E Mafai o Manumalo Tatou i Lagonaga Takalialia!

Kafai e seki fai penā, kāti ko oti ne lavea ne koe a vaegā faifaiga penā. E ‵logo tatou i lipoti e uiga ki te takalia‵lia o tino ki nisi tino ona ko olotou fenua, itukāiga, io me ko olotou amioga fakasotoma. Ona ko mea konā, ne fai ei ne malo a tulafono ke puipui a tino mai i lagonaga takalia‵lia penā.

E masani o fakaasi atu a lagonaga takalialia ne tino kolā ne fakaasi atu ki ei a lagonaga penā. E ma‵nako sāle a tino penei ke taui ma sui atu kae ko fai ei pelā me se tamilosaga telā ko se mafai o fakagata.

Kāti ko oti ne fepaki koe mo faifaiga fakailoga tino, te fakakese‵kese tino, pati fakatauemu, pati se ‵tau, mo fakamatakutakuga. Kae e uke atu a mea aofia i lagonaga takalialia. E masani o iku atu ki te kaitaua malosi, amioga takafia‵toa, ofa kope o tino, fusu, pukemālō, tatino, io me tamate se matakāiga.

Ka tali aka i te mekesini tenei a fesili konei mai lalo kae fakaasi mai te auala e mafai o manumalo i lagonaga takalialia:

• Kaia ko lauiloa malosi ei a lagonaga takalialia?

• E fakagata pefea te tamilosaga o lagonaga takalialia?

• E mata, e isi se taimi ka fakaseai atu katoatoa a lagonaga takalialia?