Ieova e Alofa Atafai ki a Koe

1. Ne a mea e mafai o masaua ne koe māfai e mafaufau ki a Ieova?

KAI fakaataata aka eiloa ne koe i tou mafaufau me ko Ieova se vaegā tino pefea? Kafai e ‵talo atu koe ki a ia, ne a mea e masaua ne koe e uiga ki a ia? E tiga eiloa e se lavea ne tatou a Ieova, e fakamatala mai ne te Tusi Tapu a ia i auala kese‵kese. A Ieova e taku ki “se la mo se talita” mo “se afi ‵ka ulaula.” (Sala. 84:11; Epe. 12:29) E auala i se fakaasiga, ne fakamatala mai ne Esekielu a Ieova e pelā me se fatu safaila, e malapulapu pelā me se aulo palu tasi mo te siliva, mo se nuanua maina. (Eseki. 1:​26-28) A nisi fakamatalaga konei e uiga ki a Ieova e fakaofoofogia kae kāti e fai ei ke ofo tatou.

2. Ne a mea e mafai o fai ei ke faigata ki nisi tino ke fakapili‵pili atu ki a Ieova?

² Kāti ka faigata ke tali‵tonu tatou me e alofa mai a Ieova ona ko te mea e se lavea ne tatou a ia. E mafau‵fau a nisi tino me e se mafai o alofa a Ieova ki a latou ona ko mea ne ‵tupu ki olotou olaga i aso mua. Kāti e seki ai loa se tamana o latou telā e alofa tonu ki a latou. E malamalama a Ieova i vaegā lagonaga penā mo te auala e pokotia i ei tatou. Ke fesoasoani mai ki a tatou, e fakaasi mai ne ia ana uiga ‵gali i tena Muna.

3. Kaia e ‵tau ei o tauloto faka‵lei tatou e uiga ki te alofa o Ieova?

³ A te ‵toe pati ‵lei e tasi telā e mafai o fakamatala ki ei a Ieova ko te alofa. (1 Ioa. 4:8) E fakamatala katoatoa mai ne te alofa a ia. E fai ne ia a mea katoa ona ko tena alofa. A te alofa o te Atua e kaimalie kae malosi telā e fakaasi atu foki ne ia ki tino kolā e se a‵lofa ki a ia. (Mata. 5:​44, 45) I te mataupu tenei, ka sau‵tala tatou e uiga ki a Ieova mo tena alofa. Ko te uke o mea e tauloto ne tatou e uiga ki te ‵tou Atua, ko te lasi foki o te ‵tou a‵lofa ki a ia.

A IEOVA E ALOFA MALOSI KI A TATOU

4. E pefea ou lagonaga ki te alofa atafai o Ieova? (Onoono foki ki te ata.)

⁴ “E lasi ‵ki te alofa atafai . . . o Ieova.” (Iako. 5:11) I te Tusi Tapu, e fakatusa ne ia a ia eiloa ki se mātua alofa atafai. (Isa. 66:​12, 13) Fakaataata aka la ne koe se mātua e atafai atu ki tena tama. E fakamoe tena tama i ana vae kae faipati atu mo te alofa mo te atafai ki a ia. Kafai ko tagi io me logo‵mae, e taumafai eiloa tou fafine o fai te mea e manako ki ei tena tama. Kafai tatou e logo‵mae, e mautinoa i a tatou me e alofa mai a Ieova ki a tatou. Ne tusi mai te faisalamo: “Kafai ko uke a mea e manavase au ki ei, e fakamafanafana kae fakafiafia ne koe au.”—Sala. 94:19.

5. Se a te uiga o te alofa fakamaoni o Ieova ki a koe?

⁵ A Ieova e fakamaoni. (Sala. 103:8) E se ‵fiu vave a ia māfai e fai ne tatou se mea ‵se. Ne fakafanoanoa ne te fenua o Isalaelu a Ieova i taimi e uke; kae ne fakaasi atu faeloa ne ia tena alofa tumau ki ana tino loto sala‵mo e auala i pati konei: “A koe ne fai pelā me se mea tāua i taku kilokiloga, a koe ne fakaaloalogina, kae ne alofa au ki a koe.” (Isa. 43:​4, 5) Ne seki mafuli eiloa a te alofa o te Atua. E mafai faeloa o faka‵na tatou ki ei. Kafai foki loa ne fai ne tatou a agasala matagā, e se tuku tiaki ne Ieova tatou. Kafai e sala‵mo tatou kae toe ‵foki ki a Ieova, ka lavea ne tatou me koi alofa mai eiloa a ia ki a tatou. E tauto mai me ka “fakamagalo ne ia i se auala lasi” a tatou. (Isa. 55:7) E fai mai te Tusi Tapu me i te alofa fakamagalo tenei e aumai ne ia a “te malosi fou mai i a Ieova eiloa.”—Galu. 3:19.

6. Se a te mea e akoako mai i te Sakalia 2:8 e uiga ki a Ieova?

⁶ Faitau te Sakalia 2:8. Ona ko tena alofa ki a tatou, e malamalama a Ieova i ‵tou lagonaga kae manako o puipui tatou. E mafatia a ia māfai tatou e logo‵mae. Ona ko te mea tenā, e mafai o ‵talo atu tatou ki a ia mo te mautinoa, penei: “Puipui mai au e pelā mo te mea uli o tou ‵kano mata.” (Sala. 17:8) A te mata se vaega tāua o te foitino telā e ‵mae vave. Tela la, i te taimi e fakatusa ne Ieova tatou ki te mea uli i tena mata, ko pelā loa me ko fai mai a ia penei, ‘So se tino e fakalogo‵mae ne ia koutou, oku tino, ko fakalogo‵mae ne latou a te mea telā e tāua ki a au.’

7. Kaia e tāua ei ke fakamalosi aka ‵tou loto tali‵tonu ki te alofa o Ieova?

⁷ A Ieova e manako ke tali‵tonu tatou ki tena alofa ki a tatou taki tokotasi. Kae e iloa ne ia me ona ko mea ne ‵tupu ki a tatou i aso mua, e mafai o fakalotolotolua tatou ki tena alofa mō tatou. Io me kāti e fe‵paki tatou i te taimi nei mo fakalavelave kolā e tofotofo aka i ei a te ‵tou loto tali‵tonu ki te alofa o Ieova. Se a te mea ka fakamalosi aka i ei ‵tou loto tali‵tonu? Ko te tauloto ki auala ne fakaasi atu ne Ieova tena alofa ki a Iesu, te kau fakaekegina, mo tatou katoa.

TE AUALA E FAKAASI MAI NE IEOVA TENA ALOFA

8. Kaia ne talitonu ei a Iesu ki te alofa o tena Tamana ki a ia?

⁸ A te ‵toe fesokotakiga leva eiloa i te iunivesi ko te fesokotakiga i te va o Ieova mo tena Tama pele. I te fia piliona tausaga ne ‵nofo tasi ei i te lagi, ne ‵pili malosi te lā va kae fakatau a‵lofa. Ne fakaasi manino atu ne Ieova a tena alofa ki a Iesu, i te Mataio 17:5. Ne mafai fua o fai atu a Ieova penei, ‘Tenei a ia telā ko oti ne talia ne au.’ Kae ne manako a ia ke iloa ne tatou a te lasi o tena alofa ki a Iesu, telā ne taku ei ne ia me “ko taku Tama, ko taku fagasele.” Ne fakamatamata a Ieova i a Iesu, maise loa me ne loto fiafia a ia o tuku atu a tena ola. (Efe. 1:7) Kae ne seki fakalotolotolua eiloa a Iesu e uiga ki lagonaga o tena Tamana ki a ia. Ne lavea ne Iesu a te alofa tonu o tena Tamana ki a ia. Ne faipati faeloa a ia mo te loto talitonu ki te alofa o tena Tamana ki a ia.—Ioa. 3:35; 10:17; 17:24.

9. Se a te tugapati e fakamatala mai i ei a te lasi o te alofa o Ieova ki te kau fakaekegina? Fakamatala mai. (Loma 5:5)

⁹ E lavea atu foki a te alofa o Ieova ki te kau fakaekegina. (Faitau te Loma 5:5.) Mafaufau ki te tugapati “ne ‵ligi.” E fai mai se fakamatalaga e tasi e uiga ki te mea tenā me “e ‵tafe mai ki a tatou e pelā me se vaitafe.” E lavea faka‵lei atu i te fakatusaga tenei a te lasi o te alofa o Ieova ki te kau fakaekegina! E iloa ne te kau fakaekegina me i a latou ko tino kolā e “alofa ki ei te Atua.” (Iuta 1) Ne fakaasi mai ne te apositolo ko Ioane a olotou lagonaga i te taimi ne tusi mai a ia, penei: “Onoono la ki te vaegā alofa telā ne tuku mai ne te Tamana ki a tatou, ko te mea ke fakaigoa tatou ki tama‵liki a te Atua!” (1 Ioa. 3:1) E mata, ko te kau fakaekegina fua e alofa a Ieova ki ei? Ikai, ko oti ne fakaasi mai ne Ieova a tena alofa mō tatou katoa.

10. Se a te ‵toe fakamaoniga sili o te alofa o Ieova mō koe?

¹⁰ Se a te ‵toe fakamaoniga sili o te alofa o Ieova? Ko te togiola—te ‵toe alofa tu ‵kese ne lavea atu i te iunivesi! (Ioa. 3:16; Loma 5:8) Ne tuku mai ne Ieova a tena Tama pele, kae talia ne ia ke mate mō tino katoa ke mafai o fakamagalo a ‵tou agasala kae ke fai tatou mo Ana taugasoa. (1 Ioa. 4:10) Ko te mafaufau ‵loto faeloa o tatou ki te lasi o te fakatokaga ne fai ne Ieova mo Iesu, ko te malamalama faka‵lei foki o tatou i te lasi o te lā a‵lofa mō tatou katoa. (Kala. 2:20) Ne seki ‵togi fua a te togiola me e manako fua a Ieova o fai a te fakamasinoga tonu. Kae se meaalofa o te alofa. Ne fakamaoni mai ne Ieova a tena alofa mō tatou e auala i te ofoatuga o te ‵toe tino telā e pele ki a ia—ko Iesu. Ne talia ne Ieova ke logo‵mae a tena Tama kae ke mate mō tatou.

11. Ne a mea e tauloto ne tatou mai i te Ielemia 31:3?

¹¹ E pelā mo te mea ne lavea ne tatou, e se alofa fua a Ieova ki a tatou, kae e fakaasi mai eiloa ne ia a tena alofa atafai. (Faitau te Ielemia 31:3.) E fakapilipili atu ne Ieova tatou ki a ia me alofa a ia ki a tatou. (Fakatusa ki te Teutelonome 7:​7, 8.) E seai se mea io me se tino e mafai o ‵vae kea‵tea ne ia tatou mai te alofa tenā. (Loma 8:​38, 39) E pefea ou lagonaga ki te alofa tenei? Faitau te Salamo 23, kae onoono ki te aoga o te alofa mo te alofa atafai o Ieova ki a Tavita kae penā foki mo tatou katoa.

E PEFEA OU LAGONAGA KI TE ALOFA O IEOVA?

12. E fakamatala fakatoetoe mai pefea ne koe a te Salamo 23?

¹² Faitau te Salamo 23:​1-6. A te Salamo 23 se pese e fakaasi mai i ei a te loto talitonu ki te alofa mo te alofa atafai o Ieova. Ne fakamatala mai ne Tavita, telā ne tusi ne ia a te salamo tenei, a te ‵pili o te fesokotakiga i te va o ia mo tena Tausi Mamoe, ko Ieova. Ne tokagamalie a Tavita mai te iloa atu me e takitaki ne Ieova a ia, kae ne fakalagolago katoatoa a tou tagata ki a Ia. Ne iloa ne Tavita me ka fakaasi atu ne Ieova a tena alofa ki a ia i aso takitasi o tena olaga. Se a te mea ne fai ei ke maua ne ia te loto talitonu?

13. Kaia ne talitonu ei a Tavita ki te tausiga atafai a Ieova?

¹³ “Ka seai se mea e mativa ei au.” Ne tokagamalie eiloa a Tavita me ne tausi atu faeloa a Ieova ki ana manakoga. Ne ‵pili foki te va fakataugasoa o Tavita mo Ieova kae iloa ne ia me maua ne ia a tena taliaga. Tenā te pogai ne mautinoa ei i a ia me faitalia a mea ‵tupu ki a ia i aso mai mua, ka tausi atu faeloa a Ieova ki ana manakoga katoa. A te talitonu o Tavita ki te alofa atafai o Ieova ne sili fakafia atu i lō ana manavasega katoa, kae ne fai ei ke fiafia malosi a ia kae lotomalie foki.—Sala. 16:11.

14. I auala fea e fakaasi mai ne Ieova tena alofa atafai ki a tatou?

¹⁴ E tausi mai a Ieova mo te alofa ki a tatou, maise loa māfai e ‵tupu a mea ma‵sei ki ‵tou olaga. A Claire,a telā ne tavini atu i te Peteli i se 20 tupu tausaga, ne seki iloa ne ia ana mea ka fai i te taimi ne fe‵paki ana kāiga mo fakalavelave kese‵kese. Ne masaki faka‵mate a tena tamana, ne fakatea se taina o ia, kae ne mate te lotou tamā pisinisi, galo atu i ei mo te lotou fale. Ne fakaasi atu pefea ne Ieova a tena alofa atafai ki a latou? Ne fai mai a Claire: “Ne fai ne Ieova ke lava a mea e manakogina ne te motou kāiga i aso takitasi. Kae ko mea ne tuku mai ne Ieova i taimi e uke, e sili fakafia atu i lō mea ne mafaufau au ki ei! E mafaufau sāle au ki taimi ne lagona ei ne au te alofa atafai o Ieova, kae ne fakatāua ne au a taimi konā. Ne fesoasoani mai a mea konā ke tumau au i te tavini atu ki a Ieova mo te fiafia māfai ko ‵sae aka a fakalavelave faiga‵ta.”

15. Ne toe maua pefea ne Tavita te malosi fou? (Onoono foki ki te ata.)

¹⁵ “E fakafou ne ia toku malosi.” I nisi taimi, ne loto mafatia a Tavita i fakalavelave mo mea faiga‵ta ne fepaki mo ia. (Sala. 18:​4-6) Kae ne maua faeloa ne ia te malosi fou ona ko te alofa atafai o Ieova. Ne ‵taki ne Ieova a tena taugasoa loto mafatia ki “laukele moukuā” mo “koga malō‵lo e uke a vai i ei.” Tenā ne toe maua ei ne Tavita a te malosi ke tumau i te tavini atu ki a Ieova mo te fiafia.—Sala. 18:​28-32.

16. I auala fea ne fakafou ei ne Ieova a tou malosi?

¹⁶ E penā foki i aso nei, “ona ko te alofa fakamaoni o Ieova, ne seki fakaseai atu ei ne ia tatou” i taimi e fe‵paki ei mo tulaga faiga‵ta i te olaga. (Tagi. 3:22; Kolose 1:11) Mafaufau ki te fakaakoakoga a Rachel. Ne mafatia tou fafine i te tiakinaga ne tena avaga a ia mo Ieova i te taimi o te masaki ‵pisi ko te COVID-19. Ne a mea ne fai ne Ieova mō ia? Ana muna: “Ne fakamautinoa ne Ieova ke lavea ne au me alofagina au. Ne fai ne ia ke tokouke a taugasoa e ‵kau fakatasi faeloa mo au, e aumai ne latou a mea‵kai, lafo mai a fekau mo tusi fai‵tau fakamalosi loto, e fakamisi‵kata mai, kae fakamasaua mai faeloa ki a au me i a Ieova e atafai mai. E fakafetai faeloa au ki a Ieova mō te tukumaiga ne ia se kāiga lasi kae a‵lofa ki a au.”

17. Kaia ne “se mataku” ei a Tavita?

¹⁷ “E se mataku eiloa au, me i a koe e fakatasi mai ki a au.” Ne tu atu faeloa a te ola o Tavita i se tulaga fakamataku, kae ne tokouke ‵ki ana fili ma‵losi. Kae ona ko te alofa o Ieova, ne maua ei ne ia te tokagamalie mo se puipuiga. Ne lagona ne Tavita a te ‵kau fakatasi atu o Ieova ki a ia i taimi katoa, kae ne fai ei ke malosi tena loto talitonu ki a ia. Tenā ne mafai ei o usu atu a ia, penei: “Ne fakasao ne [Ieova] au mai mea katoa e mataku au ki ei.” (Sala. 34:4) Ne mataku tonu eiloa a Tavita, kae ne iloa ne ia me sili atu a te alofa o Ieova ki a ia i lō a mea ne mataku a ia i ei.

18. I te auala fea e fakamalosi aka tatou ne te alofa o Ieova māfai ko fe‵paki mo tulaga fakama‵taku?

¹⁸ I te auala fea e fakamalosi aka tatou ne te alofa o Ieova māfai ko fe‵paki mo tulaga fakama‵taku? Ne fakamatala mai ne te paenia e igoa ki a Susi a lagonaga o lāua mo tena avaga i te taimi ne fakamate ei te lā tama tagata: “Kafai e tupu se mea fakafanoanoa i tou olaga, e mafatia malosi koe i ei kae ko se iloa foki me ne a mea e ‵tau o fai. Kae mai te alofa atafai o Ieova, ne maua ei ne māua te tokagamalie mo se puipuiga.” Ne toe fai mai a Rachel, telā ne sae muamua mai, penei: “I se po e tasi telā ne logo‵mae ‵ki toku loto, manavase kae mataku, ne tagi au kae ‵talo atu i se leo maluga ki a Ieova. I konā eiloa, maua ei ne au se fakamafanafanaga i toku loto mo se fakatapūga, e pelā loa mo mea e fai ne se mātua ki tena pepe, kae ne tō ei taku moe. Ka se toe puli i a au te taimi tenā.” Ne ‵pei a te toeaina e igoa ki a Tasos ki te falepuipui mō se fa tausaga, me seki manako a ia o kau ki te kautau. Ne tausi atu pefea a Ieova ki a ia mo te alofa? Ana muna: “Ne tuku mai ne Ieova a mea e uke i lō mea ne manakogina ne au. Ne fai ne te mea tenei ke momea aka te lasi o toku loto talitonu ki a ia. E se gata i ei, e auala i tena agaga, ne tuku mai ne Ieova ki a au te fiafia faitalia te nofo atu i loto i te falepuipui. Ne fakamautinoa mai ne te mea tenei ke lavea ne au me ko te lasi o toku loto talitonu ki a Ieova, ko te lasi foki o tena alofa ki a au. Tenā ne kamata ei au o tavini atu e pelā me se paenia tumau a koi nofo atu i te falepuipui.”

FAKAPILIPILI MALOSI ATU KI TOU ATUA ALOFA ATAFAI

19. (a) Ka ‵talo atu pefea tatou ona ko te iloa atu me e alofa mai te Atua ki a tatou? (e) Se a te fakamatalaga o te alofa o Ieova e otia i ei koe? (Onoono ki te pokisi “Pati Kolā ka Fesoasoani Mai ke Lagona ne Tatou te Alofa o Ieova.”)

¹⁹ E fakamaoni mai i tala katoa kolā ne sau‵tala tatou ki ei me i a Ieova “te Atua o te alofa,” e fakatasi mai ki a tatou! (2 Koli. 13:11) A ia e fiafia ki a tatou taki tokotasi. E tali‵tonu tatou me e “fakatamilo [tatou] ne Tena alofa fakamaoni.” (Sala. 32:10) Ko te lasi o te mafaufau ‵loto o tatou ki te auala ne fakaasi mai ne ia tena alofa, ko te lavea ‵lei foki ne tatou a ia e pelā me se tino tonu kae ka gasolo o ‵pili malosi atu tatou ki a ia. E mafai o ‵talo atu tatou ki a ia e aunoa mo te ma‵taku kae fakaasi atu a te lasi o te manakogina ne tatou a tena alofa. E mafai o fakaasi atu ne tatou a ‵tou manava‵sega katoa ki a ia, mo te talitonu me e malamalama kae toka foki a ia o fesoasoani mai ki a tatou.—Sala. 145:​18, 19.

20. E fai pefea ne te alofa o Ieova ke fia fakapili‵pili malosi atu tatou ki a ia?

²⁰ E pelā loa mo te fia fakapili‵pili atu o tatou ki te mafanafana o se afi i se aso ‵moko, ka fia fakapili‵pili atu foki tatou ki te alofa atafai o Ieova. E tiga eiloa e malosi a te alofa o Ieova, kae e atafai foki. Tela la, ke na talia mo te fiafia ne koe a te alofa atafai o Ieova. Kae ke ‵saga tonu atu tatou ki tena alofa mai te fai atu, penei: “Au e alofa ki a Ieova”!—Sala. 116:1.