Fakaaoga Faka‵lei a Fakamatalaga Mai te Tusi ko te Akoakoga a te Tusi Tapu i se Auala Magoi
A te tino akoga telā e tauloto kae fakagalue ne ia a mea kolā e akoako mai i te Tusi Tapu, ka gasolo ki mua kae ka maua foki ne ia a fuataga faka-te-agaga. (Sala. 1:1-3) E mafai o fesoasoani atu tatou ki te tino akoga ke gasolo ki mua e auala i te fakagalue ne ia a nisi auala fesoasoani kolā e maua i te tusi ko te Akoakoga a te Tusi Tapu.
Fesili i te Kamataga o te Mataupu: I mataupu takitasi, e isi ne fesili i ei kolā e mafai o tali aka i te fakaotiga o te mataupu. E mafai o ‵sili ne koe a fesili kolā e se manakogina ke tali aka ke fakamalosi aka ei te fiafia o te tino akoga ki te sau‵talaga telā ka ‵soko mai. Io me fakamalosi atu koe ke tuku mai ne ia se tali toetoe ki fesili takitasi. Kafai e tai ‵kese tena tali, e se manakogina ke fakasao ne tatou a ia i te taimi tenā. Ka fesoasoani mai tena tali ke iloa ne koe a manatu tāua kolā e manakogina ke fakamatala atu ne koe i se auala manino.—Faata. 16:23; 18:13.
Mataupu Fakaopoopo: Kafai se tino akoga ko malamalama kae talia ne ia a fakamatalaga i te mataupu tenā, ko fakamalosi atu ei koe ki a ia ke onoono ki fakamatalaga fakaopoopo mai tua o te tusi i ana taimi avanoa. I te suā akoga, ko mafai ei ne koe o fakaaoga ne nāi minute ke fakamautinoa aka me e malamalama ‵lei a te tino akoga i mea ne sau‵tala koulua ki ei. Kae kafai e mafaufau koe me ka aoga te mea tenā ki a ia, se mea ‵tau ke sau‵tala ki manatu kolā i te mataupu fakaopoopo io me se vaega i ei e auala i te fai‵tau ki palakalafa kae ‵sili atu a fesili kolā ko oti ne fakatoka aka mai mua o fai te akoga.
Fesili i te Pokisi: A pokisi kolā i fakaotiga o mataupu takitasi ko tali o fesili kolā i te kamataga o te mataupu. E mafai o fakaaoga ne koe a fakamatalaga konei ko te mea ke fakamautinoa aka me e malamalama te tino akoga kae ko mafai foki ne ia o fakamatala mai a manatu tāua. Ke faitau ki luga a fesili mo tusi fai‵tau katoa kolā e tuku mai i fakamatalaga konā. Ko ‵kami mai ei te tino akoga ke fakamatala mai ne ia se tusi faitau telā e fakamaoni mai ei me e tonu eiloa te manatu tenā.—Galu. 17:2, 3.