“Āva ki Tou Tamana mo Tou Mātua”

I te taimi ne nofo ei a Iesu i te lalolagi, ne faka‵mafa atu eiloa ne ia te fakatonuga tenei: “Āva ki tou tamana mo tou mātua.” (Eso 20:12; Mat 15:4) Ne maua eiloa ne Iesu te saolotoga ke faipati atu me ne “tumau a ia i te fakalogo” ki ana mātua e pelā me se talavou. (Luk 2:51) Kae e pelā me se tino matua, ne fai eiloa ne ia se fakatokaga mautinoa ki te auala ke tausi atu ei ki tena mātua māfai ko mate a ia.—Ioa 19:26, 27.

I ‵tou aso foki nei, e faka‵logo eiloa a Kelisiano talavou ki olotou mātua kae fai‵pati atu ki a latou i te auala atafai o fakaasi atu te olotou āva. E ui i ei, a te fakatonuga ke āva tatou ki ‵tou mātua e seai se gataga ki ei. Faitalia me ko gasolo o ma‵tua latou, e ‵tau eiloa o tumau tatou i te āva ki a latou mai te mauaga ne tatou a mea aoga mai te olotou atamai. (Fat 23:22) E āva foki tatou ki ‵tou mātua mai te ‵saga atu mo te atafai ki olotou feitu i mea tau lagonaga mo manakoga i mea tau tupe māfai e manakogina. (1Ti 5:8) Faitalia me koi talavou io me ko ma‵tua, te fakatumauga o se fesokotakiga ‵lei mo latou ko te toe kī ki te auala e fakaasi atu ei ne tatou te āva.

KE ONOONO KI TE VITIO KA FAKAILOA ATU PEFEA NE AU KI OKU MĀTUA?, KA OTI KO TALI ATU A FESILI KONEI MAI LALO:

• Kaia e mafai o foliga faigata ei ki a koe ke faipati atu ki ou mātua?

• E mafai pefea ne koe o fakaasi atu te āva ki ou mātua i te taimi e faipati atu ei koe ki a lāua?

  

• Kaia e aoga ei au taumafaiga ke faipati atu ki ou mātua? (Fat 15:22)