Te Taimi ka Fakaseai Katoatoa a Lagonaga Takalialia!
Kafai foki loa e tapale keatea ne tatou a lagonaga takalialia mai ‵tou loto, e se mafai eiloa ne tatou o fakagata a faifaiga mo uiga o nisi tino. Koi tumau eiloa te pokotia o tino e seai ne mea ‵se ona ko lagonaga takalia‵lia o nisi tino. Tela la, se a te faka‵leiga tumau ki lagonaga takalialia?
Ko Ieova te Atua fua e mafai o faka‵lei katoatoa ne ia a lagonaga takalialia e lavea ne tatou i aso nei. Tenā eiloa te mea ka fai ne ia e ‵tusa mo te folafolaga i te Tusi Tapu.—Faataoto 20:22.
KA FAKASEAI NE TE ATUA A MĀFUAGA O LAGONAGA TAKALIALIA
1. SATANI TE TIAPOLO. A Satani, te agelu ‵teke, ko te māfuaga eiloa o lagonaga takalialia e lavea ne tatou i aso nei. Ka fakaseai ne te Atua a Satani mo tino katoa kolā e maua a lagonaga takalialia ki nisi tino e pelā mo ia.—Salamo 37:38; Loma 16:20.
2. TE LALOLAGI A SATANI TELĀ E ‵FONU I LAGONAGA TAKALIALIA. Ka fakaseai atu ne te Atua a mea ma‵sei katoa o te lalolagi tenei, e aofia i ei a tino fakapolitiki mo takitaki lotu sē fakamaoni kolā e fakamalosi aka ne latou a lagonaga takalialia. Ka fakaseai foki ne te Atua a pisinisi kaima‵nako fakatasi mo olotou faifaiga sē fakamaoni katoa.—2 Petelu 3:13.
3. TULAGA SĒ ‵LEI KATOATOA O TINO. E fai mai te Tusi Tapu me ko maua ne tino katoa te tulaga sē ‵lei katoatoa—ko te manakoga ke mafaufau, ke lagona, kae fai a mea ma‵sei. (Loma 5:12) Tasi o mea konā ko te mauaga mo te fakaasi atu o lagonaga takalialia ki nisi tino. Ka fesoasoani mai eiloa a te Atua ki a tatou ke manumalo i manakoga ma‵sei katoa ko te mea ke fakaseai katoatoa atu a lagonaga takalialia.—Isaia 54:13.
E FOLAFOLA MAI I TE TUSI TAPU E UIGA KI SE LALOLAGI TELĀ KA SEAI NE TINO MO LAGONAGA TAKALIALIA I EI
1. KA SE POKOTIA SE TINO I FAIFAIGA SĒ FAKAMAONI. Ka pule te lalolagi ne te Malo o te Atua, se malo fai mea tonu kae tumau ki te se-gata-mai telā e tu i te lagi. (Tanielu 2:44) Ka se toe ai se uiga fakailoga tino. Ka faka‵tonu aka ne te Atua a faifaiga sē fakamaoni katoa kolā e fe‵paki mo tino i aso nei.—Luka 18:7.
2. KA MAUA NE TINO KATOA TE FILEMU. Ka se toe logo‵mae se tino ona ko fakasauaga io me ko taua. (Salamo 46:9) Ka filemu te lalolagi me ka ‵nofo fua i ei a tino kolā e fia‵fia ki te filemu.—Salamo 72:7.
3. KA OLA A TINO KATOA KI TE SE-GATA-MAI I TULAGA ‵LEI KATOATOA. A tino katoa o te lalolagi ka fakatau fakaasi atu te alofa tonu. (Mataio 22:39) Ka se toe ai se mea e fakalogo‵mae atu ki se tino, ke oko foki loa ki mafaufauga mo mea sē ‵lei ne ‵tupu. (Isaia 65:17) I te taimi tenā, ka maua eiloa ne tino kolā e seai ne olotou lagonaga takalialia a “te fiafiaga sili ona ko te lasi o te filemu.” —Salamo 37:11.
E a, e olioli koe ke ola i se lalolagi penā? Ke oko mai nei, koi taumafai eiloa a tino e tokouke ke tapale keatea a lagonaga takalialia mai te fakagalue aka o akoakoga fakavae i te Tusi Tapu. (Salamo 37:8) Tenā eiloa te mea e fai ne te fia miliona o Molimau a Ieova i te lalolagi kātoa. E tiga eiloa te kese‵kese o tuu mo aganuu mo olaga ne ‵mai ei latou, e ‵kau fakatasi kae fakatau a‵lofa eiloa latou pelā me se kāiga.—Isaia 2:2-4.
E fia‵fia eiloa a Molimau a Ieova o fakaasi atu a mea ne tauloto ne latou ki te auala ke fakafesagai atu ki faifaiga sē fakamaoni mo te fakakese‵kese tino. Au mea ne tauloto ka fesoasoani atu eiloa ke sui so se lagonaga takalialia ki te alofa. E mafai o tauloto koe ki te auala ke fakaasi atu te atafai ki tino—ke oko foki loa ki tino kolā e seai se loto fakafetai io me fakaasi atu a lagonaga takalialia. Kae ka iku atu ei ki te mauaga ne koe a te fiafia sili kae ka gasolo o ‵lei atu ou fesokotakiga mo nisi tino. Kae sili atu i ei, ka iloa ne koe a mea e ‵tau o fai ke mafai o ola mai lalo i te Malo o te Atua, ko te taimi telā ka fakaseai atu a lagonaga takalialia.—Salamo 37:29.