Ke Masaua o ˋTalo mō Nisi Tino

1. E iloa pefea ne tatou me tāua ki a Ieova a ˋtou ˋtalo?

A ˋTALO se meaalofa gali ˋki. Mafaufau la ki ei: Ne tuku atu ne Ieova a nisi galuega ke fai ne agelu. (Sala. 91:11) Ne tuku atu foki ne ia ki tena Tama a nisi tiute tāua ke fai ne ia. (Mata. 28:18) Kae e mata, e isi se tino ne ˋtofi ne ia ke fakalogologo ki ˋtou ˋtalo? Ikai, tenā te galuega ne fakaiku aka ne Ieova ke tuku ke fai eiloa ne ia. A Ieova, te “Tino e Lagona ne ia a talo,” e fakalogologo mai eiloa ki a tatou.—Sala. 65:2.

2. Se a te fakaakoakoga ne fakaasi mai ne te apositolo ko Paulo e uiga ki te ˋtalo mō nisi tino?

² E tiga loa e mafai o faiˋpati atu tatou ki a Ieova e uiga ki mea e manavase tatou ki ei, kae e ˋtau foki o ˋtalo tatou mō nisi tino. Tenā eiloa te mea ne fai ne te apositolo ko Paulo. E pelā me se fakaakoakoga, ne tusi atu a ia ki te fakapotopotoga i Efeso, penei: “E taku faeloa ne au koutou i aku ˋtalo.” (Efe. 1:16) Ne ˋtalo foki a Paulo mō tino taki tokotasi pelā mo ana pati ne fai ki a Timoteo: “E fakafetai au ki te Atua, . . . e masaua faeloa ne au koe i aku talosaga i po mo ao.” (2 Timo. 1:3) E isi eiloa ne fakalavelave o Paulo kolā ne ˋtalo a ia e uiga ki ei. (2 Koli. 11:23; 12:​7, 8) Kae ne fakaaoga foki eiloa ne ia ana taimi ke ˋtalo mō nisi tino.

3. Kaia e mafai ei o puli i a tatou o ˋtalo mō nisi tino?

³ I nisi taimi e mafai o puli i a tatou o ˋtalo mō nisi tino. Kaia? Ne fai mai ne se tuagane Kelisiano e igoa ki a Sabrinaa se pogai e tasi. Ana muna: “E uke ˋki a mea e fakalaveˋlave tatou i ei i te olaga i taimi katoa. Ona ko te mafaufau ˋmafa ki ˋtou fakalavelave ko ˋtalo atu fua tatou ki mea e maˋnako tatou ki ei.” E mata, ko oti ne tupu te mea tenā ki a koe? Kafai ko oti, ka fesoasoani atu eiloa te mataupu tenei ki a koe. Ka (1) fakamatala mai ei a te pogai e tāua ei ke ˋtalo mō nisi tino mo te (2) tuku mai a manatu fesoasoani ki te auala ke fai ne koe te mea tenā.

KAIA E ˋTAU EI O ˋTALO MŌ NISI TINO?

4-5. I te auala fea e fai ei a ˋtou ˋtalo mō nisi tino e pelā me “malosi ˋki kae magoi”? (Iakopo 5:16)

⁴ A ˋtalo e fai mō nisi tino e “malosi ˋki kae magoi.” (Faitau te Iakopo 5:16.) E mata, e mafai eiloa ne ˋtou ˋtalo mō nisi tino o fesoasoani ke ˋfuli olotou tulaga? Ao, e mafai. A Iesu, telā e iloa ne ia me ko pili o fakafiti ne te apositolo ko Petelu a ia, ne fai atu penei: “Ko oti ne ˋtalo malosi au mō koe ko te mea ke se galo tou fakatuanaki.” (Luka 22:32) Ne iloa foki ne Paulo me e mafai eiloa o aoga malosi a ˋtalo ki nisi tino. I te taimi ne ˋpei a ia ki te falepuipui i Loma, ona ko pogai sē ˋtonu, ne tusi atu a ia ki a Filemoni: “Au e fakamoemoe me e auala i otou talosaga ka toe fakafoki atu au ki a koutou.” (File. 22; onoono ki te manatu mō sukesukega “for I am hoping that through your prayers.”) Kae tenā loa te mea ne tupu, e seki leva kae ˋtala a Paulo mai te falepuipui kae ne mafai o toe fai tena galuega talai.

⁵ E tonu, e se ko tena uiga me kafai e ˋtalo tatou ko faimālō ne tatou a Ieova ke fai a te mea e maˋnako tatou ki ei. E lavea ne ia a mea e manavase ki ei ana tavini kae i nisi taimi e filifili ne ia ke tali olotou manakoga. Ka fesoasoani mai a te iloaga tenā, ke tumau faeloa i te ˋtalo ki a Ieova ma isi se fakalavelave, ko tuku atu ei mo te loto taliˋtonu ne tatou a te mea tenā ki ana lima.—Sala. 37:5; onoono ki te 2 Kolinito 1:11 mo manatu mo sukesukega.

6. E pokotia pefea ˋtou lagonaga ki nisi tino ona ko ˋtalo e fai ne tatou mō latou? (1 Petelu 3:8)

⁶ A te ˋtalo mō nisi tino e fesoasoani mai ke ati aka a te “alofa atafai.” (Faitau te 1 Petelu 3:8.) A te tino alofa atafai e lavea ne ia a logoˋmaega o te suā tino kae e manako o fai se mea ke fesoasoani atu ki a ia. (Male. 1:​40, 41) E fai mai se toeaina e igoa ki a Michael penei: “Kafai e ˋtalo au mō manakoga o nisi tino i fakalavelave e feˋpaki mo latou, ka fai ei ke alofa malosi au ki a latou. E fai ei ke gasolo o pili toku va ki a latou faitalia me e se iloa ne latou a te mea tenā.” E fai mai ne te toeaina e igoa ki a Richard a te suā auala e aoga ei a te ˋtalo mō nisi tino. Ana muna: “Kafai e ˋtalo tatou e uiga mō se tino, ka fakamalosi mai ei ke fai ne tatou se mea ke fesoasoani atu ki a ia.” Ne toe fai mai a ia: “Kafai e olo atu tatou o fesoasoani ki te tino ne ˋtalo tatou e uiga ki ei, ko pelā eiloa me ko fesoasoani atu tatou ke tali a ˋtou ˋtalo mō ia.”

7. E fesoasoani mai pefea a te ˋtalo mō nisi tino ke maua ne tatou se kilokiloga paleni ki ˋtou fakalavelave totino? (Filipi 2:​3, 4) (Onoono foki ki ata.)

⁷ A te ˋtalo mō nisi tino e fesoasoani mai ke maua ne tatou se kilokiloga tonu e uiga ki ˋtou fakalavelave totino. (Faitau te Filipi 2:​3, 4.) E feˋpaki a tatou taki tokotasi mo fakalavelave i te lalolagi telā e pule ne te Tiapolo. (1 Ioa. 5:19; Faka. 12:12) Kafai e fakamasani tatou o ˋtalo mō nisi tino, e fai ei ke masaua ne tatou me i “vaegā logoˋmaega konei e pokotia foki i ei [ˋtou] taina i te lalolagi kātoa.” (1 Pe. 5:9) E fai mai se paenia e igoa ki a Katherine penei: “A te ˋtalo mō nisi tino e fakamasaua mai ki a au me e feˋpaki foki latou mo fakalavelave. Kae e fai ne te mea tenā ke mo a ma tō saga malosi au ki oku fakalavelave totino.”

E MANAKOGINA NE LATOU A ˋTOU ˋTALO

8. Taku mai a tino kolā e mafai o aofia ne tatou i ˋtou ˋtalo.

⁸ Ko oi e mafai o aofia ne tatou i ˋtou ˋtalo? E mafai o ˋtalo tatou mō se potukau o tino e pelā mo latou kolā e fakamasakiˋsaki, tamaˋliki kolā e feˋpaki mo fakatauemuga io me ko tofotofoga mai taugasoa maˋsei i te akoga, io me ko latou kolā ko maˋtua. E tokouke ˋtou taina taliˋtonu e feˋpaki mo ˋtekemaiga mai kāiga io me mai te malo. (Mata. 10:​18, 36; Galu. 12:5) E isi ne ˋtou taina ko oti ne tiaki ne latou olotou koga ˋnofo ona ko kinauga e māfua mai i mea fakapolitiki. Nisi tino e logoˋmae i fakalavelave o te natula. Kāti e se iloa ne tatou a taina mo tuagane konei. Kae kafai e ˋtalo tatou mō latou, ko fakaasi atu ei me fakaˋlogo tatou ki te fakatonuga a Iesu ke “fakatau aˋlofa.”—Ioa. 13:34.

9. Kaia e ˋtau ei o ˋtalo tatou mō latou kolā e fai te takitakiga i te fakapotopotoga a Ieova e pelā foki mo olotou avaga?

⁹ E mafai foki o ˋtalo tatou mō latou kolā e fai te takitakiga i te fakapotopotoga a Ieova. E aofia i a latou konei ko te Potukau Pule mo taina fesoasoani ki a latou, komiti o Ofisa Lagolago, ovasia i ofisa lagolago, ovasia o te seketi, toeaina o fakapotopotoga, mo tavini fesoasoani. E feˋpaki a taina e tokouke konei mo fakalavelave totino o latou kae gaˋlue malosi foki latou o fesoasoani mai ki a tatou. (2 Koli. 12:15) E pelā me se fakaakoakoga, ne fai mai a Mark telā se ovasia o te seketi penei: “Tasi o fakalavelave faigata ki a au ko te nofo ˋmao mai oku mātua kolā ko maˋtua. E fakamasakiˋsaki katoa lāua. E tiga loa e tausi lāua ne toku tuagane mo tena avaga, kae e fanoanoa au me e se mafai o nofo atu au i lā tafa ke fesoasoani atu ki a lāua.” Faitalia me iloa io me se iloa ne tatou a fakalavelave e feˋpaki mo taina gaˋlue malosi konei, kae se mea ˋlei ke masaua ne tatou o ˋtalo faeloa mō latou. (1 Tesa. 5:​12, 13) E mafai foki o ˋtalo tatou mō avaga a taina konei me ona ko te lotou fesoasoani ko mafai ei ne olotou avaga o tumau i te gaˋlue mō te fakapotopotoga.

10-11. E mata, e fiafia a Ieova māfai e ˋtalo atu tatou mō ˋtou taina mo tuagane katoa? Fakamatala mai.

¹⁰ E pelā mo mea ne sauˋtala tatou ki ei, se mea masani ke ˋtalo tatou mō se potukau o taina mo tuagane. E pelā me se fakaakoakoga, kafai foki loa e se mafauˋfau tatou ke ˋtalo mō se tino e tokotasi e mafai o fakamolemole tatou ki a Ieova ke fesoasoani ki a latou i falepuipui io me fakamafanafana atu ki a latou kolā ko ˋgalo olotou tino pele i te mate. Ne fai mai se toeaina e igoa ki a Donald penei, “E tokouke ˋki a ˋtou taina mo tuagane e feˋpaki mo fakalavelave tela la, i nisi taimi e ˋtalo atu fua tatou mō latou kolā e feˋpaki mo logoˋmaega.”

¹¹ E mata, e fiafia a Ieova ki vaegā ˋtalo penā? Ao! E tonu, e se iloa ne tatou a fakalavelave takitasi o ˋtou taina taliˋtonu katoa. Tela la, se mea ˋlei ke ˋtalo atu fua tatou mō se potukau o taina mo tuagane. (Ioa. 17:20; Efe. 6:18) A ˋtalo konei e fakamaoni mai i ei me i a tatou e “aˋlofa ki te kautaina kātoa.”—1 Pe. 2:17.

MĀFAI KO ˋTALO MŌ TINO TAKI TOKOTASI

12. E fesoasoani mai pefea a te onoono fakaˋlei ko te mea ke iloa ne tatou a mea ke ˋtalo ki ei e uiga mō tino taki tokotasi?

¹² Ke onoono fakaˋlei. I tafa o te ˋtalo mō se potukau o taina mo tuagane, se mea ˋlei foki ke ˋtalo mō tino taki tokotasi kae fakaaoga olotou igoa. E mata, e isi se tino i te otou fakapotopotoga e maua ne ia se masaki tumau? E mata, e isi se talavou telā e loto vāivāi ona ko tofotofoga e fepaki mo ia i te akoga? E mata, e isi se mātua e seai sena avaga e taumafai malosi o puti aka tena tamaliki “i polopolokiga mo fakatakitakiga a Ieova”? (Efe. 6:4) Mai te onoono fakaˋlei, ka fai ei ke alofa malosi koe ki nisi tino kae fakamalosi atu ki a koe ke ˋtalo mō latou.b—Loma 12:15.

13. E mafai pefea o ˋtalo tatou mō tino kolā e se masani tatou?

¹³ ˋTalo mō nisi tino kae fakaaoga olotou igoa. E mafai o fai ne tatou a te mea tenā ke oko foki loa ki tino kolā e seki fetaui mo tatou. E pelā me se fakaakoakoga, mafaufau ki ˋtou taina mo tuagane kolā e ˋpei i falepuipui i Crimea, Eritrea, Lusia, mo Singapore. E mafai o iloa ne koe a igoa o latou kolā e ˋpei i falepuipui i luga i te jw.org.c Ne fai mai se ovasia o te seketi e igoa ki a Brian penei: “Ne iloa ne au me kafai e tusi ne au ki lalo se igoa o se taina i te falepuipui kae taku atu ne au i se leo maluga, e fesoasoani mai a te mea tenā ke masaua ne au a te tino tenā i aku ˋtalo totino.”

14-15. E mafai pefea o taku ˋtonu atu ne tatou a mea takitasi e maˋnako tatou ki ei?

¹⁴ Taku atu a mea takitasi e manako koe ki ei. Ne fai mai a Michael, telā ne sae muamua mai: “Kafai e faitau au ki tala i te jw.org e uiga ki taina e ˋpei i falepuipui, e taumafai au o mafaufau ki lagonaga e mafai o maua ne au moi fai e nofo au i te lotou tulaga. E iloa ne au me ka manavase au ki taku avaga kae manako au ke fakamautinoa me maua ne ia a mea e manakogina ne ia. E fesoasoani mai te mea tenā, ke iloa ne au se mea ke taku atu i aku ˋtalo kolā e fai mō taina aˋvaga i loto i falepuipui.”—Epe. 13:​3, fml.

¹⁵ Kafai e mafauˋfau tatou ki mea e fai ne ˋtou taina i aso takitasi i loto i falepuipui, ko mafai ei o iloa ne tatou a mea ke aofia i ˋtou ˋtalo. E pelā me se fakaakoakoga, e mafai o ˋtalo tatou ke aˋlofa a leoleo o falepuipui ki ˋtou taina kae ke mafai o talia ne tino pule ke fai a tapuakiga a ˋtou taina i loto i falepuipui. (1 Timo. 2:​1, 2) E mafai o ˋtalo tatou ke maua ne te fakapotopotoga a fakamalosiga mai te fakaakoakoga ˋlei a te ˋtou taina fakamaoni i te falepuipui, io me ˋtalo ke lavea ne tino sē taliˋtonu a amioga ˋlei a te pagota tenā kae ke mafai o talia ne latou ke fakalogoˋlogo ki te ˋtou fekau. (1 Pe. 2:12) E tonu, e mafai foki o fai ne tatou se mea tai ˋpau penā māfai ko ˋtalo mō ˋtou taina mo tuagane kolā e feˋpaki mo nisi tofotofoga. Kafai e onoono fakaˋlei tatou, ˋtalo mō nisi tino kae taku atu olotou igoa, kae taku atu a mea takitasi e maˋnako tatou ki ei, ko fakaasi atu i ei ne tatou me i a tatou e “ˋfonu i te alofa o te suā tino ki te suā tino.”—1 Tesa. 3:12.

KE MAUA SE KILOKILOGA TONU KI ˋTOU ˋTALO

16. E mafai pefea o maua ne tatou se kilokiloga tonu ki ˋtou ˋtalo? (Mataio 6:8)

¹⁶ E pelā mo mea ko iloa ne tatou, e mafai o fesoasoani atu a ˋtou ˋtalo ki nisi tino ke ˋfuli olotou fakanofonofoga. Kae e ˋtau o maua ne tatou se kilokiloga tonu. Kafai e ˋtalo tatou e se fakauiga i ei me ko fakailoa atu ne tatou ki a Ieova se mea telā e se iloa ne ia; io me fai atu ki a ia a te ˋtoe auala ˋlei ke fakaˋlei se fakalavelave. Ko leva ne iloa ne Ieova a mea e manakogina ne ana tavini mai mua foki loa o iloa ne latou—io me ko tatou—a te mea tenā. (Faitau te Mataio 6:8.) Kae kaia la e ˋtau ei o ˋtalo tatou mō nisi tino? I tafa o pogai kolā e fakaasi mai i te mataupu tenei, a te faifaiga tenā se mea telā e fai ne tino kolā e aˋlofa ki nisi tino. E fakamalosi aka tatou ne te alofa ke ˋtalo mō nisi tino. Kae e fiafia a Ieova ke kilo atu ki ana tavini e fakaasi atu ne latou a tena alofa.

17-18. E fakamatala mai pefea ne koe te aoga o ˋtou ˋtalo e fai mō taina taliˋtonu?

¹⁷ Kafai foki loa e foliga mai me e seki aoga ˋtou ˋtalo ne fai mō nisi tino, kae e fakaasi mai i ei a te ˋtou aˋlofa ki ˋtou taina mo tuagane, kae lavea ˋlei ne Ieova te mea tenā. E mafai o fakatusa ne tatou a te mea tenā penei: Mafaufau ki se kāiga telā e isi se tamaliki tagata mo se tamaliki fafine i ei. E masaki malosi te tamaliki tagata kae takato i te moega. E fakamolemole atu te tamaliki fafine ki tena tamana penei: “Fakamolemole fai aka ke ˋlei toku tuagane. A ia e masaki malosi!” E isi ne mea ko oti ne fai ne te tamana ke fakaˋlei tena tamaliki; e alofa a ia ki tena tama kae tausi fakaˋlei atu ki a ia. Kae e ui ei, e fiafia malosi te tamana ke kilo atu ki te tamaliki fafine e fakaasi atu te lasi o tena alofa ki tena tuagane, mai te fakamolemole atu ki a ia ke fesoasoani atu ki tou tagata.

¹⁸ Tenā eiloa te mea e fakamalosi mai a Ieova ke fai ne tatou—ke fakatau aˋlofa kae ˋtalo te suā tino mo te suā tino. Mai te fai penā, e fakaasi atu i ˋtou ˋtalo a te lasi o te ˋtou aˋlofa ki nisi tino kae lavea ne Ieova a te mea tenā. (2 Tesa. 1:3; Epe. 6:10) Kae pelā mo mea ko oti ne sauˋtala tatou ki ei, e mafai foki o fesoasoani atu a ˋtou ˋtalo ke ˋfuli te tulaga o se tino. Tela la, ke masaua faeloa ne tatou o ˋtalo mō nisi tino.