“These Words . . . Must Be on Your Heart”

E fai eiloa a mātua e pelā me ne tausi mamoe. E ‵tau o tausi faka‵lei atu ki olotou tama‵liki kolā e mafai o faigofie o tapea‵pea kea‵tea kae tosina atu ki fakalavelave. (Faata. 27:23) E mafai pefea ne mātua o fakataunu faka‵lei te lotou tiute tenei? E ‵tau mo latou o sau‵tala fakatasi faeloa i aso katoa mo olotou tama‵liki ko te mea ke mafai o iloa ne latou a mea i mafaufau mo loto o olotou tama‵liki. (Faata. 20:5) E ‵tau foki mo mātua o puti aka olotou tama‵liki mai te fakaaoga o mea faigaluega kolā e se mafai o ‵ka i te afi ke fakamalosi aka ei olotou fakatuanaki. (1 Koli. 3:10-15) A te vitio tenei, “These Words . . . Must Be on Your Heart” e faka‵mafa mai i ei a te tāua ke fai faeloa a tapuakiga a kāiga. Ke onoono fakatasi ki ei te kāiga, ka oti ko sau‵tala fakatasi ei ki fesili konei mai lalo.

(1) Kaia ne fakata‵mala ei te kāiga o Roman ke ‵saga tonu atu ki mea faka-te-agaga? (2) Kaia ne seki taunu ei te taumafaiga muamua a te taina ko Roman ke fai te lotou tapuakiga a kāiga? (3) Se a te fakatakitakiga i te Tusi Tapu telā e mafai o iku atu ki te ‵toe auala manuia i te putiakaga o tama‵liki? (Teu. 6:6, 7) (4) Se a te mea e mafai o fesoasoani atu ke momea aka te ‵lei o fesokotakiga i te kāiga? (5) Ne a manakoga o tama‵liki e ma‵nako ke fai atu ne olotou mātua ki a latou? (6) Ne a fakamalosiga ‵lei ne fakaasi atu ne te taina mo te tuagane ko Barrow ki te kāiga o Roman? (Faata.27:17) (7) Se a te fakatokaga e ‵tau o fai muamua ne se ulu o te kāiga ko te mea ke aoga te lotou tapuakiga a te kāiga? (8) Se a te mea ne fai ne te taina ko Roman ke faka‵lei aka te tulaga o tena kāiga? (9) Kaia e tāua ke fai faeloa a tapuakiga a te kāiga? (Efe. 6:4) (10) Ne a manatu aoga e mafai o fakaaoga i tapuakiga a kāiga? (11) I te auala fea ne fakaasi atu ne te taina ko Roman a te uiga filemu kae sē gutugutulua i te taimi ne fesoasoani atu ei a ia ki a Marcus ke fakatāua ne ia te faiga o te mea tonu? (Iele. 17:9) (12) Ne mafai pefea o fesoasoani atu te taina mo te tuagane ko Roman ki te lā tamaliki fafine ko Rebecca e uiga ki te faiga o se fakaikuga tonu i tena fesokotakiga mo Justin? (Maleko 12:30; 2 Timo. 2:22) (13) Ne lavea atu pefea a te lasi o te fakatuanaki o te taina mo te tuagane ko Roman i te faiga o ‵fuliga ki te olaga o te lotou kāiga? (Mata. 6:33) (14) E faka‵mafa mai pefea i te vitio tenei a te manakoga mō ulu o kāiga ke tausi atu ki te feitu faka-te-agaga o olotou kāiga? (1 Timo. 5:8) (15) E pelā me se ulu o te kāiga, se a tau fakaikuga e ‵tau o fai?

KI ULU O KĀIGA: Ne fai a te koniseti tenei i te fono o te atufenua i te 2011. I te taimi tenā, e mata, ne lavea ne koe te tāua ke momea aka te ‵lei o tapuakiga a kāiga? Kae e a i te taimi nei? Kafai e manakogina ke fai ne fakamafuli‵fuliga, akai atu e auala i se ‵talo ko te mea ke maua faeloa ne tou kāiga a mea aoga ki te se-gata-mai.—Efe. 5:15-17.