Auala e Fesoasoani Mai a Ieova ke Kufaki Tatou

1. Kaia e manakogina malosi ne tatou te kufaki, kae se a te fesoasoani e maua ne tatou? (1 Petelu 5:10)

I ASO faigaˋta o aso fakaoti konei, e manakogina ne tino o Ieova a te kufaki. E logoˋmae a nisi tino ona ko se masaki tumau. Kae ko nisi tino e logoˋmae ona ko te galo atu o se tino pele. Kae e feˋpaki a nisi tino mo ˋtekemaiga kāti mai kāiga io me ko te malo. (Mata. 10:​18, 36, 37) Ke talitonu me faitalia so se tulaga faigata e fepaki mo koe e mafai eiloa o fesoasoani atu a Ieova ke tumau koe i te kufaki.—Faitau te 1 Petelu 5:10.

2. E maua i fea ne tatou a te malosi ke tumau i te kufaki e pelā me ne Kelisiano?

² A te kufaki ko te tumau i te fakamaoni ki a Ieova kae tavini ki a ia mo te fiaˋfia faitalia me feˋpaki tatou mo fakalavelave, fakasauaga, io me tofotofogina ke fai se agasala. Ko te mea ke mafai o kufaki, e ˋtau foki mo tatou o taliˋtonu me ka gasolo o ˋlei atu a mea katoa. E pelā me ne Kelisiano e se mafai o maua ne tatou te kufaki i ˋtou malosi totino, kae e maua a te mea tenā mai i a Ieova, te tino telā e tuku mai ne ia “a te malosi telā e sili atu i te malosi masani.” (2 Koli. 4:7) I te mataupu tenei, ka sauˋtala tatou ki fakatokaga e fa ne fai ne Ieova ke mafai o fesoasoani mai ki a tatou ke tumau i te kufaki. Ka onoono foki tatou ki auala ke fakaaoga fakaˋlei ne tatou a fakatokaga takitasi konā.

ˋTALO

3. Kaia e mafai ei o fai atu tatou me i ˋtalo se mea fakaofoofogia?

³ Ne fai ne Ieova se mea fakaofoofogia telā e mafai o fesoasoani mai ki a tatou ke tumau i te kufaki. Ne fai ne ia ke mafai o fesokotaki atu tatou ki a ia faitalia ˋtou tulaga agasala. (Epe. 4:16) Mafaufau la ki te mea tenā: E mafai o ˋtalo atu tatou ki a Ieova e uiga ki so se mea i so se taimi. E mafai o lagona ne ia ˋtou ˋtalo i so se ˋgana mo so se koga e ˋnofo ei tatou faitalia me ˋnofo taki tokotasi io me e ˋpei i falepuipui. (Iona 2:​1, 2; Galu. 16:​25, 26) Kafai foki loa ko tō manavaˋse tatou telā ko se iloa ne tatou me ne a ˋtou pati ke fai atu, e mafai eiloa o malamalama a Ieova i pati kolā e maˋnako tatou o fai atu ki a ia. (Loma 8:​26, 27) E tonu eiloa me i ˋtalo se mea fakaofoofogia!

4. Kaia e mafai o fai atu tatou me i ˋtou ˋtalo ke maua te kufaki e fetaui ˋlei mo te loto o Ieova?

⁴ E fakamautinoa mai ne Ieova i tena Muna “me ko so se mea e fakatagi atu tatou ki ei e ˋtusa mo tena loto, e lagona eiloa ne ia tatou.” (1 Ioa. 5:14) E mata, e mafai o fakamolemole atu tatou ki a Ieova mō se fesoasoani ke tumau tatou i te kufaki? Ao! E fetaui ˋlei te mea tenā mo tena loto. Kaia e fai atu ei tatou penā? Kafai e tumau tatou i te kufaki i taimi o tofotofoga, ko tuku atu ne tatou ki a Ieova se tali ke fai atu ki a Satani, te Tiapolo, te tino fakaitaita. (Faata. 27:11) E se gata i ei, e fai mai te Tusi Tapu me manako malosi a Ieova “ke fakaasi atu tena malosi ona ko latou kolā e tuku katoatoa atu olotou loto ki a ia.” (2 Nofo. 16:9) Tela la, e mautinoa i a tatou me manako a Ieova o fesoasoani mai kae mafai foki o tuku mai ne ia te malosi ki a tatou ke tumau i te kufaki.—Isa. 30:18; 41:10; Luka 11:13.

5. E maua pefea ne tatou a te filemu e auala i ˋtalo? (Isaia 26:3)

⁵ E fai mai te Tusi Tapu me kafai e ˋtalo malosi tatou e uiga ki mea e manavase tatou ki ei, “kae ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia [ˋtou] loto mo te malosi o [ˋtou] mafaufau.” (Fili. 4:7) Mafaufau ki te uiga o te mea tenā. E feˋpaki a tino kolā e se tavini atu ki a Ieova mo mea faigaˋta, kae e taumafai latou o fai so se mea e mafai ke maua ne latou te filemu o te mafaufau. E pelā mo se mea e tasi, e taumafai latou o mafaufau ˋloto mai te tapale keaˋtea a mea katoa i olotou mafaufau e aofia i ei a mea e manavase latou ki ei. Kae ko te fai penā e fakamataku ˋki eiloa i te feitu faka-te-agaga. (Fakatusa ki te Mataio 12:​43-45.) E ˋkese mai ei, a te filemu telā e tuku mai ne Ieova māfai e ˋtalo tatou ki a ia e sili fakafia atu i so se vaegā filemu e mafai o maua ne se tino māfai e mafaufau ˋloto i se auala penā. Kafai e ˋtalo tatou ki a Ieova, e fakaasi atu i ei me fakalagoˋlago katoatoa tatou ki a ia, kae tuku mai ne ia ki a tatou a te “filemu tumau.” (Faitau te Isaia 26:3.) A te auala e tasi e fai ei ne Ieova a te mea tenā ko te fesoasoani mai ki a tatou ke masaua a munaˋtonu mautinoa ko oti ne tauloto ne tatou mai i tena Muna. A munaˋtonu konā e fakamasaua mai ei a te lasi o tena alofa mō tatou kae manako foki a ia o fesoasoani mai ko te mea ke maua ne tatou a te filemu.—Sala. 62:​1, 2.

6. E mafai pefea o fakaaoga fakaˋlei ne koe a te fakatokaga ki ˋtalo? (Onoono foki ki te ata.)

⁶ Mea e mafai ne koe o fai. I te taimi e kufaki koe i se tofotofoga o tou fakatuanaki, “ˋpei atu tau amoga ki a Ieova” kae ˋtalo ke maua tena filemu. (Sala. 55:22) ˋTalo foki ke maua te poto e manakogina ne koe ke mafai o fakafesagai atu ki te tulaga faigata e fepaki mo koe. (Faata. 2:​10, 11) I tafa o au ˋtalo ke maua te kufaki, ke mo a foki ma puli o fakafetai atu ki a Ieova i au ˋtalo. (Fili. 4:6) Onoono ki auala e fesoasoani atu a Ieova ki a koe i taimi o tou fakalavelave kae fakafetai atu ki a ia mō tena fesoasoani. Ke mo a e fai ne te fakalavelave tenā ke se lavea ne koe a fakamanuiaga ko oti ne maua ne koe.—Sala. 16:​5, 6.

TE MUNA A TE ATUA

7. E fesoasoani mai pefea a te sukesuke ki te Tusi Tapu ke tumau tatou i te kufaki?

⁷ Ko oti ne tuku mai ne Ieova a tena Muna ke fesoasoani mai ki a tatou ke tumau i te kufaki. E uke a tala i te Tusi Tapu e fakamaoni mai ki a tatou me fesoasoani mai eiloa a Ieova. Mafaufau ki se fakaakoakoga fua e tasi. E fai mai te Mataio 6:8 penei: “E iloa ne te otou Tamana a mea kolā e maˋnako koutou ki ei kae koi tuai o fakatagi atu koutou ki a ia.” Ne fai mai ne Iesu a pati konā kae e iloa fakaˋlei ne ia a Ieova i lō so se isi tino. Tela la, e seai se pogai e ˋtau ei o fakalotolotolua tatou ki te saga tonu mai o Ieova ki a tatou māfai ko feˋpaki mo fakalavelave. E uke a folafolaga ˋgali penā e maua i te Tusi Tapu kolā e fakamalosi aka i ei a te kufaki o tatou.—Sala. 94:19.

8. (a) Taku mai se fakaakoakoga e uiga ki se fakatakitakiga i te Tusi Tapu telā e mafai o fesoasoani mai ke tumau tatou i te kufaki. (e) Se a te mea e mafai o fesoasoani mai ke masaua ne tatou a fakatakitakiga i te Tusi Tapu māfai ko manakogina ne tatou?

⁸ E mafai o fesoasoani mai a fakatakitakiga i te Tusi Tapu ke tumau tatou i te kufaki. E maua i ei a manatu fesoasoani e uke kolā e mafai o aoga ki a tatou ke fai a fakaikuga ˋlei. (Faata. 2:​6, 7) E pelā me se fakaakoakoga, e fakamalosi mai te Tusi Tapu ke manavase fua tatou ki mea o te aso i lō te sōna manavase ki mea i aso mai mua. (Mata. 6:34) Kafai e masani tatou o faiˋtau faeloa ki te Tusi Tapu kae mafauˋfau ˋloto ki ei, ka mafai eiloa o masaua ne tatou a fakatakitakiga kolā ka fesoasoani mai māfai ko manakogina ne tatou.

9. E fakamalosi aka pefea ne tala i te Tusi Tapu a te ˋtou loto taliˋtonu me ka fesoasoani mai eiloa a Ieova?

⁹ E maua foki i te Tusi Tapu a tala ˋtonu o tino e penei mo tatou kolā ne taliˋtonu ki a Ieova kae ne maua ne latou tena fesoasoani. (Epe. 11:​32-34; Iako. 5:17) A te mafaufau ˋloto ki tala penā, ka ati aka i ei te ˋtou loto taliˋtonu me i a Ieova “ko te ˋtou lafiga mo te ˋtou malosi, se fesoasoani telā e toka faeloa i taimi o fakalavelave.” (Sala. 46:1) Kae kafai e masaua ne tatou a te fakamaoni o tavini a Ieova i aso mua, ka fakamalosi mai te mea tenā ke fakaakoako tatou ki te lotou fakatuanaki mo te lotou kufaki.—Iako. 5:​10, 11.

10. E mafai pefea o fakaaoga fakaˋlei ne koe a te Muna a te Atua?

¹⁰ Mea e mafai ne koe o fai. Faitau te Tusi Tapu i aso katoa, kae fakamau ki lalo a fuaiupu kolā ne maua ne koe a mea aoga mai i ei. Ne iloa aka ne tino e tokouke me aoga ˋki te faiˋtau ki te tusi siki mō te aso ke kamata te lotou aso ki se manatu fakamalosi loto mai te Tusi Tapu. Ne iloa ne te tuagane e igoa ki a Mariea a te ˋtonu o te mea tenei, i te taimi ne iloa aka me ko kenisa katoa ana mātua. Ne a mea ne fesoasoani atu ki a ia ke tumau i te kufaki i te taimi ne tausi atu ki a lāua mai mua malie o ˋmate? “I tafataeao katoa ne faitau au ki te tusi siki o te aso mai te Ke Sukesuke ki te Tusi Tapu i Aso Katoa kae mafaufau ˋloto ki ei,” ko ana pati. “Ne fesoasoani mai a te faifaiga tenei ke fakaˋfonu toku mafaufau ki se manatu faka-te-Tusi Tapu, telā ne fesoasoani mai ke saga tonu atu au ki mea ˋgali e akoako mai ne Ieova, i lō te manavase fua ki te fakalavelave ko fepaki mo au.”—Sala. 61:2.

TAINA TALIˋTONU

11. Kaia e fakamalosi mai ei a te iloa atu me e se ko tatou fua e kufaki i ˋtou fakalavelave?

¹¹ Ne tuku mai ne Ieova se kautaina Kelisiano i te lalolagi kātoa ke fesoasoani mai ki a tatou ke tumau i te kufaki. A te iloa atu ne koutou “i vaegā logoˋmaega konei e pokotia foki i ei otou taina i te lalolagi kātoa” e fakamaoni mai ei me e se ko tatou fua e feˋpaki mo fakalavelave penā. (1 Pe. 5:9) E tonu, e mafai o mautinoa i a tatou me faitalia so se fakalavelave e feˋpaki mo tatou, ko oti foki ne feˋpaki a nisi tino mo fakalavelave penā kae ne mafai ne latou o kufaki. Tela la, e mafai foki ne tatou o kufaki!—Galu. 14:22.

12. E mafai pefea o fesoasoani mai a taina taliˋtonu ki a tatou, kae ne a ˋtou mea e mafai o fai mō latou? (2 Kolinito 1:​3, 4)

¹² I te taimi e kufaki ei tatou, e mafai eiloa o maua ne tatou a fakamalosiga mai taina taliˋtonu. Tenā eiloa te mea ne tupu ki te apositolo ko Paulo. I ana tusi, ne taku mai ne ia a igoa o tino kolā ne fesoasoani atu ki a ia i te taimi ne ˋloka ei a ia i tena fale kae ne fakafetai atu a ia ki a latou. Ne fakamafanafana, fakamalosi, kae fesoasoani atu latou ki a Paulo. (Fili. 2:​25, 29, 30; Ko. 4:​10, 11) E mafai foki o tupu se mea penā ki a tatou i aso nei. Kafai e manakogina ke tumau tatou i te kufaki e mafai eiloa o fesoasoani mai a ˋtou taina mo tuagane; kae kafai e maˋnako latou ki se fesoasoani e toka tatou mō latou.—Faitau te 2 Kolinito 1:​3, 4.

13. Ne a mea ne fesoasoani atu ki te tuagane ko Maya ke tumau i te kufaki?

¹³ E uke a fakamalosiga ne maua ne te tuagane i Lusia e igoa ki a Maya mai taina mo tuagane. Ne ulu mālō atu a pulisimani ki tena fale i te 2020, kae fakamuli ifo ne tu atu tou fafine i mua o te fono ona ko te faipati atu ki nisi tino e uiga ki tena fakatuanaki. “I te taimi telā ne fiˋta, manavase, kae fanoanoa ei au, ne telefoni mai a taina mo tuagane kae tusi mai foki olotou tusi o fakamaoni mai te lotou aˋlofa ki a au,” ko pati a Maya. “Ne iloa faeloa ne au me ne isi se kāiga lasi kae aˋlofa o oku. Kae talu mai i te 2020, ne talitonu katoatoa au ki te mea tenā.”

14. E maua pefea ne tatou a mea aoga mai te fesoasoani o taina taliˋtonu i te taimi e kufaki ei tatou i ˋtou fakalavelave? (Onoono foki ki te ata.)

¹⁴ Mea e mafai ne koe o fai. I te taimi e kufaki ei koe i se fakalavelave, se mea tāua ke faipati atu ki ou taina mo tuagane Kelisiano kae ˋkau fakatasi faeloa mo latou. Ke mo a ma fakatalave koe o ˋsala fesoasoani ki toeaina. E mafai o fai latou “pelā me ne koga fakamalu mai te matagi, se koga e fakaˋlafi i ei mai te afā.” (Isa. 32:​2, fml.) Ke masaua foki, me kufaki foki ou taina Kelisiano i tulaga faigaˋta. A te faiga o se mea ˋlei mō se tino telā e manako ki se fesoasoani ka fai ei ke fiafia koe kae ka fesoasoani atu foki ke tumau koe i te kufaki i ou fakalavelave.—Galu. 20:35.

TE ˋTOU FAKAMOEMOEGA

15. Ne aoga pefea te fakamoemoega ki tino fakamaoni, e aofia i ei a Iesu? (Epelu 12:2)

¹⁵ Ko oti ne tuku mai ne Ieova se fakamoemoega mautinoa ke fesoasoani mai ki a tatou ke tumau i te kufaki. (Loma 15:13) Masaua a te taimi ne fesoasoani atu ei a te fakamoemoega o Iesu ki a ia ke tumau i te kufaki i te ˋtoe taimi faigata o tena olaga i te lalolagi nei. (Faitau te Epelu 12:2.) Ne iloa ne Iesu me i tena fakamaoni ka fesoasoani atu ki te fakamalugaga o te igoa o Ieova. Ne olioli foki a Iesu ki te taimi ka toe ˋkau fakatasi a ia mo tena Tamana, kae fakamuli ifo ke tavini atu mo ana taina i te malo faka-te-lagi. I se auala tai ˋpau, e fesoasoani mai foki te ˋtou fakamoemoega ke ola ki te se-gata-mai i te lalolagi fou a te Atua, ke tumau tatou i te kufaki i so se tulaga faigata e feˋpaki mo tatou i te lalolagi a Satani.

16. Ne fesoasoani atu pefea a te fakamoemoega ki se tuagane ke tumau i te kufaki, kae ne a mea ne tauloto ne koe mai i ana pati?

¹⁶ Mafaufau ki te auala ne fesoasoani atu ei te fakamoemoega e uiga ki te Malo, ki se tuagane i Lusia e igoa ki a Alla, telā ne ˋpei tena avaga ki te falepuipui ke oko ki te taimi e fai ei tena fono. I te taimi ne tupu ei te mea tenei, ne fai mai a Alla: “A te ˋtalo faeloa e uiga ki te fakamoemoega mō aso mai mua kae mafaufau ˋloto ki ei, ne fesoasoani mai ke mo a ma tō loto vāivāi au. Ne malamalama au me e se tenei te fakaotiga. Ka manumalo eiloa a Ieova, kae penā foki tatou.”

17. E mafai pefea o fakaasi atu ne tatou te ˋtou loto fakafetai ki te fakamoemoega faka-te-Tusi Tapu ko maua ne tatou? (Onoono foki ki te ata.)

¹⁷ Mea e mafai ne koe o fai. Ke fakaaoga a taimi ke mafaufau e uiga ki te olaga gali i aso mai mua telā ne folafola mai ne Ieova. Ke fakaataata ne koe a koe eiloa i te lalolagi fou a te Atua mo fakamanuiaga kolā ka maua ne koe. Kae ko so se fakalavelave e feˋpaki mo tatou i te taimi nei, ka “vave oti . . . kae māˋma foki.” (2 Koli. 4:17) Ke fai foki ne koe a te ˋtoe mea e mafai ke fakailoa atu tou fakatuanaki ki nisi tino. Mafaufau ki te faigata ki a latou ke fakafesagai atu ki fakalavelave i te lalolagi a Satani tenei, e aunoa mo te iloa ne latou a te fuafuaga a te Atua mō aso mai mua. E mafai o fakamalosi aka ne koe te lotou fiaˋfia ki te ˋtou fakamoemoega e uiga ki te Malo, mai te fakasae aka se manatu e uiga ki ei.

18. Kaia e mafai ei o taliˋtonu tatou ki folafolaga a Ieova?

¹⁸ I te otiga ne kufaki ne Iopu a tulaga faigaˋta e uke kae tumau i te fakamaoni, ne fai atu a ia ki a Ieova: “Nei la, ko iloa ne au me mafai ne koe o fai a mea katoa kae seai se mea ne mafaufau koe o fai e se mafai o fai ne koe.” (Iopu 42:2) E pelā mo te mea ne iloa ne Iopu, e seai se mea e mafai o taofi aka ei a te fakataunuga o te fuafuaga a Ieova. E mafai o fakamalosi mai a te manatu tenā ki a tatou ke tumau i te kufaki. E pelā me se fakaakoakoga, mafaufau ki se fafine masaki telā ko loto vāivāi ona ko te tokouke o tokita ne fano a ia ki ei kae seki mafai ne latou o fakaˋlei tena masaki. Kae i te taimi ne maua aka ne ia se tokita atamai telā ne fai atu me mafai o ˋsala ne ia te fakalavelave ki tena masaki, kae fakamatala atu foki te auala ke fakaˋlei aka tena masaki, ne fiafia tou fafine faitalia me koi manakogina ke fakaˋtali a ia mō se taimi ke fakaˋlei a ia. Ko mafai nei ne ia o kufaki me iloa ne ia me ko isi sena fakamoemoega mautinoa—ko te fakamoemoega me ka mafai o ˋlei tena masaki. I se auala tai ˋpau, e fesoasoani mai eiloa a te ˋtou loto taliˋtonu ki te ˋtou fakamoemoega e uiga ki te palataiso telā ka oko mai ke tumau tatou i te kufaki.

19. Ne a mea e manakogina ke fai ne tatou ke mafai o tumau i te kufaki?

¹⁹ E pelā mo mea ko oti ne lavea ne tatou, e fesoasoani mai a Ieova ki a tatou ke tumau i te kufaki i ˋtou fakalavelave e auala i ˋtalo, tena Muna, ˋtou taina taliˋtonu, mo te ˋtou fakamoemoega. Kafai e fakaaoga fakaˋlei ne tatou a fakatokaga konei, ka fesoasoani mai eiloa a Ieova i so se fakalavelave faigata e fepaki mo tatou ke oko eiloa ki te aso ko fakaseai katoatoa atu a fakalavelave o te lalolagi a Satani tenei.—Fili. 4:13.