Ke Maua te Filemu Faitalia a Taua mo Kinauga Fakasaua
“Mai mua o sukesuke au ki te Tusi Tapu,” ko pati a Gary, telā ne aofia muamua i te kautau, “ne ˋnumi au i te pogai ne uke ˋki ei amioga maˋsei, faifaiga sē fakamaoni, mo fakalavelave i te lalolagi. Kae nei la ko maua ne au te filemu o te mafaufau. Ko iloa ne au me ka fai ne Ieova te Atua a te lalolagi mo fai se koga telā e maua i ei te tokagamalie.”
E se ko Gary fua e maua ne ia a lagonaga penā. Mafaufau ki te auala ne fesoasoani atu ei te Tusi Tapu ki nisi tino.
E FAI MAI TE TUSI TAPU: “A koe e Ieova, e ˋlei kae e toka o fakamagalo.”—Salamo 86:5.
TE AUALA E FESOASOANI ATU TE MEA TENEI: “E fakamautinoa mai i te fuaiupu tenei me i a Ieova e alofa fakamagalo. E iloa ne au me e toka a ia o fakamagalo au mo aku mea katoa ne fai i aso ko ˋteka i te taimi ne kau atu au ki taua.”—Wilmar, Colombia.
PATI A TE TUSI TAPU: “Ko faite ne au se lagi fou mo se lalolagi fou; kae ko mea mua ka se toe manatua i te mafaufau, kae ka se toe ˋsae aka i te loto.”—Isaia 65:17.
TE AUALA E FESOASOANI ATU TE MEA TENEI: “Ne pokotia au i te masaki ko te post-traumatic stress disorder mo te loto mafatia ona ko mea ne ˋtupu ki a au i te taua. Kae e fakamasaua mai te tusi faitau tenei me ka fai ne Ieova ke puli i a au a mafaufauga sē ˋlei katoa kolā e nofo mo au. Ka se manatua eiloa i toku mafaufau mo toku loto. Se meaalofa gali ˋki eiloa tenā!”—Zafirah, Amelika.
PATI A TE TUSI TAPU: “I ana aso a tino amioˋtonu ka lauolaola, kae ka lasi te filemu ke oko ki te taimi ko seai ei se masina.”—Salamo 72:7.
TE AUALA E FESOASOANI ATU TE MEA TENEI: “Ne mafaufau faeloa au ki pati konā. Ko pili fua o fakaseai atu a taua mo ikuga sē ˋlei mai taua, kae ka se toe manavaˋse tatou ki te ˋnofo ˋlei o ˋtou tino pele.”—Oleksandra, Ukraine.
PATI A TE TUSI TAPU: “Ou tino ˋmate ka ola aka . . . . Ala mai kae kaˋlaga mo te fiaˋfia, koutou e tino i te ˋpefu!”—Isaia 26:19.
TE AUALA E FESOASOANI ATU TE MEA TENEI: “Toeitiiti ko kāiga katoa o oku ne tamate i te taimi ne fakatau tamate ei ne nisi tino a tino Tutsi. Kae e fakatalitonu mai ki a au te fuaiupu tenei me ka toe fetaui matou. E olioli eiloa au ke toe lagona atu olotou leo fiaˋfia māfai ko toe fakaˋtu aka!”—Marie, Rwanda.
PATI A TE TUSI TAPU: “E se leva nei, kae ka ˋgalo atu a tino amio maˋsei . . . Kae ko tino agamalu ka fai mō latou te lalolagi, kae ka maua ne latou te fiafiaga sili ona ko te lasi o te filemu.”—Salamo 37:10, 11.
TE AUALA E FESOASOANI ATU TE MEA TENEI: “E tiga eiloa ko oti atu te taua, koi isi loa ne faifaiga sē fakamaoni mo tino maˋsei. Ne fesoasoani malosi mai a fuaiupu konei ki a au. E lavea ne Ieova a mea katoa kae malamalama i toku tulaga. E tauto mai a ia me ko pili o gata atu a logoˋmaega katoa kae fakapuli atu foki.”—Daler, Tajikistan.
A tino konei ne taku mai olotou tala i te mekesini tenei e aofia i te fia miliona o Molimau a Ieova kolā ne fesoasoani atu ki ei a te Tusi Tapu ke maua ne latou te filemu. Ne tauloto latou ki te auala ke manumalo i te takalialia telā e fakamāfua aka ne itukāiga, fenua, matakāiga mo fakalavelave totino. (Efeso 4:31, 32) E se ˋkau atu a Molimau a Ieova ki se feitu i mea fakapolitiki kae ˋteke atu ki amioga fakasaua.—Ioane 18:36.
E fakatau fesoasoani foki a Molimau a Ieova mo te aˋlofa ki te kautaina i te lalolagi kātoa. (Ioane 13:35) E pelā mo se mea e tasi, a Oleksandra, telā ne sae mai muamua, ne ˋtau o ˋtele atu mo tena taina ki te suā fenua ona ko te taua. Ana muna: “I te mā oloatuga ki te suā fenua, ne lavea eiloa ne māua a Molimau i konā e fakafetaui mai ki a māua. Ne fesoasoani mai latou ke fakamasani māua ke ola i se fenua fou.”
E ˋkami atu eiloa koe ke kau mai ki omotou fakatasiga, telā ka tauloto i ei matou ki te fekau o te filemu mai te Tusi Tapu mo te auala ke fakagalue aka ei. Fano ki te jw.org ke ˋsala se koga telā e pili atu ki a koe io me fakamolemole atu ke fai se akoakoga faka-te-Tusi Tapu telā e se ˋtogi mo se tokotasi o Molimau a Ieova, mai te fakaaogaga o te tusi ko te Ke Ola ki te Se-Gata-Mai!