Te Auala ke Tuku Atu a Pati Fakatonutonu

1. Ko oi e ‵tau o tuku atu ne latou a pati fakatonutonu? Fakamatala mai.

E PEFEA ou lagonaga māfai ko tuku atu ne koe a pati fakatonutonu? Nisi tino e fia‵fia o fai penā. Nisi tino e se fia‵fia kae fai fakaa‵tea māfai e tuku atu a pati fakatonutonu io me ne manatu fesoasoani. Kae ui ei, e ‵tau eiloa mo tatou katoa o tuku atu a pati fakatonutonu i nisi taimi. Kaia? Me fai mai a Iesu me i ana soko ‵tonu e lavea fua ona ko te alofa telā e fakaasi ne te suā tino ki te suā tino. (Ioa. 13:35) Kae tasi te auala e fakamaoni atu ei te ‵tou a‵lofa ko te tukuatuga o pati fakatonutonu ki ‵tou taina mo tuagane māfai e manakogina. Kae fai mai te Muna a te Atua me i te “va fakataugasoa gali” e sae aka io me māfua mai i “fautuaga fakamaoni.”—Faata. 27:9.

2. Se a te mea e ‵tau o iloa ‵lei ne toeaina o fai kae kaia? (Onoono foki ki te pokisi “Manatu Fesoasoani i Fakatasiga i te Vaiaso.”)

² E ‵tau mo toeaina o iloa ‵lei ne latou o tuku atu a pati fakatonutonu ma‵goi. Ko oti ne ‵tofi aka ne Ieova e auala i a Iesu a tāgata konei ke tausi te fakapotopotoga. (1 Pe. 5:​2, 3) Tasi o auala e fai ei latou penā ko te tuku atu o manatu fesoasoani mai te Tusi Tapu e auala i olotou lāuga ki te fakapotopotoga. E ‵tau foki o tuku atu ne latou a manatu fesoasoani ki mamoe taki tokotasi e aofia i ei a latou kolā ko tapea‵pea kea‵tea mai te lafu mamoe. E mafai pefea ne toeaina e pelā foki mo tatou katoa o tuku atu a pati fakatonutonu ‵lei?

3. (a) E mafai pefea o fai tatou pelā me se tino fakatonutonu ‵lei? (Isaia 9:6; onoono foki ki te pokisi “Fakaakoako ki a Iesu Māfai ko Tuku Atu a Pati Fakatonutonu.”) (e) Ne a mea ka sau‵tala tatou ki ei i te mataupu tenei?

³ E uke a mea e mafai o tauloto ne tatou mai i tala o tino i te Tusi Tapu kae maise ko Iesu, ki te auala ke fai pelā me se tino fakatonutonu ‵lei. Tasi o tofi ne tuku atu ki a ia ko te “Tino Fakatonutonu Sili.” (Faitau te Isaia 9:6.) Ka sau‵tala tatou i te mataupu tenei ki mea e ‵tau o fai māfai e fakamolemole mai se tino ki ne pati fakatonutonu mo mea e mafai o fai māfai e ‵tau o tuku atu ne manatu fesoasoani faitalia me seki fakamolemole mai se tino ki ei. Ka onoono foki tatou ki te tāua ke tuku atu a pati fakatonutonu i te taimi tonu mo te auala tonu.

MĀFAI KO FAKAMOLEMOLE MAI SE TINO KI NE PATI FAKATONUTONU

4-5. Kafai e fesili mai se tino ki ne pati fakatonutonu, se a te fesili e ‵tau o fesili ifo muamua ne tatou ki a tatou eiloa? Taku mai se fakaakoakoga.

⁴ Kafai e fesili mai se tino ki ne pati fakatonutonu, e ‵tau o ‵saga atu pefea tatou ki ei? Kāti ka fia‵fia tatou kae ma‵nako o fesoasoani fakavave atu. Kae e ‵tau o fesili ifo muamua tatou penei, ‘E mata, ko au te tino tonu ke tuku atu a pati fakatonutonu i te feitu tenei?’ Nisi taimi, a te ‵toe auala ‵lei ke fesoasoani atu ko te ‵sala ki se tino telā e malamalama ‵lei i te tulaga o te tino tenā, i lō te tuku atu ne tatou a pati fakatonutonu.

⁵ Mafaufau ki te fakaakoakoga tenei. Kāti e masaki malosi sou taugasoa. E fai atu a ia me isi ne ana sukesukega ko oti ne fai ki togafiti kolā e mafai o fakaaoga ne ia kae ko fesili atu ki a koe me ne a togafiti kolā e mafaufau koe me e ‵lei ki a ia. E tiga loa e isi se togafiti telā e fiafia koe ki ei, kae masaua i a koe e sē se tokita telā ne akoga faka‵lei ke faka‵lei te masaki tenā. Tela la, a te ‵toe auala ‵lei ke fesoasoani ki tou taugasoa ko te ‵sala ki te tino tonu ke fesoasoani atu ki a ia.

6. Kaia e ‵lei ei ke faka‵tali malie a koi tuai o tuku atu a pati fakatonutonu?

⁶ Kafai foki loa e mafaufau koe me ko koe te tino tonu ke tuku atu a pati fakatonutonu e uiga ki se mea, kāti e ‵lei ke faka‵tali malie mō se vaitaimi koi tuai o avatu se tali ki te tino tenā. Kaia? Faataoto 15:28 e fai mai me i “te tino amiotonu e mafaufau ‵loto kae koi tuai o tali atu.” Kae e a māfai e mafau‵fau tatou me iloa ne tatou te tali? Se mea ‵lei eiloa ke ‵sala se taimi ke fai a sukesukega, ‵talo, kae mafaufau ‵loto. Ko maua i ei ne tatou a te loto talitonu me e fetaui ‵lei a te tali a tatou mo lagonaga o Ieova e uiga ki te mea tenā. Mafaufau ki te fakaakoakoga a te pelofeta ko Natano.

7. Ne a au mea ne tauloto mai te tala o te pelofeta ko Natano?

⁷ I te taimi ne faipati atu ki te pelofeta ko Natano, ne fai atu te tupu ko Tavita me manako a ia o faite te faletapu o Ieova. Ne tali fakavave atu a Natano ke fai a te mea tenā. Kae ne ‵tau mo Natano o ‵sala muamua me se a te loto o Ieova. Kaia? Me ne seki manako a Ieova ke faite ne Tavita a te faletapu. (1 Nofo. 17:​1-4) E fakaasi mai i te tala tenei, me kafai e fakamolemole mai se tino ki ne pati fakatonutonu, se mea poto ke “fakatuai o fai‵pati” tatou.—Iako. 1:19.

8. Se a te suā pogai e ‵tau ei o fakaeteete tatou māfai ko tuku atu a pati fakatonutonu?

⁸ Mafaufau ki te suā pogai e ‵tau ei o fakaeteete tatou māfai ko tuku atu a pati fakatonutonu ki se tino: Kafai ne fai ne se tino se fakaikuga sē ‵lei ona ko manatu fesoasoani ne tuku atu ne tatou e mafai eiloa o ‵losi mai te mea tenā ki a tatou. Tela la, se mea tāua eiloa ke mafaufau faka‵lei a koi tuai o tuku atu ne pati fakatonutonu.

TE AUALA KE TUKU ATU A MANATU FESOASOANI MĀFAI FOKI LOA E SEKI FAKAMOLEMOLE MAI SE TINO KI EI

9. Koi tuai o tuku atu a manatu fesoasoani, se a te mea e ‵tau o fakamautinoa muamua ne toeaina? (Kalatia 6:1)

⁹ I nisi taimi, e ‵tau o ga‵sue muamua a toeaina o tuku atu a manatu fesoasoani ki se taina io me se tuagane telā ko ‘seke tena auala.’ (Faitau te Kalatia 6:1.) E mafai o fai ne se tino a fakaikuga sē ‵lei kolā ka takitaki atu ki te faiga ne ia se agasala matagā. E ‵tau o taumafai a toeaina ke fesoasoani ki te tino tenā ke tumau i te auala ki te ola se-gata-mai. (Iako. 5:​19, 20) Kae muamua la, e ‵tau o fakamautinoa ne latou me ko seke eiloa te auala o te tino tenā ko te mea ke mafai o aoga olotou manatu fesoasoani e tuku atu ki ei. Ko oti ne talia ne Ieova ke fai ne tatou katoa a ‵tou fakaikuga totino kolā e fakavae ki ‵tou loto lagona. (Loma 14:​1-4) Kae e pefea la māfai ko seke eiloa te auala o se taina kae ko fakaiku aka ne toeaina ke ga‵sue muamua latou o tuku atu ne manatu fesoasoani ki a ia?

10-12. Ne a mea e ‵tau o fai ne toeaina māfai e tuku atu ne latou a manatu fesoasoani ki se tino telā e seki fakamolemole mai ki ei? Fakamatala mai. (Onoono foki ki ata.)

¹⁰ E sē se mea faigofie ki toeaina ke tuku atu a manatu fesoasoani ki se tino telā e seki fakamolemole mai ki ei. Kaia? E fai mai te apositolo ko Paulo me e mafai o seke se auala o se tino e aunoa mo te iloa ne ia. Tela la, e isi ne mea e ‵tau o fai muamua ne toeaina ke fakatoka te tino tenā ke talia ne ia a manatu fesoasoani.

¹¹ A te tukuatuga o manatu fesoasoani ki se tino telā e seki fakamolemole mai ki ei, e tai ‵pau mo te ‵tokiga o lakau i se laukele telā e seki fakamalū faka‵lei. Koi tuai o ‵toki ne se tino ‵toki lakau ana lakau, e ‵tau o fakamalū faka‵lei muamua ne ia te laukele. E fai ei ke malū te laukele kae ke ola faka‵lei te fuaga telā e ‵toki ki ei. Ka oti ko ‵toki ifo ei te fuaga. Ko fakasiusiu ei ne ia ke fesoasoani atu ke mafai o ola. I se auala tai ‵pau, koi tuai o tuku atu ne se toeaina a manatu fesoasoani ki se tino e seki fakamolemole mai ki ei, se mea ‵lei ke galue muamua a ia o fakatoka te laukele ke malū, i se auala fakatusa. E pelā me se fakaakoakoga, kafai ko maua se taimi ‵lei ke faipati ki ei, e fakamautinoa atu ne te toeaina me e alofa kae atafai a ia ki te taina tenā kae e isi se mea e manako a ia o faipati ki ei. Ka faigofie ki nisi tino ke talia ne latou a manatu fesoasoani māfai a te tino e tuku mai ne ia a manatu konā se tino telā e masani o fakaasi atu ne ia te alofa mo te atafai.

¹² I te taimi e fai‵pati ei lāua, e tumau te toeaina i te fakamalū ne ia te laukele mai te fai atu me i tino katoa e fai ne latou a mea ‵se kae e manakogina ne latou a manatu fesoasoani i nisi taimi. (Loma 3:23) I se leo filemu kae āva, e fakaasi atu ei ne te toeaina mai te Tusi Tapu a te mea ‵se telā ko oti ne fai ne ia. I te taimi eiloa ko iloa ne te taina a te mea ‵se ne fai ne ia ko ‵toki ei ne te toeaina a te fuaga mai te fakamatala atu i tugapati faigofie a mea e manakogina ke fai ne ia ke faka‵tonu aka a te mea ‵se tenā. Ka oti loa, ko “fakasiusiu” ei ne te toeaina a te fuaga tenā mai te fakamālō atu ki te taina kae ‵talo fakatasi mo ia.—Iako. 5:15.

13. E fakamautinoa aka pefea ne toeaina me malamalama a te tino i manatu fesoasoani ne fai atu ki a ia?

¹³ I nisi taimi, a pati e fai atu ne te tino fakatonutonu mo mea e lagona ne te tino e tuku atu ki ei a manatu fesoasoani e mafai o ‵kese. E fakamautinoa aka pefea ne toeaina me malamalama a te tino tenā i pati ne fai atu ki ei? E mafai o fai atu ne latou a fesili i se auala alofa kae atamai ke maua ne te tino a manatu tāua konā. (Fai. 12:11) Ka fesoasoani atu ana tali ki te tino fakatonutonu ke mautinoa i a ia me ko malamalama ‵lei a te tino tenā i ana manatu fesoasoani.

TUKU ATU A PATI FAKATONUTONU I TE TAIMI TONU MO TE AUALA TONU

14. E mata, e ‵tau o tuku atu ne tatou a pati fakatonutonu māfai e kaitāua tatou? Fakamatala mai.

¹⁴ A tatou katoa ne tino sē ‵lei katoatoa, tela la, i nisi taimi e fakafanoanoa ne tatou a nisi tino i ‵tou pati mo faifaiga e fai. (Ko. 3:13) E fai mai te Muna a te Atua me i nisi taimi e mafai o fai ne tatou a nisi tino ke kaitāua. (Efe. 4:26) Kae e se ‵tau o tuku atu ne tatou a pati fakatonutonu māfai ko kaitāua. Kaia? Me “e se mafai o aumai ne te ita o te tagata a te amiotonu o te Atua.” (Iako. 1:20) Kafai e tuku atu ne tatou a pati fakatonutonu i te taimi e kaitāua ei tatou, ka fai fua i ei ke masei atu a te fakalavelave. Kae e se fakauiga i ei me ko se ‵tau eiloa o fakaasi atu a ‵tou mafaufauga mo lagonaga ki te tino ne fai ne ia ke kaitāua tatou. Kae kafai e faka‵tali tatou ke filemu a mea katoa, ka mafai eiloa o aoga a pati fakatonutonu e tuku atu ne tatou. Ke mafaufau ki te fakaakoakoga ‵lei a Eliu telā ne tuku atu ne ia a manatu fesoasoani ki a Iopu.

15. Se a te mea e tauloto ne tatou mai te tala o Eliu? (Onoono foki ki te ata.)

¹⁵ Ne fakalogologo a Eliu i aso e uke ki a Iopu e taumafai o ‵pulu a ia mai i ‵losiga ‵se a ana tino fakamafanafana ‵loi. Ne alofa a Eliu ki a Iopu. Kae ne kaitaua malosi foki a Eliu ki a Iopu me ne fai ne ia a pati sē ‵tonu e uiga ki a Ieova kae saga ifo ki a ia eiloa. Kae ui ei, ne faka‵tali eiloa a Eliu ki te taimi ke faipati a ia kae ne faipati atu i se auala agamalu mo te āva ke fakatonutonu aka ei a Iopu. (Iopu 32:2; 33:​1-7) E mafai o tauloto ne tatou se akoakoga tāua mai te tala o Eliu: E ‵lei atu ke tuku atu a pati fakatonutonu i te taimi tonu mo te auala tonu kae ke tuku atu i te āva mo te alofa.—Fai. 3:​1, 7.

TUMAU I TE TUKU ATU KAE TALIA A PATI FAKATONUTONU

16. Se a te akoakoga e tauloto ne koe mai te Salamo 32:8?

¹⁶ A te tusi siki fakavae o te mataupu tenei e fai mai me e ‘tuku mai ne Ieova a pati fakatonutonu mo ana mata e kilo mai ki a tatou.’ (Faitau te Salamo 32:8.) E fakaasi mai ei me tumau eiloa a ia i te fesoasoani mai ki a tatou. E se tuku mai fua ne ia a pati fakatonutonu kae e fesoasoani mai foki ke fakagalue ne tatou a manatu konā. Ko oko eiloa i te gali o te fakaakoakoga tenei mō tatou. Kafai ko maua ne tatou te tauliaga ke tuku atu a pati fakatonutonu ki nisi tino, ke fakaakoako eiloa tatou ki a Ieova mai te tumau faeloa i te fakamalosi atu ki a latou kae fesoasoani atu ke fai ne latou a fakaikuga ‵poto.

17. Ne a lagonaga e maua ne tatou māfai e tuku mai ne toeaina a pati fakatonutonu mautinoa mai te Tusi Tapu? (Isaia 32:​1, 2)

¹⁷ Ko manakogina malosi eiloa i te taimi nei ke tuku atu a pati fakatonutonu kae ke talia foki ne tatou. (2 Timo. 3:1) A toeaina kolā e tuku mai ne latou a pati fakatonutonu mautinoa mai te Tusi Tapu e fai loa “e pelā me ne tamā vaitafe i koga e seai ne vai i ei.” (Faitau te Isaia 32:​1, 2.) A taugasoa kolā e iloa ne latou a mea e ma‵nako tatou o fakalogo‵logo ki ei kae tuku mai ne latou a pati fakatonutonu kolā e manakogina malosi ne tatou, e fai eiloa pelā me tuku mai ne latou se meaalofa tāua e pelā mo “apolo aulo i loto i se pōla siliva.” (Faata. 25:11) Ke na tumau tatou i te tauloto malosi ke iloa o tuku atu a pati fakatonutonu ‵lei kae ke talia foki ne tatou.