KE OLA E PELĀ ME NE KELISIANO
Auala ke Fakaaoga a Manatu Fesoasoani mō Sau‵talaga
Talu mai i a Ianuali 2018, a manatu fesoasoani mō sau‵talaga ne ‵sae mai mua i te ‵kava o te ‵Tou Olaga Kelisiano mo te Galuega Talai—Tusi mō Fakatasiga. Kae fakaaoga pefea?
I te Taimi e Tuku Atu se Tōfiga ki te Tino Talai: E ‵tau o fakaaoga ne koe te fesili, tusi faitau, mo te fesili mō te suā asiga mai te manatu fesoasoani mō sau‵talaga. Kae e se fakauiga i ei me ‵tau o ‵kopi ne koe a pati i te vitio ki manatu fesoasoani mō sau‵talaga. E mafai o ‵fuli ne koe te fakanofonofoga, au pati fakatomua, mo au fakamatalaga, mo nisi mea aka. E mafai foki o fakaaoga ne koe se tusi mai te Pusa o Mea Faigaluega mō Fai Akoakoga, e tiga loa e se fakatonu mai ke fai penā.
I te Galuega Talai: A manatu fesoasoani mō sau‵talaga ne fakatoka ke fesoasoani mai ki a tatou. Kafai se tino e fiafia kae koi fia iloa ne ia a mea e uke atu, e mafai o faka‵soko ne koe te sau‵talaga, kāti mai te fakaaoga ne koe a manatu mai te manatu fesoasoani mō te ‵toe asiga. E mafai o ‵fuli malie ne koe a pati i te manatu fesoasoani mō sau‵talaga io me ‵fuli te mataupu kātoa. E mata, e isi se mataupu mai te masina ko teka io me se tusi faitau fakaa‵tea e fia‵fia malosi atu ki ei a tino i tau koga talai? E mata, a tino i tau koga talai e fia‵fia ke sau‵tala ki se mea ko oti ne tupu io me se mea telā koi tupu i te koga tenā? Faitalia me se a te auala e fakaaoga i ei ne koe a manatu fesoasoani mō sau‵talaga, a te mea tāua ko te fai “a mea katoa mō te tala ‵lei, ko te mea ke mafai o talai atu ne au te mea tenā ki nisi tino.”—1Ko 9:22, 23.