E Fai Pefea te Taulaga a Iesu mo Fai se “Togiola mō Tino e Tokouke”?
Te tali mai te Tusi Tapu
A te taulaga a Iesu ko te auala e fakasaoloto, io me faka‵sao ne te Atua a tino mai te agasala mo te mate. E fakasino atu te Tusi Tapu ki te toto maligi o Iesu pelā me ko te togiola. (Efeso 1:7; 1 Petelu 1:18, 19) Tela la, ne fai mai a Iesu me ne vau a ia “ke tuku atu foki [tena] ola mō tino e tokouke.”—Mataio 20:28, Tusi Tapu, Tuvalu.
Kaia ne manakogina ei se “togiola mō tino e tokouke”?
A te tagata muamua, ko Atamu, ne faite ke ‵lei katoatoa, io me e aunoa mo te agasala. Ne maua ne ia te fakamoemoega ke ola ki te se-gata-mai kae ne galo atu ona ko tena filifiliga ke se fakalogo ki te Atua. (Kenese 3:17-19) I te taimi ne fai ei ana tama‵liki, ne faka‵solo atu ne ia ki a latou a te ikuga o te agasala. (Loma 5:12) Ona ko te pogai tenei, e fakaasi mai i te Tusi Tapu me ne “fakatau atu” ne Atamu a ia eiloa mo ana tama‵liki ke fai mo pologa ki te agasala mo te mate. (Loma 7:14) Ona ko te tulaga sē ‵lei katoatoa, ne seki ai se tino ne mafai o toe ‵togi mai ne ia a mea kolā ne ‵galo i a Atamu.—Salamo 49:7, 8.
Ne alofa atafai a te Atua ki tino kolā ne ‵tupu mai i a Atamu ona ko te lotou tulaga e aunoa mo se fakamoemoega. (Ioane 3:16) Kae ona ko te tulaga fakamaoni o te Atua, ne seki mafai fua ne ia o fulitua atu io me fakamagalo ne ia olotou agasala e aunoa mo se fakavae tāua. (Salamo 89:14; Loma 3:23-26) E alofa te Atua ki tino, tela la, ne tuku mai ne ia se auala i mea tau tulafono ke mafai o fakamagalo olotou agasala kae ke fakasaoloto foki latou mai i ei. (Loma 5:6-8) A te togiola ko te fakavae tenā i mea tau tulafono.
E fakagalue aka pefea te togiola?
I te Tusi Tapu, a te tugapati “togiola” e aofia i ei a mea e tolu konei:
Ko te ‵togi.—Numela 3:46, 47.
E aumai i ei te fakasaolotoga.—Esoto 21:30.
E fetaui ‵lei ki te tāua o mea ne ‵togi ki ei, io me e ufi ki ei.a
Mafaufau ki te auala ne fakagalue aka a mea konei ki te taulaga togiola a Iesu Keliso.
Te ‵togi. E fai mai te Tusi Tapu me i Kelisiano “ne ‵togi ki se ‵togi.” (1 Kolinito 6:20; 7:23) A te ‵togi tenā ko te toto o Iesu, telā “ne ‵togi ei ne [Iesu] a tino mō te Atua mai i matakāiga mo ‵gana mo tino mo fenua katoa.”—Fakaasiga 5:8, 9.
Fakasaolotoga. E tuku mai i te taulaga a Iesu a te “fakasaolotoga e auala i te togiola.—1 Kolinito 1:30; Kolose 1:14; Epelu 9:15.
E fetaui ‵lei. E fetaui ‵lei a te taulaga a Iesu mo te mea ne galo atu i a Atamu—te ola faka-te-foitino ‵lei katoatoa. (1 Kolinito 15:21, 22, 45, 46) E fai mai te Tusi Tapu: “Me e pelā eiloa mo tino e tokouke ko fai mo tino agasala e auala i te sē fakalogo o te tagata e tokotasi [Atamu], e penā foki te fai o tino e tokouke mo fai ne tino amio‵tonu e auala i te fakalogo o te tagata e tokotasi [Iesu Keliso].” (Loma 5:19) E fakamatala mai i te mea tenei a te auala ne mafai ei o ‵togi atu ne te mate o se tagata e tokotasi a te togiola mō tino agasala e tokouke. A te tonuga loa, a te taulaga a Iesu ko te “togiola telā e fetaui tonu mō tino katoa” ko latou kolā e fai a mea e manakogina ke maua a mea aoga mai i ei.—1 Timoteo 2:5, 6.
a I te Tusi Tapu, a pati muamua kolā ne ‵fuli ki te “togiola” e fakaasi mai i ei a te manatu e uiga ki se ‵togi, io me se mea tāua, telā e ‵tau o ‵togi. E pelā mo te veape Epelu ko te ka·pharʹ e fakauiga sāle ki te “ufi.” (Kenese 6:14) E masani o fakasino atu ki te ufiga o agasala. (Salamo 65:3) A te nauna telā e tai ‵pau ko te koʹpher e fakasino atu ki te ‵togi ne ‵togi atu ke mafai o fai te ufiga tenei, io me ko te fakasaolotoga. (Esoto 21:30) E penā foki loa, a te pati Eleni ko te lyʹtron, telā e masani o ‵fuli sāle ki te “togiola,” e mafai foki o ‵fuli ki “se ‵togi mō se fakasaolotoga.” (Mataio 20:28; The New Testament in Modern Speech, a R. F. Weymouth) Ne fakaaoga ne tino tusitala Eleni te tugapati tenā ke fakasino atu ki se ‵togi ne tuku atu ke fakasaoloto ei se pagota o te taua io me ke fakasaoloto ei se pologa.