Ke Momea Aka Faeloa ‵Tou Atamai i te Galuega Talai ​—Ke Kamata se Sau‵talaga ke Talai Atu i Taimi Seki Fuafuagina

Te Pogai e Tāua ei: I te taimi e talai atu ei mai fale ki fale, e lavea faeloa ne tatou me tokouke a tino e ‵galo mai i olotou fale. Kae e mafai o fai‵pati atu tatou ki a latou i taimi e olo fakatasi ei i luga i pasi mo nisi mea fakateletele, māfai ko fano koe o talavai, māfai ko malōlō a galuega mo akoga, mo nisi taimi aka. Ko te loto eiloa o Ieova ke maua ne tino katoa te avanoaga ke lagona ne latou te fekau o te Malo. (1 Timo. 2:3, 4) Ko te mea ke mafai o talai atu, e ‵tau o kamata faeloa ne koe se sau‵talaga.