“Filifili la Koutou . . . me ko oi ka Tavini Koutou ki ei”

1. Ne a mea e ‵tau o fai ne tatou ke maua te fiafia tonu, kae kaia? (Isaia 48:​17, 18)

E ALOFA malosi te ‵tou Tamana i te lagi ki a tatou, kae manako ke fia‵fia tatou i te olaga i aso nei mo aso mai mua. (Fai. 3:​12, 13) Ne faite ne ia tatou mo atamai kese‵kese, kae ne seki tuku mai ne ia a te atamai ke mafai o pule tatou ki a tatou eiloa io me fakaiku aka ne tatou a te mea tonu mo te mea ‵se. (Fai. 8:9; Iele. 10:23) E iloa ne ia me e ‵tau o tavini tatou ki a ia kae ola e ‵tusa mo ana tulaga māfai e fia maua ne tatou te fiafia tonu.—Faitau te Isaia 48:​17, 18.

2. Se a te mea ne manako a Satani ke tali‵tonu tatou ki ei, kae ne tali atu pefea a Ieova ki te ‵losiga ‵se tenā?

² E manako a Satani ke tali‵tonu tatou me e mafai o fia‵fia tatou e aunoa mo Ieova, kae e mafai ne tino o pule atu ki a latou eiloa mo te manuia. (Kene. 3:​4, 5) I tena tali ki te ‵losiga ‵se tenā, ne talia ne Ieova ke pule atu a tino ‵teke ki a latou eiloa mō se vaitaimi. E faigofie fua ke lavea ne tatou a ikuga fakafanoanoa e maua mai i pulega a tāgata. I te suā feitu, e ‵fonu te Tusi Tapu i fakaakoakoga o tāgata mo fāfine kolā ne maua ne latou se olaga fakamalie loto ona ko te tavini atu ki a Ieova. A te ‵toe tino fiafia eiloa mai i tino konei ko Iesu Keliso. Muamua la, ke onoono aka tatou ki pogai ne filifili ei ne ia ke tavini atu a ia ki a Ieova. Ka oti, ko onoono ei tatou ki pogai e ‵tau ei o tapuaki atu tatou ki te ‵tou Tamana i te lagi. Fakamuli loa, ka onoono tatou ki pogai ne filifili ei tatou ke tavini atu ki a Ieova.

POGAI NE FILIFILI NE IESU KE TAVINI A IA KI A IEOVA

3. Se a te mea ne ofo atu ki a Iesu, kae se a te filifiliga ne fai ne ia?

³ I tena nofoga i te lalolagi, ne ‵tau o fai ne Iesu se filifiliga me ko oi te tino ka tavini a ia ki ei. Mai tua malie o tena papatisoga, ne ofo atu ne Satani a malo katoa o te lalolagi māfai e ifo fakatasi atu fua tou tagata ki a ia. Ne tali atu a Iesu: “Fano kea‵tea e Satani! Me e tusi i te tusi: ‘E ‵tau mo koe o tapuaki ki a Ieova tou Aua kae ko ia fua tokotasi e ‵tau o avatu ne koe ki ei te taviniga tapu.’” (Mata. 4:​8-10) Kaia ne fai ei ne Iesu te filifiliga tenā? Mafaufau ki nai pogai.

4-5. Ne a nisi pogai ne filifili ei ne Iesu ke tavini a ia ki a Ieova?

⁴ A te pogai tonu ne filifili ne Iesu ke tavini atu a ia ki a Ieova ko te alofa—ne ‵poko ‵ki kae ‵mautakitaki te alofa o Iesu ki tena Tamana. (Ioa. 14:31) E se gata i ei, ne tavini atu a Iesu ki a Ieova me tenā eiloa te mea tonu e ‵tau o fai. (Ioa. 8:​28, 29; Faka. 4:11) E iloa ne ia me i a Ieova ko te Pogai o te ola kae ko Ia e fakatalitonugina kae kaimalie. (Sala. 33:4; 36:9; Iako. 1:17) Ne faipati atu faeloa a Ieova ki a Iesu e uiga ki te munatonu kae tuku atu a mea katoa ki a ia. (Ioa. 1:14) Kae ko Satani ne māfua mai i a ia te mate. A ia se tino loi telā e kaimanako. (Ioa. 8:44) Ne iloa ‵lei ne Iesu a mea konei e uiga ki a Ieova mo Satani, kae ne seki manako lele a ia ke fakaakoako ki a Satani o ‵teke atu ki a Ieova.—Fili. 2:​5-8.

⁵ Te suā pogai ne filifili ne Iesu ke tavini a ia ki a Ieova, me e iloa ne ia te uke o mea ‵gali ka iku mai i ei. (Epe. 12:2) Ne iloa ne ia me kafai e tumau a ia i te fakamaoni, ka faka‵malu aka i ei te igoa o tena Tamana kae fakaseai atu a logo‵maega katoa kolā ne māfua mai i te Tiapolo.

POGAI E ‵TAU EI O TAPUAKI TATOU KI A IEOVA

6-7. Kaia e se tavini atu ei a tino e tokouke i aso nei ki a Ieova, kae kaia e ‵tau ei o tapuaki tatou ki a ia?

⁶ E tokouke a tino i aso nei e se tavini atu ki a Ieova, me e se iloa ne latou ana uiga ‵gali mo mea katoa ne fai ne ia mō latou. Tenā eiloa te mea ne tupu ki tino kolā ne talai a te apositolo ko Paulo ki ei i Atenai.—Galu. 17:​19, 20, 30, 34.

⁷ Ne fai atu a Paulo ki ana tino fakalogo‵logo me i te Atua tonu “e tuku atu ne ia ki tino katoa a te ola mo te mānava e pelā foki mo mea katoa.” Ne toe fai atu a ia: “E auala i a ia ko maua ei ne tatou a te ola, e gasue‵sue, kae e iai foki tatou.” A te Atua ko te Mafuaga, telā “ne faite ne ia mai i te tagata e tokotasi a itukāiga o tino i fenua katoa,” tela la, ko ia eiloa te tino e ‵tau o tapuaki tatou ki ei.—Galu. 17:​25, 26, 28.

8. Se a te mea e se tāitāi o fai ne Ieova? Fakamatala mai.

⁸ E pelā me ko te Māfuaga mo te Pule o te lagi mo te lalolagi, ne mafai fua o faimālō ne Ieova a tino ke tavini atu ki a ia. Kae e se tāitāi eiloa o fai ne Ieova se mea penā. Ne tuku mai ne ia a fakamaoniga e uke me i a ia se Atua ola kae e alofa malosi a ia ki a tatou taki tokotasi. E manako a ia ke fai a tino e tokouke mo fai ana taugasoa ki te se-gata-mai. (1 Timo. 2:​3, 4) Tenā te pogai ne fakaakoako ne Ieova tatou ke akoako a nisi tino e uiga ki ana fuafuaga mo mea ‵gali kolā ka fai ne ia mō tino. (Mata. 10:​11-13; 28:​19, 20) Ne fakatoka ne ia tatou ki fakapotopotoga kae ke isi ne ovasia a‵lofa ke tausi mai ki a tatou.—Galu. 20:28.

9. I auala fea ne fakaasi atu ei ne Ieova tena alofa ki tino katoa?

⁹ E lavea atu te alofa o Ieova i ana faifaiga ki tino kolā e filifili ke se tali‵tonu ki a ia. Mafaufau ki manatu konei: I te fia afe tausaga ko ‵teka, e lau i piliona o tino ko oti ne filifili aka ne latou eiloa a te mea telā e tonu mo te mea ‵se. Kae ui ei, ne tuku atu eiloa ne Ieova mo te alofa a mea e ‵tau o maua ne latou ko te mea ke ola kae ke fia‵fia foki. (Mata. 5:​44, 45; Galu. 14:​16, 17) Ona ko ia, ko mafai o isi ne olotou kāiga mo taugasoa kolā e a‵lofa ki a latou, ko mafai o isi ne olotou tama‵liki, kae ko mafai o ga‵lue kae fia‵fia ki fuataga o olotou galuega. (Sala. 127:3; Fai. 2:24) E fakaasi manino mai i fakamaoniga konei me e alofa te ‵tou Tamana i te lagi ki tino katoa. (Eso. 34:6) Ke na fakamasaua ifo ne tatou ki a tatou eiloa a nisi pogai ne filifili ei ke tavini atu tatou ki a Ieova mo te auala e fakamanuia ne ia tatou.

POGAI E FILIFILI TATOU KE TAVINI KI A IEOVA

10. (a) Se a te pogai tonu e tavini atu ei tatou ki a Ieova? (Mataio 22:37) (e) Ne a mea aoga ne maua ne koe mai te kufaki o Ieova? (Salamo 103:​13, 14)

¹⁰ E pelā mo Iesu, a te pogai tonu e tavini atu tatou ki a Ieova ona ko te ‵poko o te ‵tou a‵lofa ki a Ia. (Faitau te Mataio 22:37.) Ka fia fakapili‵pili eiloa tatou ki a Ieova māfai ko iloa ne tatou ana uiga. E pelā me se fakaakoakoga, mafaufau ki te kufaki o Ieova i a tatou. I te taimi ne seki faka‵logo a tino Isalaelu ki a ia, ne fai atu a ia ki a latou: “Fakamolemole, ke na fulitua atu ki otou auala ma‵sei.” (Iele. 18:11) E masaua ne Ieova i a tatou ne tino sē ‵lei katoatoa, kae ne faite mai te ‵pefu. (Faitau te Salamo 103:​13, 14.) Kafai e mafaufau ‵loto tatou ki te kufaki o Ieova mo ana nisi uiga ‵gali, e a, e se fakamalosi atu ki a koe ke fia tavini atu ki a ia ki te se-gata-mai?

11. Ne a nisi pogai e filifili ei tatou ke tavini atu ki te ‵tou Tamana i te lagi?

¹¹ A te suā pogai e fia tavini atu tatou ki a Ieova me i te mea tenā se mea eiloa e ‵tau o fai. (Mata. 4:10) E se gata i ei, e iloa ne tatou a ikuga ‵gali ka maua mai māfai e tavini fakamaoni tatou ki a Ieova. A te ‵tou tavini fakamaoni atu ka faka‵malu i ei te igoa o Ieova, fakatalitonu atu foki i ei a te loi o te Tiapolo, kae fakafiafia te loto o te ‵tou Tamana. Kae kafai e filifili aka ke tavini atu tatou ki a Ieova i te aso nei, ka maua ne tatou te fakamoemoega ke tavini atu ki a ia ki te se-gata-mai!—Ioa. 17:3.

12-13. Ne a mea e tauloto ne tatou mai te tala o Jane mo Pam?

¹² I te taimi koi fo‵liki tatou, e mafai eiloa o ati aka ke ‵poko te ‵tou a‵lofa ki a Ieova, se alofa telā ka tu ‵mautakitaki tena malosi i te taimi e ga‵solo aka ei tatou o ma‵tua. Mafaufau ki te fakaakoakoga a te tautaina ko Jane mo Pam.a Ko 11 tausaga o Jane kae ko Pam ko 10 i te taimi ne kamata o fai te lā akoga ki te Tusi Tapu. E tiga loa e se fia suke‵suke lā mātua ki te Tusi Tapu, kae ne talia ne lāua ke fai a akoga a Jane mo Pam ne Molimau kae ke olo fakatasi loa mo te lotou kāiga ki te lotu i te fakaotiga o te vaiaso. “A mea ne akoako mai ne te kau Molimau,” ko pati a Jane, “ne fesoasoani mai ke ‵teke ne au a fakamalosiga a oku taugasoa ke fakaaoga a vailakau tapu pelā foki mo amioga fakatauavaga sē ‵tau.”

¹³ Mai tua o nai tausaga, ne fai lāua pelā me ne tino talai. Fakamuli ifo, ne kamata lāua o paenia kae tausi atu foki ki lā mātua kolā ko ma‵tua. Kafai e toe mafau‵fau ki mea ne ‵tupu ki a lāua, ne fai mai a Jane: “Ne tauloto ne au me e tausi eiloa ne Ieova mo te fakamaoni ana taugasoa e pelā eiloa mo pati i te 2 Timoteo 2:19 telā e fai mai, ‘E iloa ne Ieova ana tino.’” E mautinoa eiloa me tausi atu a Ieova ki a latou kolā e filifili ke a‵lofa kae tavini atu ki a ia!

14. E fesoasoani atu pefea tatou o ‵pulu te igoa o Ieova mai fakamaseiga ne fai ki ei? (Onoono foki ki ata.)

¹⁴ E ma‵nako tatou o ‵pulu te igoa o Ieova mai fakamaseiga katoa e fai e uiga ki a ia. Mafaufau ki te fakatusaga tenei: E isi sou taugasoa pili telā ko ia loa ko alofa, kaimalie, kae loto fakamagalo. I se aso e tasi, ko logo koe me isi ne ‵losiga ne fai ne se tino me i tou taugasoa ko ia loa ko masei kae sē fakamaoni. Ne a au mea ka fai? Ka ‵pulu eiloa ne koe a ia. E penā foki loa tatou, māfai ko ‵logo i tala sē ‵tonu a Satani mo ana tino e fai e uiga ki a Ieova, ka ga‵sue eiloa tatou o fakailoa atu a muna‵tonu e uiga ki a Ia kae ‵pulu Tena igoa. (Sala. 34:1; Isa. 43:10) E fakaasi atu ne tatou me e ma‵nako tatou o tavini katoatoa atu ki a Ieova e auala i ‵tou pati mo faiga.

15. Ne maua pefea ne te apositolo ko Paulo a mea aoga mai fakama‵fuliga ne fai ki ana fakamoemoega? (Filipi 3:​7, 8)

¹⁵ E fia‵fia tatou o fai a fakama‵fuliga ki ‵tou fakamoemoega i te olaga ko te mea ke fakafiafia ki a Ieova io me ke fai a mea e uke atu i te ‵tou taviniga. E pelā mo te apositolo ko Paulo, ne maua ne ia se tulaga takutakua i tena fenua kae ne tiaki ne ia ke mafai o tautali a ia i a Keliso kae tavini atu ki a Ieova. (Kala. 1:14) Ona ko te mea tenā, ne gali ‵ki tena olaga i tena taviniga ki a Ieova, kae ne maua foki ne ia te avanoaga ke pule fakatasi mo Keliso mai te lagi. Ne seki salamō eiloa a ia ki tena fakaikuga ne fai ke tavini atu ki a Ieova, kae ka penā foki tatou.—Faitau te Filipi 3:​7, 8.

16. Ne a au mea ne tauloto mai te tala o Julia? (Onoono foki ki ata.)

¹⁶ Kafai e fai ne tatou a te taviniga ki a Ieova e pelā me ko te ‵toe mea tāua i ‵tou olaga, ka fakamanuia ne ia tatou i te taimi nei mo aso mai mua. Mafaufau ki te tala o te tuagane ko Julia. Mai mua o tauloto a ia ki te munatonu, ne kau sāle a Julia ki te kau fai pese a tena lotu a koi foliki a ia. Ona ko te gali o tena leo, ne lavea ne se tino poto i pese a tou fafine, puke ei ne ia o fakaakoga ki te usuusu. Fakamuli ifo, ne lauiloa a Julia kae ne kamata o usuusu i koga usuusu lauiloa. A koi akoga a ia i se akoga usuusu lauiloa, ne kamata o faipati atu se tino i tena vasega e uiga ki te Atua kae fai atu me isi se igoa o te Atua, ko Ieova. E seki leva, kae ne fai te akoga faka-te-Tusi Tapu a Julia fakalua i te vaiaso. Fakamuli loa, ne fakaiku aka ne ia ke saga atu a ia o tavini ki a Ieova i lō te usuusu. Ne seki faigofie te fakaikuga tenā. “Ne fai mai a tino e tokouke me ko fakamāumāu ne au taku taleni,” ko ana pati, “kae ne manako eiloa au o fakaaoga toku olaga ke tavini atu ki a Ieova.” Ne a nei ana lagonaga e uiga ki te fakaikuga ne fai ne ia i se 30 tupu tausaga ko ‵teka? “Ko filemu toku mafaufau, kae talitonu au me ka fakamalie ne Ieova a manakoga katoa o toku loto i aso mai mua.”—Sala. 145:16.

TUMAU I TE TAVINI ATU KI A IEOVA

17. Ona ko te pili mai o te gataga o te olaga tenei, ka pokotia pefea a tino kolā ko oti ne filifili ke tavini atu ki te Atua mo tino kolā e se fai penā?

¹⁷ Ko ola nei tatou i taimi kolā ko pili ‵ki ki te gataga o te olaga tenei. Ne tusi mai te apositolo ko Paulo: “Me ‘ko toetoe te taimi,’ kae ‘ka oko mai eiloa te tino telā ka fai o vau kae ka se tuai.’” (Epe. 10:37) Ka pokotia pefea tatou i te mea tenei? Ko toetoe fua te taimi koi ‵toe ke fai ne tino olotou filifiliga ke tavini ki a Ieova. (1 Koli. 7:29) Kae kafai ko oti ne fai ‵tou filifiliga ke tavini atu ki te Atua, e iloa ne tatou me tiga eiloa e ‵tau o kufaki tatou i tofotofoga, kae ka fai fua penā mō se ‘taimi toetoe.’

18. Ne a mea e ma‵nako a Iesu mo Ieova ke fai ne tatou?

¹⁸ Ne fakamalosi atu a Iesu ki tino ke fai mo ana soko kae ke tumau i te fai penā. (Mata. 16:24) Tela la, kafai ne tavini tatou ki a Ieova i se fia tausaga, ke mo a eiloa ma ‵fiu. E ‵tau o ga‵lue malosi tatou ke ola e ‵tusa mo ‵tou fakaikuga ne fai ke tavini atu ki a ia. E mafai o faigata, kae e uke a fakamanuiaga mo mea ‵gali ka maua foki ne tatou i te taimi nei eiloa!—Sala. 35:27.

19. Ne a au mea ne tauloto mai te tala o Gene?

¹⁹ E mafau‵fau a nisi tino me ka se mafai o fia‵fia latou ki te olaga māfai e tavini atu latou ki a Ieova. Kafai koe koi talavou, e mata, e mafaufau koe me uke a mea ‵gali ka se maua ne koe māfai e tavini atu koe ki a Ieova? Ne fai mai te taina talavou ko Gene, penei: “Ne mafaufau au me e se mafai au o fiafia māfai e fai au pelā me se Molimau a Ieova. A tama‵liki kolā ne ‵tupu tasi aka matou e fai olotou patī, fai famau, io me ta‵fao i tafaoga fana‵fana i vitio, kae ko au tenei fua e fano ki fakatasiga mo te galuega talai.” Ne pokotia pefea a Gene i te vaegā mafaufauga tenei? “Ne kamata o ola au i se olaga magalua,” ko ana pati, “kae ne fiafia fua au mō se vaitaimi. Kae ne seki maua ne au te fiafia tumau. Ne kamata au o mafaufau ki muna‵tonu mai te Tusi Tapu kolā ne seki fakatāua ne au kae fakaiku aka ke tavini katoatoa atu ki a Ieova. Talu mai te taimi tenā, e pelā eiloa me ne tali mai a Ieova ki aku ‵talo katoa.”

20. Se a te mea e ‵tau o fakaiku aka ke fai ne tatou?

²⁰ Ne usu atu se faisalamo ki a Ieova: “E fiafia a te tino telā e filifili kae fakapilipili mai ne koe ke nofo i ou koga ateatea.” (Sala. 65:4) Ke na fai foki ne tatou a te fakaikuga ne fai ne Iosua: “Kae ko au mo toku kāiga, ka tavini eiloa matou ki a Ieova.”—Iosu. 24:15.