Sui ˋFou e Tokolua o te Potukau Pule

I A OKETOPA 5, 2024, ne fai se fakaˋpulaga fakapito i te fono tausaga: A Taina ko Jody Jedele mo Jacob Rumph ko oti ne ˋtofi aka ke fai mo sui o te Potukau Pule o Molimau a Ieova. A taina konei ne tavini atu ki a Ieova mo te fakamaoni i tausaga e uke.

A te Taina ko Jedele ne fanau i Missouri, U.S.A. kae ne puti aka i te munatonu. Ne ˋnofo atu tena kāiga i se koga telā e se tokouke a Molimau i ei. Tela la, ne fetaui a ia mo taina mo tuagane mai koga keseˋkese o te fenua kolā e olo atu sāle o fesoasoani ki te galuega talai i konā. Ne fakamalosigina a ia ne te lotou aˋlofa mo te ˋkau fakatasi. Ne papatiso tou tagata a koi talavou i a Oketopa 15, 1983. Ne fiafia a ia ki te galuega talai, kae i tena otiga mai te akoga lasaga lua, ne kamata o paenia tumau a ia i a Setema 1989.

I te taimi koi foliki ei te Taina ko Jedele, ne ave sāle ne ana mātua a lāua mo tena tuagane ke āsi atu ki te Peteli. Ne fakamalosi aka ne asiga konei a te manakoga i tamaˋliki ke kausaki atu ki te fakamoemoega ke tavini i te Peteli—se fakamoemoega telā ne mafai ne lāua o fakataunu. Ne fanatu te taina ko Jedele ki te Peteli i Wallkill i a Setema 1990. Ne kamata o galue a ia i te Matagaluega ˋFulu kae fakamuli ifo i te Matagaluega Tau Fakaimasaki.

I te taimi tenā, e isi ne fakapotopotoga i te ˋgana Sepania ne manakogina i ei a taina ona ko te gasolo aka o tokouke. Tenā ne kau atu te Taina ko Jedele ki se fakapotopotoga e tasi kae kamata o tauloto ki te ˋgana Sepania. E seki leva, kae fetaui a ia mo te tuagane ko Damaris, telā ne paenia i konā. Fakamuli loa, ne avaga lāua kae fanatu tou fafine ki te Peteli.

I te 2005, ne tiaki ne lāua te Peteli ke tausi atu ki lā mātua fakamaoni. I te taimi tenā, ne tavini atu lāua e pelā me ne paenia tumau. Ne fesoasoani atu te Taina ko Jedele e pelā me se faiakoga i te Akoga mō Paenia, kae ne tavini atu a ia i te Komiti Fesokotaki mō Fakaimasaki mo te Komiti Fakatūˋtu o Atufenua.

I te 2013, ne toe ˋkami te Taina ko Jody Jedele mo te tuagane ko Damaris ki te Peteli mō te galuega fakatūˋtu i Warwick. Talu mai te taimi tenā, ne gaˋlue foki lāua i Patterson mo Wallkill. A te Taina ko Jedele ne galue i te Matagaluega ˋLomi/Fakatūˋtu i Ofisa Lagolago Foˋliki mo te Matagaluega mō Fakaimasaki. I a Mati 2023, ne ˋtofi aka a ia pelā me se taina fesoasoani ki te Komiti o te Galuega Talai. Ne toe fakafoki tena mafaufau ki galuega ne fai ne ia kae fai mai, penei: “Kafai e maua ne koe ne galuega ˋfou, e masani o maua ne koe a lagonaga manavase. Kae tenā te taimi e ˋtau o masaua ne koe ke fakalagolago ki a Ieova, me ko ia fua e mafai ne ia o fai tatou ke fai so se mea e manako a ia ki ei.”

A te Taina ko Rumph ne fanau i California, U.S.A. I te taimi koi foliki ei a ia, ne vāivāi tena mātua i te feitu faka-te-agaga kae ne taumafai malosi tou fafine o akoako tou tagata ki munaˋtonu i te Tusi Tapu. E se gata i ei, i tausaga takitasi, e masani o āsi atu tou tagata ki tena tupuna fafine, telā se Molimau fakamaoni. Ne fesoasoani atu tou fafine ke fakamalosi aka te fiafia o tou tagata ki te munatonu, kae i te taimi ko 13 ana tausaga, ne fakamolemole atu a ia ke fai tena akoga faka-te-Tusi Tapu. I a Setema 27, 1992, i te taimi koi talavou a ia, ne papatiso tou tagata. Se mea fakafiafia me ne toe malosi mai tena mātua kae kamata o gaˋsolo ki mua te lotou kāiga kae papatiso fakamuli.

I te taimi koi talavou ei, ne lavea ne te Taina ko Rumph a te fiaˋfia o paenia. Tela la, i tena otiga mai te akoga lasaga lua, ne kamata a ia o paenia i a Setema 1995. I te 2000, ne fanatu a ia ki Ecuador o tavini atu i koga e lasi te manakoga i ei mō tino talai. Ne fetaui ei lāua i konā mo Inga, se tuagane paenia mai Kanata, kae ne avaga lāua fakamuli. I te otiga lāua ne avaga, ne tavini atu lāua i se fakai o Ecuador telā e isi se tamā potukau o tino talai i ei. Nei la, ko fai pelā me se fakapotopotoga malosi ˋki.

Fakamuli ifo, ne ˋtofi aka te taina ko Jacob Rumph mo te tuagane ko Inga e pelā me ne paenia fakapito kae fakamuli ifo e pelā se ovasia o te seketi. I te 2011, ne ˋkami lāua ki te vasega 132 o Kiliata. I te lā otiga mai te akoga, ne tavini lāua i fenua keseˋkese e lima kae ne fiaˋfia lāua ki vaega keseˋkese o te taviniga ne aofia lāua i ei, e pelā mo te tavini atu i te Peteli, te galuega fakamisionale, mo te galuega a te ovasia o te seketi. Ne maua foki ne te Taina ko Rumph te tauliaga ke akoako atu i te Akoga mō Tino Talai o te Malo.

Ona ko te famai ˋpisi ko te COVID-19, ne toe ˋfoki atu te taina ko Jacob mo Inga ki Amelika. Ne toe ˋkami lāua ki te Peteli i Wallkill, telā ne fakamasani ei te taina ko Rumph ki te galuega e fai i te Matagaluega o te Galuega Talai. Fakamuli ifo, ne toe ˋtofi lāua ke gaˋlue i te ofisa lagolago i Ecuador, telā ne tavini atu ei te Taina ko Rumph e pelā me se Komiti o te Ofisa Lagolago. I te 2023, ne toe ave lāua ki Warwick. I a Ianuali 2024, ne ˋtofi aka te Taina ko Rumph ke tavini atu e pelā me se taina fesoasoani ki te Komiti o te Galuega Talai. Mai te ˋtoe mafaufau ki koga kolā ne tavini atu a ia i ei, ne fai mai a ia: “A te mea telā e fai ei ke tu ˋkese se galuega, e se ko te koga e tavini koe i ei, kae ko tino kolā e tavini koe ki ei.”

E fakatāua ne tatou a te gaˋlue malosi o taina konei, kae ko tatou e “āva malosi faeloa ki vaegā tino penā.”—Fili. 2:29.