Iosua

7 Kae ne seki fakamaoni a tino Isalaelu e uiga ki mea kolā ne ‵tau o fakaseai, me ne puke ne Akana+ te tama tagata a Kami, te tama tagata a Sapeti, te tama tagata a Tila mai te matakāiga o Iuta, a nisi mea kolā ne ‵tau o fakaseai.+ Ona ko te mea tenei ne kaitaua malosi ei a Ieova ki tino Isalaelu.+

2 Tenā ne uga ei ne Iosua a tāgata mai Ieliko ke olo atu ki Ai,+ telā e pili ki Petavene kae tu i te feitu ki saegala o Peteli,+ kae fai atu ki a latou: “Olo o iloilo a te fenua.” Tenā ne olo atu ei a tāgata konā ki luga o iloilo a Ai. 3 I te lotou ‵fokimaiga ki a Iosua ne fai atu latou ki a ia: “E se manakogina ke olo aka a tino katoa ki ei. E lava loa i tāgata e toko lua afe io me toko tolu afe ke fakatakavale ne latou a Ai. Sa fakafi‵ta a tino mai te uga atu o latou katoa me e se tokouke a tino konā.”

4 Tenā ne olo atu ei a tāgata e toko 3,000 ki ei, kae ne afuli latou ne tāgata Ai.+ 5 Ne tamate ne tāgata Ai a tāgata e toko 36, kae afuli ne latou mai tua o mataloa o te fakai ke oko atu ki Sepalima,* kae tamate ne latou i te lotou auala ki lalo mai te mauga. Tenā ne vāi‵vai ei a loto o tino e pelā me ne vai.

6 Tenā ne saesae ei ne Iosua ana gatu kae fakasiga ifo ki lalo i te laukele i mua o te Pusa a Ieova ke oko eiloa ki te afiafi, ko ia mo toeaina o Isalaelu, kae ne asu faeloa ne latou a ‵pefu ki luga i olotou ulu. 7 Muna a Iosua: “Oi aue, te Aliki Sili ko Ieova, kaia ne aumai ei ne koe a tino konei ke oko mai ki te suā feitu o te Iolitana o tuku atu fua matou ki lima o tino Amoli ke ‵ta fakapalele? E ‵lei atu moi ne lotoma‵lie matou o ‵nofo i te suā feitu* o te Iolitana! 8 Ieova, fakamolemole, ne a aku pati ka fai, a te kau Isalaelu ko oti ne afuli mai* ne ana fili? 9 Kafai e ‵logo a tino Kanana mo tino katoa i te fenua e uiga ki te mea tenei, ka nikoi ne latou a matou kae fakaseai atu i ei te motou igoa mai te lalolagi, kae ne a au mea ka fai ki tou igoa sili?”+

10 Ne tali atu a Ieova ki a Iosua: “Tu ki luga! Kaia e takato ei koe mo ou mata e ‵fuli ki lalo? 11 A Isalaelu ko oti ne agasala. Ko oti ne ofa ne latou taku feagaiga+ telā ne fakatonu atu au ke tausi ne latou. Ne puke ne latou a mea kolā ne ‵tau o fakaseai,+ ne kaisoa+ ne latou kae ‵funa fakatasi mo olotou kope.+ 12 Tela la, ka se mafai ne tino Isalaelu o ‵tu o fakafesagai olotou fili. Ka fulitua atu latou kae ‵tele kea‵tea mai i olotou fili, me ko fai latou e pelā me ne mea ko ‵tau o fakaseai. Ka se toe fakatasi atu au ki a koe seiloga ke fakaseai ne koe mai i a koutou a te mea telā ne ‵tau o fakaseai.+ 13 Tu ki luga kae fakatapu a tino!+ Fai atu ki a latou, ‘Ke fakatapu a koutou eiloa i te aso ma taeao, me konei a pati a Ieova te Atua o Isalaelu ne fai mai: “E isi ne mea konā i a koutou ne ‵tau o fakaseai, e Isalaelu. Ka se mafai ne koutou o ‵tu ki luga o fakafesagai atu ki otou fili seiloga ke ave kea‵tea mai i a koutou a te mea telā e ‵tau o fakaseai. 14 E ‵tau o ‵mai koutou ki oku mua i te tafataeao i matakāiga takitasi, kae ko te matakāiga telā e filifili ne Ieova+ ka o‵mai ki mua i olotou kaukāiga takitasi, kae ko te kaukāiga telā e filifili ne Ieova ka o‵mai ki mua i olotou kaufale takitasi, kae ko te kaufale telā e filifili ne Ieova ka o‵mai ki mua, ko tāgata taki tokotasi i ei. 15 Kae ko te tino telā e maua mai i ei a mea kolā e ‵tau o fakaseai ka ‵sunu ki te afi,+ ko ia mo ana mea katoa, me ko oti ne ofa ne ia te feagaiga+ a Ieova kae fai foki ne ia se mea fakamasiasi i Isalaelu.”’”

16 Tenā ne ala aka ei a Iosua i te tafataeao o te suā aso kae fai atu ki tino Isalaelu ke o‵mai ki mua i matakāiga takitasi kae ne filifili aka ei te matakāiga o Iuta. 17 Ne fai ne ia a te kaukāiga o Iuta ke o‵mai ki mua kae ne filifili aka ei a te kaukāiga o Tila,+ kae fai atu ki te kaukāiga o Tila ke o‵mai ki mua, ko tāgata taki tokotasi i ei, kae ne filifili aka ei a Sapeti. 18 Fakamuli loa, ne aumai ne ia te kaufale o Sapeti ki mua, ko tāgata taki tokotasi i ei, kae ne filifili aka ei a Akana te tama tagata a Kami, te tama tagata a Sapeti, te tama tagata a Tila mai te matakāiga o Iuta.+ 19 Tenā ne fai atu ei a Iosua ki a Akana: “Taku tama, fakamolemole fakaasi atu te āva ki a Ieova te Atua o Isalaelu kae fakaasi atu te mea tonu ki a ia. Fakamolemole fakailoa mai a te mea ne fai ne koe. Sa ‵funa ne koe mai i a au.”

20 Ne tali atu a Akana ki a Iosua: “E tonu, ko au te tino ne agasala i mua o Ieova te Atua o Isalaelu, kae tenei te mea ne fai ne au. 21 I te taimi ne matea ei ne au mai i mea ne maua mai i te taua se gatu gali o se tino maluga mai Sina+ mo se 200 sekela* siliva mo se aulo telā e 50 sekela tena ‵mafa, ne manako malosi au ki ei, puke ei ne au. Konā e tanu i lalo i te laukele i loto i toku faleie, ko tupe e tafa ki lalo.”

22 I konā eiloa uga ei ne Iosua a avefekau, ne ‵tele latou ki te faleie, kae maua atu ne latou a te gatu e ‵funa i loto i tena faleie mo tupe mai lalo i ei. 23 Tenā ne puke mai ei ne latou a mea konā mai te faleie kae avatu ki a Iosua mo tino Isalaelu katoa kae tuku atu i mua o Ieova. 24 Tenā ne puke ei ne Iosua mo tino Isalaelu katoa a Akana+ te tama tagata a Tila, te siliva, te gatu gali, mo te aulo,+ fakatasi mo ana tama tāgata, ana tama fāfine, ana pulumakau, ana asini, ana lafu mamoe, tena faleie mo ana mea katoa, kae aumai ne latou a mea konā ki luga i te Vanu o Akoa.+ 25 Ne fai atu a Iosua: “Kaia ne aumai ei ne koe a te malaia* ki luga i a tatou?+ Ka aumai ne Ieova a te malaia ki luga i a koe i te aso nei.” I konā eiloa peipei+ ei ne tino Isalaelu katoa a ia, oti aka ‵sunu ei ne latou ki te afi.+ Ne peipei ne latou a tino katoa konā ki fatu. 26 Kae ne fakatu aka ne latou se faka‵tuga fatu lasi ‵ki mai luga i a ia, telā koi tu mai eiloa ki te aso nei. I konā ne ‵noga ifo ei te kaitaua o Ieova.+ Tenā te pogai ne fakaigoa ei a te koga tenā ki te Vanu o Akoa* ke oko mai ki te aso nei.