e iloa aka ne ia me e se olo atu fua tatou o talai io me tufatufa a tusi, kae ona ko tatou e amanaia ‵tonu ki a ia.