Se a te Aoga o te Olaga?

Te tali mai te Tusi Tapu

A te fesili e uiga ki te aoga o te olaga e mafai o ‵sili atu i auala e uke, e pelā mo te Kaia e ‵nofo ei tatou i konei? Io me E mata, e isi se aoga o toku olaga? E fakaasi mai i te Tusi Tapu me i te pogai o te ola ko te ati aka o se va fakataugasoa mo te Atua. Mafaufau ki nisi muna‵tonu fakavae kolā e fakaasi mai i te Tusi Tapu.

A te Atua ko te ‵tou Mafuaga. E fai mai te Tusi Tapu: “Ne faite eiloa ne [te Atua] tatou.”—Salamo 100:3; Fakaasiga 4:11.
E isi se pogai ne faite ei ne te Atua a mea katoa, e aofia i ei tatou.—Isaia 45:18.
Ne faite ne te Atua tatou mo se “manakoga faka-te-agaga,” telā e aofia i ei a te manakoga ke iloa a te aoga o te olaga. (Mataio 5:3) E manako a ia ke fakamalie ne tatou ‵tou manakoga tenā.—Salamo 145:16.
E fakama‵lie ne tatou ‵tou manakoga faka-te-agaga mai te atiakaga o se va fakataugasoa mo te Atua. E tiga eiloa e mafau‵fau a nisi tino me e se mafai o fai tatou mo taugasoa o te Atua, e tuku mai i te Tusi Tapu a te fakamalosiga tenei: “Fakapilipili atu ki te Atua, kae ka fakapilipili mai a ia ki a koutou.”—Iakopo 4:8; 2:23.
Ke fai mo taugasoa o te Atua, e ‵tau o ola tatou e ‵tusa mo te pogai ne faite ei ne ia tatou. E taku mai i te Tusi Tapu a te pogai tenā i te Failauga 12:13: “Mataku ki te Atua, kae tausi ki ana fakatonuga, me e tenā eiloa te pogai ne faite ei a te tagata.”—Tusi Tapu, Tuvalu.
I aso mai mua, ka lavea katoatoa atu ne tatou a te fakataunuga o te fuafuaga muamua a te Atua mō tatou māfai ko fakagata atu ne ia a logo‵maega kae tuku atu te ola se-gata-mai ki ana taugasoa, ko latou kolā e tapuaki atu ki a ia.—Salamo 37:10, 11.