Te Mea Tonu mo te Mea ‵Se: Te Tusi Tapu—Te ‵Toe Takitakiga ‵Lei

E MA‵NAKO TATOU KI TE TAKITAKIGA A TE ATUA

Ne fakamatala mai ne Ieovaa te Atua i te Tusi Tapu me ne manako a ia ke ‵sala atu a tino ki tena takitakiga, kae ke mo a ma takitaki ne latou a latou eiloa. (Ielemia 10:23) Tenā te pogai ne tuku mai ei ne ia a fakatonuga e uiga ki te mea tonu mo te mea ‵se i te Tusi Tapu. E alofa a ia ki tino kae e se manako ke fai ne tatou a fakaikuga sē ‵lei kolā ka logo‵mae i ei tatou kae fai ei ke faigata ‵tou olaga. (Teutelonome 5:29; 1 Ioane 4:8) E sili atu i ei, e pelā me ko te ‵tou Mafuaga, e maua ne ia te poto mo te iloaga e manakogina ke tuku mai a toe manatu fakatonutonu ‵lei e uiga ki te mea tonu mo te mea ‵se. (Salamo 100:3; 104:24) Kae e se faimālō ne te Atua a tino ke ola e ‵tusa mo ana tulaga.

Ne tuku atu ne Ieova ki te tagata mo te fafine muamua, ko Atamu mo Eva, a mea katoa e manakogina ke maua ne lāua te fiafia tonu. (Kenese 1:​28, 29; 2:​8, 15) Ne tuku atu foki ne ia a fakatonuga faigofie kolā ne manako a ia ke faka‵logo lāua ki ei. Kae ne tuku ne ia ke filifili ne lāua me faka‵logo lāua ki fakatonuga konā io me ikai. (Kenese 2:​9, 16, 17) Se mea fakafanoanoa me ne filifili ne Atamu mo Eva ke ola lāua e ‵tusa mo mea e ma‵nako lāua ki ei i lō tulaga o te Atua. (Kenese 3:6) Ne a mea ne iku mai i ei? E mata, e ‵lei atu ke filifili ne tino i a latou eiloa a te mea tonu mo te mea ‵se? Ikai. E fakamaoni mai i mea ne ‵tupu i olaga o tino me e se mafai o maua te filemu mo te fiafia tumau e aunoa mo tulaga o te Atua.—Failauga 8:9.

E fakaasi mai i te Tusi Tapu a te takitakiga e manakogina ne tatou ko te mea ke fai a fakaikuga ‵poto e uiga ki te mea tonu mo te mea ‵se, faitalia te koga mo te olaga e ola i ei tatou. (2 Timoteo 3:​16, 17; onoono ki te pokisi “Se Tusi mō Tino Katoa.”) Mafaufau ki te auala e fakaasi mai ne te Tusi Tapu a te mea tenā.

Tauloto ki mea e uke e uiga ki te pogai e mafai o taku te Tusi Tapu me ko “te muna a te Atua.”—1 Tesalonia 2:13. Onoono ki te vitio Ko oi te Tino ne Aumai ne Ia te Tusi Tapu? i te jw.org.

TE AUALA E FAKAASI MAI I TE TUSI TAPU TE TAKITAKIGA A TE ATUA

A te Tusi Tapu e tusi i ei a tala ‵tonu e uiga ki faifaiga a te Atua ki tino. A mea e aofia i ei e fesoasoani mai ke malama‵lama tatou i te kilokiloga a te Atua e uiga ki te mea tonu, te mea ‵se, te mea aoga mo te mea fakamataku. (Salamo 19:​7, 11) E tauloto ne tatou a fakatakitakiga aoga e uke kolā e fesoasoani mai ke fai ne tatou a filifiliga ‵poto e uiga ki te mea tonu mo te mea ‵se i aso takitasi.

E pelā mo se mea e tasi, mafaufau ki pati fakatonutonu e maua i te Faataoto 13:20: “A te tino e sa‵sale fakatasi mo tino ‵poto ka poto, kae ko te tino telā e fai mea fakatasi mo tino va‵lea ka iku atu ki te masei.” Koi ‵pau eiloa te aoga o te fakatakitakiga tenā i ‵tou lalolagi i aso nei mo tena aoga i aso mua. Ko ‵fonu te Tusi Tapu i fakatakitakiga aoga kae tāua penā.—Onoono ki te pokisi “Te Poto Mai te Tusi Tapu Telā Koi Tumau Tena Aoga.”

Kāti ka mafaufau ifo koe, ‘Kae e mautinoa pefea i a au me koi aoga eiloa i aso nei a fakatonuga i te Tusi Tapu e uiga ki te mea tonu mo te mea ‵se?’ Ka fakamatala mai i te suā mataupu a fakaakoakoga o mea ‵tonu kolā ne ‵tupu.