1 | ‵Talo—‘‵Pei Atu Otou Manavasega Katoa ki Luga i a Ia’

PATI I TE TUSI TAPU: ‘‵Pei atu otou manavasega katoa ki luga i te Atua, me e atafai a ia ki a koutou.’—1 PETELU 5:7.

Te Uiga o te Mea Tenā

E ‵kami ne Ieova te Atua a tatou ke fai‵pati atu ki a ia e uiga ki so se fakalavelave telā e ‵mafa i ‵tou mafaufau mo ‵tou loto. (Salamo 55:22) E seai se fakalavelave e tō lasi io me tō foliki ke ‵talo atu e uiga ki ei. Kafai e tāua te mea tenā ki a koe, e tāua foki ki a Ieova. A te ‵talo atu ki a ia se auala tāua ‵ki e tasi ke maua i ei ne koe te filemu o te mafaufau.—Filipi 4:6, 7.

Te Aoga o te Mea Tenei

Kafai ko fepaki koe mo fakalavelave tau te ola ‵lei o te mafaufau, e mafai o oko mai a lagonaga me ko koe fua e fai penā. E se malamalama faka‵lei a nisi tino i mea e fe‵paki mo tatou. (Faataoto 14:10) Kae kafai e fakaasi ‵tonu atu ‵tou lagonaga ki te Atua i ‵tou ‵talo, ko fai‵pati atu eiloa tatou ki se tino telā e fakalogologo faka‵lei mai mo te alofa mo te loto malamalama. E lavea ne Ieova tatou, e iloa ne ia ‵tou logo‵maega mo fakalavelave, kae manako a ia ko tatou ke ‵talo atu ki a ia e uiga ki so se mea e manava‵se tatou ki ei.—2 Nofoaiga Tupu 6:29, 30.

A te faipati atu ki a Ieova i ‵talo e fakamalosi aka i ei te ‵tou loto talitonu me e atafai mai a ia ki a tatou. E mafai o ‵pau ‵tou lagonaga mo te faisalamo telā ne ‵talo atu penei: “Ne lavea ne koe toku puapuaga; e iloa ‵lei ne koe te ‵poko o toku fakalavelave.” (Salamo 31:7) A te iloa atu me lavea ne Ieova a mea e fakafesagai mo tatou ka fesoasoani mai eiloa ke kufaki tatou i taimi faiga‵ta. Kae e se lavea fua ne ia a ‵tou puapuaga. E sili atu tena malamalama i mea e fe‵paki mo tatou i lō nisi tino, kae e fesoasoani mai ke maua ne tatou a fakamafanafanaga mo fakamalosiga mai te Tusi Tapu.

Te Auala e Fesoasoani Atu te Tusi Tapu ki a Julian

Pokotiaga o te Manava‵se ki Luga i a Au

“E manava‵se sāle au kae poko foki ne se vaegā masaki o te mafaufau ko te obsessive-compulsive disorder (OCD). E manava‵se sāle au i taimi seki fakamoemoegina. E mafai o ‵lei faeloa au i te taimi nei, kae e se leva ko manava‵se valevale fua au e aunoa mo se pogai. E masani o manava‵se malosi au māfai e tokouke a tino. E manava‵se au ki olotou mafaufauga e uiga ki a au.

“E lasi te fesoasoani e maua ne au mai tino kolā e iloa ne latou toku fakalavelave. Kae fai ‵tonu atu au me e se aoga a nisi manatu fesoasoani o latou. Kae e loto fakafetai au ki olotou taumafaiga o fesoasoani mai.

“I nisi taimi e faigata ki a au ke ‵talo ona ko te manava‵se mo toku masaki ko te OCD. E uke a taumafaiga e ‵tau o fai ko te mea ke tuku tonu toku mafaufau kae ke ‵talo atu ki a Ieova. E uke a mea e mafaufau au ki ei—ko tō uke katoa telā ko ‵numi valevale au. Kafai ko se mafai o taofi aka a mafaufauga konā, ko faigata ei ke fakamatala atu oku mafaufauga mo lagonaga.”

Te Fesoasoani o te Tusi Tapu ki a Au

“Ne tauloto ne au mai aku sukesukega ki te Tusi Tapu me e se manakogina ke ‵loa io me ‵tagi gali au ‵talo ko te mea ke talia koe ne te Atua. Nisi taimi kafai ko se mafai o fakamatala atu ne au oku lagonaga, e ‵talo fakavave atu au: ‘Ieova, fakamolemole fesoasoani mai.’ I konā loa, e lagona ne au me malamalama Ieova i a au kae tuku mai a mea e manakogina ne au i te taimi tenā. I tafa o ‵talo, ne ‵sala foki au ki fesoasoani mai tokita. E fiafia au o fai atu, me ne lasi ‵ki te fesoasoani o mea konā, ko gasolo eiloa o ‵lei toku tulaga. E aoga ‵ki eiloa a taumafaiga e uke ne fai ke faipati atu ki toku Tamana faka-te-lagi kae ke maua ne au tena fesoasoani alofa.”