Ikuga Matagā o Taua
A te nofo atu o se tino i te koga e fai ei se taua se tasi o mea faigata ˋki i te olaga o se tino. E iloa ˋlei ne sotia mo tino kolā e se ne sotia a te matagā o mea e ˋtupu i ei.
SOTIA
“A fakalavelave matagā—kolā e ˋfuli katoatoa i ei a olaga o tino io me ˋmate atu i ei—e ˋtupu fua i ˋtou tafa. E isi faeloa se lagonaga manavase i taimi katoa.”—Gary, Peletania.
“Ne ˋpoko a polofana i toku tua mo oku mata, kae ne lavea ne au a tino tokouke e tamate, e aofia i ei a tamaˋliki mo tino maˋtua. A taua e fai ne ia ke seai se alofa i a koe.”—Wilmar, Colombia.
“Kafai e kilo atu koe ki se tino e fana i ou mua, e faigata o galo te mea tenā i tou mafaufau. Ka masaua faeloa ne koe te pakalaga mo te tagi a te tino tenā. Ka se mafai eiloa o puli i a koe a ia.”—Zafirah, Amelika.
TINO KOLĀ E SE NE SOTIA
“Au ne mafaufau me ka se toe mafai eiloa au o fiafia. E mataku koe i a koe ma mate, kae sili atu tou mataku i te mea ma ˋmate ou kāiga mo taugasoa.”—Oleksandra, Ukraine.
“A te ˋtu atu fua i se laina ke maua ne au meakai mai te 2:00 i te taeao ke oko ki te 11:00 i te po se mea fakamataku ˋki, me seiloa me ko te taimi fea ka poko koe i se polofana.”—Daler, Tajikistan.
“Ne ˋmate oku mātua i te taua. Ne fai i ei ke seai ne oku mātua, ko seai ne tino ke fakamafanafana io me tausi mai ki a au.”—Marie, Rwanda.
Faitalia a mea fakamaˋtaku ne feˋpaki mo tino konei, kae ko oti ne maua ne latou se tulaga filemu. E se gata i ei, ko taliˋtonu nei latou me ko pili fua o se toe ai ne taua mo kinauga fakasaua. Ka fakamatala mai i Te Faleleoleo Maluga tenei a pati i te Tusi Tapu ki te auala ka fakataunu ei a te mea tenā.