Fesili Mai Tino Faiˋtau
Se a te “manatu” ka tuku atu ne Ieova ki loto o malo o atufenua i aso mai mua?
E fai mai te Fakaasiga 17:16, 17, e uiga ki te kamataga o te fakalavelave lasi: “Kae ko suki e sefulu kolā ne matea ne koe mo te manu fekai, a latou konei ka takaliaˋlia ki te fafine talitāgata kae ka ta fakamasei ne latou tou fafine kae tuku ke nofo fuafua, kae ka kai ne latou ana ˋkano kae ˋsunu katoatoa a ia ki te afi. Me ne faulu ne te Atua ki olotou loto a tena manatu ke fakataunu tena loto, ao, ke fakataunu te lotou manatu e tasi mai te tukuatuga o te lotou malo ki te manu fekai.” I aso mua, ne fakamatala mai sāle i ˋtou tusi me i te “manatu” telā ka tuku ne Ieova ki loto o malo o atufenua ko te fakaseaiga o lotu ˋse.
Kae e ˋtau o fai se fakamafuliga ki ei. A te “manatu” telā ka tuku ne Ieova ki loto o malo o atufenua ko te faiga ke tuku atu ne latou a “te lotou malo ki te manu fekai.” Ke malamalama i te auala ka fakataunu ei te mea tenei, ke mafauˋfau ki fesili konei.
Ko oi e aofia i te valoaga tenei? A “te fafine talitāgata” e taku foki ko “Papelonia te Sili”; kae fakasino atu ki te emupaea o lotu ˋse i te lalolagi kātoa. A te “manu fekai lanu kula” e fakasino ki te fakapotopotoga telā e taumafai ke maua te filemu i te lalolagi kātoa, kae ne kamata o fakatu aka i te 1919 e pelā me ko Malo ˋKaufakatasi kae nei ko taku ki Malo ˋSoko. (Faka. 17:3-5) A “suki e sefulu” e fakasino ki malo katoa kolā e ˋlago atu ki te manu fekai.
Se a te fesokotakiga o te fafine talitāgata mo te manu fekai lanu kula? Te fafine talitāgata e “sagasaga” i luga i te manu fekai, ko tena uiga e ˋlago malosi atu tou fafine ki ei, kae taumafai o pule atu ki a ia.
Se a te mea ka tupu ki te fafine talitāgata? A te manu fekai fakatasi mo suki e sefulu kolā e ˋlago atu ki ei ka “takaliaˋlia ki te fafine talitāgata.” Ona ko te lasi o te lotou takaliaˋlia, ka puke ne latou ana koloa katoa kae fakaasi fakaˋsau atu a amioga maˋsei a tou fafine. Kae ka fakataunu ne latou a te fakamasinoga a Ieova e uiga ki tou fafine, telā ko te fakaseai katoatoa atu. (Faka. 17:1; 18:8) Tenā eiloa te ikuga o fakapotopotoga fakalotu ˋse katoa. Kae mai mua o tupu te mea tenā, ka fai ne Ieova a malo o atufenua ke fai ne latou se mea telā e seki fai aka eiloa i tala fakasolopito o pulega a tāgata.
Se a te mea ka fai ne Ieova ke fai ne malo o atufenua? Ka fai ne ia a malo katoa, kolā ko suki e sefulu, ke fakataunu ne latou “tena manatu,” telā ko te “tuku atu te lotou malosi mo te lotou pulega ki te manu fekai (lanu kula)”—telā ko Malo ˋSoko. (Faka. 17:13) Mafaufau ki te uiga o te mea tenā. E mata, ka fakaiku aka ne malo o tāgata ke tuku atu fua te lotou malosi mo te lotou pulega ki te manu fekai? Ikai! E fakaasi mai i te valoaga me ka fakamalosi ne te Atua a latou ke fai te mea tenā. (Faata. 21:1; fakatusa ki te Isaia 44:28.) A te mafuliga tenei ka se tupu malielie. E mautinoa me ka tupu fakavave. Tenā ka fakaoko atu i ei ne te manu fekai telā ko malosi ˋki a te fakamasinoga a Ieova ki fakapotopotoga fakalotu ˋse katoa mai te fakaseaiga o latou ki te se-gata-mai.
Ne a mea ka fakamoeˋmoe tatou ke ˋtupu i aso mai mua? E se manakogina ke fakaˋtali tatou ke ˋlogo i tala me i malo ko kamata o ˋlago atu ki Malo ˋSoko. Tenei te mea e ˋtau o fakamoeˋmoe tatou ke tupu: I se auala fakapoi, ka fai ne Ieova a malo katoa ke tuku atu te lotou malosi ki Malo ˋSoko. Kafai ko tupu te mea tenā ka iloa ei ne tatou me ko pili o kamata te fakalavelave lasi. I te taimi nei, “ke ala faeloa tatou kae tausi ˋtou mafaufau ke ˋlei” me ko pili fua o maˋfuli fakavave a mea!—1 Tesa. 5:6.