Se a te Fakavae Tonu o Tou Olaga mō Aso Mai Mua?

MEA E TALI‵TONU KI EI A TINO E TOKOUKE

ILOILOGA O FETŪ: E tali‵tonu a nisi tino me i olotou olaga i aso mai mua e fakavae ki te auala e ‵tu ei a fetū i te taimi e fa‵nau ei latou. Ko iloilo ei ne latou a fakamatalaga o fetū ke iloa atu a mea ka ‵tupu ki a latou, ko taumafai ei latou ke se ‵tupu a mea ma‵sei io me ke maua te manuia.

FENG SHUI: E tali‵tonu a nisi tino me i te auala ke manuia latou ko te faite olotou fale i se auala telā e fetaui ‵lei mo malosi sē matea o te natula. Ne fai mai a Lo Wing,a telā e nofo i Hong Kong, “Ne fai mai se tino poto o te feng shui me kafai e tuku atu ne au se fatu kilasi fakapito i taku sitoa, ka fesoasoani mai te mea tenā ke maua ne au a tupe e uke atu.”

TAPUAKIGA KI TUPUGA: E tali‵tonu a nisi tino me e ‵tau mo latou o fakafiafia olotou tupuaga kolā ko oti ne ‵mate io me ko nisi atua ke puipui kae maua ne latou a fakamanuiaga. Ne fai mai a Van, telā e nofo i Vietnam, “E talitonu au me kafai e fakaasi ne au te fakaaloalo ki oku tupuga, ka maua ne au mo aku tama‵liki se olaga tai ‵lei atu i aso nei mo se olaga gali i aso mai mua.”

‵TOE FANAU MAI KI SE ISI MEA: E ‵kilo atu a tino e tokouke ki te ola e pelā me se tamilosaga o te ola, te mate, mo te ‵toe fanau mai. E tali‵tonu latou me i mea ‵lei io me ko mea ma‵sei e fe‵paki mo latou i te taimi nei ko ikuga o mea kolā ne ‵tupu i te lotou olaga mua.

Kae e tali‵tonu a tino e tokouke me i vaegā talitonuga penā ne manatu sē ‵tonu. Kae koi aofia loa latou i faifaiga lauiloa e pelā mo te faitauga o laina i lima o tino, te fakamatalaga o fetū, tafaoga ko te Fakamalosi, lāmī, mo nisi mea penā. Kae e mafau‵fau latou me i vaegā faifaiga penā, kāti e mafai o fesoasoani atu ke iloa a mea ka ‵tupu ki a latou i aso mai mua.

NE A MEA NE IKU MAI I EI?

E mata, ko oti ne maua ne tino kolā e tali‵tonu ki vaegā faifaiga penei se olaga ‵lei i aso nei mo se olaga gali i aso mai mua?

Mafaufau ki te tala o Hào, telā e nofo i Vietnam. Ne fakalagolago a ia ki te iloiloga o fetū, feng shui, mo te tapuaki ki ana tupuga ke takitaki ei a ia. E mata, ne manuia a ia? Ne fai mai a Hào, “Ne seki manuia taku pisinisi, uke aku kaitalafu, fepaki mo fakalavelave i toku kāiga, kae ne loto mafatia a au.”

Ne talitonu foki a Qiuming, mai i Taiwan, ki te iloiloga o fetū, te ‵toe fanau mai ki se isi mea, te talitonu me ko oti ne palani a mea e ‵tau o tupu i te olaga, feng shui, mo te tapuakiga ki tupuga. I te otiga ne iloilo ne ia a talitonuga konei, ne fai mai a ia: “Ko iloa ne au me i akoakoga mo tuu mo aganuu konei e se fetaui kae e faka‵numi tino. Ne iloa ne au me e se ‵tonu sāle a fakamatalaga o fetū. Kae pelā mo te ‵toe fanau mai ki se isi mea, kafai ko seai ne au mea e masaua i tou olaga mua, e mafai pefea o ‵fuli ne koe ke tai ‵lei atu au faifaiga i te suā olaga?”

E pelā mo te mea ko iloa ne Hào, Qiuming, mo nisi tino e tokouke, a ‵tou olaga i aso mai mua e se fakavae ki te talitonu me ko oti ne palani a mea e ‵tau o ‵tupu i te olaga, fetū, ‵tou tupuga kolā ko ‵mate, io me ko te ‵toe fanau mai ki se isi mea. E mata, e fakauiga i ei me e seai ne ‵tou mea e mafai o fai ke faka‵lei aka ‵tou olaga i aso mai mua?

E mafau‵fau a nisi tino me i te auala ke maua ei se olaga ‵lei i aso mai mua ko te kausaki atu ki akoakoga ma‵luga mo koloa. Ne a ikuga ne maua ne tino kolā ne filifili aka ke fai penā?