E Alofa a Ieova ki Tino ‵Ma

“‵Fulu ou lima. ‵Teu tou potu. ‵Teu te fale. ‵Pei a kaiga ki te tulamu.” E akoako eiloa ne te tokoukega o mātua a olotou tama‵liki ke tu ‵ma. Kae e tiga i ei, a fakatakitakiga ki te auala ke tu ‵ma ne māfua mai eiloa i te ‵tou Atua telā e tapu. (Eso 30:18-20; Teu 23:14; 2Ko 7:1) Kafai e tu ‵ma tatou i ‵tou foitino mo ‵tou kope, e faka‵malu i ei ne tatou a Ieova. (1Pe 1:14-16) Kae e a ‵tou fale mo matāfale? E ‵kese mai ei, e pelā mo tino kolā e ‵pei valevale olotou kaiga i auala mo koga ta‵fao, e tausi eiloa ne Kelisiano a te koga ‵nofo ko te lalolagi ke ‵ma. (Sal 115:16; Fks 11:18) E aofia foki ei a mea fo‵liki, e pelā mo tamā pepa o lole, kapa inu, io me ko kamu, e fakaasi atu ei te ‵tou kilokiloga ki te ‵tu ‵ma. I feitu katoa o te olaga, e ma‵nako tatou o fakaasi atu me i a tatou “ko tavini a te Atua.”—2Ko 6:3, 4.

KE ONOONO KI TE VITIO E ALOFA TE ATUA KI TINO ‵MA, KA OTI KO TALI EI A FESILI KONEI MAI LALO:

• Ne a fakamasakoga e mafai o fakasae aka ne se tino e uiga ki te auala e se tausi ei ke ‵ma ana kope?

• Ne fakaasi mai pefea ne te Tulafono Faka-Mose a te kilokiloga a Ieova e uiga ki te tu ‵ma?

• E mafai pefea o tuku atu ne koe a tavaega ki a Ieova e aunoa mo pati?