Fakaaoga a Vitio ke Akoako Atu ‵Tou Akoga Faka-te-Tusi Tapu

A mea kolā e lavea ki mata e faigofie ke ‵mau i te mafaufau o te tino, kae e fesoasoani atu ke malamalama kae ke masaua a mea ne tauloto ne ia. Ne fakaaoga ne te ‵tou Toe Faiakoga Sili ko Ieova a mea e lavea ki mata ke akoako mai i ei a akoakoga tāua. (Ken 15:5; Iel 18:1-6) Ne fakaaoga foki ne te ‵tou Faiakoga Sili ko Iesu. (Mat 18:2-6; 22:19-21) A te vaega e tasi o mea e lavea ki mata telā ko oti ne fakamaoni aka me e aoga ‵ki eiloa i tausaga fakamuli nei ko vitio. E mata, e fakaaoga faka‵lei ne koe a vitio i te taimi e akoako atu ei ne koe au a‵koga faka-te-Tusi Tapu?

Ko oti ne fakatoka a vitio e sefulu ke fesoasoani mai ki a tatou ke akoako atu a mataupu mai te polosiua ko te Tala ‵Lei Mai te Atua! E tonu, a matua o vitio takitasi konei e fetaui ‵tonu mo fesili takitasi kolā e tusi i mataimanu kolā e ‵tau malosi i te polosiua. A te vaega tenei o te polosiua telā e maua i loto i te ‵tou fakatuatusi ko te jw.org e aofia i ei a link kolā e fakamasaua mai ki a tatou te taimi ke pei atu i ei a vitio takitasi konā. E se gata i ei, e maua foki ne tatou a nisi vitio io me ko nisi tusi kolā e mafai o fakaaoga ke akoako atu i te ‵tou Pusa o Mea Faigaluega mo Fai Akoakoga.

E mata, e sau‵tala koe mo tau akoga faka-te-Tusi Tapu ki se mataupu telā kāti e tai faigata ke malamalama a ia i ei? Io me e isi se fakalavelave e fepaki mo tau tino akoga? Ke ‵sala ki vitio i te jw.org® mo te Leo Fakasalalau o te JW ke maua ne koe se vitio e tasi telā e mafai o aoga ki a ia. Kāti e mafai o onoono tasi koe mo tau akoga faka-te-Tusi Tapu ki te vitio tenā kae sau‵tala fakatasi ki ei.

I masina takitasi, e isi faeloa ne vitio ‵fou. I te taimi e onoono koe ki ei, ke mafaufau ki te auala e mafai o fakaaoga ne koe a vitio konā māfai ko akoako atu a nisi tino.