Ke Loto Maulalo o Talia a Mea e se Iloa ne Koe

1. I te auala fea ne faite ei ne Ieova tatou, kae kaia?

NE FAITE eiloa ne Ieova tatou ke mafai o mafau‵fau faka‵lei, ke maua te iloaga, ke ati aka te malamalama, kae ke fakaasi atu te poto. Kaia ne faite ne ia tatou i te auala tenei? Me e manako a ia ke “maua ne koe te iloaga o te Atua” kae ke tavini atu ki a ia mai te fakaaogaga o te malosi o tou mafaufau.—Faata. 2:​1-5; Loma 12:1.

2. (a) Ne a mea e iloa ne tatou e uiga ki a tatou eiloa? (Iopu 37:​23, 24) (Onoono foki ki te ata.) (e) Kaia e tāua ei ke talia ne tatou mo te loto maulalo a te manatu me e se iloa ne tatou a mea katoa?

² E tiga eiloa ne faite tatou ke mafai o tauloto se mea, e isi ne ‵tou tapulā ki mea e iloa ne tatou. (Faitau te Iopu 37:​23, 24.) Mafaufau ki te tala o Iopu. Ne fai atu ne Ieova a fesili e uke telā ne fai ei ke malamalama a ia me koi uke a mea e seki iloa ne ia. Ne fai ne te mea tenā ke loto maulalo a ia kae faka‵tonu aka ana mafaufauga. (Iopu 42:​3-6) E maua foki ne tatou a mea aoga māfai e talia ne tatou mo te loto maulalo a te manatu me e se iloa ne tatou a mea katoa. Ka fakamalosi aka tatou ne te loto maulalo tenā ke tali‵tonu me ka fakaasi mai ne Ieova a mea e manakogina malosi ke iloa ne tatou, ko te mea ke mafai o fai a filifiliga ‵poto.—Faata. 2:6.

3. Ne a ‵tou mea ka sau‵tala ki ei i te mataupu tenei?

³ I te mataupu tenei, ka sau‵tala tatou ki nisi mea e se iloa ne tatou mo mea faiga‵ta e mafai o fe‵paki mo tatou ona ko te mea tenā. Ka suke‵suke foki tatou ki te pogai e ‵lei ei māfai e se iloa ne tatou a nisi mea. A te sau‵tala ki manatu konei ka fakamalosi aka ei ‵tou loto tali‵tonu me e fakailoa mai ne Ieova “te Atua telā e katoatoa ‵lei tena iloa,” a mea kolā e ‵tau o iloa ‵lei ne tatou.—Iopu 37:16.

E SE ILOA NE TATOU TE TAIMI KA OKO MAI EI TE GATAGA

4. E ‵tusa mo te Mataio 24:​36, se a te mea e tasi e se iloa ne tatou?

⁴ Faitau te Mataio 24:36. E se iloa ne tatou te taimi ka oko mai ei te gataga o te olaga tenei. Ke oko foki ki a Iesu i te nofoga i te lalolagi nei, ne seki iloa ne ia te “aso mo te itula.”a Ne fai fakamuli atu a ia ki te kau apositolo me i a Ieova, te Tino telā e tausi ki te taimi, ka fakaiku aka ne ia te taimi ka ‵tupu ei a mea konā “i tena pule eiloa.” (Galu. 1:​6, 7) Ko oti ne fakamoe ne Ieova te taimi o te gataga o te olaga tenei, kae e se mafai o iloa tonu ne tatou a te taimi tenā.

5. E mafai pefea o pokotia tatou ona ko te se iloa ne tatou te taimi o te gataga?

⁵ E ‵tusa mo pati a Iesu, e se iloa ne tatou te leva ka faka‵tali ei tatou ke oko mai te gataga. Tela la, kāti e mafai o se lava ‵tou kufaki, io me loto vāi‵vai tatou, maise loa māfai ko leva ne fakatali‵tali tatou mō se vaitaimi ki te aso o Ieova. Io me faigata ki a tatou ke kufaki i fakatauemuga mai ‵tou kāiga mo nisi tino. (2 Pe. 3:​3, 4) Kāti e mafai o mafau‵fau tatou me moi fai ko iloa ne tatou te aso ka oko mai ei te gataga, ka mafai eiloa o kufaki tatou kae se loto vāi‵vai i fakatauemuga a tino ki a tatou.

6. Kaia e ‵lei ei ke se iloa ne tatou te taimi ka oko mai ei te gataga?

⁶ A te ‵tonuga loa, mai te sē fakaasi te taimi tonu o te gataga, e tuku mai ei ne Ieova ki a tatou te avanoaga ke fakaasi atu me tavini tatou ki a ia ona ko te a‵lofa mo te tali‵tonu ki a ia. E se tavini tatou ki a Ieova ona ko te mea e iloa ne tatou me isi se taimi ka oko mai ei te gataga, e pelā eiloa me isi se tapulā o te ‵tou fakatuanaki ki a ia. I lō te ‵saga malosi ki te taimi ka oko mai ei te “aso o Ieova,” e ‵tau o ‵saga muamua atu tatou ki mea ka ‵tupu i te taimi tenā. I te faiga tenā, ka fai ei ke fakapili‵pili malosi atu tatou ki te Atua, tali‵tonu ki a ia, kae fai te ‵toe e mafai ke fakafiafia a ia.—2 Pe. 3:​11, 12.

7. Se a te mea e iloa ne tatou?

⁷ E ‵tau eiloa o ‵saga tonu tatou ki mea e iloa ne tatou—me i aso fakaoti ne kamata i te 1914. Ne tuku mai ne Ieova i te Tusi Tapu a valoaga kolā e fakasino atu ki te tausaga tenā mo tulaga o te lalolagi talu mai te taimi tenā. Tela la, ko tali‵tonu tatou me i “te aso lasi o Ieova ko pili mai.” (Sefa. 1:14) E iloa foki ne tatou a te galuega telā e manako a Ieova ke fai ne tatou telā ko te talaiatuga ki tino e tokouke, a te “tala ‵lei o te Malo.” (Mata. 24:14) Ko oti ne folafola atu a te fekau tenei ki nisi fenua e 240 mo ‵gana e silia atu mo te 1,000. E se manakogina ke iloa ne tatou a te “aso mo te itula” ko te mea ke ‵kau atu mo te loto finafinau ki te galuega tāua tenei.

E SE ILOA NE TATOU TE AUALA E GASUE EI A IEOVA

8. Se a te mea e fakasino atu ki ei “a galuega a te Atua tonu”? (Failauga 11:5)

⁸ E se mafai o iloa faeloa ne tatou “a galuega a te Atua tonu.” (Faitau te Failauga 11:5.) E fakasino atu a te tugapati tenā ki mea e fai ne Ieova ke ‵tupu io me ko mea e talia ne ia ke ‵tupu ko te mea ke fakataunu ei a tena loto. E se mafai o iloa ‵lei ne tatou te pogai kāti ne talia ei ne Ieova ke tupu se mea io me ko te auala ka gasue ei a ia mō tatou. (Sala. 37:5) E fakatusa ne te Tusi Tapu a te sē iloa ne tatou a “galuega a te Atua tonu” ki te sē iloa o te auala e tupu aka ei se pepe i te tinae o tena mātua, se mea telā e seki malamalama katoatoa i ei a saienitisi.

9. Ne a mea faiga‵ta e mafai o fe‵paki mo tatou māfai e se iloa ne tatou te auala ka gasue ei a Ieova o fesoasoani mai?

⁹ Kafai e se iloa tonu ne tatou te auala ka gasue ei a Ieova o fesoasoani mai ki a tatou, kāti ka fakatalave tatou i te faiga o nisi fakaikuga. E mafai o fakatalave tatou o tiaki a nisi mea ko te mea ke uke ‵tou taimi i te galuega talai, e pelā mo te fakafaigofie aka o ‵tou olaga, io me ga‵sue ki se koga e lasi te manakoga i ei mō tino talai o te Malo. Io me kāti e mafau‵fau tatou me maua ne tatou te taliaga a te Atua io me ikai māfai e se mafai o taunu ‵tou fakamoemoega faka-te-agaga, māfai e se lavea atu a ikuga ‵lei o ‵tou galuega talai, io me māfai e fe‵paki tatou mo mea faiga‵ta e uke i se galuega fakatūtū a te ‵tou fakapotopotoga.

10. Ne a uiga tāua ka ati ne tatou māfai e se iloa tonu ne tatou te auala ka gasue ei a Ieova o fesoasoani mai?

¹⁰ A te sē iloa tonu ne tatou a mea ka fai ne Ieova ka fesoasoani mai ke ati aka ne tatou a uiga tāua e pelā mo te agamalu mo te loto maulalo. Ko iloa nei ne tatou me sili fakafia atu a mafaufauga mo auala o Ieova i lō tatou. (Isa. 55:​8, 9) E tauloto foki tatou ke tali‵tonu katoatoa ki a Ieova, kae fakalago‵lago ki a ia ke manuia tatou. Kafai e maua ne tatou a ikuga ‵lei i te galuega talai io me i se galuega fakatūtū a te ‵tou fakapotopotoga, e ‵tau eiloa o avatu ne tatou a vikiga ki a Ieova. (Sala. 127:1; 1 Koli. 3:7) Kafai e se ‵tupu a mea i te auala ne fakamoe‵moe tatou ki ei, e ‵tau o masaua ne tatou me e lavea ‵lei ne Ieova a mea konā. (Isa. 26:12) Ke fai fua ‵tou tusaga, kae tali‵tonu faeloa me ka fai foki te tusaga o Ieova. E tali‵tonu tatou me ka tuku mai ne ia a fakatakitakiga e manakogina ne tatou, faitalia foki loa me e se fai ne ia i se auala fakavavega e pelā mo mea ne fai sāle ne ia i aso mua.—Galu. 16:​6-10.

11. Ne a mea e iloa ne tatou me e mafai o fesoasoani mai?

¹¹ E tonu, e iloa ne tatou i a Ieova e alofa faeloa, e fai mea tonu, kae e poto. E fakatāua malosi foki ne ia a ‵tou mea e fai mō ia penā foki mō ‵tou taina tapuaki. Kae e iloa ne tatou me e fakamanuia faeloa ne ia a latou kolā e fakamaoni ki a ia.—Epe. 11:6.

E SE ILOA NE TATOU A MEA KA ‵TUPU MA TAEAO

12. E ‵tusa mo te Iakopo 4:​13, 14, ne a mea e se mafai o iloa ne tatou?

¹² Faitau te Iakopo 4:​13, 14. Se mea tonu me e se iloa ne tatou a mea ka ‵tupu ki ‵tou olaga i te aso ma taeao. I te olaga tenei, e fakafesagai atu tatou ki “taimi o fakalavelave mo mea ‵tupu fakafuasei.” (Fai. 9:11) Ona ko te mea tenā, e se iloa ne tatou me e mata, ka manuia a ‵tou palani io me ka lavea ne tatou te fakataunuga o ‵tou palani io me ikai.

13. E pokotia pefea tatou māfai e se mautinoa i a tatou a mea ka ‵tupu i aso mai mua?

¹³ E mafai eiloa o faigata ki a tatou ke kufaki māfai e se mautinoa i a tatou a mea kolā ka ‵tupu i aso mai mua. Pefea la? Kāti ka manava‵se tatou ki mea e mafai o ‵tupu, kae fai ei ke galo atu a te ‵tou fia‵fia. A fakalavelave ‵tupu fakavave mo mea ‵tupu fakafuasei e mafai o fai ei ke fanoa‵noa kae kaitāua tatou. Kae kafai ko se taunu a ‵tou fakamoemoega, e mafai eiloa o loto vāi‵vai kae fano‵noa tatou.—Faata. 13:12.

14. Se a te mea e fakalagolago ki ei a te ‵tou fia‵fia tumau? (Onoono foki ki ata.)

¹⁴ Kafai e kufaki tatou i mea faiga‵ta, ko mafai o fakamaoni atu ne tatou me faitalia me ne a mea e ‵tupu, e tavini tatou ki te ‵tou Tamana faka-te-lagi ona ko te alofa, kae e se ona ko te kaimanako. E fakaasi mai i tala i te Tusi Tapu me e se ‵tau o fakamoe‵moe tatou ke puipui ne Ieova tatou mai fakalavelave katoa, kae e se palani foki ne ia a mea ka ‵tupu ki ‵tou olaga. E iloa ne ia me e se fakalagolago ‵tou fia‵fia ki te iloa ne tatou a mea ka ‵tupu ki a tatou i aso mai mua. Kae e fakalagolago ki te ‵sala atu ki tena takitakiga kae faka‵logo ki a ia. (Iele. 10:23) Mai te ‵sala atu ki a ia i te taimi e fai ei ‵tou fakaikuga, e pelā loa me ko fai atu tatou: “Kafai e loto a Ieova ki ei, ka ola eiloa matou kae ka fai ne matou te mea tenei io me ko te mea telā.”—Iako. 4:15.

15. Ne a ‵tou mea e iloa e uiga ki aso mai mua?

¹⁵ E tiga eiloa e se iloa ne tatou a mea ka ‵tupu i aso takitasi, e iloa ne tatou me ne folafola mai ne Ieova a te ola se-gata-mai—faitalia me i te lagi io me i te lalolagi. E iloa ne tatou me e se mafai a ia o loi kae e sē se mea e mafai o taofi a ia mai te fakataunuga o ana tautoga katoa. (Tito 1:2) Ko ia fua e mafai o “‵valo ne [ia] te mea ka tupu mai te kamataga, mo mea kolā e seki fai ne [ia] mai i aso mua eiloa.” E pelā mo valoaga kolā ko oti ne fakataunu i aso mua, ka fakataunu foki a mea kolā ne ‵valo me ka ‵tupu i aso mai mua. (Isa. 46:10) E mautinoa i a tatou me e seai se mea e mafai o taofi ne ia te alofa o Ieova ki a tatou. (Loma 8:​35-39) Ka tuku mai ne ia a te poto, fakamafanafanaga, mo te malosi e manakogina ke kufaki i mea katoa e fakafesagai mo tatou. E mautinoa i a tatou me ka fesoasoani kae fakamanuia eiloa ne Ieova a tatou.—Iele. 17:​7, 8.

E SE MALAMALAMA KATOATOA TATOU I TE ILOA ‵LEI NE IEOVA O TATOU

16. E pelā mo pati i te Salamo 139:​1-6, ne a mea e iloa ne Ieova kolā e se mafai o malamalama katoatoa tatou i ei?

¹⁶ Faitau te Salamo 139:​1-6. E iloa ne te ‵tou Mafuaga a mea katoa e uiga ki a tatou. E iloa ne ia ‵tou mafaufauga mo lagonaga. E iloa ne ia a pati e fai ne tatou mo mea i ‵tou loto. E iloa foki ne ia a mea katoa ne fai ne tatou mo te pogai e fai ei ne tatou. E pelā mo pati a te tupu ko Tavita, e toka kae e mafai eiloa ne Ieova o fesoasoani mai ki a tatou. Ko oko eiloa i te gali ke iloa atu me i te Aliki Sili o te iunivesi, te Tino ne faite ne ia te lagi mo te lalolagi, e atafai tonu mai ki a tatou! Ne fai mai a Tavita: “A te vaegā iloa tenā e se mafai o oko ki ei toku malamalama. Ko tō uke ke malamalama au i ei.”—Sala. 139:​6, fml.

17. Kaia e faigata i ei ke tali‵tonu tatou me e iloa ‵lei ne Ieova a tatou?

¹⁷ Ona ko te auala ne puti aka ei tatou, ‵tou fenua, io me ko ‵tou talitonuga mua, kāti e faigata ke ‵kilo atu tatou ki a Ieova e pelā me se Tamana alofa telā e saga tonu mai ki a tatou. Io me kāti e mafau‵fau tatou me ko tō ma‵sei ‵tou amioga mua telā ko se manako ei a Ieova ke iloa ne ia tatou kae ko ‵mao ‵ki a ia mai i a tatou. Ne penā foki a lagonaga o Tavita i nisi taimi. (Sala. 38:​18, 21) Io me kāti e mafaufau ifo se tino telā ne taumafai malosi o ‵fuli tena olaga kae ola e ‵tusa mo tulaga amio‵tonu o te Atua, penei, ‘Kafai e iloa ‵lei ne te Atua a au, kaia e manako ei a ia ke ‵teke atu au ki te vaegā olaga telā ne masani o ola muamua au i ei?’

18. Kaia e tāua ei ke talia ne tatou te manatu me e iloa fakafia ne Ieova a mea e uiga ki a tatou i lō tatou eiloa? (Onoono foki ki ata.)

¹⁸ Fai ke talia te manatu me e iloa fakafia atu ne Ieova a mea e uiga ki a tatou i lō tatou eiloa, kae e lavea ne ia a mea ‵lei i loto i a tatou kolā e se lavea ne tatou. Kae e tiga eiloa e lavea ne ia ‵tou mea ‵se kae malamalama i ‵tou lagonaga mo faifaiga, e alofa mai eiloa a ia. (Loma 7:15) Kafai ko iloa ne tatou me e lavea faeloa ne Ieova a mea e mafai ne tatou o fai, ka momea aka i ei ‵tou loto tali‵tonu ke tavini atu ki a ia mo te fakamaoni mo te fiafia.

19. Se a te mea mautinoa e iloa ne tatou e uiga ki a Ieova?

¹⁹ E iloa ne tatou i a Ieova ko te alofa. E seai eiloa se fakalotolotolua e uiga ki ei. (1 Ioa. 4:8) E iloa ne tatou me e fakaasi mai i ana tulaga amio‵tonu a tena alofa mō tatou, kae manako ke maua ne tatou te ‵toe olaga ‵lei. E iloa ne tatou me e manako a Ieova ke maua ne tatou te ola se-gata-mai, tenā ne tuku mai ei ne ia te togiola. E mautinoa me e auala i te meaalofa ko te togiola, ka manuia eiloa tatou faitalia ‵tou tulaga sē ‵lei katoatoa. (Loma 7:​24, 25) Kae e iloa ne tatou me e “sili atu te Atua i ‵tou loto kae e iloa ne ia a mea katoa.” (1 Ioa. 3:​19, 20) E lavea ne Ieova a mea katoa e uiga ki a tatou, kae e talitonu a ia me e mafai o manuia tatou i te faiga o tena loto.

20. Se a te mea ka fesoasoani mai ke ‵kalo kea‵tea tatou mai te sōna manavase?

²⁰ E se taofi eiloa ne Ieova so se fakamatalaga telā e ‵tau o maua ne tatou. Tela la, kafai e talia ne tatou mo te loto maulalo a te manatu tenā, ka ‵kalo kea‵tea eiloa tatou mai te sōna manava‵se ki mea e se iloa ne tatou, kae ke ‵saga tonu atu fua ki mea kolā e tāua. I te faiga tenā, ko fakaasi atu ei te ‵tou loto tali‵tonu ki a Ieova, “te Atua telā e katoatoa ‵lei tena iloa.” (Iopu 36:4) E tiga eiloa e se malamalama tatou i nisi mea i te taimi nei, ke olioli ki te taimi ka akoako ei tatou ki mea ‵fou mo mea e uiga ki te ‵tou Atua Tafasili i te Maluga ke oko loa ki te se-gata-mai.—Fai. 3:11.