Fakamafanafanaga mō Tino Kolā e Logo‵mae

I TE fia selau o tausaga, ne ‵numi valevale eiloa a tino ‵poto mo faifeau i te pogai ne talia ei ne te Atua a logo‵maega. Ne fai mai a nisi tino me e ‵tau o ‵losi atu ki te Atua a logo‵maega katoa ona ko tena malosi katoatoa. Ne fai mai a te tino telā ne tusi ne ia a te tusi telā e se fakatalitonugina ko The Clementine Homilies i te lua o senitenali me e pule ne te Atua a te lalolagi ki ana lima e lua. E fakaaogā ne te Atua tena “lima fakamaui” ke pule atu ki te Tiapolo telā e tuku mai ne ia a logo‵maega mo puapuagā, kae e fakaaogā tena “lima fakaatamai” ke pule atu ki a Iesu telā e faka‵sao kae fakamanuia ne ia a tino.

Ne fakafiti ne nisi tino a te manatu me e māfua mai kae talia foki ne te Atua a logo‵maega, telā e mafau‵fau ei latou me e seai ne logomaega. Ne tusi mai a Mary Baker Eddy, penei: “A te masei e se se mea tonu kae seai foki sena fakavae tonu. Kafai ko tali‵tonu a tino me i te agasala, masaki mo te mate e se ne mea ‵tonu, penei ko ‵galo atu loa.”​—⁠Science and Health With Key to the Scriptures.

Ko oti ne fakaiku aka ne te tokoukega o tino me e se mafai o taofi aka ne te Atua a logo‵maega ona ko fakalavelave ne ‵tupu i tala fakasolopito kae maise eiloa talu mai te taua muamua a te lalolagi ke oko mai ki ‵tou aso nei. “I taku faka‵tau, ko oti ne ‵solo keatea ne te fakatau tamatega valevale ne te kau Nasi a te kau Iutaia i te Taua i te Lua a te Lalolagi a te manatu me i te Atua se atua malosi katoatoa,” ko pati a te tagata Iutaia lauiloa ko David Wolf Silverman i tena tusi. Ne toe fakaopoopo mai foki a ia, penei: “Ko te mea ke maina tatou i uiga o te Atua, e ‵tau foki o maina tatou i te auala e fetaui ei Ana uiga ‵lei mo te taliaga ne ia o amioga ma‵sei, kae e mafai fua o fetaui a mea e lua konā māfai e se malosi katoatoa a Ia.”

E se tuku mai ne vaegā manatu penā a fakamafanafanaga ki tino kolā e logo‵mae. Kae e sili atu i ei, e se tāitāi eiloa o fetaui a talitonuga penā mo te Atua fai mea tonu, malosi kae atafai telā e fakamatala mai i te Tusi Tapu. (Iopu 34:​10, 12; Ielemia 32:17; 1 Ioane 4:⁠8) Se a la te mea e fakaasi mai i te Tusi Tapu e uiga ki te pogai ne talia ei ke logo‵mae tatou?

Ne Māfua Mai Fea a Logo‵maega?

Ne seki faite ne te Atua a tino ke logo‵mae. E ‵kese mai ei, ne tuku fakameaalofa atu ne ia ki te tauavaga muamua ko Atamu mo Eva a te tulaga ‵lei katoatoa, ne fakatoka ne ia se fatoaga gali mō laua kae ne fai foki ne laua a galuega aogā. (Kenese 1:​27, 28, 31; 2:⁠8) Kae ne fakalagolago atu eiloa a te tumau o te lā fia‵fia ki te taliaga ne laua a te pulega a te Atua mo tena tulaga ke filifili aka a te mea ‵lei mo te mea masei. Ne fakaata mai a te fakatonuga tenā a te Atua i “te lakau telā e fai ne ia te tino ke iloa te ‵lei mo te masei.” (Kenese 2:17) Ne mafai ne Atamu mo Eva o fakaasi atu te lā faka‵logo ki te Atua moi ne seki ‵kai laua ki te fuaga o te lakau telā ne fakatonu atu ki a laua ke se ‵kai ki ei.a

Se mea fakafanoanoa me ne seki fia faka‵logo a Atamu mo Eva ki te Atua. Ne fakaloiloi ne se tino faka-te-agaga ‵teke, telā ne fakaigoa fakamuli ki a Satani te Tiapolo, a Eva me ka se fiafia eiloa a ia māfai e tumau i te fakalogo ki te Atua. Kae ne fakauiga i ei me ne taofi aka fua ne te Atua se mea tāua ‵ki mai i a ia: ko te tu tokotasi, telā ko te saolotoga o tou fafine ke fai ne ia ana filifiliga i a ia eiloa ki mea ‵lei mo mea ma‵sei. Ne fai atu foki a Satani me kafai e kai a ia ki te fuaga o te lakau, ‘ka ‵pau a ia mo te Atua, ka iloa foki ei ne ia te mea ‵lei mo te mea masei.’ (Kenese 3:​1-6; Fakaasiga 12:⁠9) Ona ko takolekolega ke fia tu tokotasi, ne kai a Eva ki te fuaga o te lakau telā ne fakatapu ma kai ki ei kae ne fai foki penā a Atamu.

I te aso foki eiloa tenā, ne maua ei ne Atamu mo Eva a ikuga o te lā sē faka‵logo. Ona ko te ‵teke atu ki te pulega a te Atua, ne seki maua ei ne laua a te puipuiga mo fakamanuiaga kolā ne ‵tau o maua ne laua mai te Atua. Ne ‵tuli keatea laua ne te Atua mai te Palataiso kae ne fai atu a ia ki a Atamu, penei: “A koe ka galue fi‵ta i tou olaga kātoa ko te mea ke ‵fua mai ne meakai ma koe i te laukele. A koe ka galue malosi kae tauta, kae fatoā maua ne au meakai mai te laukele, ke oko eiloa ki te taimi e toe foki ei koe ki te laukele telā ne māfua mai ei koe.” (Kenese 3:​17, 19) Ne oko atu ei ki a Atamu mo Eva a masaki, logo‵maega, te olaga matua mo te mate. Ko fai a te logo‵mae e pelā me se mea e masani ki ei a tino.​—⁠Kenese 5:⁠29.

Te Faka‵leiga o te Kinauga

Kāti ka fesili mai se tino, penei: ‘E a, e se mafai ne te Atua o fakapuli atu fua te agasala a Atamu mo Eva?’ E se mafai, me moi fai penā, penei ka se toe āva a tino ki tena pulega, kae kāti ka fakamalosi aka foki i ei a ‵tekemaiga i aso mai mua telā ka iku atu i ei ki logo‵maega e uke atu. (Failauga 8:11) E se gata i ei, a te manatu māmā ki te lā sē faka‵logo e fai pelā me e ‵lago atu te Atua ki te faiga o mea ma‵sei. E fakamasaua mai a te tino tusitala o te Tusi Tapu ko Mose, penei: “A te Aliki . . . e tonu kae amiotonu i ana auala katoa; a te otou Atua e fakamaoni kae amiotonu; e fai ne ia te mea tonu kae nofogamalie.” (Teutelonome 32:⁠4) Ke fetaui ana uiga mo ana faifaiga, ne ‵tau ei o talia ne te Atua ke logo‵mae a Atamu mo Eva i ikuga o te lā sē faka‵logo.

Kaia ne seki fakaseai fakavave atu i ei ne te Atua a te tauavaga muamua fakatasi mo Satani, te tino sē lavea telā ne māfua mai i ei te ‵tekeatuga? Ne maua eiloa ne ia te ‵mana ke fai penā. Moi penei e se logo‵mae kae ‵mate atu foki a tama‵liki a Atamu mo Eva. Kae ui ei, a te fakaasiatuga penā o te ‵mana o te Atua ka se fakamaoni mai ei te amiotonu o tena pulega ki ana tino faka‵logo. E se gata i ei, moi ne ‵mate atu a Atamu mo Eva kae e seai ne lā tama‵liki, e fakamaoni mai ei me e se mafai ne te Atua o fakataunu tena fuafuaga ke faka‵fonu te lalolagi ki lā tama‵liki ‵lei katoatoa. (Kenese 1:28) Kae ko “te Atua e se ‵pau mo te tagata . . . So se mea e tauto a ia ke fai, e fai eiloa; e fai tena muna, te mea eiloa ko taunu.”​—⁠Numela 23:⁠19.

Ona ko tena poto ‵lei katoatoa, ne talia ei ne Ieova te Atua ke ola a tino ‵teke konei mō se vaitaimi toetoe fua. Ka maua ei ne tino ‵teke konā a te taimi e lava kae ‵toe ke iloa aka ne latou a ikuga o te olaga tu tokotasi mai te Atua. Ko fakamaoni mai ne fakalavelave ‵tupu i te lalolagi nei me e ‵tau o maua ne tino a te takitakiga a te Atua kae e sili atu foki tena pulega i lō tino io me ko Satani. I te taimi foki eiloa tenā, ne gasuesue a te Atua ke fakamautinoa aka me ka fakataunu eiloa tena fuafuaga mō te lalolagi. Ne folafola mai a ia me ka ‘tuki pala ne te fanau a te ulu o Satani’ ke fakaseai katoatoa atu i ei a ia fakatasi mo ana faifaiga ma‵sei.​—⁠Kenese 3:⁠15.

A Iesu Keliso ko te Fanau telā ne folafola mai. E fai‵tau tatou ki te 1 Ioane 3:18 me ka “vau te Tama a te Atua . . . o fakamalepe a te galuega a te Tiapolo.” Ne fai ne ia te mea tenei mai te tukumaiga o tena ola ‵lei katoatoa e pelā me se togiola ke fakasaoloto ei a tama‵liki a Atamu mai te agasala mo te mate. (Ioane 1:29; 1 Timoteo 2:​5, 6) Ne folafola atu me ka maua ne tino kolā e fakatuanaki tonu ki te taulaga togiola a Iesu a te saolotoga mai logo‵maega. (Ioane 3:16; Fakaasiga 7:17) Ka tupu māfea a te mea tenei?

Te Gataga o Logo‵maega

Ko oti ne fakamāfua aka ne te ‵tekeatuga ki te pulega a te Atua a logo‵maega e uke ‵ki. Tela la, se mea ‵lei eiloa ke fakaaogā ne te Atua i se auala fakapito tena tulaga pule ke fakagata aka i ei a logo‵maega o tino kae ke fakataunu i ei tena fuafuaga muamua mō te lalolagi. Ne fakaasi mai ne Iesu a te fakatokaga a te Atua tenei i te taimi ne akoako ei ne ia ana soko ke ‵talo, penei: “Te motou Tamana telā i te lagi: . . . ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.”​—⁠Mataio 6:​9, 10.

Ko pili fua o palele atu te taimi ne talia ei ne te Atua ke pule ifo a tino ki a latou eiloa. I te fakataunuga o valoaga i te Tusi Tapu, ne fakatu aka tena Malo i te 1914 kae ne fai a Iesu Keliso mo fai te Tupu i ei.b E se leva kae ka fakatakavale i ei a malo katoa o tino.​—⁠Tanielu 2:⁠44.

I te taimi toetoe ne galue ei a ia i te lalolagi nei, ne tuku mai ne Iesu se ata o fakamanuiaga kolā ka maua māfai ko toe pule mai a te Atua ki tino. E fakamaoni mai ne tusi faka-Evagelia me ne fakaasi atu ne Iesu tena alofa ki tino ma‵tiva mo tino fakaa‵lofa. Ne faka‵lei ne ia a tino ma‵saki, fagai a tino fia‵kai, kae faka‵tu foki a tino ‵mate. Ne faka‵logo foki te matagi mo peau ki tena leo. (Mataio 11:5; Maleko 4:​37-​39; Luka 9:​11-​16) Mafaufau la ki mea kolā ka fakataunu ne Iesu māfai ko fakaaogā ne ia tena taulaga togiola ke maua ei ne tino katoa a mea aogā! E folafola mai i te Tusi Tapu me e auala i te pulega a Keliso, ka ‵solo keatea ne te Atua a “loimata i olotou mata [o tino katoa]. Ka se toe iai se mate, se fanoanoa, se tagi io me se ‵mae.”​—⁠Fakaasiga 21:⁠4.

Fakamafanafanaga mō Tino Kolā e Logo‵mae

Ko oko eiloa i te fakamafanafana loto ke iloa atu me e atafai mai ki a tatou te ‵tou Atua alofa kae malosi katoatoa ko Ieova, kae ko pili fua o tuku mai ne ia se fakatapūga ki tino! E talia sāle ne se tino telā e masaki ‵ki so se taumafaiga fakatokitā telā ka faka‵lei aka ei tena masaki, faitalia me e logo‵mae ‵ki a ia i ei. Kafai foki e iloa ne tatou me ka maua a fakamanuiaga se-gata-mai i faifaiga a te Atua, ka fakamalosi faeloa ne te iloaga tenā tatou faitalia me ne a fakalavelave sē tumau e fe‵paki mo tatou.

A Likato, telā ne taku mai i te mataupu muamua, se tino tokotasi telā ko iloa ne ia te auala e maua ei a fakamafanafanaga mai folafolaga i te Tusi Tapu. Ne fai mai a ia, penei: “Mai tua o te mate o taku avaga, ne fia nofo tokotasi eiloa au, kae fakamuli ifo ne iloa aka ne au me ka se mafai eiloa ne te mea tenei o toe fakaola mai taku avaga kae ka momea aka fua i ei toku fanoanoa.” I lō te fai penā, ne tumau eiloa a Likato i te kau atu ki fakatasiga Kelisiano mo te folafolaatuga o te fekau i te Tusi Tapu ki nisi tino. Ne toe fai mai a Likato, penei, “I te taimi ne lavea ei ne au te ‵lago malosi mai o Ieova mo te auala ne tali mai ei ne ia aku ‵talo i nisi feitu, ne fakapilipili atu eiloa au ki a ia. Ona ko te iloaga e uiga ki te alofa o te Atua ne fai ei ke mafai ne au o fa‵ki i te ‵toe tofotofoga matagā ne fepaki mo au.” Ne taku ‵tonu mai a ia, penei: “E masausau faeloa au ki taku avaga i taimi katoa, kae nei ko talitonu katoatoa au me e seai eiloa se mea ne talia ne Ieova ke tupu e mafai o fakamasei katoatoa ei tatou.”

E mata, e fai koe pelā mo Likato fakatasi mo te fia miliona o nisi tino kolā e olioli faeloa ki te taimi telā ka “se toe manatua eiloa” a logo‵maega o tino? (Isaia 65:17) Se mea tonu me e mafai eiloa o maua ne koe a fakamanuiaga i te Malo o te Atua māfai e tautali atu ki te fakatakitakiga tenei i te Tusi Tapu: “‵Fuli atu ki te Aliki kae ‵talo atu ki a ia, me ko pili mai a ia i te taimi nei.”​—⁠Isaia 55:⁠6.

Ke fesoasoani atu ki a koe ke fai penā, ke fakamuamua faeloa a te faitau mo te sukesuke faka‵lei ki te Tusi Tapu i tou olaga. Ke na fakamasani koe ki te Atua e pelā foki mo te tino telā ne uga mai ne ia, ko Iesu Keliso. Taumafai malosi ke ola e ‵tusa mo ana fakatakitakiga kae ke fakaasi atu te loto fiafia o fakalogo ki tena pulega sili. Kafai e fai penā, ka maua eiloa ne koe te fiafia tonu faitalia a tofotofoga kolā e mafai o fe‵paki mo koe. Kae ka maua eiloa ne koe i aso mai mua a te olaga fiafia i se lalolagi telā ko saoloto mai logo‵maega.​—⁠Ioane 17:⁠3.

[Fakamatalaga mai lalo]

[Pokisi i te itulau e 6, 7]

E Mafai Pefea NE TATOU O FA‵KI I LOGO‵MAEGA?

“Fakaeke katoa ki luga i a ia [te Atua] a mea e manava‵se ei koutou.” (1 Petelu 5:⁠7) E oko mai sāle a te ‵numi, te kaitaua mo te lagonaga i a koe ko tuku tiaki māfai ko logo‵mae tatou io me e lavea atu se tino telā e pele ki a tatou ko logo‵mae. Kae ke masaua faeloa ne tatou me e malamalama eiloa a Ieova i ‵tou lagonaga. (Esoto 3:7; Isaia 63:⁠9) E pelā mo tāgata fakamaoni i aso mua, e mafai o fakaasi kae fakamatala atu ne tatou ki a ia ‵tou mafaufauga mo mea katoa kolā e manava‵se tatou ki ei. (Esoto 5:​22; Iopu 10:​1-3; Ielemia 14:19; Sapakuka 1:​13) Kāti ka se fakaseai fakavavega ne ia ‵tou tofotofoga, kae i te tali mai ki ‵tou talo kolā e fai atu mo te loto kātoa e mafai ei o tuku mai ne ia te poto mo te malosi ke fakafesagai atu tatou ki ei.​—⁠Iakopo 1:​5, 6.

“Sa ‵poi otou loto i te tofotofoga faigata tenā ko fetaui mo koutou, e pelā me se mea fou fatoā oko atu ki a koutou.” (1 Petelu 4:12) E faipati a Petelu i konei ki fakasauāga, kae e fetaui ‵tonu eiloa ana pati mo so se logo‵maega telā e ‵tau o kufaki i ei se tino talitonu. E logo‵mae a tino i te sē lava o mea e tausi ei te olaga, masaki mo te mate atu o se tino pele. E fai mai te Tusi Tapu me i “te malaia e maua ne tino katoa.” (Failauga 9:11) A mea katoa konei ne vaega o te olaga masei tenei o tino. A te iloaga o te mea tenei ka fesoasoani mai ke kufaki tatou i logo‵maega mo fakalavelave kolā e ‵tupu. (1 Petelu 5:⁠9) E sili atu i ei, a te iloaga me i “te Aliki e onoono faeloa ki tino amio‵tonu kae talia foki olotou fakatagi” e fai pelā me se mea e fakamafanafana mai ki a tatou.​—⁠Salamo 34:15; Faataoto 15:3; 1 Petelu 3:⁠12.

“Ke fia‵fia koutou i te otou fakamoemoega.” (Loma 12:12) I lō te mafaufau faeloa ki aso fakafia‵fia kolā ko ‵teka, e mafai o mafaufau ‵loto tatou ki te folafolaga a te Atua e uiga ki te fakaseaiatuga o logo‵maega. (Failauga 7:10) Ka puipui ne te fakamoemoega ‵mautakitaki tenei a tatou e pelā eiloa mo se pulou tau telā e puipui ei te ulu. E fakafeoloolo aka ne te fakamoemoega tenei a fakalavelave o te olaga nei kae fesoasoani mai foki i ei ke se fakamasei katoatoa ne fakalavelave konā ‵tou mafaufau, lagonaga io me ko ‵tou malosi i te feitu faka-te-agaga.​—⁠1 Tesalonia 5:⁠8.

[Ata i te itulau e 5]

Ne ‵teke atu a Atamu mo Eva ki te pulega a te Atua

[Ata i te itulau e 7]

Ne folafola mai ne te Atua me ka oko mai se lalolagi e saoloto mai logo‵maega