Faitauga Fakalogo‵logo—Te Auala e Fakaaoga ei
1. I tafa o ‵tou tusi, se a te suā fakatokaga aoga telā ko fakaaoga nei ne tatou?
1 E tokouke a tino e fia‵fia o fakaaoga te jw.org ke fai‵tau latou ki pati fakamafanafana loto io me fakafiafia mo muna ‵tonu eiloa. (Fai. 12:10) Kae e mata, kai fakaaoga aka eiloa ne koe a te faitauga fakalogologo? E fai ne te faitauga tenei ke fakalogologo koe ki fakamatalaga e uke mai i te ‵tou website. E aoga pefea ki a tatou a fai‵tauga fakalogo‵logo konei?
2. E mafai pefea o fakaaoga ne tatou a te faitauga fakalogo‵logo i ‵tou sukesukega totino io me ko tapuakiga a kāiga?
2 Mō ‵Tou Sukesukega Totino io me ko Tapuakiga a Kāiga: A te fakalogologo ki te faitauga o te Tusi Tapu, mekesini io me se tusi i taimi e fai‵malaga atu ei io me fai se galuega o te aso, e fesoasoani mai ke mafai ne tatou o fakaaoga faka‵lei ‵tou taimi. (Efe. 5:15, 16) E mafai o uke a mea aoga e fai ne tatou i te ‵tou tapuakiga a kāiga i te taimi telā e fakalogo‵logo ki te faitauga o se mataupu mai te tusi, kae tau‵tali fakalei atu foki i ‵tou ‵kopi totino. E aoga ‵ki a te fakaaogaga o te faitauga fakalogologo i taimi e fai ei ‵tou sukesukega totino, maise eiloa māfai e ma‵nako tatou ke momea aka te ‵lei o ‵tou faitauga io me ko te taulotoga ki se ‵gana fou.
3. Ko oi a tino i ‵tou koga talai e mafai o aoga ki ei a te faitauga fakalogo‵logo?
3 Mō te Galuega Talai: A tino i ‵tou koga talai kolā e mafau‵fau me seai ne olotou taimi o fai‵tau, kāti e fia‵fia eiloa o fakalogo‵logo ki faitauga fakalogo‵logo konei. Io me mafai o fakafesagai atu tatou ki tino kolā e fai‵pati ki se ‵gana fakaa‵tea io me ko latou kolā e fia‵fia ke lagona ne latou te fekau o te Malo i “‵gana kolā ne fa‵nau mai” mo latou. (Galu. 2:6-8) I nisi koga, a te fakalogologo se vaega tāua o tuu mo aganu. E pelā mo tuu a te kau Hmong, se mea masani ke fakaoko atu ne tino a tala fakasolopito o te lotou fenua ki tupulaga fakamuli, kae e ‵poto eiloa a tupulaga fakamuli i te tausiga o fakamatalaga kolā ne lagona ne latou. E uke a fenua i Afelika kolā e fia‵fia o fakalogo‵logo ki tala kolā e fakamatala atu.
4. Ne a fesili e mafai o ‵sili ifo ne tatou ki a tatou eiloa e uiga ki te fesoasoani atu ki tino i ‵tou koga talai?
4 I ‵tou koga talai, e mata e ‵lei ke fakatagi atu a te faitauga fakalogologo i te ‵gana eiloa a te tino i te fale? E mata, e isi se tino ne aoga ki a ia a te faitauga fakalogologo o se tusi telā ne lafo ne koe ki ei i te meli? E mata, e mafai o ‵kopi mai ne tatou se faitauga o se tusi ki loto i te CD kae tuku atu ki se tino fiafia i te fale, fakatasi mo te ‵kopi o te tusi tenā telā ko oti ne ‵lomi? A so se ‵kopi o se tusi, polosiua io me se tamā pepa i luga i komupiuta telā e tuku atu ne tatou ki se tino i te galuega talai, e mafai o lau pelā me se tusi telā ne ofo atu ne tatou. Ne fakatoka eiloa a te faitauga fakalogologo ke fakaaoga ne tatou i ‵tou sukesukega totino kae ‵toki foki ei a fuaga o te munatonu e uiga ki te Malo.—1 Koli. 3:6.