A te Faiga ke Gasolo o ‵Pili te ‵Tou va se Mea ‵Lei mō Tatou!

1-2. Se a te mea e tasi telā e tāua ki a Ieova, kae se a te mea e manako a ia ke fai ne tatou?

A ‵TOU faifaiga ki nisi tino e aofia i mea e uke kolā e tāua ki a Ieova. Ne akoako mai a Iesu me e ‵tau mo tatou o a‵lofa ki ‵tou tuakoi e pelā mo te ‵tou a‵lofa ki a tatou eiloa. (Mata. 22:​37-39) E aofia i ei te a‵lofa ki a latou kolā e se ‵pau ‵tou talitonuga. Kafai e fakaasi atu ne tatou te alofa tenā, ko fakaakoako tatou ki a Ieova te Atua, telā e “fakamaina mai ne ia a te la ki luga i tino ma‵sei mo tino ‵lei kae e faka‵to ne ia te vaiua ki luga i tino amio‵tonu mo tino sē amio‵tonu.”—Mata. 5:45.

² E tiga eiloa e alofa a Ieova ki tino katoa, kae e sili atu tena alofa ki a latou kolā e fai ne latou a te mea tonu. (Ioa. 14:21) E manako a ia ke fakaakoako tatou ki a ia. E fakamalosi mai a ia ke “fakatau a‵lofa” malosi tatou ki ‵tou taina mo tuagane. (1 Pe. 4:8; Loma 12:10) Kafai e mafau‵fau tatou o fakaasi te alofa tenā ki se tino, kāti ka mafau‵fau tatou ki te lagonaga fakatau a‵lofa telā e masani o fakaasi atu ne koe ki sou kāiga io me se taugasoa pele.

3. Se a te mea e ‵tau o masaua ne tatou e uiga ki te alofa?

³ A te alofa e fai pelā me se lakau telā koi fakaolaola, e ‵tau o atafai faka‵lei ne koe ko te mea ke ola ‵lei. Ne polopoloki atu a te apositolo ko Paulo ki Kelisiano: “Ke na fakatumau te otou a‵lofa fakataina.” (Epe. 13:1) E manako a Ieova ke tumau tatou i te fakamalosi aka te ‵tou a‵lofa mō nisi tino. Ka faipati te mataupu tenei ki pogai e ‵tau ei o fai ke gasolo o ‵pili malosi te ‵tou va mo ‵tou taina tapuaki mo te auala ke fai penā i taimi katoa.

POGAI E ‵TAU EI O FAI KE GASOLO O ‵PILI MALOSI TE ‵TOU VA

4. E ‵tusa mo te Salamo 133:​1, e fakatumau pefea ne tatou a te ‵tou loto fakafetai ki te ‵kau fakatasi o ‵tou kautaina? (Onoono foki ki ata.)

⁴ Faitau te Salamo 133:1. E lotoma‵lie tatou ki pati a te faisalamo telā ne tusi mai me i te fai taugasoa mo tino kolā e a‵lofa ki a Ieova e “‵lei kae gali.” E pelā mo se tino telā e manatu māmā ki se lakau gali kae lasi telā e lavea ne ia i aso katoa, e mafai foki loa o manatu mā‵ma tatou ki te gali o te ‵kau fakatasi o ‵tou taina Kelisiano. E fetaui faeloa tatou mo ‵tou taina mo tuagane i taimi e uke, kāti fakafia taimi katoa i se vaiaso. E fakatumau pefea ne tatou a te ‵tou loto fakafetai mō latou? Kafai e ‵nofo tatou o mafau‵fau ki te aoga o tino taki tokotasi ki te fakapotopotoga e pelā foki ki a tatou eiloa, ka fai ei ke a‵lofa malosi tatou ki ‵tou taina mo tuagane.

5. E aoga pefea ki nisi tino a te fakatau a‵lofa o te kautaina?

⁵ E ofo malosi sāle a tino kolā e ‵kau mai ki ‵tou fakatasiga mō te taimi muamua ona ko te fakatau a‵lofa o tatou. Ona fua ko te mea tenā, e mafai loa o fakaiku aka ne latou me ko maua ne latou te munatonu. Ne fai mai a Iesu: “Ona ko te mea tenei ka iloa ei ne tino katoa i a koutou ko oku soko, māfai e fakatau a‵lofa koutou.” (Ioa. 13:35) Mafaufau ki te tala o Chaithra, se tamaliki e akoga i te iunivesiti kae suke‵suke mo Molimau a Ieova ki te Tusi Tapu. Ne talia ne ia te ‵kamiga ke kau atu ki se fono lasi, kae mai tua o te aso muamua o te fono, ne fai atu tou fafine ki tena faiakoga: “Oku mātua seki ‵sai mai aka loa ki a au. Kae i te otou fono, e toko 52 a tino ne ‵sai mai ki a au! Ko lagona eiloa ne au a te alofa o Ieova e auala i te kāiga faka-te-agaga tenei. Au ko fia kāiga ki a koutou.” Ne gasolo ki mua faeloa a Chaithra kae ne papatiso i te 2024. E tonu, kafai e lavea ne tino ‵fou a ‵tou galuega ‵lei, e aofia i ei te fakatau a‵lofa o tatou, e masani eiloa o fakamalosi atu ki a latou ke tavini atu ki a Ieova.—Mata. 5:16.

6. I te auala fea e maua i ei ne tatou se puipuiga ona ko te ‵pili o ‵tou va mo taina mo tuagane?

⁶ Kafai e ‵pili malosi ‵tou va mo taina mo tuagane, e fai eiloa te mea tenā e pelā me se puipuiga. Ne fakamalosi atu a Paulo ki taina Kelisiano: “Ke tumau i te fakatau fakamalosi atu te suā tino ki te suā tino i aso takitasi . . . ko te mea ke mo a se tino i a koutou e fakamakeke tena loto ne te malosi fakaloiloi o te agasala.” (Epe. 3:13) Kafai ko loto vāi‵vai malosi tatou kae ko kamata o ‵sipa kea‵tea ‵tou vae mai te auala o te amiotonu, e mafai eiloa o fakamalosi ne Ieova se taina talitonu telā e lavea ne ia te mea tenei ke fesoasoani mai ki a tatou. (Sala. 73:​2, 17, 23) E aoga eiloa a vaegā fakamalosiga penei ki a tatou.

7. Se a te sokoga o te alofa mo te ‵kau fakatasi? (Kolose 3:​13, 14)

⁷ E aofia tatou i se potukau o tino kolā e ga‵lue malosi ke fakatau fakaasi atu a te alofa, tela la, e maua eiloa ne tatou a fakamanuiaga e uke. (1 Ioa. 4:11) E pelā mo te mea tenei, e fakamalosi aka tatou ne te alofa ke “fakatau fa‵ki faeloa” tatou i a tatou eiloa kae fesoasoani atu te mea tenei ke ‵kau fakatasi a Kelisiano. (Faitau te Kolose 3:​13, 14; Efe. 4:​2-6) Tela la, e ‵kese eiloa te gali o te ‵kau fakatasi o tatou i taimi o ‵tou fakatasiga kae e se mafai o lavea ne koe te alofa tenā i se isi koga aka i te lalolagi nei.

KE FAKATAU FAKAASI ATU TE ĀVA

8. E fesoasoani mai pefea a Ieova ki a tatou ke ‵kau fakatasi mo taina mo tuagane?

⁸ A te ‵kau fakatasi o tatou i te lalolagi kātoa se vavega eiloa. Ko Ieova fua e mafai o fai ne ia te mea tenā faitalia ‵tou vāivāiga. (1 Koli. 12:25) E fai mai te Tusi Tapu me “e akoako eiloa koutou ne te Atua ke alofa te suā tino ki te suā tino.” (1 Tesa. 4:9) I nisi tugapati, e fai mai ne Ieova e auala i te Tusi Tapu a te mea e ‵tau o fai ne tatou ko te mea ke gasolo o ‵pili te va o tatou. E mafai o ‘akoako tatou ne te Atua’ māfai e suke‵suke faka‵lei ki ana akoakoga kae fakagalue ne tatou. (Epe. 4:12; Iako. 1:25) Kae tenā eiloa te mea e taumafai malosi a Molimau a Ieova o fai.

9. Se a te mea e tauloto ne tatou mai te Loma 12:​9-13 e uiga ki te fakaasi atu o te āva te suā tino ki te suā tino?

⁹ E akoako pefea tatou ne te Muna a te Atua ke gasolo o ‵pili te ‵tou va? Mafaufau ki pati a Paulo e uiga ki te mea tenei i te Loma 12:​9-13. (Faitau.) Konei ana pati “ke mua o fakaasi atu te āva o te suā tino ki te suā tino.” Se a te uiga o pati konā? E ‵tau o ga‵sue muamua tatou o fakaasi atu te “fakatau a‵lofa” te suā tino ki te suā tino e auala i te fakamagalo atu, te fakaasi atu o te uiga talimalo, ke uiga kaima‵lie mo nisi mea aka. (Efe. 4:32) Sa faka‵tali ke fakamasani muamua atu tou taina io me ko tou tuagane ki a koe. “Ke mua” koe o fai penā. Ne fai mai a Iesu: “E sili atu te fiafia o te tino telā e tuku atu ana mea i lō te maua ne ia.”—Galu. 20:35.

10. I te auala fea e ga‵lue malosi ei tatou o “fakaasi atu te āva o te suā tino ki te suā tino”? (Onoono foki ki te ata.)

¹⁰ A te mea e gali i ei, me i te otiga loa ne fai mai ke mua o fakaasi atu te āva te suā tino ki te suā tino, ne fakamalosi mai a Paulo ki a tatou ke “ga‵lue malosi kae sa paie.” A te tino galue malosi e loto finafinau kae galue fakamaoni. Kafai e tuku atu ke fai ne ia se galuega, e fai eiloa ne ia ke oti. E fakamalosi mai te Faataoto 3:​27, 28 ki a tatou: “Sa taofi a mea ‵lei mai i a latou kolā e ‵tau o tuku atu ne koe ki ei māfai e lava tou malosi o fesoasoani.” E ‵tusa mo pati konā, kafai e manako se tino ki se fesoasoani, e fai ne tatou te mea e mafai ke fesoasoani atu ki a ia. E se fakatalave tatou; io me mafau‵fau me isi se tino ka fesoasoani atu ki a ia.—1 Ioa. 3:​17, 18.

11. Se a te mea e mafai o fesoasoani mai ke gasolo o ‵pili te va o tatou?

¹¹ A te suā auala ke fakaasi atu te āva ki nisi tino ko te vave o fakamagalo latou māfai ne fakalogo‵mae ne latou a tatou. Efeso 4:26 e fai mai: “Ke se tō te mata o te la kae koi ita koutou.” Kaia? E fai mai te fuaiupu 27 me i te fai penā ko ‘tuku atu i ei se avanoaga ki te Tiapolo.’ E uke a taimi ne fai mai a Ieova i tena Muna ke fakatau fakamagalo tatou. E fakamalosi mai te Kolose 3:13 ki a tatou ke “fakatau fakamagalo atu te suā tino ki te suā tino.” A te fakamagalo ne koe a mea ‵se a nisi tino se tasi o toe auala ‵lei e mafai o fai ei ke pili tou va mo nisi tino. Mai te fai penā ko fesoasoani tatou o “fakatumau . . . te tasi o te agaga telā ko te fusi o te filemu.” (Efe. 4:3) E manino ‵lei, me i te loto fakamagalo se auala e tasi e fai ei ke ‵kau fakatasi kae ke maua te filemu i tino o Ieova.

12. E fesoasoani mai pefea a Ieova ki a tatou ke loto fakamagalo?

¹² Kāti ka faigata ki a tatou ke fakamagalo a tino kolā ne fakalogo‵mae ne latou a tatou. Kae e mafai o fai tatou penā mai te fesoasoani o te agaga o te Atua. I te otiga ne fakamalosi mai ki a tatou ke ‘fakatau a‵lofa te suā tino ki te suā tino’ kae ke “ga‵lue malosi,” e fai mai te Tusi Tapu: “Ke faka‵fonu koutou ki te agaga tapu.” Ko tena uiga e mafai ne te agaga tapu o te Atua o fai ne ia tatou ke loto finafinau malosi. E mafai ne te agaga o te Atua o fesoasoani mai ke fakatau a‵lofa kae ke fakatau fakamagalo tatou. Tela la, e akai eiloa tatou mo te loto fakamaoni ki a Ieova ke fesoasoani mai ki a tatou.—Luka 11:13.

“E SE ‵TAU O ISI NE MAVAE‵VAEGA I A KOUTOU”

13. Ne a mea e mafai o fai ei ke mavae‵vae tatou?

¹³ E aofia i te fakapotopotoga “a vaegā tino katoa” mai olaga kese‵kese. (1 Timo. 2:​3, 4) Tela la, e kese‵kese foki a filifiliga e fai ne tatou ki ‵tou gatu mo teuga, ‵tou ola ‵lei, io me ko fakafiafiaga, kae kafai e se fakaeteete tatou e mafai o fai ne mea konei ke isi ne mavae‵vaega i te va o tatou. (Loma 14:4; 1 Koli. 1:10) Ona ko tatou ne akoako ne te Atua ke alofa te suā tino ki te suā tino, e ‵tau o fakaeteete tatou ke mo a ma fai atu me e sili atu te ‵lei o mea kolā e fia‵fia tatou ki ei i lō mea e fia‵fia ki ei a nisi tino.—Fili. 2:3.

14. Se a te mea e ‵tau o taumafai faeloa tatou o fai, kae kaia?

¹⁴ E mafai foki o fai ne tatou ke seai ne mavae‵vaega i te fakapotopotoga mai te taumafai o fakamalosi atu a nisi tino i taimi katoa. (1 Tesa. 5:11) Fakamuli nei, e tokouke a tino kolā ne ‵mate faka-te-agaga io me ne tapale kea‵tea mai te fakapotopotoga ko oti ne toe ‵foki mai. E talia eiloa ne tatou a latou mo te a‵lofa! (2 Koli. 2:8) Mafaufau ki te mea ne tupu ki se tuagane telā ne mate faka-te-agaga i tausaga e sefulu i te taimi ne foki mai ei ki te Fale Tapuaki. Ana muna, “Ne fakatalofa mai a tino ki a au mo te fakamisikata.” (Galu. 3:19) Ne aoga pefea ki a ia a faifaiga atafai konā? Ana muna, “Ne lagona ne au me ko Ieova eiloa ko toe takitaki mai ne ia au ki te fiafia.” Kafai e tumau tatou i te fakamalosi atu ki tino katoa, e mafai o fakaaoga tatou ne Keliso ke tuku atu se malosi fou ki tino “kolā e fi‵ta kae ‵mafa [olotou] amoga.”—Mata. 11:​28, 29.

15. Se a te suā auala e fakamalosi aka ne tatou a te ‵kau fakatasi? (Onoono foki ki te ata.)

¹⁵ A te suā auala ke fakamalosi aka ne tatou a te ‵kau fakatasi ko ‵tou pati e fai. E fai mai te Iopu 12:11: “E a, e se tofotofo ne te taliga a pati e pelā mo te alelo e tami ki meakai?” E pelā eiloa mo se kūka apo e tami faeloa ki tena kūka ke iloa ne ia te gali mai mua o ‵kai ki ei a tino, se mea ‵lei mō tatou ke mafau‵fau muamua faka‵lei ki ‵tou pati ka fai a koi tuai o fai atu ne tatou. (Sala. 141:3) E ‵tau o taumafai faeloa tatou o fakamautinoa aka me i pati ka fai atu ne tatou ne pati fakamalosi, e maua i ei te malosi fou, kae e “aoga ki tino kolā e fakalogo‵logo mai.”—Efe. 4:29.

16. Ko oi a tino kolā e ‵tau o taumafai malosi ke fakaaoga a pati fakamalosi?

¹⁶ E ‵tau foki o fakaeteete a tāgata a‵vaga mo mātua ko te mea ke fai atu ne latou a pati fakamalosi. (Ko. 3:​19, 21; Tito 2:4) Ke oko ki toeaina e ‵tau foki o fai latou pelā me ne tausi mamoe fakamalosi loto kae fakamafanafana ki te lafu a Ieova. (Isa. 32:​1, 2; Kala. 6:1) E fakamasaua mai te faataoto i te Tusi Tapu ki a tatou penei: “Te pati e faipati atu i te taimi tonu—ko oko eiloa i te ‵lei!”—Faata. 15:23.

KE A‵LOFA “I FAIGA KOLĀ E FAI MO TE FAKAMAONI”

17. E fakamautinoa pefea ne tatou me e a‵lofa fakamaoni tatou ki ‵tou taina mo tuagane?

¹⁷ E fakamalosi mai te apositolo ko Ioane me “e se ‵tau fua o a‵lofa tatou i ‵tou pati io me ko ‵tou gutu, kae i faiga kolā e fai mo te fakamaoni.” (1 Ioa. 3:18) E ma‵nako tatou ke a‵lofa ki ‵tou taina mo tuagane mai ‵tou loto. E fai pefea ne tatou a te mea tenā? Ko te uke o taimi e fakamāumāu ne tatou mo ‵tou taina mo tuagane, ko te gasolo foki o ‵pili te va o tatou mo latou kae ka malosi foki te alofa i te va o tatou. Tela la, ‵sala ki avanoaga ke ‵kau fakatasi mo nisi tino—i fakatasiga mo te galuega talai. ‵Sala se taimi ke āsi atu ki nisi tino. Mai te fai penā, ko fakaasi atu ne tatou me “e akoako eiloa [tatou] ne te Atua ke alofa te suā tino ki te suā tino.” (1 Tesa. 4:9) Kae ka lavea ‵tonu eiloa ne tatou ki ‵tou mata me se mea “‵lei kae galil mō taina ke ‵nofo fakatasi i te fealofani!”—Sala. 133:1.