Se Fesoasoani mō Kāiga

1. Ne aoga pefea ki kāiga Isalaelu a te tausiga o te Sapati i vaiaso katoa?

¹ A te tausiga o te Sapati se fakatokaga alofa mai i a Ieova telā ne aoga ki kāiga. Ne malō‵lo a te kau Isalaelu mai i olotou galuega ‵mafa kae maua ne latou a te taimi ke mafau‵fau ki te aga‵lei o Ieova mo te lotou fesokotakiga mo ia. Ne mafai o fakaaoga faka‵lei ne mātua a te avanoaga tenei ke fakaoko ‵tonu atu a te Tulafono ki loto o olotou tama‵liki. (Teu. 6:​6, 7) Ne tuku mai ne te Sapati a te taimi i vaiaso takitasi ke ‵saga tonu atu a tino o Ieova ki te lotou fesokotakiga mo ia.

2. Se a te mea e akoako mai ne te Sapati ki a tatou e uiga ki a Ieova?

² E tonu, e se toe manako a Ieova ke tausi ne kāiga a te Sapati. Kae e akoako mai ne te tulafono ki a tatou se mea e uiga ki te ‵tou Atua. Ne manako faeloa a ia ke maua se fesokotakiga ‵lei o ana tino mo ia. (Isa. 48:​17, 18) I aso nei, a te auala e tasi e fakaasi atu ei ne Ieova tena manakoga alofa tenei ko te Tapuakiga a Kāiga i te afiafi.

3. Se a te aoga o te Tapuakiga a Kāiga i afiafi?

³ Se a te Aoga o te Tapuakiga a Kāiga i Afiafi? I a Ianuali 2009, ne kamata o fai a te Sukesukega a te Fakapotopotoga ki Tusi i te aso foki e fai ei a Te Akoga mō Tino Talai mo Te Fakatasiga mō te Galuega Talai. A te pogai e tasi mō te fakamafuliga tenei ko te mea ke tuku atu ki kāiga se avanoaga ke fakamalosi aka olotou fesokotakiga mo Ieova e pelā me se kāiga mai i te fakatokaga o se afiafi mautinoa i vaiaso takitasi mō tapuakiga a kāiga. Ne fakamalosi atu ki kāiga takitasi ke fai te lotou sukesukega faka-te-kāiga ki te afiafi-po telā ne fakaaoga sāle mō te sukesukega ki tusi, māfai e ‵lei, kae ke fakaaoga a te taimi tenei mō sau‵talaga faka-te-Tusi Tapu kolā e se fai fakavave kae ke fakafetaui aka a te sukesukega tenei ki manakoga o te kāiga.

4. E mata, e ‵tau eiloa o fai a te sau‵talaga a te kāiga i se itula e tasi? Fakamatala mai.

⁴ Ko te mea ke ‵kau atu ki te Sukesukega a te Fakapotopotoga ki Tusi, e manakogina ne tatou a taimi ke fai faka‵lei ‵tou gatu, faima‵laga atu, mo nisi mea aka foki penā. E uke atu a taimi e fakaaoga ne tino e tokouke i a tatou i lō te itula fua e tasi telā e ‵kau atu ei ki te fakatasiga masani. Ona ko te fakamafuliga ki ‵tou fakatasiga, ko maua ei ne tatou a te afiafi tenei ke tapuaki atu ki a Ieova e pelā me se kāiga. Tela la, e se ‵tau fua o fai‵ tou Tapuakiga a Kāiga ki se itula e tasi. I lō te fai penā, e ‵tau o mafau‵fau tatou ki manakoga mo tapulā o ‵tou kāiga kae ke fai i te leva telā e manakogina.

5. E mata, e ‵tau o fakaaoga a te taimi kātoa ki te faiga o se sau‵talaga e pelā me se potukau? Fakamatala mai.

⁵ E Mata, e ‵Tau o Fakaaoga a te Taimi Kātoa ke Sau‵tala e Pelā me se Potukau? I te taimi e sau‵tala fakatasi ei a tauavaga mo kāiga mo olotou tama‵liki ki mataupu faka-te-Tusi Tapu, e fakatau fakamalosi ei latou te sua tino ki te sua tino. (Loma 1:​12) E fai ei ke ‵pili ‵ki a te fesokotakiga o te kāiga. Tela la, a te sau‵tala fakatasi ki te Tusi Tapu e ‵tau o fai mo fai se vaega tāua o te Tapuakiga a Kāiga i te afiafi. Kae e mafai foki o fakamāumāu ne kāiga takitasi a taimi i te faiga o sukesukega totino. Kae mai tua o te sau‵talaga e pelā me se potukau, kāti e ‵nofo mai eiloa te kāiga kae e fai eiloa ne tino taki tokotasi olotou sukesukega totino, kāti mai i te fakaotiga o ana fakatokaga mō te fakatasiga io me ko te faitauga o mekesini. E filifili aka ne nisi kāiga ke se fakaola eiloa a te televise i te afiafi-po kātoa tenā.

6. E ‵tau o fai pefea a te sau‵talaga?

⁶ E Mafai Pefea o Fai a te Sau‵talaga? E se ‵tau o fai faeloa te mea tenei e pelā me se faiga o fesili mo tali. Ko te mea ke gali kae fakafiafia a te Tapuakiga a Kāiga i afiafi, e isi se polokalame a kāiga e tokouke telā e tai ‵pau mo te ‵tou fakatasiga i te kogaloto o te vaiaso. E vaevae aka ne latou olotou sau‵talaga ki vaega kese‵kese kae fai ne latou i auala kese‵kese. E pelā mo te fai‵tau fakatasi ki te Tusi Tapu, fakatoka ki se vaega e tasi o fakatasiga, mo te fakaakoako ki olotou pati e fai i te galuega talai. E tuku mai a nisi manatu fesoasoani i te itulau e 6.

7. Ne a fakanofonofoga e ‵tau o taumafai ki ei a mātua?

⁷ Se a te Vaegā Fakanofonofoga e Taumafai Atu ki ei a Mātua? Ka sili atu te ‵lei o te taulotoga a tou kāiga i fakanofonofoga a‵lofa kae filemu. Kafai e ‵lei te aso, e mafai o fai a te sukesukega i nisi taimi i te tafāfale. Ke malō‵lo malie māfai e manakogina. E aofia ne nisi kāiga a te inu tī mai tua o te polokalame. E tiga eiloa ka ‵kalo keatea a mātua mai i te fakaaogaga o te Tapuakiga a Kāiga i afiafi ke kotekote io me ke polopoloki atu, e mafai o fakaaoga a nai taimi ke fakasino atu ki se manakoga io me se fakalavelave fakapito telā ko lavea ne lāua. Kae e sili atu i te ‵lei ke sau‵tala mo se tamaliki ki nisi mataupu tai faiga‵ta i a koutou aka eiloa i se isi taimi i te vaiaso ko te mea ke mo a ma fakamā ne koe a ia i mua o ana taina mo tuagane. E se ‵tau o fai a te Tapuakiga a Kāiga e pelā me se mea fakafi‵ta kae e ‵tau o fakaata atu i ei a te Atua fiafia telā e tapuaki atu tatou ki ei.​​—1 Timo. 1:​11.

8, 9. Ne a fakatokatokaga e manakogina ke fai ne ulu o kāiga?

⁸ E Mafai Pefea o Fakatoka a te Ulu o te Kāiga? Ka maua malosi eiloa ne te kāiga a mea aoga māfai e fakatoka faka‵lei a te ulu o te kāiga mō te Tapuakiga a Kāiga i te afiafi mai i te fakaiku aka o mea e ‵tau o sau‵tala ki ei mo te ‵toe auala ‵lei foki ke sau‵tala ki ei. (Faata. 21:5) Se mea ‵lei mo te avaga tagata ke sau‵tala fakatasi mo tena avaga e uiga ki te mea tenei. (Faata. 15:22) Ulu o kāiga, kaia e se fesili atu ei koutou ki otou tama‵liki i nisi taimi me ne a olotou manatu? Kafai e fai koe penā, ka maua ei ne koe a te mainaga tāua ki olotou manakoga mo mea e mafau‵fau latou ki ei.

⁹ I te ukega o vaiaso, ka se lasi a te taimi e fakaaoga ne ulu o kāiga ki te faiga o fakatokaga. Kāti ka fia‵fia a te kāiga ke fai faeloa se fakatokaga penā i vaiaso takitasi, kae ka se ‵tau o fakatoka ne te ulu o te kāiga se polokalame fou kātoa i taimi katoa. Kāti e ‵lei atu ki a ia ke fakatoka mai tua o akoga takitasi i te taimi koi masaua ei a manakoga faka-te-agaga o tena kāiga i tena mafaufau. E tusi ki lalo ne nisi ulu o kāiga se tamā fakasologa o mea e ‵tau o fai kae faka‵piki atu ne ia i se koga telā e mafai o laveagofie ne te kāiga, e pelā mo te aisa. E fakamalosi aka ei a te fiafia mo te olioli kae e tuku atu i ei ki te kāiga se taimi ke fakatoka faka‵lei māfai e manakogina ke fai penā.

10. E mafai pefea o fakaaoga ne tino kolā e ‵nofo taki tokotasi a te Tapuakiga a Kāiga i afiafi?

¹⁰ Kae e a Māfai ko Au Fua Tokotasi i Toku Kāiga? A tino kolā e ‵nofo taki tokotasi e mafai o fakaaoga ne latou a te Tapuakiga a Kāiga i afiafi mō sukesukega totino. A te polokalame o sukesukega ‵lei e ‵tau o aofia i ei a te faitauga ki te Tusi Tapu, te fakatokaga mō fakatasiga, mo te faitauga o Te Faleleoleo Maluga mo te Awake! E sui ne nisi tino talai a te mea tenei ki te faiga o sukesukega ‵loto. I nisi taimi, e mafai o ‵kami atu a nisi tino talai io me ko tino i te kāiga ke ‵kau atu ki a latou i te faiga o sau‵talaga faka-te-Tusi Tapu kolā e fakamalosi loto.

11, 12. Ne a nisi mea aoga e maua mai i te faiga faeloa o te Tapuakiga a Kāiga i afiafi?

¹¹ Ne a Mea Aoga e Maua Mai i te Fai Faeloa o Tapuakiga a Kāiga i Afiafi? A tino kolā e ‵kau atu mo olotou loto kātoa ki te tapuakiga tonu e sili atu te lotou ‵pili ki a Ieova. E se gata i ei, a kāiga kolā e tapuaki fakatasi atu ki a Ieova e fakamalosi aka ne latou te fesokotakiga i loto i te kāiga. Ne tusi mai penei se tauavaga e uiga ki fakamanuiaga ne maua ne lāua: “E pelā me se tauavaga paenia e aunoa mo tama‵liki, e olioli eiloa māua ki te po e fai ei te Tapuakiga a Kāiga. E lagona ne māua a te pili o te ma va kae penā foki loa ki te ma Tamana faka-te-lagi. Nei la, i te taimi e ala ei māua i te aso ko oti ne fakatoka ke suke‵suke fakatasi māua, e fakatau fai atu māua: ‘Masaua me se a te mea ka fai i te po? Ko te Tapuakiga a Kāiga i te po!’”

¹² A te fakatokaga ke fakaaoga se afiafi mō tapuakiga a kāiga e fesoasoani atu foki ki kāiga fakalave‵lave. Ne tusi mai se mātua nofo taka telā e puti aka ne ia a tama tagata e tokolua kae paenia tumau foki: “I aso ko ‵teka, ne seki fai sāle te motou sukesukega faka-te-kāiga. Ne seki fakatumau sāle te faiga me ne fi‵ta malosi au. Ne seki mafai eiloa o maua ne au se auala ke fai aka ei. Tela la, au e tusi atu ke fakafetai lasi atu eiloa ki a koutou mō te Tapuakiga a Kāiga i afiafi. Ko oti eiloa ne manuia matou i te fakatumauga o te sukesukega faka-te-kāiga kae ko maua foki i ei ne matou a mea aoga.”

13. Se a te mea e fua aka ki ei te uke o mea aoga e maua ne tou kāiga mai i te fakatokaga tenei?

¹³ E pelā mo te Sapati, a te Tapuakiga a Kāiga i afiafi se meaalofa mai i te ‵tou Tamana faka-te-lagi telā e mafai o fesoasoani atu ki kāiga. (Iako. 1:​17) A te auala ne fakaaoga ei ne kāiga Isalaelu a te Sapati e fua aka ki ei te uke o mea e aoga ki a latou i te feitu faka-te-agaga. E penā foki loa, a te auala e fakaaoga ei ne tatou a te afiafi telā ko oti ne tuku mai mō tapuakiga a kāiga e fua aka ki ei a te uke o mea aoga ka maua ne ‵tou kāiga. (2 Koli. 9:6; Kala. 6:​7, 8; Kolose 3:​23, 24) Mai i te fakaaogaga faka‵lei o te fakatokaga tenei, e mafai o fai atu tou kāiga e pelā mo pati a te faisalamo: “Kae ki a au, se mea tafasili i te gali te pili ki te Atua; e maua toku puipuiga i te Aliki Maluga.”​​—Sala. 73:28.

[Caption on page 6]

TAUSI

A Nisi Manatu mō Tapuakiga a Kāiga i Afiafi

Tusi Tapu:

• Ke fai‵tau fakatasi ki se vaega o te faitauga ki te Tusi Tapu i te vaiaso. E isi ne tala i te Tusi Tapu kolā e mafai o faitau mai ne se tino a pati a te tino fakamatala, kae ko nisi tino e mafai o fai‵tau ki pati a tino kese‵kese.

• Ke fai e pelā me se koniseti se vaega o te faitauga ki te Tusi Tapu.

• Ke ‵tofi aka a tino taki tokotasi i te kāiga ke faitau mai se mataupu i te Tusi Tapu kae ke tusi ki lalo se fesili e tasi io me lua kolā e maua a tali i te tusi e faitau ne ia. Ko suke‵suke fakatasi ei ki fesili a tino katoa.

• I vaiaso takitasi, ke fakatoka a pepa mo se tusi siki i te Tusi Tapu kae taumafai ke masaua kae fakamatala mai foki. Ke ‵teu faka‵lei a tamā pepa penā, kae ke toe mafau‵fau ki ei i vaiaso katoa ke onoono aka me e fia a tusi siki e masaua ne koe.

• Ke fakalogologo ki te faitauga o te Tusi Tapu i kaseti i te taimi e tautali ei koe ki tau Tusi Tapu.

Fakatasiga:

• Ke fakatoka fakatasi ki se vaega i te fakatasiga.

• Ke fakaakoako ki pese o te Malo kolā ka fakaaoga i te vaiaso tenā.

• Kafai e isi se lauga a se tino i Te Akoga mō Tino Talai io me se fakaasiga i te Fakatasiga mō te Galuega Talai, ke sau‵tala ki manatu ke fakaaoga i ei io me ke fakaakoako i mua o te kāiga.

Manakoga o te Kāiga:

• Ke mafau‵fau ki mataupu mai i tusi ko te Young People Ask io me ko te Learn From the Great Teacher.

• Ke fakaakoako ki te auala ke fakafesagai atu ki se tulaga faigata i te akoga.

• Ke fai se fakaakoakoga telā e sui tulaga ei a mātua mo tama‵liki. E sukesuke te tamaliki ki se mataupu kae fakasakosako atu mo mātua.

Galuega Talai:

• Ke fakaakoako ki te fakatokaga o fakamatalaga mō te Aso Ono.

• Ke sau‵tala ki fakamoemoega aoga e mafai o fai ne te kāiga ke momea aka te lotou tusaga i te galuega talai i te vaitaimi o te Fakamanatuga io me ko taimi malō‵lo.

• Ke fakaavanoa atu a nai minute ki tino taki tokotasi i te kāiga ke fai olotou sukesukega ki te auala ke tali aka ei a fesili kese‵kese kolā e mafai o ‵sae aka i te galuega talai, kae ka oti ko fakaakoako ki ei.

Nisi Manatu Fesoasoani:

• Ke fai‵tau fakatasi ki se mataupu mai i se mekesini fou.

• Ke fai‵tau a tino katoa i te kāiga ki se mataupu telā e gali ki a ia mai i se mekesini fou, kae ke tuku mai ne ia se lipoti toetoe e uiga ki ei.

• Ke ‵kami atu i nisi taimi se tino talai io me se tauavaga ke ‵kau atu ki te otou Tapuakiga a Kāiga i te afiafi, kae kāti ke fakasau‵tala aka a latou.

• Ke onoono kae sau‵tala ki se vitio e tasi a tatou.

• Ke sau‵tala fakatasi ki te “Young People Ask” io me ko te mataupu ko te “For Family Review” mai i te Awake!

• Ke sau‵tala fakatasi ki te “Teach Your Children” io me ko te “For Young People” mai i The Watchtower.

• Ke faitau kae sau‵tala ki se vaega o te Yearbook fou io me se tusi fou mai i te fono i te atufenua fakamuli nei.

• Mai tua o te kauatuga ki se fono i te atufenua io me se tamā fono, ke toe mafaufau ki manatu tāua mai i ei.

• Ke onoono eiloa ki mea ne faite ne Ieova, kae sau‵tala ki mea e akoako mai i ei ki a tatou e uiga ki a Ieova.

• Ke ga‵lue fakatasi ki se mea, e pelā me se fakaakoakoga ‵lei, se mape, io me se ata.

[Blurb on page 5]

E se ‵tau o fai a te Tapuakiga a Kāiga i afiafi e pelā me se taimi fakafi‵ta kae fakafanoanoa kae e ‵tau o fakaata atu i ei a te Atua fiafia telā e tapuaki atu tatou ki ei