Ke Maua te Filemu Māfai ko Tupu se Fakalavelave

1. Se a “te filemu o te Atua,” kae ne a mea aoga e maua ne tatou mai i ei? (Filipi 4:6, 7)

E ISI se vaegā filemu telā e se iloa ne te lalolagi. Ko “te filemu o te Atua,” ko lagonaga tokagamalie kolā e maua mai i se fesokotakiga tāua mo te ‵tou Tamana faka-te-lagi. Kafai e maua ne tatou te filemu o te Atua, e maua ne tatou a lagonaga tokagamalie. (Faitau te Filipi 4:6, 7.) E maua ne tatou a va fakataugasoa ‵pili mo nisi tino kolā e a‵lofa ki a ia. Kae e maua foki ne tatou se fesokotakiga pili mo “te Atua o te filemu.” (1 Tesa. 5:23) Kafai e iloa, tali‵tonu, kae faka‵logo tatou ki te ‵tou Tamana, e fakafilemu aka ne te filemu o te Atua ‵tou loto manava‵se māfai ko fe‵paki tatou mo se tulaga faigata.

2. Kaia e tali‵tonu tatou me e mafai o maua te filemu o te Atua?

² E mata, e mafai eiloa o maua te filemu o te Atua māfai ko fe‵paki mo se matugā fakalavelave lasi e pelā mo se masaki ‵pisi, fakalavelave o te natula, tamā taua i te fenua, io me ko fakasauaga? E mafai o fai ne se matugā fakalavelave penei ke ma‵taku tatou. Kae ne polopoloki atu a Iesu ki ana soko: “Ke mo a ma ‵pole otou loto io me e ma‵taku koutou.” (Ioa. 14:27) Se mea fakafiafia me ne faka‵logo a taina mo tuagane ki te fakatakitakiga tenā a Iesu. Fakatasi mo te fesoasoani o Ieova, ne mafai ne latou o maua a lagonaga filemu i te taimi ne fakafesagai atu ei ki tofotofoga faiga‵ta.

KE MAUA TE FILEMU I TAIMI O MASAKI ‵PISI

3. Ne fakamakosu pefea ne masaki ‵pisi a ‵tou filemu?

³ E mafai eiloa o ‵fuli ne masaki ‵pisi a feitu katoa o te olaga. Mafaufau ki te mea ne tupu ki te tokoukega o tino ona ko te COVID-19. I se sukesukega e tasi, e silia atu i te āfa o tino ne lipoti mai me ne seki mafai o ‵moe ‵lei i te taimi o te masaki ‵pisi tenā. Ne fai ne te masaki ‵pisi ke momea aka te manava‵se o tino, te loto mafatia, te fakaaoga ‵se o meainu ma‵losi mo vailakau tapu, fakasauaga i kāiga, mo taumafaiga ke faka‵mate. Kafai ne masei ‵ki a te masaki ‵pisi i te koga e nofo koe i ei, e mafai pefea o pule faka‵lei atu koe ki tou manavase kae maua te filemu o te Atua?

4. Kaia e maua ei ne tatou te filemu mai te iloaga o te valoaga a Iesu e uiga ki aso fakaoti?

⁴ Ne ‵valo mai a Iesu me ka isi ne famai mo masaki ‵pisi “i koga katoa” i aso fakaoti konei. (Luka 21:11) E maua pefea ne tatou te filemu ona ko te iloa atu o te mea tenā? E se ‵poi tatou i masaki ‵pisi. E iloa ne tatou me e ‵tau o ‵tupu muamua a vaegā mea penā e pelā eiloa mo pati a Iesu. Tela la, e maua ne tatou a te pogai ‵lei ke faka‵logo ki te fakatakitakiga a Iesu telā ne tuku atu ki a latou kolā e ola i te taimi o te gataga: “Ke mo a ma ‵poi koutou.”—Mata. 24:6.

5. (a) E ‵tusa mo te Filipi 4:8, 9, ne a mea e ‵tau o ‵talo atu tatou ki ei māfai ko fe‵paki tatou mo se masaki ‵pisi? (e) E aoga pefea ki a koe a te fakalogologo ki te faitauga o te Tusi Tapu i te ‵tou fakatuatusi?

⁵ A te salalau atu o se masaki ‵pisi e mafai o iku atu ki se tulaga sē toka, ke oko foki ki te manavase. Tenā te mea ne tupu ki se tuagane e igoa ki a Desi.b I te otiga ne ‵mate atu a tena fakatamana, tena fakataina, mo se tokita i te COVID-19, ne mataku tou fafine i a ia ma masaki kae faka‵pisi atu ki tena mātua telā ko lōmatua ‵ki. Ne tu atu tena galuega ‵togi i se tulaga fakamataku ona ko te masaki ‵pisi, tela la, ne mafaufau tou fafine me ka ‵togi pefea ne ia a mea‵kai mo te fale. Ne kamata o manavase faeloa a ia ki mea konei kae ne seki moe ‵lei ei a ia i te po. Kae ne toe maua ne Desi a lagonaga filemu. E pefea la? Ne ‵talo atu eiloa tou fafine ki te fesoasoani o Ieova ke fakafilemu ana lagonaga kae ke mafaufau faeloa ki feitu ‵lei. (Faitau te Filipi 4:8, 9.) Ne fakalogologo a ia ki a Ieova i te taimi ne “faipati” atu ki tou fafine e auala i te faitauga o te Tusi Tapu i te neti. Ana muna, “E fai ne leo o tino fai‵tau ke fakafilemu toku manavase, kae fakamasaua mai i ei a te alofa fakamagalo o Ieova.”—Sala. 94:19.

6. Ka fesoasoani atu pefea au sukesukega totino mo fakatasiga a te fakapotopotoga?

⁶ E mautinoa me e mafai o fakamakosu ne so se masaki ‵pisi a nisi vaega o faifaiga masani, kae ke mo a ma talia ne koe ke fakalavelave atu ki au sukesukega totino io me ko te kau atu ki fakatasiga. A tala ‵tonu kolā e maua i ‵tou tusi mo vitio, ka fakamasaua atu ki a koe a te tumau ou taina mo tuagane i te fakamaoni faitalia a tulaga faiga‵ta tai ‵pau. (1 Pe. 5:9) Ka fesoasoani atu a fakatasiga ke faka‵fonu tou mafaufau ki manatu ‵lei faka-te-Tusi Tapu. Ka maua foki ei ne koe a avanoaga ke fakamalosi atu ki nisi tino, kae ka fakamalosigina foki koe. (Loma 1:11, 12) Kafai e mafaufau koe ki te auala ne fesoasoani atu a Ieova ki ana tino tapuaki i taimi ne ma‵saki, ma‵taku, io me maua a lagonaga sē sologa, ka fakamalosi aka tou fakatuanaki mo tou loto talitonu me ka fesoasoani atu foki a ia ki a koe.

7. Se a te akoakoga e mafai o tauloto ne koe mai i te apositolo ko Ioane?

⁷ Taumafai ke fesoasoani atu ki ou taina mo tuagane. E mafai o manakogina ke tumau i te faka‵mao o tatou mai nisi tino, māfai ko salalau atu se masaki ‵pisi, ke oko foki ki taimi e ‵tau ei o ‵nofo fakatasi tatou mo ‵tou taina tali‵tonu. I se taimi penā, e mafai o maua ne tatou a lagonaga e pelā mo te apositolo ko Ioane. Ne manako a ia ke fetaui faka‵lei mo tena taugasoa ko Kaio. (3 Ioa. 13, 14) Kae ko leva ne iloa ne Ioane me ne seki mafai o lavea ne ia a Kaio. Tela la, ne fai ne Ioane a te mea e mafai ne ia o fai; ne avatu ne ia se tusi ki a Kaio. Kafai e se mafai ne koe o asi atu ki ou taina mo tuagane, taumafai ke fesokotaki atu ki a latou e auala i te telefoni, i te neti, io me lafo atu se fekau ki olotou selefoni. Kafai e fesokotaki faeloa koe mo ou taina Kelisiano, ka momea aka tou tokagamalie mo te filemu. Taumafai ke fesokotaki atu ki toeaina kae maise māfai ko maua ne koe se lagonaga manavase malosi, kae talia olotou fakamalosiga a‵lofa.—Isa. 32:1, 2.

KE MAUA TE FILEMU MĀFAI KO FE‵PAKI MO SE FAKALAVELAVE O TE NATULA

8. E fakamakosu pefea ne se fakalavelave o te natula a tou filemu?

⁸ Kafai ko pokotia koe i se lofiaga, se mafuie, io me se afi, e mafai eiloa o maua ne koe a lagonaga manavase i se taimi leva mai tua ifo i ei. Kafai ne ‵galo atu ou tino pele, io me ne fakamasei ou kope, e mafai o lagona ne koe a te loto mafatia, seai se fakamoemoega, io me kaitaua. E se fakauiga i ei me i a koe e fiafai kope io me ko se lava tou fakatuanaki. Ne fatoa fepaki koe mo se tofotofoga faigata kae e mafai o fakamoe‵moe a nisi tino ke maua ne koe se kilokiloga sē ‵lei. (Iopu 1:11) Kae faitalia a fakanofonofoga fakafi‵ta, e mafai o maua ne koe te filemu. E pefea la?

9. Ne fakatoka pefea tatou ne Iesu mō fakalavelave ‵tupu?

⁹ Masaua a te mea ne ‵valo mai ne Iesu. E se pelā mo nisi tino i te lalolagi kolā e se mafai o mafau‵fau me ka pokotia latou i se fakalavelave o te natula, e fakamoe‵moe tatou me ka gasolo aka o ma‵sei atu a mea ‵tupu, nisi mea mai i ei e mafai o pokotia tatou. Ne fai atu a Iesu ki ana soko me ka isi ne “mafuie fakama‵taku” mo nisi fakalavelave o te natula kolā e ‵tau o ‵tupu a koi tuai o oko mai te gataga. (Luka 21:11) Ne ‵valo mai foki ne ia a te “gasolo aka o amioga soli tulafono,” kolā ko lavea faka‵lei atu i te ofa tulafono, amioga fakasaua, mo amioga ‵teke a te kau takafia‵toa. (Mata. 24:12) Ne seki fai mai a Iesu me ka pokotia fua a latou kolā ne tiakina ne Ieova. A te ‵tonuga loa, ka pokotia foki i ei a tavini fakamaoni e tokouke a Ieova i fakalavelave o te natula. (Isa. 57:1; 2 Koli. 11:25) E mafai o se puipui fakavavega a tatou ne Ieova mai i fakalavelave ‵tupu katoa, kae ka tuku mai ne ia so se mea e manakogina ke mafai o maua ne tatou a lagonaga tokagamalie kae filemu.

10. Kaia e fai ei a te fakatokatoka nei mō se fakalavelave o te natula e pelā me se fakaasiga o te fakatuanaki? (Faataoto 22:3)

¹⁰ Ka sili atu te faigofie ke se pole‵pole tatou i taimi o fakalavelave tupu fakafuasei māfai ne fakatokatoka faka‵lei tatou ki ei. Kae e mata, e fakaasi mai i te fakatokatoka faka‵lei a te sē lava o te ‵tou fakatuanaki ki a Ieova? Ikai, e se penā loa. A te ‵tonuga, a te fakatokatoka mō se fakalavelave tupu o te natula, e fakaasi atu me e fakatuanaki tatou ki tena malosi ke tausi mai ki a tatou. E pefea la? E fakamalosi mai te Muna a te Atua ke fakatokatoka tatou mō fakalavelave kolā e mafai o ‵tupu. (Faitau te Faataoto 22:3.) Kae e auala i mataupu i mekesini, fakatasiga i te fakapotopotoga, mo faka‵pulaga i te taimi tonu, ne fakamalosi mai faeloa te fakapotopotoga a te Atua ke fakatoka tatou mō se fakalavelave tupu fakafuasei.c E mata, e tali‵tonu tatou ki a Ieova? Kafai e penā loa, ka faka‵logo nei tatou ki te fakamalosiga tenā—a koi tuai o tupu se fakalavelave o te natula.

11. Se a te akoakoga e tauloto ne koe mai i a Margaret?

¹¹ Mafaufau ki te tala o te tuagane e igoa ki a Margaret. Ne fakatonu atu ke tiaki tena fale i te taimi ne ‵ka ei te afi i tena kogā koga. Ona ko te tokouke o tino ne taumafai o ‵tele atu keatea i te taimi e tasi, ne sai‵tia te auala kae ne ‵tau o faka‵tali a motoka. Ne gasolo o matolu te ea i ausaga uli, kae ne ‵lave a Margaret i tena motoka mō se taimi leva. Kae ne sao tou fafine me ne fakatokatoka faka‵lei. Ne tausi ne ia i tena pausi tupe se mape telā e mafai o fesoasoani atu ke fanatu a ia i te auala tonu. Ko oti ne fakatele sāle atu tena motoka i te auala tenā ko te mea ke mafai o faigofie ke fanatu a ia i ei māfai ko tupu fakafuasei se fakalavelave. Fakafetai tatou ki ana fakatokatokaga me ne sao atu a Margaret.

12. Kaia e faka‵logo ei tatou ki fakatonuga kolā e puipui ei tatou?

¹² Ke puipui tatou kae ke toe fakatoka faka‵lei, e mafai o fakamolemole mai a tino pule‵pule, ke faka‵logo tatou ki tulafono e uiga ki te sē oloolo, ke ‵tele keatea, io me ke fai a nisi mea kolā e ‵tau o fai. E tuai o faka‵logo io me fakatalave a nisi tino ona ko te mea e ma‵nako latou o tausi olotou kope. E ‵saga atu pefea a Kelisiano ki ei? E fai mai te Tusi Tapu: “Ke faka‵logo koutou ki pulega katoa a tāgata ona ko te Aliki, faitalia me se tupu telā e maluga io me ko kovana kolā e uga atu ne ia.” (1 Pe. 2:13, 14) E tuku mai foki ne te fakapotopotoga a te Atua a fakatonuga kolā e puipui ei tatou. E fakamasaua mai faeloa ke tuku atu a ‵tou napa telefoni ‵fou ki toeaina ko te mea ke mafai o fesokotaki mai latou i taimi o fakalavelave ‵tupu fakafuasei. Kai fai ne koe te mea tenā? E mafai foki o maua ne tatou a fakatakitakiga e uiga ki koga e mafai o ‵tele atu ki ei, te auala ke ‵tele atu, penā foki loa mo te mauaga o fesoasoani io me ko te auala mo te taimi ke fesoasoani atu ki nisi tino. Kafai e fakata‵mala tatou o faka‵logo, e mafai o fakamataku ki ‵tou ola kae penā foki ki ola o toeaina. Masaua me i tāgata fakamaoni konei e tausi faka‵lei mai ki a tatou. (Epe. 13:17) Ne fai mai a Margaret, “E talitonu katoatoa au me i te fakalogo ki fakatonuga e tuku mai ne toeaina mo te fakapotopotoga ne fakasao ei toku ola.”

13. Se a te mea ne mafai ei o maua ne Kelisiano e tokouke kolā ne ‵tele atu ki nisi koga, a te fiafia mo te filemu?

¹³ A taina mo tuagane e tokouke kolā ne ‵tele ki nisi koga ona ko fakalavelave o te natula, io me ko taua io me ko tamā taua i olotou fa‵kai, ne fai ne latou te ‵toe mea e mafai ke fakafetaui aka ki olotou olaga ‵fou, kae ne aofia fakavave latou i faifaiga faka-te-agaga. E pelā mo Kelisiano mua kolā ne salalau atu ona ko fakasauaga, ne tumau latou i te “folafola te tala ‵lei e uiga ki te muna a te Atua.” (Galu. 8:4) E fesoasoani atu a te galuega talai ke ‵saga tonu latou ki te Malo i lō olotou fakanofonofoga faiga‵ta. Ne iku atu i ei ki te fakatumau ne latou te lotou fia‵fia mo te filemu.

KE MAUA TE FILEMU MĀFAI KO FAKASAUAGINA

14. E fakamakosu pefea ne fakasauaga a te ‵tou filemu?

¹⁴ E mafai o ave keatea ne fakasauaga a mea e uke kolā e maua sāle ne tatou i ei a te filemu. E fia‵fia kae lotoma‵lie tatou māfai ko maopoopo fakatasi e aunoa mo ne fakataputapuga, talai atu i koga katoa, kae tumau i ‵tou olaga masani e aunoa mo te manava‵se ki te ‵tou puke fakapagota. Kafai ko ave keatea a saolotoga konā, e mafai o kamata o manava‵se tatou kae ma‵taku ki mea kolā ka ‵tupu. Se mea masani ke maua a lagonaga penei. Kae koi ‵tau o fakaeteete malosi tatou. Ne fakaasi mai ne Iesu me ka fai ne fakasauaga ke vāi‵vai ana soko. (Ioa. 16:1, 2) Tela la, e mafai pefea o fakatumau ne tatou a te ‵tou filemu māfai ko fakasauagina?

15. Kaia e se ‵tau ei o ma‵taku tatou ki fakasauaga? (Ioane 15:20; 16:33)

¹⁵ E fai mai te Muna a te Atua: “Me i tino katoa kolā e ma‵nako o ola kae tapuaki fakamaoni atu ki te Atua i te ‵kau fakatasi mo Keliso Iesu ka fakasauagina foki.” (2 Timo. 3:12) Ne faigata ki se taina e igoa ki a Andrei ke talia a te manatu tenā mai tua o te fakatapuga o te galuega i tena fenua. Ne fai mai tou tagata: ‘Ko tō uke a Molimau i konei. E mafai pefea o puke fakapagota ne tino pule‵pule a matou katoa?’ Kae i lō te mauaga ne Andrei a te filemu, ne fai ne te mafaufauga tenei ke manavase faeloa tou tagata. Ne tuku atu ne nisi taina a te ikuga tenā ki lima o Ieova, mai te taumafai ke se mafau‵fau me ka se mafai o ave fakapagota a latou. Ne iloa ne latou me e mafai o puke fakapagota latou, kae ne seki manava‵se malosi latou e pelā mo Andrei. Tela la, ne fakaiku aka ne ia ke fakaakoako atu ki te lotou kilokiloga kae tuku kātoa atu ne ia a mea ki te Atua. E seki leva kae ne maua ne ia a lagonaga filemu, kae ko maua nei ne ia a te fiafia faitalia a tulaga faiga‵ta. E mafai foki o aoga te mea tenā ki a tatou katoa. E tiga eiloa ne fai mai a Iesu me ka oko mai a fakasauaga, ne fakatalitonu mai foki ne ia me e mafai o tumau tatou i te fakamaoni.—Faitau te Ioane 15:20; 16:33.

16. Ne a fakatonuga e ‵tau o faka‵logo tatou ki ei māfai ko fakasauagina?

¹⁶ Kafai ko fakatapu io me ko se talia lele ke fai ‵tou galuega, e mafai o maua ne tatou a fakatonuga mai te ofisa lagolago mo te kau toeaina. E fai a mea konei ke puipui ei tatou, ke fakamautinoa aka me e tumau i te maua ne tatou a mea‵kai faka-te-agaga kae fesoasoani mai ke tumau tatou i te talai atu e ‵tusa mo te ‵toe mea e mafai ne tatou o fai. Fakaoti ou mafi ke fakalogo ki fakatakitakiga e maua ne koe, faitalia foki e se malamalama katoatoa koe i te pogai. (Iako. 3:17) Ke se fakaasi atu foki a fakamatalaga e uiga ki ‵tou taina mo tuagane io me ko faifaiga a te fakapotopotoga ki a latou kolā e se ‵tau o iloa ne latou.—Fai. 3:7.

17. E pelā mo te kau apositolo i te senitenali muamua, se a te mea e fakaiku aka ne tatou ke fai?

¹⁷ A te pogai tāua e tasi e taua atu ei a Satani ki tino o te Atua, me “e ga‵lue [latou] i te molimau atu e uiga ki a Iesu.” (Faka. 12:17) Sa talia ne koe a Satani mo tena lalolagi ke fakamatakutaku atu ki a koe. A te talai mo te akoako atu faitalia a ‵tekemaiga, e maua i ei ne tatou a te fiafia mo te filemu. I te senitenali muamua, i te taimi ne fakatonu atu ei a takitaki Iutaia ki te kau apositolo ke fakagata te lotou talai atu, ne filifili aka ne tāgata fakamaoni konā ke faka‵logo ki te Atua. Ne tumau latou i te talai atu, kae ne fai ei ne te galuega tenā ke fia‵fia latou. (Galu. 5:27-29, 41, 42) E tonu, kafai e fakatapu te ‵tou galuega, e ‵tau o ‵poto tatou i te taimi e talai atu ei. (Mata. 10:16) Kae kafai e fai ne tatou te ‵toe mea e mafai o fai, ka maua ne tatou a te filemu telā e māfua mai i te fakafiafia atu ki a Ieova mo te fakaasiatuga o se fekau fakaola tino.

“TE ATUA O TE FILEMU KA FAKATASI ATU KI A KOUTOU”

18. Ko oi e mafai o maua mai ei ne tatou a te filemu tonu?

¹⁸ Ke na talitonu me ke oko foki loa ki toe taimi faiga‵ta, e mafai o maua ne tatou te filemu. I vaegā taimi penā, e ‵tau o masaua ne tatou me i te filemu telā e ma‵nako tatou ki ei ko te filemu o te Atua, telā ko Ieova fua e mafai o tuku mai ne ia. Fakalagolago ki a ia māfai ko fepaki koe mo se masaki ‵pisi, se fakalavelave o te natula, io me se fakasauaga. Ke ‵piki ‵mau ki tena fakapotopotoga. Kilo atu ki te olaga gali i aso mai mua. Kafai e fai koe penā, a “te Atua o te filemu ka fakatasi atu ki a koe.” (Fili. 4:9) I te suā mataupu, ka mafau‵fau tatou ki te auala e mafai ei o fesoasoani atu tatou ki taina Kelisiano kolā e fe‵paki mo fakalavelave ke maua ne latou te filemu o te Atua.