Fesoasoani ki au Tino A‵koga ki te Tusi Tapu ke Tu ‵Mautakitaki i te Munatonu

1-2. (a) Kaia e faigata ei ki nisi tino a‵koga ki te Tusi Tapu ke tu ‵mautakitaki i te munatonu? (e) Ne a mea ka sau‵tala tatou ki ei i te mataupu tenei?

E MATA, e isi ne mea ne taofi ne ia koe mai te fai pelā me se Molimau a Ieova? Kāti ne mataku koe i te mea ma ‵teke atu a tino e ga‵lue tasi mo koe, ou taugasoa, io me ko ou kāiga. Io me kāti ne mafaufau koe me e se mafai o ola koe e ‵tusa mo tulaga o te Atua. Kafai ne penā loa, ko mafai ei o malamalama koe i te pogai e fakatalave ei au tino a‵koga ki te Tusi Tapu o fai olotou fakaikuga ke fai pelā me ne Molimau a Ieova.

² Ne iloa ne Iesu me e mafai ne mea konei o taofi se tino mai te tavini atu ki a Ieova. (Mata. 13:​20-22) Kae ne seki ‵fiu vave a ia i a latou kolā e fakatalave o tau‵tali atu i a ia. I lō te fai penā, ne fakaasi atu ne ia ki ana soko te auala ke fesoasoani atu ki vaegā tino penā ke (1) iloa a mea kolā e fakalavelave atu ki te lotou ga‵solo ki mua, (2) faka‵poko te lotou a‵lofa ki a Ieova, (3) fai a fakama‵fuliga ki mea e ‵tau o fakamuamua ne latou, kae ko te (4) ke manumalo i olotou tofotofoga. E mafai pefea o fakagalue ne tatou a pati a Iesu ki ana soko i te taimi e fakaaoga ei ne tatou a te tusi ko te Ke Ola ki te Se-Gata-Mai! ke fesoasoani ki se tino akoga ki te Tusi Tapu ke tu ‵mautakitaki i te munatonu?

FESOASOANI KE LAVEA NE TE TINO AKOGA MEA E FAKALAVELAVE ATU KI TENA GASOLO KI MUA

3. Se a te mea kāti ne fakatalave ei a Nikotemo ke fai mo soko o Iesu?

³ A Nikotemo, se takitaki lauiloa o tino Iutaia, ne fakafesagai mo se fakalavelave telā ne fakatalave ei a ia ke fai pelā mo soko o Iesu. Mai tua o se ono masina ne kamata ei te galuega talai a Iesu, ne iloa ne Nikotemo i a Iesu ko te sui o te Atua. (Ioa. 3:​1, 2) Kae ne filifili aka ne Nikotemo ke fetaui a ia mo Iesu i se auala ‵funa ona ko te ‘mataku i tino Iutaia.’ (Ioa. 7:13; 12:42) Kāti ne mataku tou tagata me kafai ko fai a ia mo soko o Iesu, ka galo atu tena tulaga pule.a

4. Ne fesoasoani atu pefea a Iesu ki a Nikotemo ke malamalama i te mea e manako a te Atua ke fai ne ia?

⁴ Ne iloa ne Nikotemo a te Tulafono a Mose, kae ne manako a ia ki se fesoasoani ke malamalama i te mea e manako a Ieova ke fai ne ia. Ne fesoasoani atu pefea a Iesu ki tou tagata? Ne loto fiafia a Iesu o fakaaoga tena taimi i se po e tasi ke fetaui kae sau‵tala mo Nikotemo. Kae ne fakamatala faka‵lei atu ne Iesu ki a Nikotemo a mea e ‵tau o fai ne ia ko te mea ke fai pelā me se soko: ke salamō ki ana agasala, papatiso ki te vai, kae fakatuanaki ki te Tama a te Atua.—Ioa. 3:​5, 14-21.

5. E mafai pefea o fesoasoani atu tatou ki se tino akoga ki te Tusi Tapu ke lavea ne ia a mea kolā e fakatalave ei tena gasolo ki mua?

⁵ Kafai foki loa e iloa ‵lei ne se tino akoga ki te Tusi Tapu a te Tusi Tapu, kāti e manakogina ke fesoasoani atu tatou ke lavea ne ia a te mea telā e taofi ne ia tena gasolo ki mua. E mafai ne galuega ‵togi io me ko ‵tekemaiga mai kāiga o fakalavelave atu ki ana fakamoemoega faka-te-agaga. Tela la, fakaavanoa ou taimi ke fesoasoani atu ki a ia. Kāti e mafai o ‵kami mai ke inu tī koulua io me olo o sa‵sale. I vaegā taimi penā, se avanoaga gali ke fesoasoani atu ke mo a e mā tau tino akoga o fakaasi mai ana fakalavelave. Fakamalosi atu ki a ia ke fai so se fakamafuliga aoga, e se ko te mea ke fakafiafia atu ki a koe, kae ke fakaasi atu ei tena alofa ki a Ieova.

6. E mafai pefea o fesoasoani atu koe ki se tino akoga ke momea aka tena loto malosi ke tu ‵mautakitaki i te munatonu? (1 Kolinito 16:13)

⁶ Kafai e talitonu se tino akoga me ka fesoasoani atu a Ieova ke ola a ia e ‵tusa mo tulaga o te Tusi Tapu, ka momea aka tena loto malosi ke fakagalue ana mea ne tauloto. (Faitau te 1 Kolinito 16:13.) A ‵tou tiute e pelā me se faiakoga o te Tusi Tapu e tai ‵pau eiloa mo te tiute o se faiakoga i akoga. Mafaufau ki taimi koi akoga ei koe, se a te vaegā faiakoga e gali ‵ki ki a koe? Kati ko te faiakoga telā e fesoasoani atu ki a koe mo te kufaki ke ati aka tou loto talitonu ki mea kolā e mafai ne koe o fai. I se auala tai ‵pau, a te faiakoga o te Tusi Tapu ‵lei, e se akoako fua ne ia a mea e manako te Atua ke fai ne tatou, kae e fakatalitonu atu foki ki tena tino akoga me mai te fesoasoani o Ieova ka mafai eiloa ne ia o fai a fakama‵fuliga aoga i tena olaga. E mafai pefea o fai ne koe a te mea tenā?

FESOASOANI KI TAU TINO AKOGA KE FAKA‵POKO TENA ALOFA KI A IEOVA

7. Ne fesoasoani atu pefea a Iesu ki a latou kolā ne fakalogo‵logo ki a ia ke momea aka te lotou a‵lofa ki a Ieova?

⁷ Ne iloa ne Iesu me i te alofa ki te Atua ka fakamalosi ei ana soko ke fakagalue a mea ne tauloto ne latou. Ne akoako faeloa ne ia a mea kolā ka fesoasoani atu ki ana soko ke momea aka te lotou a‵lofa ki te lotou Tamana faka-te-lagi. E pelā me se fakaakoakoga, ne fakatusa ne ia a Ieova ki se tagata telā e tuku atu ne ia a mea ‵lei ki ana tama‵liki. (Mata. 7:​9-11) Kāti a tamana o nisi tino fakalogo‵logo a Iesu ne tino sē a‵lofa. Mafaufau la ki olotou lagonaga i te taimi ne fai atu ne Iesu te tala fakatusa ki se tamana alofa atafai telā ne tali fiafia ne ia te fokimaiga o tena tama telā ne ola i se olaga masei. Ne lavea ei ne latou te alofa atafai o Ieova ki ana tama‵liki i te lalolagi.—Luka 15:​20-24.

8. E fesoasoani atu pefea koe ki se tino akoga ki te Tusi Tapu ke faka‵poko tena alofa ki a Ieova?

⁸ E mafai foki koe o fesoasoani atu ki sau tino akoga ki te Tusi Tapu ke faka‵poko tena alofa ki a Ieova mai te faka‵mafa ne koe a uiga ‵gali o te Atua i au akoakoga. I taimi katoa e fai ei tena akoga, fesoasoani atu ke malamalama a ia i te sokoga o ana mea ne tauloto ki te auala e fakaasi mai ne Ieova tena alofa. Kafai e sau‵tala ki te togiola, faka‵mafa atu te tāua o te mea tenā ki a ia. (Loma 5:8; 1 Ioa. 4:10) Kafai ko malamalama te tino akoga i te lasi o te alofa o Ieova ki a ia, ka fai foki i ei ke alofa malosi a ia ki a Ieova.—Kala. 2:20.

9. Se a te mea ne fesoasoani atu ki a Michael ke ‵fuli tena olaga?

⁹ Mafaufau ki te tala o Michael, mai Indonesia. Ne puti aka a ia i loto i te munatonu kae ne seki papatiso eiloa. I te taimi ko 18 ana tausaga, ne fanatu a ia ki te suā fenua o galue i ei e pelā me se tino fakateletele motoka. Fakamuli ifo, ne avaga a ia, kae ne toe foki o galue i te fenua tenā kae tiaki tena kāiga. I te taimi tenā, ne kamata o fai te akoga a tena avaga mo tena tama fafine ki te Tusi Tapu kae ne ga‵solo ki mua. I te otiga ne mate tena mātua, ne fakaiku aka ne Michael ke foki mai a ia o tausi tena tamana kae ne talia ne ia ke fai tena akoga faka-te-Tusi Tapu. I te taimi ne suke‵suke ei ki te vaega “Keli Malosi Ifo” i te mataupu e 27 o te tusi ko te Ke Ola ki te Se-Gata-Mai!, ne otia ‵ki te loto o Michael. I te taimi ne fakaataata ne ia a lagonaga o Ieova ki te logo‵mae o tena Tama, ne tagi ei a Michael. Ne fakaasi atu ne ia te lasi o tena loto fakafetai mō te togiola, kae gasue o ‵fuli tena olaga kae ne papatiso a ia.

FESOASOANI KI TAU TINO AKOGA KE FAKAMA‵FULI A MEA E FAKAMUAMUA NE IA

10. Ne fesoasoani atu pefea a Iesu ki ana soko ke fai a fakama‵fuliga ki mea e ‵tau o fakamuamua ne latou? (Luka 5:​5-11) (Onoono foki ki te ata.)

¹⁰ A nisi tino kolā ne talai a Iesu ki ei, ne iloa ne latou i te taimi tenā i a ia ko te Mesia, kae koi manakogina ke fesoasoani atu ki a latou ke malamalama me e ‵tau o fakamuamua ne latou te faiga o te galuega talai. A Petelu mo Anitelea ko oti ne fai mo soko mō se vaitaimi i te taimi ne ‵kami ne Iesu lāua ke tau‵tali katoatoa atu i a ia. (Mata. 4:​18, 19) Ne aofia lāua i se pisinisi faika telā ne teletele ‵lei loa, fakatasi mo Iakopo mo Ioane. (Male. 1:​16-20) I te taimi ne tiaki ne Petelu mo Anitelea a te lā pisinisi faika ke tau‵tali katoatoa atu i a Iesu, kae kāti ko oti ne fai lā palani ki te auala ke tausi atu ki lā kāiga. Se a te mea ne fakamalosi atu ki a lāua ke fakama‵fuli a mea kolā e ‵tau o fakamuamua? E fai mai te tala i te Luka me ne fai ne Iesu se vavega telā ne fakamalosi aka ei te lā loto tali‵tonu me e mafai eiloa ne Ieova o tausi lāua.—Faitau te Luka 5:​5-11.

11. E mafai pefea o fakaaoga ne tatou a ‵tou tala totino ke fakamalosi aka ei te fakatuanaki o se tino akoga?

¹¹ E se mafai ne tatou o fai a vavega, e pelā mo Iesu, kae e mafai o fai atu ne tatou a tala ki te auala e fesoasoani atu ei a Ieova ki a latou kolā e fakamuamua ne latou a Ia i olotou olaga. E pelā me se fakaakoakoga, e masaua ne koe te auala ne fesoasoani atu a Ieova ki a koe i tau kamataga o kau ki fakatasiga? Kāti ne sau‵tala koe mo tou pule kae fakamatala atu te pogai e se mafai o galue ovataimi koe māfai e fakalavelave atu ki tou kau ki fakatasiga. I taimi e fai atu tau tala ki tau tino akoga, fakamatala atu te auala ne fakamalosi aka tou fakatuanaki ne te auala ne fesoasoani atu a Ieova ki tau fakaikuga ke fakamuamua te tapuakiga i tou olaga.

12. (a) Kaia e ‵tau o kami ne tatou a tino talai kese‵kese ki se akoga faka-te-Tusi Tapu? (e) E mafai pefea o fakaaoga ne koe a vitio ke akoako tau tino akoga i se auala magoi? Taku mai se fakaakoakoga.

¹² E gali foki māfai e fakamatala atu ne nisi taina mo tuagane te auala ne ‵fuli ei olotou olaga ke fakamuamua a Ieova. Tela la, ke ‵kami a taina tapuaki kese‵kese ki tau akoga faka-te-Tusi Tapu. Fai atu ke fakamatala olotou tala ki te auala ne maua ne latou te munatonu mo mea ne fai ne latou ke fakamuamua te galuega a Ieova i olotou olaga. E se gata i ei, fakaavanoa se taimi mo tau tino akoga ke onoono ki vitio i te vaega “Keli Malosi Ifo” io me ko te vaega ko “Nisi Fakamatalaga” o te tusi ko te Ke Ola ki te Se-Gata-Mai! E pelā me se fakaakoakoga, kafai e sau‵tala ki te mataupu 37, e mafai o faka‵mafa atu ne koe a fakatakitakiga mai te vitio ko te Ka Tausi Eiloa Tatou ne Ieova.

FESOASOANI KI TAU TINO AKOGA KE MANUMALO I TOFOTOFOGA

13. Ne fakatoka pefea ne Iesu ana soko mō ‵tekemaiga?

¹³ Ne fai atu faeloa a Iesu ki ana soko me ka fe‵paki latou mo ‵tekemaiga mai nisi tino, penā foki mai i olotou kāiga. (Mata. 5:11; 10:​22, 36) I te taimi ko pilipili o oti te galuega talai a Iesu, ne fai atu a ia ki ana soko me e mafai o ‵mate latou. (Mata. 24:9; Ioa. 15:20; 16:2) Ne fakamalosi atu a ia ki a latou ke fakaeteete i te lotou galuega talai. Ne fai atu a ia ki a latou ke mo a e kinau mo tino kolā e ‵teke atu ki a latou kae ke ‵poto ko te mea ke tumau latou i te talai atu.

14. E mafai pefea o fesoasoani tatou ki se tino akoga ke fakatoka mō ‵tekemaiga? (2 Timoteo 3:12)

¹⁴ E mafai o fesoasoani atu tatou ki se tino akoga ke toka mō ‵tekemaiga mai te fakamatala atu a mea kolā kāti ka mafai o fai mai ne tino e ga‵lue tasi mo ia, taugasoa mo kāiga. (Faitau te 2 Timoteo 3:12.) Kāti ka fakatauemu atu a tino ga‵lue me ko taumafai a ia o ola e ‵tusa mo akoakoga i te Tusi Tapu. Kae ko nisi tino, ke oko ki ana kāiga ‵pili, e mafai o se fia‵fia ki ana talitonuga kolā e fakavae ki te Tusi Tapu. Kafai e vave tatou o fakatoka ‵tou tino a‵koga ke fakafesagai atu ki ‵tekemaiga, ka toka ‵lei foki latou o fakafesagai atu ki ei.

15. Se a te mea e mafai o fesoasoani atu ki se tino akoga ki te Tusi Tapu ke kufaki i ‵tekemaiga mai ana kāiga?

¹⁵ Kafai e fakafesagai tau tino akoga mo ‵tekemaiga mai ana kāiga, fakamalosi a ia ke mafaufau ki te pogai e se fia‵fia atu ei ana kāiga. Kāti e mafau‵fau latou me ko oti ne takitaki‵segina a ia, io me mafau‵fau i Molimau a Ieova ne tino ma‵sei. Ke oko foki ki a Iesu ne fakafesagai mo faifaiga sē ‵lei mai tino kolā ne alofa a ia ki ei. (Male. 3:21; Ioa. 7:5) Akoako tau tino akoga ke tumau i te kufaki kae faipati i se auala apo ki ana kāiga mo nisi tino.

16. E mafai pefea o fesoasoani tatou ki se tino akoga ki te Tusi Tapu ke fakaasi atu ana talitonuga i se auala apo?

¹⁶ Kafai foki e fakaasi mai ne ana kāiga te fiafia, e ‵tau o poto te tino akoga ke se fakamatala atu a mea katoa i te taimi e tasi. Kafai ko tō uke a fakamatalaga, kāti ka ‵fiu vave latou kae fai ei ke se toe fia sau‵tala ki ana talitonuga. Tela la, ke fakamalosi tau tino akoga ke fakaasi atu ana talitonuga i se auala telā e fai ei ke fia fakalogo‵logo mai ana kāiga i aso mai mua. (Ko. 4:6) Kāti e mafai o ‵kami ne ia ana kāiga ke onoono ki te jw.org. Ka fai i ei ke mafai o tauloto latou ki mea e uke atu e uiga ki Molimau a Ieova i so se taimi.

17. E mafai pefea o akoako ne koe tau tino akoga ke tali aka a fesili a nisi tino e uiga ki Molimau a Ieova? (Onoono foki ki te ata.)

¹⁷ E mafai o fakaaoga ne koe te fakasologa o mataupu i te jw.org ko te “Fesili Masani” ke fesoasoani ki tau tino akoga ke fakatoka a tali faigofie ki fesili kolā e mafai o ‵sili mai ne tino e ga‵lue tasi mo ia io me ko ana kāiga. (2 Timo. 2:​24, 25) I te fakaotiga o mataupu takitasi, onoono ki te vaega “E Fai Mai a Nisi Tino” i te tusi ko te Ke Ola ki te Se-Gata-Mai! Fakamalosi tau tino akoga ke fakaakoako o tali i ana pati eiloa. Sa fakatalave o tuku atu a manatu fesoasoani ki te auala ke mafai o momea aka te ‵lei o te auala e tali atu ei a ia. A te fakaakoako faka‵lei ka fesoasoani atu ke mafai o ‵pulu ne ia ana talitonuga mo te loto talitonu.

18. E fakamalosi pefea ne koe se tino akoga ke fakaasi atu ana talitonuga i te galuega talai? (Mataio 10:27)

¹⁸ Ne fakamalosi atu a Iesu ki ana soko ke folafola atu te tala ‵lei ki tino. (Faitau te Mataio 10:27.) Ko te vave fakaasi atu ne te tino akoga ana talitonuga, ko te vave foki o iloa ne ia o fakalagolago ki a Ieova. E mafai pefea o fesoasoani atu koe ki se tino akoga ke mafai o fai ne ia te mea tenā? Kafai ko faka‵pula se galuega fakapito i te fakapotopotoga, fakamalosi atu a ia ke mafaufau ki te auala e mafai o fetaui ‵lei a ia ke fai pelā me se tino talai. Fakamatala atu te pogai ne faigofie ki tino e tokouke ke kamata o talai atu i vaegā taimi fakapito penā. Ka aoga foki ki a ia a te kau atu ki te akoga telā e fai i fakatasiga i loto i te vaiaso. Kafai e kausaki atu a ia ke fai penā, ka tauloto a ia ki te auala ke fakamatala faka‵lei atu ana talitonuga.

FAKAASI TE LOTO TALITONU KI TAU TINO AKOGA

19. Ne fakaasi atu pefea ne Iesu te loto talitonu ki ana soko, kae e mafai pefea o fakaakoako tatou ki ei?

¹⁹ Koi tuai o fanaka a Iesu ki te lagi, ne fai atu a ia ki ana soko me ka toe ‵kau fakatasi latou mo ia. Ne seki malamalama latou me ne faipati a Iesu ki te taimi e olo aka ei latou ki te lagi. Kae ne saga tonu atu a ia ki te lotou fakamaoni, kae e se ko olotou manatu fakalotolotolua. (Ioa. 14:​1-5, 8) Ne iloa ne ia me ne manakogina se taimi ke malamalama latou i nisi mea, e pelā mo te fakamoemoega ki te lagi. (Ioa. 16:12) E mafai foki o fakaasi atu te ‵tou loto tali‵tonu ki te manakoga o ‵tou tino a‵koga ke fakafiafia atu ki a Ieova.

20. Ne fakaasi atu pefea ne se tuagane i Malawi a te loto talitonu ki tena tino akoga?

²⁰ E tali‵tonu tatou me ka ma‵nako ‵tou tino a‵koga o fai a te mea tonu. Mafaufau ki te fakaakoakoga a Chifundo, se tuagane i Malawi. Ne kamata o fai ne ia se akoga faka-te-Tusi Tapu ki te tusi Ke Ola ki te Se-Gata-Mai! mo se talavou fafine lotu Katolika ko Alinafe. I te otiga ne sau‵tala lāua ki te mataupu 14, ne fesili atu a Chifundo ki tena tino akoga me ne a ana manatu ki te fakaaogaga o mea fakatusa i tapuakiga. Ne otia te loto o Alinafe kae tali atu, “Tenā se fakaikuga totino eiloa!” Ne mafaufau a Chifundo me kāti tenā te fakaotiga o te lā akoga faka-te-Tusi Tapu. Kae ne tumau eiloa a ia i te suke‵suke mo Alinafe, mo te fakamoemoega me ka malamalama a ia i te manatu tenā fakamuli. I ne masina fakamuli ifo, ne fesili atu ne Chifundo te fesili i te mataupu e 34: “Ne maua pefea ne koe a mea aoga mai i au sukesukega e uiga ki te Tusi Tapu mo te Atua tonu, ko Ieova?” Ne fakamatala mai ne Chifundo te tali a Alinafe, “Ne faka‵sae mai ne ia a manatu ‵gali e uke, tasi mai ei me i Molimau e se fai ne latou a faifaiga kolā e taku fakamasei ne te Tusi Tapu.” E se leva, kae ne seki toe fakaaoga ne Alinafe a mea fakatusa kae ne fetaui ‵lei a ia ke papatiso.

21. E mafai pefea o fakamalosi aka ne tatou te manakoga o se tino akoga ke tu ‵mautakitaki i te munatonu?

²¹ E tiga eiloa ko Ieova e “fai ne ia ke ola te lakau,” e isi se ‵tou tusaga ke fesoasoani atu ki se tino akoga ki te Tusi Tapu ke gasolo ki mua. (1 Koli. 3:7) E uke a mea e fai ne tatou i lō te akoako atu fua o ia ki mea e manako te Atua ke fai ne ia. E fesoasoani atu tatou o ati aka ke ‵poko tena alofa ki a Ieova. E fakamalosi foki ne tatou a ia ke fakaasi atu tena alofa mai te fai o fakama‵fuliga ki mea kolā e ‵tau o fakamuamua i tena olaga. Kae e akoako ne tatou a ia ke iloa o fakalagolago ki a Ieova i taimi o tofotofoga. Mai te fakaasi atu o te loto talitonu ki a ia, e fakamalosi aka ne tatou a tena loto talitonu me e mafai eiloa o ola a ia e ‵tusa mo tulaga o Ieova kae tu ‵mautakitaki i te munatonu.