Ne Lavea ne Latou a te A‵lofa o te Fakapotopotoga

A YOMARA mo ana tuagane ko—Marcelo mo Hiver—e ‵nofo i se fakai foliki i Guatemala. Ne kamata o suke‵suke a Yomara ki te Tusi Tapu mo Molimau, kae fakamuli, ne ‵kau atu ana tuagane e tokolua ki tena akoga. Kae e isi se fakalavelave. A latou katoa e ‵kivi, kae e seiloa o fai‵tau ki tusi ne fakatoka mō tino ‵kivi. Tela la, e faitau atu ne te lotou faiakoga faka-te-Tusi Tapu a palakalafa i te mataupu mo fuaiupu i te Tusi Tapu ki a latou.

Ne faigata foki ki a latou ke ‵kau atu ki fakatasiga. E se mafai ne latou o olo atu i a latou eiloa ki te ‵toe Fale Tapuaki pili atu telā se 40-minute ke oko atu ki ei. Kae ne fai ne taina i te fakapotopotoga se fakatokaga ke puke faeloa latou ki fakatasiga katoa. Kae i te taimi ko kamata o fai ei olotou tofiga i te fakatasiga i loto i te vaiaso, ne fesoasoani atu a taina ki a latou ke masaua i olotou mafaufau a olotou tofiga.

I a Me 2019, ne kamata o fai a fakatasiga a te fakapotopotoga i te lotou fakai. I te taimi tenā, ne olo atu se tauavaga paenia tumau o ‵nofo i te lotou fakai. Ne fai ne lāua pelā me se fakamoemoega ke akoako te tokotolu ‵kivi konei ke fai‵tau kae tusitusi i te ‵gana mō tino ‵kivi, e tiga eiloa e se iloa foki ne lāua o fai‵tau kae tusitusi i te ‵gana tenā. Tela la, ne olo lāua ki te faletusi ke maua aka a tusi i te ‵gana mō tino ‵kivi, ko te mea ke tauloto lāua ki te auala ke akoako a nisi tino ki ei.

I nāi masina mai tua ifo, ne mafai ne te tokotolu konei o fai‵tau ki te ‵gana mō tino ‵kivi, kae ne fai ei ke gasolo malosi latou ki mua i te feitu faka-te-agaga.a Nei la, ko tavini atu a Yomara, Marcelo, mo Hiver e pelā me ne paenia tumau. A Marcelo ko fai pelā me se tavini fesoasoani. I vaiaso katoa, ne fakalave‵lave faeloa latou i galuega faka-te-agaga. Kae ne ‵pisi atu a te lotou loto finafinau tenā ki nisi tino.

E loto fakafetai eiloa a te tokotolu konei ki te a‵lofa o te fakapotopotoga o fesoasoani ki a latou. “Mai te taimi muamua eiloa ne fetaui matou mo Molimau, ne fakaasi mai ne latou a te alofa tonu faka-Kelisiano,” ne fai mai a Yomara. “Ne maua ne matou a taugasoa ‵lei i te motou fakapotopotoga, kae ko fai matou e pelā me se vaega o te kautaina i te lalolagi kātoa kolā e fusi fakatasi i te alofa,” ne toe fai mai a Marcelo. E olioli eiloa a Yomara mo ana tuagane ki te aso telā ka lavea ne latou te ‵fuliga o te lalolagi ke fai mo fai se Palataiso.—Sala. 37:10, 11; Isa. 35:5.