KE OLA E PELĀ ME NE KELISIANO
Masaua o ‵Talo mō Kelisiano Kolā e Fakasauagina
Ne ‵valo mai i te Tusi Tapu me ka fakasaua ne Satani a tatou i ana taumafaiga ke fakatuai a te ‵tou galuega. (Ioa 15:20; Fa. 12:17) E fesoasoani atu pefea tatou ki taina Kelisiano kolā e logo‵mae i fakasauaga i nisi fenua? E mafai o ‵talo atu tatou mō latou. “A te ‵talo a te tino amiotonu e malosi ‵ki kae magoi.”—Ia 5:16.
Ne a mea e mafai ne tatou o ‵talo atu e uiga ki ei? E mafai o akai atu tatou ki a Ieova ke tuku atu ki ‵tou taina mo tuagane a te loto malosi kae fesoasoani atu ke se ma‵taku latou. (Isa 41:10-13) E mafai foki o ‵talo atu tatou mō tino pule ke talia mo te fia‵fia ne latou a te galuega talai, “ko te mea ke tumau tatou i te ola i se olaga filemu.”—1Ti 2:1, 2.
I te taimi ne fakasauagina ei a Paulo mo Petelu, ne taku atu eiloa ne Kelisiano i te senitenali muamua lā igoa i olotou ‵talo. (Ga 12:5; Lo 15:30, 31) Kafai foki loa e se iloa ne tatou a igoa o tino katoa kolā e fakasauagina i aso nei, e mata, e mafai o taku atu ne tatou olotou fakapotopotoga, fenua, io me ko te lotou fa‵kai?