Iosua

6 I te taimi nei a ‵pui o Ieliko ko oti eiloa ne ‵pono ke ‵mau faka‵lei ona ko tino Isalaelu; e seai se tino e mafai o fano ki tua io me fano ki loto i ei.+

2 Tenā ne fai atu ei a Ieova ki a Iosua: “Kiloke, ko oti ne tuku atu ne au ki a koe a Ieliko mo tena tupu mo ana toa ‵mafi.+ 3 Koutou tāgata tau katoa e ‵tau o māti fakatamilo i te fakai fakatasi taimi. Tenā te mea e ‵tau o fai ne koutou i aso e ono. 4 Fai ke sau ne faitaulaga e tokofitu a pu* e fitu i mua o te Pusa. Kae i te fitu o aso, e ‵tau o māti fakatamilo ne koutou te fakai fakafitu taimi kae e ‵tau o faka‵tagi ne faitaulaga a pu.+ 5 Kafai ko faka‵tagi a pu​—i te taimi eiloa e lagona ei ne koutou te ‵tagi* o te pu​—a tāgata katoa e ‵tau o ka‵laga ki luga e pelā me ne tino i te taua. Tenā ko ‵pui eiloa o te fakai ko maofa ki lalo,+ kae ‵tau mo tāgata o olo atu ki loto i ei.”

6 Tenā ne fakamaopoopo fakatasi ei ne Iosua te tama tagata a Nuno a faitaulaga kae fai atu ki a latou: “Puke a te pusa o te feagaiga, kae tokofitu a faitaulaga e ‵tau o sau ne latou a pu e fitu i mua o te Pusa a Ieova.”+ 7 Ne fai atu a ia ki tāgata: “Olo o fakatamilo a te fakai, kae ko tāgata kolā e isi ne olotou meatau+ e ‵tau o olo atu i mua o te Pusa a Ieova.” 8 Kae pelā eiloa mo pati a Iosua ne fai atu ki tāgata, ne olo eiloa a faitaulaga e tokofitu kolā e sau ne latou a pu e fitu i mua o Ieova kae faka‵tagi olotou pu, kae ne fakamuli atu a te pusa o te feagaiga a Ieova i olotou tua. 9 Kae ne olo atu a te kautau mo olotou meatau i mua o faitaulaga kolā e faka‵tagi a pu, kae ko leoleo tafa ki tua ne olo atu mai tua o te Pusa kae ko pu e fakatagi‵tagi eiloa.

10 Ne fakatonu atu Iosua ki tāgata: “Ke mo a ma paka‵laga io me lagona atu otou leo. E seai eiloa se pati e ‵tau o tō mai loto i otou gutu ke oko ki te aso e fai atu ei au, ‘Paka‵laga!’ Ko koutou eiloa ko paka‵laga.” 11 Ne fai ne ia ke avatu te Pusa a Ieova o fakatamilo te fakai, o fakatamilo fakatasi i te fakai, oti aka ‵foki mai ei latou ki te lotou koga ‵nofo kae ‵moe i ei i te po tenā.

12 I te suā taeao ne alausu a Iosua, kae ne sau aka ne faitaulaga a te Pusa+ a Ieova, 13 kae ko faitaulaga e tokofitu kolā e sau ne latou a pu e fitu ne olo atu i mua o te Pusa a Ieova, kae fakatagi‵tagi eiloa ne latou a pu. Ne sa‵sale atu i olotou mua a te kautau mo olotou meatau, kae ko leoleo tafa ki tua ne olo atu mai tua o te Pusa a Ieova kae ko pu e fakatagi‵tagi eiloa. 14 Ne māti fakatamilo ne latou te fakai fakatasi taimi i te lua o aso, oti aka ‵foki ei latou ki te lotou koga ‵nofo. Tenā te mea ne fai ne latou i aso e ono.+

15 I te fitu o aso ne alausu ei a latou katoa i te taimi ko mafā mai ei te ata malama, kae ne māti fakatamilo ne latou te fakai e pelā mo te masani fakafitu taimi. Ko te aso fua tenā ne māti fakatamilo ei ne latou te fakai fakafitu taimi.+ 16 Kae i te fitu o taimi ne fakatagi ne faitaulaga a pu, kae ne fai atu a Iosua ki tāgata: “Paka‵laga,+ me ko oti ne tuku mai ne Ieova ki a koutou a te fakai tenei! 17 A te fakai mo mea katoa i loto i ei e ‵tau o fakaseai katoa;+ i a Ieova katoa a mea konā. Ko Lahapa+ fua te fafine talitāgata e ‵tau o fakasao, ko ia mo tino katoa i loto i tena fale, me ne faka‵muni ne ia a avefekau kolā ne uga atu ne tatou.+ 18 Kae faka‵mao koutou kea‵tea mai mea kolā e ‵tau o fakaseai,+ ko te mea ke se ma‵nako koutou ki mea kolā e ‵tau o fakaseai kae puke ne koutou,+ kae fai ei a te koga ‵nofo o tino Isalaelu mo fai se koga e ‵tau o fakaseai mai te aumaiga o te fakalavelave ki luga i ei.+ 19 Kae ko siliva mo aulo mo mea katoa kolā ne faite ki te kopa mo te fiti e ‵malu ki a Ieova.+ E ‵tau o avatu ki te koga e ‵teu ei a koloa a Ieova.”+

20 Tenā ne paka‵laga ei a tāgata i te taimi ne faka‵tagi ei a pu.+ I te taimi eiloa ne lagona ei ne latou a te ‵tagi o pu kae paka‵laga atu e pelā me ne tino i te taua, ko ‵pui eiloa o te fakai ko maofa ki lalo.+ Oti aka, olo atu ei a tāgata ki loto i te fakai, kae puke ne latou. 21 Ne fakaseai ne latou a mea katoa i loto i te fakai ki te pelu, ko tāgata mo fāfine, talavou mo tino ma‵tua, pulumakau tāgata, mamoe mo asini.+

22 Muna a Iosua ki tāgata e tokolua kolā ne olo o iloilo a te fakai: “Olo ki te fale o te fafine talitāgata kae aumai te fafine tenā mo tino katoa konā e ‵nofo tasi mo ia, e pelā eiloa mo tau lua tautoga ne fai ki a ia.”+ 23 Ne olo atu a sipai ki loto i te fale kae aumai ki tua a Lahapa, fakatasi mo tena tamana, tena mātua, ana tuagane, mo tino katoa kolā ne ‵nofo tasi mo ia; ao, ne aumai ne lāua ki tua tena kāiga kātoa,+ kae avatu ne lāua ki se koga ‵lei i tafa o te koga e ‵nofo ei a tino Isalaelu.

24 Tenā ne ‵sunu ei ne latou te fakai mo mea katoa i loto i ei ki te afi. Kae ne avatu ne latou a siliva, aulo mo mea kolā ne faite ki kopa mo fiti ki te koga e ‵teu ei a koloa i te fale o Ieova.+ 25 Ko Lahapa fua te fafine talitāgata mo kāiga o tena tamana mo tino katoa kolā ne ‵nofo tasi mo ia ne faka‵sao ne Iosua;+ kae ne nofo eiloa tou fafine i Isalaelu ke oko mai ki te aso nei,+ me ne faka‵muni ne ia a avefekau kolā ne uga atu ne Iosua ke iloilo a Ieliko.+

26 I te taimi tenā, ne fai atu ne Iosua te tautoga tenei:* “Ke malaia a te tagata telā e taumafai o toe faite ne ia a te fakai tenei ko Ieliko i mua o Ieova. Ka mate a tena toekimua māfai e faite ne ia tena fakavae, kae ka mate a tena toekimuli māfai e faite ne ia ana mataloa.”+

27 Ne fakatasi atu eiloa a Ieova ki a Iosua,+ kae ne salalau atu tena takutakua ki te lalolagi kātoa.+