E Mafai te Fakapotopotoga o Fesoasoani ki Tino A‵koga ke Ga‵solo ki Mua i te Papatisoga

1-2. Ko oi e mafai o fesoasoani ki se tino akoga ki te Tusi Tapu ke gasolo ki mua ki te papatisoga?

“NE GALI ‵ki ki a au aku mea ne tauloto mai i taku akoga faka-te-Tusi Tapu,” ko pati a Amy telā e nofo i Fiti. “Ne iloa ne au me tenei te munatonu. Kae ko te taimi fua telā ne kamata o ‵kau fakatasi au mo taina mo tuagane, ne kamata ei o fai ne au a fakama‵fuliga kae ne gasolo atu au ki mua ki te taimi e papatiso ei.” E fakaasi mai i te tala o Amy a te mea tāua e tasi tenei: E mafai o gasolo ki mua te tino akoga ki te Tusi Tapu ki te taimi e papatiso ei māfai ko maua ne ia te fesoasoani mai nisi tino i loto i te fakapotopotoga.

² E mafai ne tino talai taki tokotasi o fesoasoani ki tino ‵fou ke ‵kau ki te fakapotopotoga. (Efe. 4:16) E fai mai a Leilani se paenia telā e nofo i Vanuatu: “E isi se tugapati me manakogina te fakai kātoa ke puti aka ne latou se tamaliki. Kāti penā foki te galuega ko te faiga o soko; se mea masani o ga‵lue fakatasi te fakapotopotoga ke aumai se tino ki loto i te munatonu.” E tāua ‵ki te tiute e fai ne kāiga, taugasoa mo faiakoga ki te putiakaga o se tamaliki ke matua ‵lei. E fai ne latou te mea tenā mai i te fakamalosi atu ki te tamaliki kae akoako atu a mataupu tāua ki a ia. I se auala tai ‵pau, e mafai foki ne tino talai o fakamalosi kae tuku atu se fakaakoakoga ‵lei ki tino a‵koga ki te Tusi Tapu kae fesoasoani atu ki a latou ke gasolo ki mua i te papatisoga.—Faata. 15:22.

3. Ne a au mea ne tauloto mai i pati a Ana, Dorin, mo Leilani?

³ Kaia e ‵tau ei mo te tino telā e fai ne ia te akoga a te suā tino o talia ne ia a te fesoasoani e maua mai nisi tino talai ki tena tino akoga ki te Tusi Tapu? Ke mafaufau ki pati a Ana, se paenia fakapito i Moldova: “E faigata ‵ki mō se tino e tokotasi ke fakataunu a manakoga katoa o se tino akoga ki te Tusi Tapu māfai ko kamata o gasolo ki mua.” E fai mai foki a Dorin, se paenia fakapito telā e tavini atu foki i te fenua tenā: “E masani o fai mai ne nisi tino talai a pati kolā e mafai o otia i ei a loto o te tino akoga, se mea telā ne seki mafaufau au ki ei.” E fai mai foki ne Leilani se suā pogai, “A te a‵lofa mo te atafai e fakaasi ne tino ki se tino akoga e fesoasoani malosi atu ke iloa tonu ne ia a tino o Ieova.”—Ioa. 13:35.

4. Ne a mea ka sau‵tala tatou ki ei i te mataupu tenei?

⁴ Kāti ka mafaufau koe, ‘E mafai pefea o fesoasoani atu au ki se tino akoga ki te Tusi Tapu ke gasolo ki mua māfai e se fai ne au tena akoga?’ Ke mafau‵fau tatou ki ‵tou mea e mafai o fai māfai e ‵kami tatou ke ‵kau ki te akoga faka-te-Tusi Tapu, mo mea e mafai o fai ne tatou māfai ko kamata o kau mai te tino akoga ki fakatasiga. Ka onoono foki tatou ki te auala e mafai ei o fesoasoani a toeaina ki tino a‵koga ki te Tusi Tapu ke ga‵solo ki mua ki te papatisoga.

MĀFAI KO KAU KOE KI SE AKOGA FAKA-TE-TUSI TAPU

5. Se a te tiute o koe māfai ko ‵kami koe ke kau ki se akoga faka-te-Tusi Tapu?

⁵ Kafai ko fai se akoga, ko te faiakoga loa i o ia te tiute ke fesoasoani atu ki te tino akoga ke malamalama i te Muna a te Atua. Kafai e fakamolemole atu te faiakoga ke olo tasi koulua o fai te akoga, a tou tiute ko te fesoasoani atu ki a ia. (Fai. 4:9, 10) Ne a mea e mafai o fai ne koe ko te mea ke magoi te faiga o te akoga faka-te-Tusi Tapu?

6. Kafai ko kau koe ki se akoga faka-te-Tusi Tapu e fakagalue pefea ne koe te fakatakitakiga i te Faataoto 20:18?

⁶ Fakatoka ki te akoga faka-te-Tusi Tapu. Muamua la, fesili atu ki te faiakoga ke fakamatala mai ne mea e uiga ki te tino akoga. (Faitau te Faataoto 20:18.) E mafai o fesili atu koe: “Ne a mea e iloa ne koe ki tau tino akoga? Se a te mataupu ka sau‵tala koulua ki ei? Se a te mea e manako koe ke tauloto ne te tino akoga i te mataupu tenei? E mata e isi ne mea e ‵tau io me se ‵tau o fai ne au i te taimi e fai ei te akoga? Ne a mea e mafai o fakamalosi atu ki te tino akoga ke gasolo ki mua?” E mautinoa me ka se fakaasi mai ne te faiakoga a mea kolā e se ‵tau o iloa ne koe, kae ko mea kolā e fakaasi mai ne ia ka mafai o aoga malosi. E fai sāle ne se misionale e fakaigoa ki a Joy a vaegā sau‵talaga penei mo tino kolā ka ‵kau ki tena akoga. E fai ‵tonu mai a ia: “A sau‵talaga penei e fesoasoani ki te tino tela ka kau mai ke fiafia ki te tino akoga kae ke iloa foki ne ia a mea kolā e ‵tau o fai ne ia i te taimi o te akoga.”

7. Kaia e ‵tau ei mo koe telā e kau ki te akoga o fakatoka faka‵lei ki te akoga?

⁷ Kafai ko ‵kami koe ke kau ki se akoga faka-te-Tusi Tapu, se mea gali ke fakatoka koe ki te mataupu telā ka sau‵tala ki ei. (Esela 7:10) Ne fai mai a Dorin te taina telā ne sae muamua mai: “E gali ki a au māfai toku ‵pea e fakatoka faka‵lei ki te akoga. Me mafai o fai ana manatu i se auala aoga.” E se gata i ei, ka mafai o lavea mai ne te tino akoga me ne fakatoka faka‵lei koulua ki te akoga, kae ka tuku atu ei se fakaakoakoga ‵lei ki a ia. Kafai foki loa e se lava tou taimi ke fakatoka te mataupu kātoa, taumafai fua ke maua ne koe a manatu tāua kolā ka fai‵pati ki ei i te mataupu.

8. E fakamautinoa pefea me e iloa ne koe a mea ke ‵talo ki ei i se akoga faka-te-Tusi Tapu?

⁸ A te ‵talo se vaega tāua o te akoga faka-te-Tusi Tapu, tela la ke na mafaufau muamua ki au pati ka fai māfai ko fakamolemole mai ke fai ne koe te ‵talo. Tenā ko mafai ei o iloa ne koe au pati ke fai i tau ‵talo. (Sala. 141:2) Hanae telā e nofo i Tiapani, koi masaua eiloa ne ia a pati i te ‵talo ne fai ne se tuagane telā ne kau atu ki tena akoga. Ne fai mai tou fafine: “Ne lavea ne au a te ‵pili o tena va fakataugasoa mo Ieova kae ne manako au ke fai pelā mo ia. Ne maua foki ne au se lagonaga alofagina i te taimi ne taku ei ne ia toku igoa i tena ‵talo.”

9. E ‵tusa mo te Iakopo 1:19, e mafai pefea o fai koe pelā me se soa aoga i te taimi o te akoga?

⁹ ‵Lago ki te faiakoga i te taimi o te akoga. “A te soa tela e tautali faka‵lei i te faiga o te akoga e lasi ‵ki tena fesoasoani,” ko pati a Omamuyovbi se paenia fakapito i Nigeria. “E aoga a manatu e fakaasi mai ne tou soa kae e se ‵tau o uke ana pati e fai, me e iloa ne ia me ko te faiakoga e ‵tau o fai ne ia te takitakiga o te akoga.” E iloa pefea ne koe a te taimi mo te auala ke fai ei ou manatu i te taimi o te akoga? (Faata. 25:11) Fakalogologo faka‵lei i te taimi e fai‵pati ei a te faiakoga mo te tino akoga. (Faitau te Iakopo 1:19.) Tenā ko mafai ei o toka koe o tuku atu sou manatu i te taimi tonu. Kae e ‵tau o mafaufau faka‵lei koe muamua koi tuai o faipati. Pelā me se fakaakoakoga, ka se manako koe ke uke au pati e fai, oso atu ki pati a te tino e fai ne ia te akoga, io me fakasae aka se mataupu fakaatea. Kae e mafai o fakamaina ne koe te manatu tāua mai i te fai atu se manatu toetoe, se tala fakatusa io me se fesili. Nisi taimi kāti e mafaufau koe me e se lasi tou tusaga e mafai o fai i te akoga. Kae kafai e fakamalo atu koe ki te tino akoga kae fakaasi atu te fiafia tonu ki a ia, ka fesoasoani malosi eiloa koe ki a ia ke gasolo ki mua.

10. E mafai pefea o fesoasoani atu tau tala ki se tino akoga ki te Tusi Tapu?

¹⁰ Fakamatala ou tala. Kafai e ‵lei, e mafai o fakamatala fakatoetoe ne koe ki te tino akoga te auala ne maua ei ne koe te munatonu, te auala ne manumalo ei koe i se fakalavelave, mo te auala ne fesoasoani atu ei a Ieova ki a koe i tou olaga. (Sala. 78:4, 7) Kāti a tau tala ko te mea eiloa telā ne manako malosi a te tino akoga ki ei. E mafai o fakamalosi atu ki tena fakatuanaki io me fakamalosi atu ki a ia ke gasolo ki mua ki te papatisoga. Kae e mafai o fesoasoani atu ki a ia ke iloa ne ia te auala ke manumalo i se tofotofoga telā e fepaki mo ia. (1 Pe. 5:9) A Gabriel telā e nofo i Brazil kae tavini atu nei e pelā me se paenia, e masaua ne ia a mea aoga i te taimi ne fai ei tena akoga faka-te-Tusi Tapu, e fai mai a ia: “I te taimi ne lagona ei ne au a tala a taina, ne tauloto ne au me lavea ne Ieova a fakalavelave e fe‵paki mo tatou. Kae kafai e mafai o manumalo latou i ei, e mafai foki o manumalo au.”

MĀFAI KO KAU MAI TE TINO AKOGA KI FAKATASIGA

11-12. Kaia e ‵tau ei o tali faka‵lei ne tatou se tino akoga telā e kau mai ki fakatasiga?

¹¹ Ko te mea ke gasolo atu ki mua te tino akoga ki te papatisoga, e ‵tau o kau faeloa a ia ki fakatasiga a te fakapotopotoga ke maua a mea aoga mai i ei. (Epe. 10:24, 25) E mautinoa me ka ‵kami a ia ne tena faiakoga ki te fakatasiga. Kafai ko kau mai a ia, e mafai ne tatou katoa o fakamalosi atu ki a ia ke kau mai faeloa ki fakatasiga i te Fale Tapuaki. E mafai pefea o fai ne tatou te mea tenā?

¹² Ke tali faka‵lei te tino akoga. (Loma 15:7) Kafai e lavea ne te tino akoga me tali faka‵lei a ia i taimi o fakatasiga, kāti ka fiafia faeloa a ia o kau mai ki fakatasiga. Ke tali faka‵lei atu ki te tino akoga kae fakafetaui atu a ia ki nisi tino ko te mea ke mo a e mā a ia. Ke mo a eiloa e mafaufau koe me isi se tino ne aumai mo ia. Kāti e talimuli mai tena faiakoga io me isi ne tiute e ‵tau o saga ki ei. Fakalogologo faka‵lei ki pati a te tino akoga, kae fakaasi atu te fiafia tonu ki a ia. Ka aoga pefea ki te tino akoga mafai e tali faka‵lei atu koe ki a ia? Mafaufau ki te ‵tala o Dmitrii tela ne fatoa oti atu fua ne papatiso i se fia tausaga ko ‵teka, kae ko tavini atu nei pelā me se tavini fesoasoani. I tena fakatasiga muamua ne kau ki ei, e fai mai a ia: “Ne lavea ne se taina i au e faka‵tali mo te mā mai tua o te Fale Tapuaki, kae ne fai mai ke olo tasi māua ki loto. E tokouke a tino ne ‵mai o fakafetaui ki a au. Ne ofo malosi au. Ne gali ‵ki ki au kae i aku muna loa me isi ne fakatasiga e fai i aso katoa o te vaiaso. Ne fatoa lavea ne au se mea telā ne seki lavea ne au i se isi koga aka.”

13. E aoga pefea au amioga ki se tino akoga ki te Tusi Tapu?

¹³ Tuku atu se fakaakoakoga ‵lei. Au amioga e mafai o fakatalitonu atu ki te tino akoga me ko maua ne ia te munatonu. (Mata. 5:16) E fai mai a Vitalii telā e tavini atu nei e pelā me se paenia i Moldova: “Ne lavea ne au a te auala e ola, e mafau‵fau, mo amioga e fai ne tino i loto i te fakapotopotoga. Fakatalitonu mai ne te mea tenei me i molimau a Ieova e ola e ‵tusa mo fakatakitakiga a te Atua.”

14. E mafai pefea o fesoasoani atu tau fakaakoakoga ki se tino ke gasolo faeloa ki mua?

¹⁴ Ke toka se tino akoga ke papatiso, e ‵tau o fakagalue ne ia a mea ne tauloto ne ia. E se faigofie faeloa te mea tenei. Kae kafai e lavea mai ne te tino me ne aoga ki a koe a te ola e ‵tusa mo fakatakitakiga i te Tusi Tapu, ka fakamalosi atu eiloa ki a ia ke fakaakoako atu ki a koe. (1 Koli. 11:1) Mafaufau ki te tala o Hanae telā ne sae muamua mai. Ana muna: “Ne ola eiloa a taina mo tuagane e ‵tusa mo mea kolā ne tauloto ne au. Ne lavea ei ne au a te auala e mafai ei o fakamalosi atu au ki nisi tino, fakamagalo a nisi tino, kae ke fakaasi atu foki te alofa. E fai‵pati faeloa latou ki mea ‵lei e fai ne nisi tino. Ne manako au o fakaakoako ki a latou.”

15. E fesoasoani mai pefea te Faataoto 27:17 ke lavea ne tatou te pogai e ‵tau ei o fakamasani ki se tino akoga māfai e kau mai ki fakatasiga?

¹⁵ Ke fakamasani mo te tino akoga. I te taimi e kau mai faeloa te tino akoga ki fakatasiga, tumau te fakaasi atu te fiafia tonu ki a ia. (Fili. 2:4) Ke sau‵tala fakatasi mo ia. I lō te fesilisili atu ki mea kolā e se ‵tau o iloa ne koe, ke fakamalo atu ki a ia e uiga ki fakama‵fuliga ko oti ne fai ne ia kae fesili atu ki a ia e uiga ki tena akoga faka-te-Tusi Tapu, tena kāiga mo tena galuega. A vaegā sau‵talaga penei ka fai ei ke pili te va fakataugasoa o koulua. Kafai e fakamasani koe ki te tino akoga, ka fesoasoani eiloa koe ki a ia ke gasolo ki mua ki te papatisoga. (Faitau te Faataoto 27:17.) Ko tavini atu nei a Hanae e pelā me se paenia tumau. E uiga ki te taimi muamua ne kau a ia ki fakatasiga, ne fai mai a ia: “I te taimi ne fakamasani au ki tino i te fakapotopotoga, ne fai ei ke olioli faeloa au ke kau ki fakatasiga, kae ne kau faeloa au faitalia me fi‵ta au. Ne fiafia au ki oku taugasoa ‵fou, kae ne fesoasoani malosi mai te mea tenei ke ‵kati toku va fakataugasoa mo tino kolā e ‵kese olotou talitonuga. Ne manako au ke pili toku va mo Ieova, kae penā foki ki taina mo tuagane. Tenā ne fakaiku ei ne au ke papatiso au.”

16. Ne a nisi mea e mafai o fai ne koe ke fesoasoani atu ki te tino akoga ke fiafia i te fakapotopotoga?

¹⁶ I te taimi e gasolo ei ki mua te tino akoga kae fai a fakama‵fuliga, fai ke maua ne ia te lagonaga me i a ia se vaega o te fakapotopotoga. E fai ne koe te mea tenā mai i te talimalo atu ki a ia. (Epe. 13:2) Kafai e toe kilo a ia ki aso mua i te taimi koi fai ei tena akoga faka-te-Tusi Tapu, e masaua ne Denis telā e tavini atu i Moldova a te mea tenei: “E uke a taimi e ‵kami sāle māua mo taku avaga ke ‵kau fakatasi mo taina. Ne fakalogo‵logo māua ki tala e uiga ki te auala ne fesoasoani a Ieova ki a latou, kae ne fakamalosi mai te mea tenā ki a māua. Ne fakamalosi aka ne taimi penei a te ma manakoga ke tavini ki a Ieova mo te tali‵tonu me ka maua ne māua se olaga fia‵fia mai i ei.” Kafai ko mafai o fai se tino akoga pelā me se tino talai, e mafai o ‵kami mai ne koe a ia ke olo tasi koulua i te galuega talai. E fai mai a Diego, se tino talai mai Brazil: “Ne ‵kami au ne taina e tokouke ke ga‵lue tasi matou i te galuega talai. Tenei te ‵toe auala ‵lei ke fakamasani mo latou. I te taimi ne fai au penā, ne tauloto ne au a mea e uke, kae ne fai ei ke pili toku va mo Ieova pelā foki mo Iesu.”

E MAFAI PEFEA O FESOASOANI A TOEAINA?

17. E mafai pefea o fesoasoani atu a toeaina ki tino a‵koga ki te Tusi Tapu?

¹⁷ Ke fakaavanoa ou taimi mō tino a‵koga ki te Tusi Tapu. Toeaina, a tou fiafia tonu ka mafai o fesoasoani ki tino a‵koga ke ga‵solo ki mua ki te papatisoga. E mata, e mafai koe o sau‵tala faeloa mo tino akoga ki te Tusi Tapu i taimi o fakatasiga? Ka lavea ne latou tou fiafia tonu māfai e masaua ne koe olotou igoa, maise māfai ko kamata o fai olotou tali. E mata, e mafai o fakama‵fuli ne koe au polokalame, ko te mea ke mafai o kau atu koe ki se tino talai i te faiga o sena akoga faka-te-Tusi Tapu? E mafai o lasi ‵ki tou fesoasoani ki te tino akoga i lō te mea tela ne mafaufau koe ki ei. E fai mai se paenia e fakaigoa ki a Jackie, kae nofo i Nigeria: “E ‵poi a tino a‵koga e tokouke me i te taina telā e olo atu sāle mo au ki te akoga se toeaina. Ne fai mai se tino akoga ki te Tusi Tapu tokotasi: ‘E se mafai o fai ne te motou faifeau te mea tenā. E āsi fua a ia ki tino mau‵mea māfai e ‵togi ne latou a ia!’” Ko kau atu nei te tino akoga tenā ki fakatasiga.

18. E fakataunu pefea ne toeaina te tiute ne tuku ki a latou i te Galuega 20:28?

¹⁸ Ke akoako kae fakamalosi a faiakoga. Toeaina, e maua ne koutou te tiute tāua ke fesoasoani ki tino talai ke ma‵goi te faiga o te lotou galuega talai, e aofia i ei te faiga o akoga faka-te-Tusi Tapu. (Faitau te Galuega 20:28) Kafai e mā se tino ke fai ne ia se akoga faka-te-Tusi Tapu kae nofo atu koe, fai atu ke fai ne koe te akoga. Ne fai mai a Jackie telā ne sae muamua mai: “E fesili mai sāle a toeaina e uiga ki aku akoga faka-te-Tusi Tapu. Kafai e isi ne fakalavelave ki te faiga o se akoga faka-te-Tusi Tapu, e tuku mai ne latou a manatu fesoasoani aoga.” E mafai ne toeaina o fakamalosi a faiakoga ke tumau i te kufaki. (1 Tesa. 5:11) Ne toe fai mai a Jackie: “E gali ki a au māfai e fakamalosi mai a toeaina, kae fakafetai mai ki aku galuega e fai. A vaegā pati penā e fakamalosi mai, kae fai pelā me se ipu vai ‵moko i se aso ‵vela. Ne fakamalosi mai olotou pati fakamālō ke maua ne au a te loto talitonu, kae ke gasolo aka toku fiafia i te faiga o akoga faka-te-Tusi Tapu.”—Faata. 25:25.

19. Se a te fiafia e mafai o maua ne tatou katoa?

¹⁹ Kafai foki loa e seai se akoga faka-te-Tusi Tapu e fai nei ne tatou, e mafai eiloa o fesoasoani atu tatou ki se tino ke gasolo ki mua i te feitu faka-te-agaga. E mafai ne tatou o ‵lago atu ki te faiakoga i te taimi o te akoga mai i te faiga o ‵tou manatu, kae ke mo a e to uke ‵tou pati e fai. E mafai o fakamasani tatou mo tino a‵koga māfai ko ‵mai ki te fale tapuaki, kae mafai foki o fai tatou pelā me ne fakaakoakoga ‵lei ki a latou. Kae e mafai ne toeaina o fakamalosi a tino a‵koga mai i te fakaavanoa a taimi mō latou, kae penā foki mo faiakoga mai i te akoako kae fakamālō atu ki a latou. E fia‵fia eiloa tatou, māfai ko iloa ne tatou me isi se ‵tou tusaga ne fai faitalia te foliki ke fesoasoani atu ki se tino ke alofa kae ke tavini atu ki te ‵tou Tamana ko Ieova.