2 | “Fakamafanafanaga Mai i Tusitusiga Tapu”

PATI I TE TUSI TAPU: “I mea katoa kolā ne tusi i aso mua ne tusi ke akoako ei tatou, me e auala i te ‵tou kufaki mo fakamafanafanaga mai i Tusitusiga Tapu, ko mafai ei o maua ne tatou a te fakamoemoega.”—LOMA 15:4.

Te Uiga o te Mea Tenā

E maua i te Tusi Tapu a manatu fakamafanafana kolā e fakamalosi mai ke kufaki kae fa‵ki i mafaufauga sē ‵lei e maua tatou. E maua foki i te fekau mai te Tusi Tapu se fakamoemoega me i lagonaga logo‵mae ko pili o palele atu.

Te Aoga o te Mea Tenei

E fe‵paki a tatou katoa mo lagonaga logo‵mae i nisi taimi; kae ko latou kolā logo‵mae ona ko te loto mafatia io me ko te manavase e mafai o maua ne latou a lagonaga logo‵mae i aso takitasi. E mafai pefea o fesoasoani mai a te Tusi Tapu?

E tuku mai i te Tusi Tapu a manatu aoga e uke kolā e mafai o sui ki ei a mafaufauga sē ‵lei. (Filipi 4:8) E mafai o faka‵fonu ‵tou mafaufau ki manatu fakamafanafana kae tokagamalie kolā ka fesoasoani mai ke fa‵ki ne tatou a ‵tou lagonaga.—Salamo 94:18, 19.
E fesoasoani mai te Tusi Tapu ke ‵teke ne tatou te manatu me ko seai se ‵tou aoga.—Luka 12:6, 7.
E fakamautinoa mai i tusi fai‵tau e uke i te Tusi Tapu me e se ko tatou fua e fai penā kae e malamalama faka‵lei a te Atua, te ‵tou Mafuaga, i ‵tou lagonaga.—Salamo 34:18; 1 Ioane 3:19, 20.
E folafola mai te Tusi Tapu me ka fai ne te Atua ke se toe masaua ne tatou a mea fakalogo‵mae ne fe‵paki mo tatou. (Isaia 65:17; Fakaasiga 21:4) Kafai e logo‵mae tatou i mafaufauga mo lagonaga kolā e fai ei tatou ke ma‵taku, kāti ka maua eiloa ne tatou te malosi mai te folafolaga tenei.

Te Auala e Fesoasoani Atu te Tusi Tapu ki a Jessica

Pokotiaga o te Loto Mafatia ki Luga i a Au

“I taimi ko 25 ei oku tausaga, ne loto mafatia malosi au i te uke o mea e manava‵se ki ei kae poko au i se vaegā masaki o te mafaufau ko te severe depression. Ne puapuaga faeloa au i te mafaufau ki mea fakalogo‵mae ne ‵tupu i aso mua. Ne fesoasoani mai a tokita ke malamalama au me i toku masaki ne māfua mai i te mafaufau faeloa ki mea sē ‵lei ne ‵tupu i toku olaga i aso ko ‵teka. I tafa o vailakau aoga, ne manakogina ne au se fesoasoani ke iloa kae ke faka‵tonu aka a mafaufauga sē ‵lei.”

Te Fesoasoani o te Tusi Tapu ki a Au

“Kafai ko mafatia malosi au, e maua ne au a lagonaga mataku, manava‵se valevale, kae sē mafai o moe. E masani o fi‵ta malosi au i po ona ko te uke o mea fakamanava‵se tino i toku mafaufau. E pelā mo pati i te Salamo 94:19, e mafai o fakamafanafana kae fakafiafia ne te Atua tatou māfai ko tō uke a mea e manava‵se tatou ki ei. Tenā ne tuku ne au i tafa o toku moega a taku Tusi Tapu mo taku tusi telā e tusi i ei a tusi fai‵tau fakamalosi loto. Kafai ko se mafai o tō taku moe, e faitau au ki nisi fuaiupu mai te Tusi Tapu, ko te mea ke fakamafanafana mai ki a au a mafaufauga o te Atua.

“E fakamalosi mai te Tusi Tapu ke ‵teke ne tatou a manatu kolā e se fetaui mo mea e iloa ne tatou e uiga ki te Atua. I aso mua, ne talitonu au me seai soku aoga kae e se alofagina ne tino. Kae ne tauloto ne au me i te mea tenā e se fetaui mo te Tusi Tapu, telā e fakaasi mai ei me i te Atua se Tamana alofa kae alofa atafai telā e atafai mai ki a tatou taki tokotasi. Fakamuli loa, ne mafai o ‵teke atu au ki oku mafaufauga i lō te talia ne au ke pule mai ki a au. Ne tauloto au ke maua ne au te kilokiloga a te Atua e uiga ki a au. Ne tāua ‵ki te mea tenei me fesoasoani mai ke mo a ma maua ne au se kilokiloga sē ‵lei ki a au eiloa.

“E olioli au ki te taimi ka se toe masaua atu ei a mea fakalogo‵mae i aso ko ‵teka mo mafaufauga sē ‵lei. A te iloa atu me ko pili o fakaseai a masaki tau te mafaufau e fakamalosi mai ke fa‵ki au i oku vāivāiga i te taimi nei, kae ke olioli ki te olaga gali i aso mai mua telā ka fakaseai katoatoa atu i ei te loto mafatia.”