Se Fesili Ke Mafaufau Ki Ei

◼ E mata, e ‵tau o pulou ne se tino talai fafine tena ulu māfai e kau atu se tino talai tagata ki tena akoga faka-te-Tusi Tapu mai tua o te fale?

Kafai e fai ne se tino talai fafine se akoga faka-te-Tusi Tapu tumau kae kau atu foki ki ei se tino talai tagata o te Malo, e ‵tau eiloa mo tou fafine o pulou tena ulu. (1 Koli. 11:​3-10) E fai mai The Watchtower i a Iulai 15, 2002, te itulau e 27: “A te mea tenei se fakatokaga o akoakoga ne fai mai mua telā e fai eiloa ne te tino i a ia te akoga. Mai lalo i vaegā fakanofonofoga konei, e fai eiloa a te akoga mo fai se isi vaega o akoakoga a te fakapotopotoga. Kafai e fai ne se Molimau fafine papatiso se vaegā akoga penā kae kau atu ki ei se Molimau tagata papatiso, ko ‵tau eiloa o pulou te ulu o tou fafine.” E ‵tau eiloa o pulou te ulu faitalia me e fai te akoga i te fale, mai tua o te fale, io me se isi fakanofonofoga.

I te suā feitu, kafai e seki kamata faka‵lei a te akoga mai tua o te fale, e se ‵tau o pulou ne se tuagane tena ulu i mua o se tino talai tagata o te Malo, faitalia foki loa me i te pogai o te asiga ko te fakaasi atu o te auala ke fai ei se akoga faka-te-Tusi Tapu io me ke mafau‵fau ki se mataupu i te tusi e fai ei te akoga. Ona ko te akoga mai tua o te fale e gasolo malielie atu ki mua, mai tua o nai taimi ne fai ei a toe asiga kolā e gasolo ki mua, ko ‵tau ei o mafaufau a te tino talai ki fakanofonofoga kae fakaiku aka me se a te taimi ko ‵tau ei o pulou tena ulu.