Kaia ne Tupu ei te Tamatega Lasi o Tino? Kaia ne Seki Fakagata ne te Atua?

A tino e tokouke kolā ne ‵sili mai ne latou a fesili konei ne logo‵mae malosi kae ne seki ‵sala atu fua latou ki tali kae penā foki ki fakamafanafanaga. E ‵kilo a nisi tino ki te Tamatega Lasi o Tino e pelā me ko te ‵toe mea matagā i tala mua o tino, kae ne faigata ke tali‵tonu latou ki te Atua.

Manatu ‵se e uiga ki te Atua mo te Tamatega Lasi o Tino

Manatu ‵se: Se mea ‵se ke fesili atu ki te Atua me kaia ne talia ne ia a te Tamatega Lasi o Tino.

Manatu tonu: Ne fakafesili ne tino kolā ne ma‵losi olotou fakatuanaki me kaia ne talia ne te Atua a mea ma‵sei. E pelā mo te pelofeta ko Sapakuka ne fesili atu ki te Atua: “E mafai pefea ne koe o kufaki tou kilokilo atu ki faiga sē ‵tonu konā? A te fakamasei mo te fakasaua ko faivalevale i oku feitu, ka ko taua mo kinauga ko salalau i koga valevale?” (Sapakuka 1:3, Tusi Tapu, Tuvalu) I lō te taku fakamasei ne ia Sapakuka, ne fai ne te Atua ke fakamau te fesili tenā i te Tusi Tapu ke fai‵tau ki ei a tino katoa.

Manatu ‵se: E se fia saga mai te Atua ki logo‵maega o tino.

Manatu tonu: E takalialia te Atua ki mea ma‵sei mo logo‵maega e māfua mai i ei. (Faataoto 6:16-19) I aso o Noa, ne ‘‵mae te loto’ o te Atua ona ko te salalau atu o amioga fakasaua i te lalolagi. (Kenese 6:5, 6, fml) E mautinoa i ei, me ne logo‵mae malosi a te Atua i te Tamatega Lasi o Tino.—Malaki 3:6.

Manatu ‵se: A te Tamatega Lasi o Tino ko te fakasalaga a te Atua ki tino Iutaia.

Manatu tonu: Ne talia ne te Atua ke fakamasei a Ielusalema ne te kau Loma i te senitenali muamua. (Mataio 23:37–24:2) Kae talu mai te taimi tenā, ne seki faka‵kese ne te Atua so se potukau o tino i se auala fakapito io me ke fakasala. I te kilokiloga a te Atua, “e seai eiloa se kese‵kesega i te va o tino Iutaia mo fenua fakaatea.”—Loma 10:12, Tusi Tapu, Tuvalu.

Manatu ‵se: Kafai e ola tonu se Atua telā e alofa kae malosi katoatoa, kaia ne seki fakagata ei ne ia a te Tamatega Lasi o Tino.

Manatu tonu: E tiga eiloa e se māfua mai i te Atua a logo‵maega, e talia ne ia i nisi taimi ke ‵tupu mō se vaitaimi.—Iakopo 1:13; 5:11.

Kaia ne talia ei ne te Atua ke tupu te Tamatega Lasi o Tino?

Ne talia ne te Atua te Tamatega Lasi o Tino mō te pogai foki ne talia ei ne ia a logo‵maega katoa o tino: ke faka‵lei aka a te kinauga i mea tau amioga telā ne sae aka i aso mua. E fakaasi faka‵lei mai te Tusi Tapu me i te vaitaimi tenei, e pule mai te Tiapolo ki te lalolagi kae e se ko te Atua. (Luka 4:1, 2, 6; Ioane 12:31) E mafai o fesoasoani mai a manatu ‵tonu e lua mai te Tusi Tapu ke iloa ne tatou te pogai ne talia ei ne te Atua a te Tamatega Lasi o Tino.

1. Ne faite ne te Atua a tino mo te saolotoga. Ne fai atu ne te Atua ki te tauavaga muamua a mea e ‵tau o fai ne lāua, kae ne seki faimālō ne ia lāua ke faka‵logo ki ei. Ne filifili lāua ke fai lā fakaikuga i a lāua eiloa ki te mea ‵lei mo te mea masei, kae ko te filifiliga masei tenā—penā foki loa a filifiliga ne fai ne tino i tala mua katoa—ne fai ei ke maua ne tino a ikuga matagā. (Kenese 2:17; 3:6; Loma 5:12) E pelā loa mo pati i te tusi ko te Statement of Principles of Conservative Judaism, e fai mai: “A te ukega o logo‵maega i te lalolagi e māfua tonu mai i te fakaaogaga ‵se o te saolotoga ne tuku mai ki a tatou.” I lō te ave keatea ne ia ‵tou saolotoga, ne tuku atu ne te Atua ki tino se taimi ke taumafai o fakatoka faka‵lei olotou fakalavelave e aunoa mo ia.

2. E mafai kae ka toe faka‵lei ne te Atua a fakamaseiga katoa kolā ne iku mai i te Tamatega Lasi o Tino. E folafola mai te Atua me ka toe faka‵foki mai ne ia te fia miliona kolā ne ‵mate, e aofia i ei a latou kolā ne pokotia i te Tamatega Lasi tenā. Ka fakagata foki ne ia a te logo‵mae telā e maua ne tino kolā ne ‵sao atu i te Tamatega Lasi tenei ona ko mea matagā ne masaua ne latou. (Isaia 65:17; Galuega 24:15) A te alofa o te Atua ki tino e fakamaoni mai i ei me ka fakataunu ne te Atua a folafolaga konei.—Ioane 3:16.

A tino e tokouke kolā ne pokotia kae ‵sao atu i te Tamatega Lasi tenei ne mafai o fakatumau te lotou fakatuanaki kae maua ne latou se olaga fakafiafia ona ko te mea ko iloa ‵lei ne latou te pogai ne talia ei ne te Atua a mea ma‵sei mo te auala ka faka‵lei aka ne ia a ikuga ma‵sei katoa konā.