Ke Momea Aka Faeloa ‵Tou Atamai i te Galuega Talai—Ke Kamata se Akoga Faka-te-Tusi Tapu i te Mataloa Mai te Fakaaogaga o te Polosiua ko te Tala ‵Lei Mai i te Atua!
Te Pogai e Tāua ei: Ke fai a soko, e ‵tau mo tatou o fai mo faiakoga o te Muna a te Atua. (Mata. 28:19, 20) E mafai eiloa ne tatou o akoako atu te munatonu i se auala magoi mai i te fakaaogaga o mea faigaluega kolā ne tuku mai ki a tatou. A te polosiua ko te Tala ‵Lei Mai i te Atua! ne fakatoka eiloa ke fesoasoani mai ki a tatou i te akoakoga o te munatonu ki nisi tino. E mafai o kamata ne tatou se akoga faka-te-Tusi Tapu i te mataloa i te asiga muamua.
Ke Tofotofo Aka ki te Mea Tenei i te Masina Kātoa:
Ke ‵talo atu mō te manakoga ke kamata se akoga faka-te-Tusi Tapu. Ke akai atu foki ki a Ieova mō tena fesoasoani i te kamataga o se akoga faka-te-Tusi Tapu kae ke fai foki mo fai se faiakoga magoi o te munatonu.—Fili. 2:13.
I te taimi e fai ei a tapuakiga a kāiga mo sukesukega totino, ke fakamasani o fakaakoako a pati fakatomua kolā ka fai atu. Ke faipati atu mo te loto talitonu kae ke kamata se akoga faka-te-Tusi Tapu i te mataloa i te taimi o te galuega talai.