Kaia e se Fakamanatu ei ne Molimau a Ieova a Aso Fanau?

E se fakamanatu ne Molimau a Ieova a aso fanau me tali‵tonu matou i aso fakamanatu penā e se fiafia ki ei te Atua. E tiga loa e se taku ‵tonu mai i te Tusi Tapu me e tapu te fakamanatu aso fanau, kae e fesoasoani mai ke iloa ne tatou a pogai tāua o fakamanatuga penei kae ke malamalama i te kilokiloga a te Atua ki ei. Ke mafaufau ki mea e fa e konei mo akoakoga fakavae mai te Tusi Tapu.

Te fakamanatuga o aso fanau ne māfua mai i mea fapaupau. E ‵tusa mo te Funk & Wagnalls Standard Dictionary of Folklore, Mythology, and Legend, ne māfua mai a fakamanatuga konei mai te talitonuga me i te taimi e fai ei te aso fanau o se tino “ko maua ne agaga mo fakamalosiga ma‵sei se avanoaga ke taua atu ki te tino i o ia te aso fanau” kae ko te “‵kau atu o taugasoa ki ei mo fakamanuiaga ki tena aso fanau e fesoasoani atu ke puipui ei te tino i o ia te aso fanau.” E fai mai te tusi ko The Lore of Birthdays me i aso mua, a te fakamauga o aso fanau ne “tāua malosi ki te fakamatalaga o mea ka ‵tupu ki se tino i aso mai mua” kolā e fakavae ki “poto fai fakaa‵tea a tino iloilo fetū.” E fai mai foki te tusi tenei me “e ‵tusa mo talitonuga mua, a moligako i taimi o aso fanau e maua ei se ‵mana fakataulaitu tu ‵kese mō fai te manakoga o te tino.”

Kae e taku fakamasei i te Tusi Tapu a te fakaaogaga o faifaiga faivailakau, mea fakataulaitu io me ko so se “mea penei.” (Teutelonome 18:14; Kalatia 5:19-21) A te ‵tonuga loa, a te pogai e tasi ne taku fakamasei ne te Atua te fakai mua ko Papelonia me ne fakaaoga ne tino i ei a poto ki te iloiloga o fetū, telā se vaega o faifaiga faivailakau. (Isaia 47:11-15) E se mafaufau ‵mafa a Molimau a Ieova ki te māfuaga o tuu mo aganuu takitasi; kae kafai e manino te kilokiloga a te Tusi Tapu ki se mea, e se manatu ma‵mā matou ki ei.
Ne seki fakamanatu ne Kelisiano mua a aso fanau. E fai mai The World Book Encyclopedia me “ne ‵kilo atu latou ki te fakamanatuga o aso fanau e pelā me se tuu a tino fāpaupau.” E fai mai te Tusi Tapu me i apositolo mo nisi tino kolā ne akoako ne Iesu ne fakaasi mai ne latou se ata o mea kolā e ‵tau o tau‵tali ki ei a Kelisiano katoa.—2 Tesalonia 3:6.
Te fakamanatuga e tasi fua telā e ‵tau o fakamanatu ne Kelisiano, e se ko te fanaumaiga, kae ko te mate—o Iesu. (Luka 22:17-20) E se ‵tau o ‵poi tatou i te mea tenei, ona ko te mea e fai mai te Tusi Tapu me i “te aso e mate ei se tino e ‵lei atu i lō te aso ne fanau mai ei a ia.” (Failauga 7:1) I te otiatuga o tena olaga i te lalolagi, ne maua ne Iesu se igoa ‵lei i mua o te Atua, kae ne fai ei ke sili atu te tāua o te aso ne mate ei a ia i lō te aso ne fanau mai ei.—Epelu 1:4.
E seai se fakaasiga i te Tusi Tapu me ne fakamanatu ne se tavini a te Atua tena aso fanau. E se ko tena uiga me ne puli i a latou o fai te mea tenei, me ne fakamau i te Tusi Tapu a aso fanau e lua o tino kolā e se tapuaki ki te Atua. Kae ne ma‵sei a mea ne ‵tupu i te avā aso fanau konā.—Kenese 40:20-22; Maleko 6:21-29.

E mata, e fanoa‵noa a tama‵liki Molimau me e se fakamanatu ne latou a aso fanau?

E pelā mo mātua ‵lei katoa, e fakaasi atu ne Molimau te lotou a‵lofa ki olotou tama‵liki i loto i te tausaga kātoa, e aofia i ei te tukuatuga o meaalofa mo maopoopoga fakafiafia. E taumafai latou o tau‵tali ki te fakaakoakoga ‵lei katoatoa a te Atua, telā e tuku mai faeloa ne ia a mea ‵lei ki ana tama‵liki. (Mataio 7:11) E se fanoa‵noa a tama‵liki Molimau, e pelā eiloa mo pati e fakaasi mai i lalo nei:

“E gali atu ma maua ne koe se meaalofa i se taimi telā e seki fakamoemoe koe ki ei.”—Tammy, ko 12.
“E tiga loa e seai ne aku meaalofa e maua i toku aso fanau, koi ‵togi eiloa ne oku mātua i nisi taimi lā meaalofa ki a au. E gali atu ki a au penā me se mea fakapoi ki a au.”—Gregory, ko 11.
“Kaia a te sefulu minute, mo te keke mo se pese e lau ki se tinā pa‵tī? Vau aka la ki toku fale ke lavea ne koe te mea e igoa ki te tinā pa‵tī!”—Eric, ko 6.