E Mata, e Isi se Auala Mautinoa ki se Olaga Gali i Aso Mai Mua?

E pelā mo mea ne fakamatala mai i mataupu mai mua, ne taumafai a tino ke maua se olaga tai ‵lei atu i aso mai mua mai te fakalagolago ki mea pelā mo te talitonu me ko oti ne palani a mea ‵tupu i te olaga, akoakoga, koloa, mo te fai fua mo fai se tino ‵lei. A te fakaaogaga o auala konei e pelā eiloa mo te fakaaogaga ne koe o se mape ‵se ke fanatu ei koe ki se koga fou. E mata, e fakauiga i ei me e seai se auala mautinoa ki se olaga gali i aso mai mua? Ikai!

FAKATAKITAKIGA MAI I TE ‵TOE TINO ‵LEI

Kafai e fai a fakaikuga, e masani o ‵sala tatou ki manatu fesoasoani mai i se tino telā e matua kae poto atu i a tatou. I se auala tai ‵pau, e mafai o maua ne tatou se auala mautinoa ki se olaga gali i aso mai mua mai i se Tino, telā e matua kae poto fakafia atu i a tatou. Ne maua ne tatou a pati fakatonutonu mai te Tino tenei e auala tusitusiga tapu kolā ne kamata o tusi i se 3,500 tausaga ko ‵teka. A tusitusiga tapu konei ko te Tusi Tapu.

Kaia e mafai ei o talitonu koe ki te Tusi Tapu? Me ne māfua mai i te ‵toe Tino matua kae poto eiloa i te iunivesi. E fakasino atu ki a ia e pelā me “ko Ia Telā Mai Aso Mua” kae “mai te se-gata-mai ki te se-gata-mai.” (Tanielu 7:9; Salamo 90:2) A ia ko “te Mafuaga o te lagi, te Atua tonu, te Atua telā ne fakafoliga ne ia te lalolagi.” (Isaia 45:18) Ne taku mai eiloa ne ia tena igoa totino, ko Ieova.—Salamo 83:18.

Ona ko te Tusi Tapu ne mai i te Mafuaga o tino katoa, e se fapito a ia ki se tuu io me se matakāiga e tasi. A pati fakatonutonu i ei e aoga mō taimi katoa kae ne maua ne tino mai fenua katoa a mea aoga mai i ei. E mafai o maua i ‵gana e uke kae ko te ‵toe tusi lauiloa ne tufatufa atu i lō nisi tusi.a Ko tena uiga e mafai ne tino i koga katoa o malamalama i ei kae tau‵tali ki ei. E ‵lago atu a manatu ‵tonu konei ki pati eiloa a te Tusi Tapu:

“Te Atua e se fakailoga tino, kae ko te tino mai so se fenua telā e mataku ki a ia kae fai mea tonu e talia eiloa ne ia.”—GALUEGA 10:34, 35.

E pelā eiloa mo se mātua alofa telā e fesoasoani atu ki ana tama‵liki, a Ieova te Atua se Tamana alofa telā e fesoasoani mai e auala i tena Muna, ko te Tusi Tapu. (2 Timoteo 3:16) E mafai o talitonu koe ki tena Muna; me ne faite ne ia tatou kae e iloa foki ne ia te ‵toe olaga ‵lei mō tatou.

FAKATAKITAKIGA KOLĀ E FAKATALITONUGINA

E mafai o tali‵tonu tatou me i te Tusi Tapu se tusi telā e fakatalitonugina ke maua ei se olaga gali i aso mai mua, me ne ‵valo tonu mai i se 2000 tausaga ko ‵teka a mea ‵tupu i te lalolagi mo uiga o tino kolā ko lavea atu ne tatou i aso nei.

MEA ‵TUPU

“Ka fai taua te suā atufenua ki te suā atufenua, mo te suā malo ki te suā malo. Ka isi ne mafuie fakama‵taku, mo oge meakai mo famai i koga katoa.”—LUKA 21:10, 11.

UIGA

“Ka oko mai eiloa a toe taimi faiga‵ta i aso fakaoti. Me i tino ka a‵lofa fua ki a latou eiloa, fia‵fai tupe, fai‵pati fakamata‵mata, fakamaua‵luga, muna ma‵sei, e se faka‵logo ki mātua, e se loto fakafetai, e se fakamaoni, seai se alofa masani, e se lotoma‵lie ki so se feagaiga, e gutu fatu‵fatu, e seai se loto pulea, e amio fakasaua, e se fia‵fia ki te aga‵lei, e faitogafiti, e ma‵keke olotou ulu, e ‵fonu i te fakamatamata, e va‵lea ki fakafiafiaga i lō te a‵lofa ki te Atua.”—2 TIMOTEO 3:1-4.

Se a te mea ka fakaiku aka ne koe me ko taunu eiloa i aso nei a pati kolā ko leva ne ‵valo tonu mai i te Tusi Tapu? E mautinoa me ka lotomalie eiloa koe ki pati konei ne fai mai ne Leung, mai i Hong Kong: “Ko leva ne tusi a valoaga i te Tusi Tapu. E seai se tino e mafai o ‵valo tonu mai ne ia a mea konei. E ‵tau o fakaosofia a te Tusi Tapu ne se tino telā e poto fakafia atu i a tatou.”

E maua i te Tusi Tapu a te fia selau o valoaga kolā ko oti ne fakataunu.b E fakamaoni mai i mea konei me i te Tusi Tapu ko te Muna eiloa a te Atua. “Au ko te Atua, kae e seai se atua e ‵pau mo au,” ko pati a Ieova. “Ne ‵valo ne au te mea ka tupu mai te kamataga.” (Isaia 46:9, 10) Tela la, ko maua ne koe a pogai ‵lei ke fakalagolago ki pati i te Tusi Tapu e uiga ki te olaga i aso mai mua.

FAKATAKITAKIGA KOLĀ E AOGA KI A KOE NEI KAE PENĀ FOKI KI TE SE-GATA-MAI

Kafai e tautali koe ki fakatakitakiga i te Tusi Tapu, ka maua ne koe a mea aoga. Mafaufau ki nai mea aoga konei.

TE KILOKILOGA PALENI KI TUPE MO GALUEGA

“E ‵lei atu ke ‵fonu te lima e tasi i te malōlō i lō te ‵fonu o te avā lima i te faiga o galuega ‵mafa mo te afuliga o te matagi.”—FAILAUGA 4:6.

OLAGA FAKA-TE-KĀIGA

“E ‵tau mo koutou taki tokotasi o a‵lofa ki otou avaga e pelā mo koutou ki a koutou eiloa; i te suā feitu, a te fafine avaga e ‵tau o āva malosi ki tena avaga.”—EFESO 5:33.

KE FEALOFANI MO NISI TINO

“Tuku kea‵tea te kaitaua kae tiaki te ita; ke mo a ma kaitaua kae ‵fuli atu koe o fai a te mea masei.”—SALAMO 37:8.

Kafai e fakagalue a pati i te Tusi Tapu, ka maua ne koe a mea aoga i te taimi nei kae ‵tala mai ei ki a koe a te auala ki se olaga gali i aso mai mua. E maua ne tatou i te Tusi Tapu a te folafolaga a te Atua ki se olaga gali i aso mai mua telā e aofia i ei

TE FILEMU MO TE TOKAGAMALIE

“Ka maua ne latou te fiafiaga sili ona ko te lasi o te filemu.”—SALAMO 37:11.

KA TOFU A TINO KATOA MO FALE MO MEAKAI

“Ka faite ne latou olotou fale kae ‵nofo i ei, kae ka ‵toki ne latou a togavine kae ‵kai ki olotou fuataga.”—ISAIA 65:21.

KA SE TOE AI NE MASAKI IO ME KO TE MATE

“Ka se toe ai se mate, ka se toe ai foki se fanoanoa, se tagi io me se ‵mae.”—FAKAASIGA 21:4.

Ne a mea e ‵tau o fai ne koe ke maua se olaga penā i aso mai mua? Onoono ki te suā mataupu.

a Ke maua a nisi fakamatalaga e uiga ki te ‵fuliga mo te tufatufaatuga o te Tusi Tapu, fano ki te www.jw.org kae onoono mai lalo o te BIBLE TEACHINGS > HISTORY & THE BIBLE.

b Ke maua a nisi fakamatalaga, onoono ki te mataupu e 9 o te tusi The Bible—God’s Word or Man’s? telā ne ‵lomi ne Molimau a Ieova. E mafai o maua i te www.jw.org. Onoono mai lalo i te LIBRARY > BOOKS & BROCHURES.