Te Lua Samuelu
7 I te taimi ko nofo ei te tupu i tena fale*+ kae ko oti ne tuku atu ne Ieova se malōlōga ki a ia mai i ana fili katoa i ana tafa, 2 ne fai atu te tupu ki a Natano+ te pelofeta: “Au tenei e nofo i te fale e faite ki alasi+ kae ko te Pusa a te Atua tonu e tuku i loto i te faleie.”+ 3 Ne tali atu a Natano ki te tupu: “Fano o fai so se mea e loto koe ki ei, me i a Ieova e fakatasi atu eiloa ki a koe.”+
4 I te po eiloa tenā, ne oko mai te fekau a Ieova ki a Natano, ana muna: 5 “Fano o fai ki taku tavini ko Tavita, ‘Konei a pati a Ieova ne fai mai: “E mata, e ‵tau o faite ne koe se fale mo oku nofo?+ 6 I a au ne seki nofo eiloa i loto i se fale mai te aso ne aumai ei ne au a tino Isalaelu kea‵tea mai Aikupito ke oko mai ki te aso nei,+ kae ko au ne faimalaga* faeloa i loto i se faleie mo se faleie tapu.+ 7 I taimi katoa ne olo ei au mo tino Isalaelu katoa, e a, kai fai atu aka loa ne au se pati ki se takitaki o se matakāiga telā ne ‵tofi aka ne au ke tausi oku tino Isalaelu penei, ‘Kaia ne seki faite ei ne koutou se fale mō oku ki lakau ko alasi?’”’ 8 Nei la, fai atu a pati konei ki taku tavini ko Tavita, ‘Konei a pati a Ieova o kautau ne fai mai: “Ne puke ne au koe mai laukele moukuā, mai te tautali atu i tua o te lafu mamoe,+ ke fai koe mo takitaki o oku tino Isalaelu.+ 9 Kae ka fakatasi atu faeloa au ki a koe i so se koga e fano koe ki ei,+ kae ka fakaseai ne au ou fili katoa i ou mua;+ kae ka fai ne au ke takutakua tou igoa+ e pelā mo igoa o tāgata takutakua i te lalolagi. 10 Ka fili ne au se koga mō oku tino Isalaelu ke ‵nofo i ei, ka ‵nofo latou i ei kae se toe ai se mea e fakalavelave atu ki a latou; kae ka se toe fakasaua foki latou ne tino amio ma‵sei e pelā mo mea ne fai sāle ne latou i aso mua,+ 11 mai te aso ne faka‵sopo aka ei ne au a famasino+ ke pule i oku tino Isalaelu. Kae ka fai ne au ke malōlō koe mai ou fili katoa.+
“‘“Ne fai atu foki a Ieova ki a koe me ka faite ne Ieova se fale* mō koe.+ 12 Kafai ko oti atu ou aso+ kae ko takato ifo koe o malōlō fakatasi mo ou tupuga, kae ka fakatu aka ne au tau tama* i ou tua, ko tau tama tagata eiloa, kae ka faka‵mautakitaki ne au tena malo.+ 13 Ko ia tenā ka faite ne ia se fale mō toku igoa,+ kae ka faka‵mautakitaki ne au te nofogaaliki o tena malo ki te se-gata-mai.+ 14 Ka fai au mo fai tena tamana, kae ka fai a ia mo fai taku tama.+ Kafai e fai ne ia se mea ‵se, ka polopoloki ne au a ia ki te tokotoko a tāgata mo te ‵kini a tama a tāgata.*+ 15 A toku alofa fakamaoni ka se ave kea‵tea mai i a ia e pelā mo te pukemaiga ne au mai i a Saulo,+ telā ne tapale ne au kea‵tea mai i ou mua. 16 A tou kāiga mo tou malo ka puipui faka‵lei ki te se-gata-mai i ou mua; a tou nofogaaliki ka faka‵mautakitaki ki te se-gata-mai.”’”+
17 Ne fai atu ne Natano ki a Tavita a pati katoa konei mo te fakaasiga kātoa tenei.+
18 I konā loa, ne ulu mai te Tupu ko Tavita, sagasaga ki lalo i mua o Ieova kae fai atu: “Ko oi au, e te Aliki Sili ko Ieova? Kae ko oi foki toku kāiga ke fai ne koe a mea katoa konei ki a au?+ 19 E pelā eiloa me e se lava a mea konei, e te Aliki Sili ko Ieova, ne faipati mai foki koe e uiga ki te kāiga o tau tavini ke oko ki aso mai mua; kae ko te mea tenei se tulafono mō tino katoa, e te Aliki Sili ko Ieova. 20 Ne a foki la a nisi pati ka fai atu ne tau tavini ko Tavita ki a koe me e iloa faka‵lei ne koe au,+ e te Aliki Sili ko Ieova? 21 Ona ko tau pati mo te mea e loto koe ki ei ne fai ei ne koe a mea katoa konei kae fakaasi mai foki ne koe ki tau tavini.+ 22 Tenā te pogai e maluga ei koe,+ e te Aliki Sili ko Ieova. E seai se tino e ‵pau mo koe,+ kae e seai foki se Atua i ou tafa;+ a mea katoa ko oti ne lagona ne matou ki omotou taliga e fakamaoni mai ei a te ‵tonu o te mea tenei. 23 Se a te fenua i te lalolagi nei e ‵pau mo ou tino Isalaelu?+ Ne fanatu te Atua kae faka‵sao ne ia latou e pelā me ne ana tino,+ kae fai ke takutakua tena igoa+ mai te faiga o mea sili kae fakaofoofogia mō latou.+ Ne afuli kea‵tea ne koe a nisi atufenua mo olotou atua ona ko ou tino, kolā ne faka‵sao ne koe mō koe mai Aikupito. 24 Ne faka‵mautakitaki ne koe ou tino Isalaelu e pelā me ko ou tino tonu i taimi katoa;+ kae ko koe e Ieova ne fai mo fai te lotou Atua.+
25 “Nei la, e Ieova te Atua, ke fakataunu eiloa ne koe te tautoga ne fai ne koe e uiga ki tau tavini mo tena kāiga i taimi katoa, kae ke fai eiloa ne koe a te mea ko oti ne tauto koe ki ei.+ 26 Ke fakamaluga aka eiloa tou igoa ki te se-gata-mai,+ ko te mea ke fai aka a tino, ‘A Ieova o kautau ko te Atua o Isalaelu,’ kae ke faka‵mautakitaki eiloa ne koe te kāiga o tau tavini ko Tavita i ou mua.+ 27 Me ko oti ne fakaasi mai ne koe e Ieova o kautau, te Atua o Isalaelu, se fakaasiga ki tau tavini i au pati, ‘Ka faite ne au se fale* mō koe.’+ Tenā te pogai e loto toa ei tau tavini o fai atu a te ‵talo tenei ki a koe. 28 Nei la, e te Aliki Sili ko Ieova, a koe ko te Atua tonu, kae ko au pati e ‵tonu,+ kae ko oti ne folafola ne koe a mea ‵lei konei ki tau tavini. 29 Tela la, ke fiafia eiloa koe o fakamanuia te kāiga o tau tavini, kae ke tumau faeloa ki te se-gata-mai i ou mua;+ me ko oti ne tauto mai koe e te Aliki Sili ko Ieova, kae ona ko tau fakamanuiaga ka manuia faeloa te kāiga o tau tavini ki te se-gata-mai.”+