Kai ‘Tauloto Koe ki au Mea e ‵Tau o Fai’ ke Maua te Lotomalie?

1. Se a te mea e fakauiga ki ei a te lotomalie, kae se a foki te mea e se fakauiga ki ei?

E MATA, ko lotomalie koe ki mea ko maua ne koe? A te tino lotomalie e maua ne ia te fiafia mo te filemu mai te saga tonu atu ki fakamanuiaga ko maua nei ne ia. E se fanoanoa io me kaitaua a ia ona ko mea e se maua ne ia. Kae e se fakauiga i ei me kafai ko lotomalie a ia, ko se ‵tau o saga atu ki te auala e ola ei a ia. E pelā me se fakaakoakoga, e ‵tau mo se Kelisiano o kausaki atu ki avanoaga e uke ke fakalauefa tena taviniga ki a Ieova. (Loma 12:1; 1 Timo. 3:1) E se gata i ei, ka se mafai o galo atu tena fiafia māfai e se maua fakavave ne ia a tauliaga kolā ne fakamoemoe a ia ki ei.

2. Kaia e fakamataku i ei māfai e se lotomalie se tino ki mea ko maua ne ia?

² A te sē lotomalie e mafai o maua mai ei a ikuga sē ‵lei. A tino kolā e se mafai o lotoma‵lie ki mea ko maua ne latou, e mafai o ga‵lue ovataimi ke maua a kope e uke kolā e se manakogina malosi. Se mea fakafanoanoa, me i nisi Kelisiano ko oti ne kai‵soa ne latou a tupe mo nisi mea aka kolā e ma‵nako latou ki ei. Kāti e mafau‵fau ifo latou, ‘E ‵tau eiloa o maua ne au a mea konā,’ ‘Ko leva ne fakatalitali au ki ei,’ io me ‘Ka toe ‵togi atu ne au a mea konā fakamuli.’ Kae ko te kaisoa se mea fakafanoanoa kae fakamasiasi ki a Ieova. (Faata. 30:9) A nisi tino kolā ne fanoa‵noa me e se maua ne latou a tauliaga i te taviniga, ko oti ne fakagata te lotou taviniga ki a Ieova. (Kala. 6:9) E mafai pefea ne se tino tapuaki telā ko oti ne tuku atu ki a Ieova o mafaufau ke fai ne ia te mea tenā? Kāti ona ko te mea ko kamata o seai se lotomalie i a ia.

3. Se a te munatonu telā e tauloto ne tatou i te Filipi 4:​11, 12?

³ E mafai ne tatou katoa o ati aka a te lotomalie. Ne tusi mai a te apositolo ko Paulo me ne “iloa ne ia o fai ke lotomalie a ia ki so se mea mai lalo i so se fakanofonofoga.” (Faitau te Filipi 4:11, 12.) Ne tusi ne ia a pati konā i te taimi koi ‵pei ei i te falepuipui. Kae ne seki galo atu eiloa a tena fiafia. Ne ‘tauloto a ia ki ana mea e ‵tau o fai’ ke maua te lotomalie. Kafai e faigata ke maua ne tatou te lotomalie, e fakamautinoa mai i pati a Paulo mo mea ne ‵tupu ki a ia, me e mafai eiloa o ati aka ne tatou a te lotomalie. E se ‵tau o fakamoe‵moe tatou me ka maua ne tatou a lagonaga lotoma‵lie ona ko ‵tou fakanofonofoga. Kae e ‵tau eiloa o tauloto tatou ke lotoma‵lie. Pefea la? Ke sau‵tala nei tatou ki uiga kolā ka fesoasoani mai ke tauloto tatou ki mea e ‵tau o fai ke maua te lotomalie.

ATI AKA TE LOTO FAKAFETAI

4. E fesoasoani mai pefea a te loto fakafetai ke maua ne tatou a te lotomalie? (1 Tesalonia 5:18)

⁴ A te tino telā e loto fakafetai e maua faeloa ne ia te lotomalie. (Faitau te 1 Tesalonia 5:18.) E pelā me se fakaakoakoga, kafai e loto fakafetai tatou ki mea tāua ko maua ne tatou i te olaga, ka se sōna manava‵se tatou ki mea kolā e ma‵nako tatou ki ei kae e se maua ne tatou. Kafai e loto fakafetai tatou ki tauliaga i te taviniga ko maua nei ne tatou, ka ‵saga tonu atu fua tatou o fai te ‵toe mea e mafai i lō te mafau‵fau faeloa ki te auala ke maua se tauliaga fou. E se tioa eiloa o fakamalosi mai te Tusi Tapu ke aofia faeloa ne tatou i ‵tou ‵talo a fakafetai ki a Ieova! A te mauaga o te loto fakafetai e fesoasoani mai ke maua ne tatou a “te filemu o te Atua telā e sili fakafia atu i mea katoa kolā e malama‵lama i ei a tino.”—Fili. 4:​6, 7.

5. Ne a pogai ne ‵tau o fakaasi atu ne te kau Isalaelu a te loto fakafetai? (Onoono foki ki te ata.)

⁵ Mafaufau ki mea ne ‵tupu ki te kau Isalaelu. I taimi e uke, ne fa‵meo latou ki a Ieova me ne seki maua ne latou a mea‵kai kolā ne maua ne latou i Aikupito. (Nume. 11:​4-6) E tonu, ne seki faigofie te olaga i te koga lavaki. Ne a mea ne fesoasoani atu ki a latou ke lotoma‵lie? Ne ‵tau o mafau‵fau kae loto fakafetai latou ki mea ko oti ne fai ne Ieova mō latou. I Aikupito, te koga telā ne fai fakamasei ei latou e pelā me ne pologa, ne fakaoko atu ne Ieova a mala e sefulu ki tino Aikupito kolā ne puke fakapagota latou. Mai tua o te fakasaolotoga o te kau Isalaelu, ne “fakama‵tiva ne latou a tino Aikupito” mai te puke ne latou a siliva, aulo, mo gatu. (Eso. 12:​35, 36) I te taimi ne afuli ei te kau Isalaelu ne te kautau a te Falao i te kaugutu o te Tai Kula, ne fai ne Ieova se vavega ke vaelua a te Tai ‵Kula. Kae i te taimi ne faima‵laga atu latou i loto i te koga lavaki, ne fagai ne ia latou i aso katoa ki te manai. Kae kaia la ne fa‵meo faeloa a te kau Isalaelu ki mea‵kai konā? Ne seki lotoma‵lie latou e se ona fua ko te mea e se maua ne latou a mea‵kai kolā e manakogina, kae ona ko te seai o se loto fakafetai ki mea ko oti ne maua ne latou.

6. Ne a nisi auala e mafai o ati aka ne tatou te loto fakafetai?

⁶ E mafai la pefea o ati aka ne koe te loto fakafetai? Muamua la, fakaavanoa se taimi i aso takitasi ke mafaufau ki mea ‵lei e maua ne koe. E mafai foki o tusi ne koe ki lalo ne mea e lua io me tolu kolā e loto fakafetai koe ki ei. (Tagiga. 3:​22, 23) Te lua, fakaasi atu tou loto fakafetai. Ke gasue muamua o fakafetai atu ki nisi tino mō mea ne fai ne latou mō koe. Kae sili atu i ei, ke fakafetai atu faeloa ki a Ieova. (Sala. 75:1) Te tolu, ke fai taugasoa ki tino kolā e loto fakafetai. A te loto fakafetai e mafai o ‵pisi vave; kae e penā foki māfai e se lotomalie koe ki se mea. (Teu. 1:​26-28; 2 Timo. 3:​1, 2, 5) Kafai e ‵saga tonu atu tatou o fakaasi te loto fakafetai, ka faigata o maua ne tatou a lagonaga sē lotoma‵lie ki mea ko maua ne tatou.

7. Ne ati aka pefea ne Aci te loto fakafetai, kae ne a mea ne iku mai i ei?

⁷ Mafaufau ki te mea ne tupu ki a Aci, telā e nofo i Indonesia. Ne fai ‵tonu mai a ia: “I te taimi o te masaki ‵pisi ko te COVID-19, ne kamata o fakapau‵pau ne au oku fakanofonofoga ki oku taina tali‵tonu. Ona ko te mea tenā, ne kamata o se lotomalie au ki aku mea ne mafai o fai.” (Kala. 6:4) Ne a mea ne fesoasoani atu ke ‵fuli a mafaufauga o tou fafine? Ne fai mai a Aci: “Ne kamata o lau ne au oku fakamanuiaga ne maua i aso takitasi, kae mafaufau ‵loto ki mea ‵lei e uke ne maua ne au mai te fai pelā me se vaega o te fakapotopotoga a te Atua. Oti aka, fakaasi atu ei ne au te loto fakafetai ki a ia. Mai te fai penā, maua ei ne au te lotomalie tonu.” Kafai ko kamata o maua ne koe lagonaga sē ‵lei, e mata, e mafai o fakagalue aka ne koe a auala tai ‵pau penā ke toe maua ne koe te agaga loto fakafetai?

SAGA TONU ATU KAE TUMAU I TE LOTO MAULALO

8. Se a te malei ne tosina atu ki ei a Paluka?

⁸ Ne tosina atu a te failautusi a te pelofeta ko Ielemia, ko Paluka ki se malei. Ne fai ne Paluka se galuega faigata, telā ko te ‵lago atu ki a Ielemia i te taimi ne avatu ne ia se fekau ‵mafa ki te mea ka tupu ki te fenua o Isalaelu kolā e seai se loto fakafetai i a latou. I se taimi e tasi, ne seki saga tonu a Paluka. I lō te fai ne ia te mea e manako a Ieova ki ei, ne kamata o mafaufau tou tagata ki a ia eiloa mo mea e manako a ia ke fai. E auala i a Ielemia, ne fai atu a Ieova ki a Paluka: “Koe salasala ke maua ne koe a mea e sili i te ‵lei mō koe. Fakagata te salasala ki vaegā mea penā.” (Iele. 45:​3-5) I nisi tugapati, ne fai atu a Ieova ki a ia: “Ke lotomalie ki mea ko maua ne koe i te taimi nei.” Ne talia ne Paluka ke fakatonutonu aka a ia, kae ne tumau i te maua ne ia te taliaga a Ieova.

9. E fesoasoani mai pefea a te 1 Kolinito 4:​6, 7, ke maua ne tatou te kilokiloga tonu ki tauliaga? (Onoono foki ki ata.)

⁹ I nisi taimi, kāti e mafaufau se Kelisiano me e ‵tau o maua ne ia se tauliaga i te taviniga. Kāti e uke a taleni e maua ne ia, e galue malosi, io me lasi tena iloa—io me kāti e maua ne ia a mea katoa konā. Kae kāti e maua ne nisi tino te tauliaga telā e manako a ia ki ei. Se a te mea e mafai o fesoasoani atu ke mo a e fanoanoa a ia? Ko te mafaufau ki mea ne tusi mai ne te apositolo ko Paulo i te 1 Kolinito 4:​6, 7. (Faitau.) A tauliaga mo taleni kolā e maua ne tatou e maua katoa mai i a Ieova. E se tuku mai ne ia a mea konei ona ko tatou e sili fakafia atu i nisi tino. A mea katoa konei se fakaasiga o te alofa tauanoa o Ieova ki a tatou.—Loma 12:​3, 6; Efe. 2:​8, 9.

10. E mafai pefea o ati aka ne tatou te loto maulalo?

¹⁰ E mafai o ati aka ne tatou a te loto maulalo, mai te mafaufau ‵loto ki te fakaakoakoga ne tuku mai ne Iesu mō tatou. Mafaufau la ki te mea ne tupu i te po ne mulumulu ei ne Iesu a vae o ana apositolo. Ne tusi mai te apositolo ko Ioane: “Ona ko te mea e iloa ne Iesu me [1] ko oti ne tuku atu ne te Tamana ki ana lima a mea katoa kae [2] a ia ne vau mai te Atua kae [3] ka fano foki ki te Atua, . . . kamata [ei] o mulumulu ne ia a vae o ana soko.” (Ioa. 13:​3-5) Ne mafai o mafaufau a Iesu me e ‵tau o mulumulu ne ana apositolo ana vae. Kae i tena olaga i te lalolagi nei, ne seki mafaufau lele a ia me e ‵tau o maua ne ia se olaga ‵lei kae gali. (Luka 9:58) Ne loto maulalo a Iesu; ne maua ne ia te lotomalie. Ne tuku mai ne ia se fakaakoakoga ‵lei katoatoa mō tatou.—Ioa. 13:15.

11. Ne fesoasoani atu pefea te loto maulalo ke maua ne Dennis te lotomalie?

¹¹ A Dennis, mai te Netherlands, ne taumafai o tautali i te fakaakoakoga loto maulalo a Iesu, kae ne seki faigofie ki a ia. Ana muna: “Kafai e maua ne se tino se tofiga e manako au ki ei, i nisi taimi e fanoanoa au me e mafaufau au me e ‵tau o maua ne au. Kafai ko tupu te mea tenā, e sukesuke au ki te mataupu e uiga ki te loto maulalo. I te JW Library^® app, ne māka ne au a nisi tusi fai‵tau e uiga ki te loto maulalo, ke faigofie o maua vave ne au kae toe faitau ki ei. Ne ‵kopi foki ne au ki taku telefoni a nisi lāuga e uiga ki te loto maulalo, kae fakalogologo faeloa ki ei.a Ne tauloto ne au me i galuega katoa e fai ne tatou, e fai ei ke faka‵malu atu ki a Ieova kae e se ki a tatou. E fai ne tatou taki tokotasi se tusaga foliki, kae ko Ieova loa e fakataunu ne ia te galuega tenā.” Kafai ko kamata o se lotomalie koe ki tou tulaga i te taimi nei, ‵sala ki auala ke ati aka ne koe te loto maulalo. Ka fakamalosi aka ei tou va fakataugasoa mo Ieova kae fesoasoani atu foki ke maua ne koe te lotomalie.—Iako. 4:​6, 8.

MAFAUFAU ‵LOTO KI TOU FAKAMOEMOEGA

12. Se a te fakamoemoega i aso mai mua e fesoasoani mai ke maua ne tatou a te lotomalie? (Isaia 65:​21-25)

¹² Ka maua eiloa ne tatou a te lotomalie māfai e mafaufau ‵loto ki te fakamoemoega gali i aso mai mua. E fakaasi mai ne te pelofeta ko Isaia a pati a Ieova ki te tulaga faigata o te olaga i aso nei, kae fakatalitonu mai foki me ka faka‵lei aka ne Ieova a tulaga faiga‵ta konā. (Faitau te Isaia 65:​21-25.) Ka maua ne tatou a fale ‵gali kae ‵lei. Ka fai ne tatou a galuega aoga, kae ‵kai ki mea‵kai paleni kae ‵gali. Ka se toe manava‵se tatou ki mea fakama‵taku ki a tatou io me ko ‵tou tama‵liki. (Isa. 32:​17, 18; Eseki. 34:25) Ka gali eiloa te olaga o tatou i aso mai mua kae ka tokagamalie foki.

13. Ne a tulaga kāti e manakogina malosi ke ‵saga tonu atu tatou ki ‵tou fakamoemoega?

¹³ Kaia ko tāua ‵ki nei ke mafau‵fau faeloa ki te ‵tou fakamoemoega i aso mai mua? Me ko ola eiloa tatou i “aso fakaoti” kae fakafesagai atu tatou ki fakalavelave i “taimi faiga‵ta” konei. (2 Timo. 3:1) E fesoasoani mai faeloa a Ieova i aso takitasi ke kufaki tatou, mai te tuku mai ne ia te takitakiga, te malosi mo te fesoasoani e manakogina ne tatou. (Sala. 145:14) E se gata i ei, e fesoasoani mai te ‵tou fakamoemoega faka-Kelisiano i taimi faiga‵ta. Kāti e galue malosi koe o tausi atu ki manakoga o tou kāiga i te feitu faka-te-foitino. E mata, e fakauiga i ei me e ‵tau o galue faeloa koe ke maua a mea mo tausi te olaga? Ikai! E tauto mai a Ieova me ka tuku mai ne ia a mea e uke atu e manakogina ne koe i te Palataiso. (Sala. 9:18; 72:​12-14) Kāti e fakafesagai koe ki logo‵maega, te loto mafatia, io me fakamasakisaki. E mata, ka logo‵mae eiloa koe penei ki te se-gata-mai? Ikai. Ka fakaseai katoatoa atu a masaki mo te mate i te lalolagi fou a te Atua. (Faka. 21:​3, 4) E fesoasoani mai a te fakamoemoega tenā ke maua ne tatou a te lotomalie—telā ko te saoloto mai te kaitaua mo te fanoanoa—i te taimi nei. E mafai eiloa o lotoma‵lie tatou i te taimi e fakafesagai atu ki faifaiga sē fakamaoni, te galo atu o se tino pele, masaki io me ko so se fakalavelave. Kaia? Me faitalia eiloa te faiga‵ta o fakalavelave e fe‵paki mo tatou i te taimi nei, e iloa ne tatou me ka “vave oti a puapuaga” i aso mai mua kae ka maua ne tatou i te lalolagi fou se fakatapūga tumau.—2 Koli. 4:​17, 18.

14. E fakamalosi aka pefea ne tatou a te ‵tou fakamoemoega?

¹⁴ Ona ko te tāua o te ‵tou fakamoemoega ki te mauaga ne tatou te lotomalie, e mafai pefea o fakamalosi aka ne tatou te mea tenā? E pelā mo te tino telā e manakogina ne ia a mata fai‵tau ke lavea faka‵lei a mea mai se koga ‵mao, e mafai o ‵sala atu tatou ki auala tāua ke fakamalosi aka ‵tou fakamoemoega ko te mea ke lavea faka‵lei ne tatou a te Palataiso i aso mai mua. E pelā me se fakaakoakoga, kafai ko manava‵se ‵ki tatou ona ko te faigata ke maua a tupe mo ola, e mafai o fakaataata ne tatou te vaegā olaga telā ka se manakogina i ei a tupe io me se tino e mativa. Kafai e fanoa‵noa tatou me seki maua ne tatou se tauliaga i te taviniga, e mafai o mafau‵fau tatou ki te taimi ka se manakogina i ei a mea konā māfai ko fakatusa ne tatou ki te olaga gali kae ‵lei katoatoa ka maua ne latou kolā e tavini atu ki a Ieova mō se fia afe tausaga. (1 Timo. 6:19) Kāti e faigata ke mafaufau ‵loto tatou ki te olaga i aso mai mua māfai koi manava‵se tatou ki mea i te taimi nei. Kae ko te lasi o te mafau‵fau ki te olaga gali telā ne folafola mai ne Ieova i aso mai mua, ko te faigofie foki o ‵saga tonu atu tatou ki ei i lō ‵tou fakalavelave.

15. Ne a mea e tauloto ne koe mai pati a Christa?

¹⁵ Mafaufau ki te auala ne fesoasoani atu te fakamoemoega ki a Christa, telā e avaga ki a Dennis, telā ne taku mai muamua. Ne fai mai tou fafine: “Ne maua ne au se masaki telā ne fai ei ke vāivāi toku foitino, kae manakogina ke fakaaoga se nofoga fakatekateka, kae moe atu i se moega i te ukega o taimi. Ne logo‵mae au i aso katoa. Ne fai mai toku tokita fakamuli nei me ko se mafai au o toe ‵lei. Kae ne mafaufau au penei, ‘E ‵kese tena kilokiloga ki aso mai mua mo au.’ Ne saga tonu atu au ki toku fakamoemoega telā e maua i ei te filemu o te mafaufau. Nei la, koi kufaki eiloa au i te lalolagi tenei, kae ka maua eiloa ne au a te fiafia katoatoa i te lalolagi fou!”

“LATOU KOLĀ E MA‵TAKU KI A IA KA SEAI NE MEA E MA‵TIVA I EI”

16. Kaia ne mafai o tusi mai te tupu ko Tavita me i a latou kolā e ma‵taku ki a Ieova ka “seai se mea e ma‵tiva i ei”?

¹⁶ Ka fakafesagai eiloa se tavini a Ieova telā e lotomalie mo fakalavelave. Ne logo‵mae a te tupu ko Tavita i te taimi ne ‵mate ei ana tamaliki e tokotolu. Ne ‵losi atu a nisi tino me ne fai ne ia a mea ma‵sei kolā e seki fai ne ia. Ne fakatogafiti a ia ne ana taugasoa, kae ne taumafai se tupu o salasala ke tamate a ia mō se fia tausaga. Kae i te taimi foki loa ne fakafesagai atu a ia ki se fakalavelave faigata, ne fai mai a ia e uiga ki a Ieova, penei: “A latou kolā e ma‵taku ki a ia e seai ne mea e ma‵tiva i ei.” (Sala. 34:​9, 10) Kaia ne mafai o fai mai a ia penā? Me ne iloa ne ia me tiga eiloa e se puipui ne Ieova tatou mai fakalavelave e ‵tupu i te olaga, ka tuku mai faeloa ne ia a mea e manakogina ne tatou. (Sala. 145:16) Kae pelā mo Tavita, e mautinoa i a tatou me ka fesoasoani mai a Ieova ke kufaki tatou i ‵tou fakalavelave. E mafai eiloa o lotoma‵lie tatou.

17. Kaia ka fakaiku aka ei ne koe ke tauloto ki mea e ‵tau o fai ke maua te lotomalie?

¹⁷ A Ieova e manako ke maua ne koe a te lotomalie. (Sala. 131:​1, 2) Tela la, taumafai ke iloa ne koe a mea e ‵tau o fai ke maua te lotomalie. Kafai e galue malosi koe o ati aka te loto fakafetai, tumau i te saga tonu kae loto maulalo, kae fakamalosi aka tou fakamoemoega, ka mafai eiloa o fai atu koe penei: “Ao, ko lotomalie au.”—Sala. 16:​5, 6.